བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ལོའི་གནས་མཆོག་རྡོ་རྗེ་གདན་ཁུལ་གྱི་ཆོས་འབྲེལ་སོགས་ཀྱི་མཛད་འཆར་ཁག་ལེགས་པར་གྲུབ་ནས་དེ་རིང་སྔ་དྲོ་ཕྱིར་བཞུགས་སྒར་དྷ་རྨ་ས་ལར་ཆིབས་ཞལ་བསྒྱུར་གནང་སོང་།
དེ་རིང་ཕྱི་ལོ་ ༢༠༡༩ ཟླ་ ༡ ཚེས་ ༢ ཉིན་སྔ་དྲོ་རྡོ་རྗེ་གདན་གྱི་༸རྒྱལ་བའི་བཞུགས་གནས་དགའ་ལྡན་འཕེལ་རྒྱས་གླིང་གི་གཟིམ་ཆུང་ནས་རྡོ་རྗེ་གདན་གྱི་བྱང་ཆུབ་ཆེན་པོའི་མཆོད་རྟེན་ཆེན་མོའི་ནང་ཞབས་ཐང་ལ་ཆིབས་བསྒྱུར་གྱིས་གནས་གཟིགས་མཛད་ཡོད་པ་དང་། སྐབས་དེར་མགོན་པོ་༸གང་ཉིད་མཆོག་ནས་བྱང་ཆུབ་མཆོད་རྟེན་གྱི་རྟེན་གཙོ་སྟོན་པ་ཐུབ་པའི་་དབང་པོའི་སྐུ་བརྙན་ཆོས་མཇལ་དང་ཐུགས་སྨོན་སོགས་གཞི་རྒྱ་ཆེན་པོ་མཛད་ཡོད་པ་རེད། 
དེ་རྗེས་སྔ་དྲོ་ཚོུད་ ༨ ཙམ་ལ་གནས་གཟིགས་གྲུབ་མཚམས་གནས་མཆོག་རྡོ་རྗེ་གདན་ནས་གྷ་ཡ་གནམ་ཐང་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་མཛད་ཡོད་པ་རེད།
གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་སྔ་ལོའི་ཕྱི་ཟླ་ ༡༢ ཚེས་ ༡༦ ཉིན་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་ནས་དེ་རིང་བར་ཉིན་གྲངས་ ༢༠ རིང་བཞུགས་ཞག་མཛད་པའི་ཁྲོད་ཀིརྟི་བྱེས་པ་གྲྭ་ཚང་གིས་གོ་སྒྲིག་ཞུས་པའི་དྲང་ངེས་ལེགས་བཤད་སྙིང་པོའི་མཁས་པའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་རེད།
གནས་མཆོག་རྡོ་རྗེ་གདན་དུ་རྒྱལ་ཁབ་འདྲ་མིན་ཁག་ ༧༠ ལྷག་ནས་ཕེབས་པའི་དད་ལྡན་མི་གྲངས་བཞི་ཁྲི་ལྷག་ལ་ལག་ལེན་སོ་བདུན་མ་དང་། ཚད་མ་རྣམ་འགྲེལ། འཇིགས་བྱེད་དཔའ་གཅིག་བཅས་ཀྱི་བཀའ་དབང་བཀྲིན་བསྩལ་བ། ལྷག་པར་དུ་མགོན་པོ་༸གང་ཉིད་མཆོག་ནས་རྒྱལ་སྤྱིའི་ལེགས་སྦྱར་དང་པྭ་ལིའི་ཆོས་བརྒྱུད་ཀྱི་བགྲོ་གླེང་ཐོག་དབུ་བཞུགས་མཛད་པ་མ་ཟད་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་སོགས་བཀྲིན་བསྩལ་ཡོད་པ་རེད།
ཁ་ཉིན་༸གོང་ས་༸མཆོག་གིས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་དང་མཇལ་འཕྲད་གནང་བ་སོགས་ཀྱི་མཛད་འཕྲིན་རྒྱ་ཆེ་བསྐྱངས་ཡོད་པ་རེད། ཤེས་རྟོགས་བྱུང་བར་༸གོང་ས་༸སྐྱབས་མགོན་ཆེན་མཆོག་དེ་རིང་རྒྱ་གར་གྱི་རྒྱལ་ས་ལྡི་ལིར་སྐུ་ངལ་གསོ་བཞུགས་མཛད་རྒྱུ་དང་སང་ཉིན་ལྡི་ལི་ནས་བཞུགས་སྒར་དྷ་རྨ་ས་ལར་ཆིབས་བསྒྱུར་བསྐྱང་གི་ཡོད་པ་རེད།
