ཁ་སང་ཚེས་༢༣ ཉིན། བོད་མིའི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གིས་ཨ་རིའི་གཞུང་འཛིན་གསར་བའི་དམ་འབུལ་མཛད་སྒོ་དང་བསྟུན་ནས་སྲིད་འཛིན་གཞོན་པ། ལྕམ་སྐུ་ཀམ་ལ་ཧེ་རི་སུ་མཆོག་ལ་མཚམས་འཕྲིན་སྩལ་འདུགམགོན་པོ་གང་ཉིད་མཆོག་གིས། ལྕམ་སྐུ་མཆོག་གིས་ལོ་མང་གི་རིང་ལ་སྤྱི་ཚོགས་ནང་ཕྱག་ལས་རླབས་ཆེན་སྒྲུབ་མྱོང་ཡོད་པར་བརྟེན། སྲིད་འཛིན་གཞོན་པའི་ལས་ཐོག་ནས་ཨ་རིའི་མི་མང་གི་ཆེད་དུ་སྔར་བཞིན་རླབས་ཆེན་གྱི་ཞབས་འདེགས་ཞུ་ཐུབ་པར་ཡིད་ཆེས་ཡོད་ཅེས་བཀའ་སྩལ་འདུག
གཞན་ཡང་མགོན་པོ་མཆོག་གིས། ལྕམ་སྐུ་མཆོག་ནི་ཨ་རིའི་ལོ་རྒྱུས་ཀྱི་ནང་དུ་བུད་མེད་ཅིག་གིས་སྲིད་འཛིན་གཞོན་པའི་ལས་ཁུར་ཞུས་པ་དང་པོ་དེ་ཆགས་ཡོད་པར་གང་ཉིད་ཐུགས་མཉེས་པོ་བྱུང་ཡོད་པར་བཀའ་སྩལ་དང་འབྲེལ། ལྕམ་སྐུ་མཆོག་གིས་སྲིད་འཛིན་གཞོན་པའི་ལས་ཁུར་བཞེས་པ་དེ་ནི་ཨ་རི་ཁོ་ན་ཙམ་མིན་པར། ཨ་རིའི་དབུ་ཁྲིད་ལ་མིག་དཔེ་ལྟ་བཞིན་པའི་རྒྱལ་ཁབ་མང་པོ་ཞིག་ལ་བློ་སྤོབས་སྐྱེད་གཞི་ཞིག་ཆགས་ཡོད་པར་བཀའ་གནང་འདུག
དེ་བཞིན་མགོན་པོ་གང་ཉིད་མཆོག་གིས་རྒྱལ་ཡུམ་ཆེན་མོ་བརྒྱུད། བུད་མེད་རྣམས་ནི་གཞན་གྱི་བདེ་སྡུག་ཚོར་རྣོ་བ་ཞིག་ཡིན་པའི་ངེས་བ་རྙེད་ཡོད་པ་མ་ཟད། དེང་རབས་ཚན་རིག་གིས་ཀྱང་བྱམས་བརྩེ་ལ་ཐུག་སྐབས་བུད་མེད་རྣམས་གཞན་དོན་ཚོར་རྣོ་བ་ཞིག་ཡིན་པའི་བདེན་དབང་རྙེད་ཡོད་པ་ལྟར། དེང་དུས་ཀྱི་སྤྱི་ཚོགས་ནང་དུ་བུད་མེད་རྣམས་ཀྱི་དབུ་ཁྲིད་ཀྱི་རིན་ཐང་དང་གལ་གནད་ལ་ངོས་འཛིན་ཐོབ་བཞིན་པ་ནི་དགའ་འོས་བའི་གནད་དོན་ཞིག་ཡིན་པ་དང་། གང་ཉིད་མཆོག་གི་ངོས་ནས་འཛམ་གླིང་ནང་གི་དབུ་ཁྲིད་མང་བ་བུད་མེད་བྱུང་ཡོད་ཚེ། འཛམ་གླིང་འདིར་བསམ་ཤེས་ཆེ་ཞིང་ཞི་བདེ་ལྡན་པ་ཞིག་ཏུ་བསྒྱུར་ཡོད་པའི་ཐུགས་ཚོར་བྱུང་བཞིན་ཡོད་པ་བཀའ་གནང་འདུག
ལྷག་པར་དུ་མགོན་པོ་མཆོག་སྐུ་ན་གཞོན་དུས་ནས། ཨ་རི་དེ་བཞིན་འཛམ་གླིང་ས་ཕྱོགས་གང་སར་རང་དབང་དང་མང་གཙོ། དེ་བཞིན་ཆོས་ལུགས་རང་དབང་དང་ཁྲིམས་ཀྱི་དབང་བསྒྱུར་འདོད་མཁན་རྣམས་ཀྱི་རེ་བ་བཅིངས་ས་ལྟ་བུ་ཞིག་ཡིན་པར་བསྔགས་བརྗོད་གནང་མཁན་ཞིག་ཡིན་པར་བཀའ་སྩལ་བ་དང་སྦྲགས། ཨ་རིའི་སྲིད་འཛིན་དང་སྲིད་འཛིན་གཞོན་པ་གཉིས་ཀྱིས་མི་མང་གི་རེ་བ་དང་མངོན་འདོད་བསྒྲུབ་རྒྱུའི་འགན་བཞེས་པ་ལྟར་བྱ་བཞག་མཐའ་དག་ལམ་ལྷོངས་ཡོང་བར་ཐུགས་སྨོན་མཛད་རྒྱུ་ཡིན་སྐོར་གསུངས་འདུག
