ཕྱི་ཟླ་ ༤ ཚེས་ ༣༠ ཉིན་ཟླ་བ་ ༤ པར་བོད་ཀྱི་དབྱངས་ཡིག་བཞི་དང་ཚེས་ ༣༠ ལ་གསལ་བྱེད་སུམ་བཅུ་མཚོན་པར་བྱེད་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ཞེས་བོད་མདོ་དབུས་ཁམས་གསུམ་ཁྱོན་ཡོངས་ལ་ལོ་ལྟར་སྲུང་བརྩི་གཟབ་རྒྱས་ཞུ་བཞིན་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་བོད་ནང་རིས་མེད་དགོན་སྡེ་ཁག་དང་། སློབ་གྲྭ་ཁག་གི་ནང་སྐབས་གསུམ་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་གཟབ་རྒྱས་ཞུས་འདུག་པ་དང་འདི་བཞིན་བཙན་བྱོལ་དུ་བོད་མིའི་སློབ་གྲྭ་ཁག་ཏུ་དེ་ལྟར་སྲུང་བརྩི་གཟབ་རྒྱས་ཞུས་ཡོད་པ་རེད།
སྤྱི་ཚོགས་ཀྱི་བརྒྱུད་ལམ་ཁག་ཏུ་བོད་ཀྱི་རྒྱལ་ས་ལྷ་ས་དང་ལྷ་སའི་གཙུག་ལག་ཁང་གཙོས་མགོ་ལོག་དང་། ཡུལ་ཤུལ་སྐྱེ་དགུ་མདོ། རྨ་ཆེན་རྫོང་མི་རིགས་ཀྱི་སློབ་འབྲིང་། མཛོད་དགེ་སྒར་སར་ནང་བསྟན་རིག་གནས་འཛིན་གྲྭ དེ་བཞིན་རྔ་ཡུལ་ཀིརྟིའི་སྔོན་འགྲོའི་སློབ་གླིང་། འབའ་ཡུལ་སེང་ཁྲི་ཆོས་གྲྭ མདོ་སྨད་རྒན་གྱའི་བྲག་དཀར་དགོན་སོགས་ཀྱི་ནང་བོད་མི་རིགས་ཀྱི་ཡིག་གཟུགས་མི་ཉམས་བརྒྱུད་འཛིན་ཞུ་སླད་དབུ་ཆེན་དང་། ཚུགས་རིང་། ཚུགས་ཐུང་། ཚུགས་མ་ཁྱུག ཁྱུག་ཡིག དེ་བཞིན་འབྲུ་རྩ་སོགས་ཡིག་གཟུགས་སྣ་མང་བྲིས་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ལ་རྟེན་འབྲེལ་ཞུས་ནས་འགྲེམས་སྟོན་གནང་བའམ་ནང་ཕན་ཚུལ་འགྲན་བསྡུར་སོགས་ལས་འགུལ་རྣམ་པ་འདྲ་མིན་ཐོག་ནས་སྐབས་གསུམ་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་གཟབ་རྒྱས་ཞུས་ཡོད་པ་རེད།
དེ་བཞིན་བཙན་བྱོལ་གྱི་ནང་དུའང་སློབ་གྲྭ་ཁག་མང་དག་ཅིག་གི་ནང་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་ཞུས་འདུག་པ་དང་། ལྷག་པར་ཁ་སང་ཕྱི་ཚེས་ ༣༠ ཉིན་བོད་ཀྱི་དགུ་བཅུ་གསུམ་ལས་འགུལ་ཚོགས་པས་གོ་སྒྲིག་འོག་གོ་པཱལ་པུར་བོད་ཕྲུག་ཁྱིམ་སྡེའི་འཛིན་རིམ་དང་པོ་ནས་བཅུ་གཉིས་བར་གྱི་སློབ་ཕྲུག་རྣམས་ལ་ཡིག་གཟུགས་འགྲན་བསྡུར་གྱི་ལམ་ནས་དུས་ཆེན་སྲུང་བརྩི་ཞུས་འདུག 
བཞུགས་སྒར་དུ་སྐུ་བཅར་རྣམ་རྒྱལ་གྲྭ་ཚང་གི་སློབ་ཕྲུག་རྣམས་ནས་ཡིག་གཟུགས་འགྲན་བསྡུར་གྱི་བྱེད་སྒོ་སྤེལ་འདུག་པ་དང་། ཀ་སྤུངས་༸དཔལ་ས་སྐྱའི་ཆོས་གྲྭ་བརྩེ་ཆེན་འཕྲིན་ལས་དར་རྒྱས་གླིང་དུ་ཚོགས་པ་སྐྱིད་སྡུག་དང་གཏན་སློབ། དེ་བཞིན་འཇམ་མགོན་ཀོང་སྤྲུལ་སློབ་གྲྭའི་སློབ་མ་རྣམས་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་ཞུས་འདུག་པ་མ་ཟད། སྒང་ཏོག་བོད་ཀྱི་སྐད་ཡིག་གཅེས་སྐྱོངས་ཀྱིས་གོ་སྒྲིག་འོག་བོད་ཀྱི་མགྲོན་ཁང་དུ་སློབ་གྲྭ་ཁག་གི་སློབ་ཕྲུག་དང་དགེ་རྒན་རྣམ་པ་ཚང་འཛོམས་ཀྱིས་ཡིག་གཟུགས་འགྲན་བསྡུར་ཞིག་གོ་སྒྲིག་གནང་འདུག
རྩ་བའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ནི་ཕྱི་ལོ་ ༢༠༡༧ ལོའི་ཟླ་ ༤ ཚེས ༡༦ ