ཉེ་ཆར་ཚེས་ ༡༦ ཉིན་ཨིན་ཡུལ་བོད་ཀྱི་སྐུ་ཚབ་དོན་གཅོད་ཁང་བརྒྱུད་བཞུགས་སྒར་དུ་ Scottish Cultural Delegation འམ་ Scottish རིག་གཞུང་གི་སྐུ་ཚབ་རུ་ཁག་ཞིག་དྷ་སར་ཉིན་ལྔའི་རིང་བོད་ཀྱི་གནད་དོན་དང་། རིག་གཞུང་རྒྱུས་མངའ་ཡོང་ཐབས་སུ་ཕེབས་ཡོད་པ་དང་བསྟུན། དེ་རིང་ཟླ་ ༡༠ ཚེས་ ༡༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་ཞུས་འདུག
མཇལ་མོལ་གྲུབ་མཚམས་སུ་གསར་འགོད་པར་རུ་ཁག་གི་སྣེ་ཁྲིད་པ་ལྕམ་ Hilary ལགས་ཀྱིས་ང་ཚོ་ Scotland ནས་ཡོང་བ་ཡིན། Scotland ནི་དེ་སྔ་བོད་ལྟ་བུ་ཁྱིམ་མཚེས་རྒྱལ་ཁབ་ཆེ་བས་བཙན་འཛུལ་བྱས་པའི་འོག་རང་གི་སྐད་ཡིག་དང་རིག་གཞུང། རྒྱལ་ཁབ་ཀྱི་ཆས་གོས་སོགས་སྤྱོད་རྒྱུའི་ཐོབ་ཐང་འཕྲོག་མྱོང་ཡོད་པ་དང་། མི་མང་ཆེ་བ་བཙན་དབང་འོག་ནས་ས་གནས་གཞན་དུ་གནས་སྤོ་བྱེད་དགོས་བྱུང་ཡོད་སྐོར་ངོ་སྤྲོད་གནང་སོང་།
ད་ལྟའི་ཆར་ Scotland འདི་ཕྱེད་རང་སྐྱོང་གི་གནས་བབ་ཐོག་ཡོད་པ་རེད། ད་ལྟ་༸གོང་ས་༸སྐྱབས་ཆེན་པོ་མཆོག་གི་ལྷན་དུ་མཇལ་མོལ་ཞུས་སྐབས་༸གོང་ས་མཆོག་གིས་བོད་ཀྱི་ཆེད་དུ་རང་སྐྱོང་གི་གནས་བབ་རྩོད་བཞིན་ཡོད་པར་བཀའ་བསྩལ་སོང་།
ང་ཚོའི་ངོས་ནས་བོད་དོན་དང་༸གོང་ས་མཆོག་གི་དྲུང་ནས་ཚུར་བསླབ་བྱ་བླངས་རྒྱུ་མང་པོ་འདུག་པ་དང་ཕར་གནད་དོན་མང་དག་ཞིག་གི་སྐོར་ཞུ་རྒྱུ་ཡོད་པའི་མྱོང་ཚོར་བྱུང་། ལྷག་དོན་ང་ཚོས་འཛམ་གླིང་འདིའི་ཐོག་སྒྱུ་རྩལ་འདྲ་མིན་བརྒྱུད་འཇམ་པོའི་སྟོབས་ཤུགས་ཀྱི་ཐོག་ནས་མིའི་སེམས་ཁམས་བསྒྱུར་བཅོས་གཏང་རྒྱུའི་ཤེས་བྱ་བརྗེ་ལེན་ཞུ་རྒྱུ་འདུག་ཅེས་སོགས་གསུངས་ཡོད།
