༸གོང་ས་མཆོག་རྒྱ་གར་གྱི་ས་ཐོག་ཏུ་༸ཞབས་སོར་འཁོད་སྐབས་རྒྱ་གར་གྱི་སྐུ་སྲུང་ཕེབས་བསུར་བཅར་མཁན་སྐུ་ཞབས་ཙནྡྲ་དཱས་ལགས་འདས་གྲོངས།   

ཁ་སང་ཕྱི་ཚེས་ ༢༨ ཉིན་སྔ་དྲོ་ཆུ་ཚོད་ ༥༌༤༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ལོར་རྒྱ་གཞུང་གི་དྲག་པོའི་བཙན་འཛུལ་འོག་རྒྱ་གར་དུ་བཙན་བྱོལ་ལ་ཕེབས་སྐབས་རྒྱ་གར་གྱི་ས་ཐོག་ཏུ་ཐོག་མར་༸ཞབས་སོར་བདེ་བར་འཁོད་མཚམས་སུ་རྒྱ་གར་གཞུང་གི་སྐུ་སྲུང་ཕེབས་བསུར་བཅར་མཁན་དམག་ཟུར་སྐུ་ཞབས་ Naren Chandra Das ལགས་དགུང་ལོ་ ༨༢ ལ་སྟེང་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུགབོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གཞུང་གི་དྲག་པོའི་བཙན་འཛུལ་འོག་རྒྱ་གར་དུ་བཙན་བྱོལ་ལ་ཕེབས་པ་བཞིན་ཕྱི་ལོ་ ༡༩༥༩ ཟླ་ ༣ ཚེས་ ༣༡ ཉིན་རྒྱ་གར་དུ་བཙན་བྱོལ་ལ་ཕེབས་སྐབས་རྒྱ་གར་གྱི་ས་ཐོག་ཏུ་ཐོག་མར་༸ཞབས་སོར་བདེ་བར་འཁོད་མཚམས་སུ་རྒྱ་གར་གཞུང་གི་ངོས་ནས་༸སྐུ་ཕྱྭ་དང་འབྲེལ་ཏེ་༸སྐུའི་སྲུང་བྱ་དང་ཕེབས་བསུ་ཞུ་བར་ཆེད་བཅར་ཞུ་ཕྱིར་ཨ་སམ་རཡི་ཧྥེལ་ཞེས་པའི་དམག་དཔུང་རུ་ཁག་གི་དམག་མི་ཁག་ཅིག་ཆེད་བརྫངས་གནང་བའི་ཁོངས་སུ་ཡོད་པ་སྐུ་ཞབས་ Naren Chandra Das ཁོང་ནི་ 5 Assam Rifles གྱི་དམག་མི་མཐའ་མ་དེ་ཡིན་པ་རེད།སྐུ་ཞབས་ Naren Chandra Das ལགས་དམ་པ་ཁོང་སྐུ་ཚེ་མ་ཟིན་པའི་གནས་སྟངས་གྱུར་བར་བརྟེན་ཁོང་གི་ཤུལ་ལུས་ནང་མི་ཚོ་ཐུགས་ཕམ་ཆེན་པོ་གནང་གི་ཡོད་ཀྱང་ཕྱོགས་གཞན་ཞིག་ནས་འདས་པོ་ཁོང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩེ་ཆེན་པོས་དམིགས་བསལ་མཇལ་ཁ་སྩལ་མྱོང་ཡོད་པ་མ་ཚད་པར་ཁ་སང་ཁོང་འདས་གྲོངས་སུ་གྱུར་སྐབས་ཨ་སམ་རཡི་ཧྤེལ་གྱི་དམག་དཔུང་རུ་ཁག་གིས་ཀྱང་ཆེ་བསྟོད་ཚུལ་དུ་སྐུ་ཕུང་ལ་རྒྱ་གར་རྒྱལ་ཁབ་ཆེན་པོའི་རྒྱལ་དར་སྒྲོན་ནས་གུས་བཀུར་ཆེན་པོའི་ཐོག་ནས་སྐུ་ཕུང་ཞུགས་འབུལ་གནང་ཡོད་སྟབས་དགའ་སྤོབས་ཆེན་པོ་བྱུང་འདུགགཞི་རྩའི་སྐུ་ཞབས་ནཱ་རེན་ཙནྡྲ་དཱས་ལགས་དམ་པ་དེ་ཉིད་ཕྱི་ལོ་ ༢༠༡༧ ཕྱི་ཟླ་ ༤ ཚེས་ ༢ ཉིན་རྒྱ་གར་གྷུ་བཱཧཱ་ཊྀ་ Brahmaputra དུས་སྟོན་ཐོག་མི་ལོ་ ༥༨ རྗེས་སུ་༸གོང་ས་༸སྐྱབས་མགོན་ཆེན་པོ་མཆོག་དང་ཞལ་མཇལ་གྱི་སྐལ་བཟང་སྐབས་བྱུང་ཡོད་པ་མ་ཟད། དེ་རྗེས་ཕྱི་ལོ་ ༢༠༡༨ ཟླ་ ༣ ཚེས་ ༣༡ ཉིན་༸རྒྱལ་བའི་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་གི་ཆོས་རར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་སྐབས་སུ་ཁོང་ཆེད་མངགས་གདན་ཞུ་གནང་སྟེ་ཆེ་བསྟོད་ཀྱི་གཟེངས་རྟགས་འབུལ་ལམ་ཞུས་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩེ་ཆེན་པོས་མཇལ་ཁ་སྩལ་ཡོད།