༸གོང་ས་མཆོག་གིས་བོད་ཀྱི་གནད་དོན་དང་འབྲེལ་བོད་དང་ནང་ཆོས་ཐད་འཁྲུག་རྩོད་ཀྱི་ལམ་ནས་མ་ཡིན་པར་མིའི་བསམ་བློ་འགྱུར་བ་གཏང་ཐབས་ཀྱི་ཐོག་ནས་གནང་གི་ཡོད་སྐོར་བཀའ་བསྩལ་བ་དེ་ Scotland ནང་དེ་སྔ་བྱུང་བ་དང་གཅིག་མཚུངས་ཡིན་པ་དང། ང་ཚོའི་ངོས་ནས་ཀྱང་བོད་ཀྱི་ཆེད་དུ་དེ་ལྟར་ཡོང་ཐུབ་པའི་རེ་བ་ཞུ་བཞིན་ཡོད། ༸གོང་ས་མཆོག་གིས་རྒྱ་ནག་གི་འོག་ལ་བསྡད་ནས་བོད་ལ་རང་སྐྱོང་གི་གནས་བབ་རྩོད་ཀྱི་ཡོད་པ་དེ་ང་ཚོར་སེམས་འགུལ་ཆེན་པོ་ཐེབས་སོང་། དེས་ན་ང་ཚོའི་ངོས་ནས་བོད་མིར་རོགས་རམ་གང་ཐུབ་ཞུ་རྒྱུའི་ཐབས་ཤེས་ཞུ་ངེས་ཡིན་སོགས་གསུངས་སོང་།
དེ་བཞིན་ང་ཚོའི་ Scotland ནང་རོལ་དབྱངས་སོགས་སྒྱུ་རྩལ་ལ་འགྱུར་བ་ཆེན་པོ་ཕྱིན་ཡོད་པ་ལྟར་མ་འོངས་པར་དེང་དུས་ཀྱི་ཤུགས་རྐྱེན་འོག་བོད་པའི་རིག་གཞུང་ལ་འགྱུར་བ་ཇི་ཐེབས་ཐད་ལ་ཤེས་འདོད་ཆེན་པོ་བྱུང་ཞེས་གསུངས་ཡོད།
ཕྱི་ལུགས་སྨན་གྱི་ཐོག་གཙུག་ལག་སློབ་དཔོན་སྐུ་ཞབས་ Michael Lean ལགས་ཀྱིས་ང་ཕྱི་ལུགས་སྨན་གྱི་སློབ་དཔོན་ཞིག Scotland ནང་དུའང་འཕྲོད་བསྟེན་དང་ལྷག་པར་དུ་རང་གི་ནུས་སྟོབས་ལ་གདེང་ཚོད་མེད་པ་དང་། རང་ཉིད་ཀྱི་ངོ་བོ་རྙེད་མ་ཐུབ་པ། རང་གི་མི་ཚེའི་བདག་དབང་རྙེད་མ་ཐུབ་མཁན་རྣམས་ཀྱི་འཕྲོད་བསྟེན་གནས་སྟངས་ཐོག་ལ་སེམས་འཚབ་ཆེན་པོ་ཡོད། བཙན་འབྱོལ་བོད་མི་རྣམས་ནས་ཕྱིའི་ལུང་པའི་ནང་དུ་རང་ཡུལ་གྱི་རིག་གཞུང་དག་གལ་ཆེར་ངོས་འཛིན་གནང་བ་ལྟར་ང་ཚོས་ཀྱང་དེ་ལྟར་ངོས་འཛིན་ཞུ་བཞིན་ཡོད་ཅེས་གསུངས་སོང་།
ཨིན་ཡུལ་གྱི་ Edinbrugh གཙུག་ལག་སློབ་གྲྭ་ཆེན་མོའི་སློབ་དཔོན་སྐུ་ཞབས་ David ལགས་ཀྱིས་ང་ Scotland ཡི་རྒྱལ་ས་ Edinburgh བཙུག་ལག་སློབ་གྲྭ་ཆེན་མོའི་དགེ་རྒན་ཡིན། ང་ཚོའི་སློབ་གཉེར་ཁང་དུ་ལྟ་གྲུབ་དང་རྩོམ་རིག་སོགས་སློབ་ཁྲིད་བྱེད་ཀྱི་ཡོད་རེད། ད་རེས་༸གོང་ས་མཆོག་དང་མཇལ་འཕྲད་ཞུ་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང། ང་ཚོའི་ངོས་ནས་མགོན་པོ་མཆོག་ལ་འཇམ་པོའི་སྟོབས་ཤུགས་སྤྱོད་ཕྱོགས་སྐོར་ལ་སྙན་གསེང་ཞུས་པ་ཡིན། བོད་ལྟ་བུ་ Scotland ལ་ཡང་ཨིན་ལནཌི་ལྟ་བུའི་མི་འབོར་ལྡབས་ ༡༠ ཡི་མང་བ་དང་སྟོབས་ཆེ་བའི་ཁྱིམ་མཚེས་རྒྱལ་ཁབ་ཞིག་ཡོད་པ་རེད།
འོན་ཀྱང་ང་ཚོས་རྩོམ་རིག་དང་ལྟ་གྲུབ་སོགས་འཇམ་པོའི་སྟོབས་ཤུགས་སྤྱོད་ནས་དེར་ཤུགས་རྐྱེན་ཆེན་པོ་སྤྲོད་ཀྱི་ཡོད་པ་ལྟར་དེ་རིང་༸གོང་ས་མཆོག་གིས་འཇམ་པོའི་སྟོབས་ཤུགས་དེ་བོད་མིའི་སྲིད་བྱུས་ཤིག་ཡིན་སྐོར་བཀའ་ཕེབས་སྟབས་རང་ཉིད་ཀྱི་བློ་ལ་འཇུག་པོ་བྱུང།སྔ་དྲོ་མཇལ་མོལ་སྐབས་༸གོང་ས་༸སྐྱབས་མགོན་ཆེན་པ་མཆོག་གིས་སྐུ་ཚབ་ཚོགས་ཆུང་ནས་ཆེད་མངགས་བོད་མིར་གདུང་སེམས་མཉམ་བསྐྱེད་གནང་བར་ཕེབས་པ་ལ་ཐུགས་རྗེ་ཆེ་ཞེས་བཀའ་གནང་བ་དང་། ཁོང་རྣམས་ལ་མུ་མཐུད་བོད་དོན་ལ་རྒྱབ་སྐྱོར་གནང་དགོས་པའི་སྐུལ་མ་མཛད་འདུག
མཇལ་མོལ་སྐབས་ Scottish རུ་ཁག་གི་ཁོངས་ནས་སྒྱུ་རྩལ་བ་སྐུ་ཞབས་ Lachlan ལགས་ཀྱིས་༸གོང་ས་མཆོག་ལ་རང་གི་རི་མོའི་སྒྱུ་རྩལ་སྤྱན་འབུལ་ཞུས་འདུག་པ་དང་།སྐུ་ཞབས་ Lachlan ལགས་ཀྱིས་ད་རེས་༸གོང་ས་མཆོག་གི་༸སྐུ་བརྙན་བྲིས་རྒྱུའི་གོ་སྐབས་བྱུང་བར་སྐལ་པ་བཟང་པོ་ཞིག་ཏུ་ངོས་འཛིན་གནང་གི་ཡོད་པ་དང། ༸སྐུ་བརྙན་དེ་ཕྱིར་རང་ཡུལ་དུ་བསྣམས་ནས་དྲན་རྟེན་དུ་ཉར་རྒྱུ་ཡིན་ཞེས་གསུངས་ཡོད།
ད་རེས་ Scotland སྐུ་ཚབ་ཚོགས་ཆུང་དེ་བཞུགས་སྒར་དུ་ཕེབས་དོན་གཙོ་བོ་ནི་བོད་མི་དང་ལྷན་དུ་རིག་གཞུང་བརྗེ་ལེན་གནང་རྒྱུར་དམིགས་པ་ཞིག་ཡིན་པ་དང་། ཁོང་རྣམས་ཚེས་ ༡༦ ཉིན་བཞུགས་སྒར་དུ་འབྱོར་རྗེས་ཚེས་ ༡༧ ཉིན་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་གནང་བ་དང་འབྲེལ། སྤྱི་འཐུས་ཚོགས་གཞོན་ཨཱ་ཙཱ་རྱ་ཡེ་ཤེས་ཕུན་ཚོགས་མཆོག་དང་མཇལ་འཕྲད་གནང་ཡོད་པ་དང། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ལྷན་མཇལ་འཕྲད་གནང་ཡོད་པ་རེད། དྷ་ས་བོད་ཀྱི་དཔེ་མཛོད་ཁང་དང་དེ་བཞིན་དེ་རིང་དང་སང་ཉིན་བཅས་ལ་དྷ་སྟེང་བོད་ཁྱིམ་དང་སྨན་རྩིས་ཁང་། ནོར་བུ་གླིང་ཁ་བཅས་སུ་གཟིགས་སྐོར་ལ་ཕེབས་ཀྱི་འདུག
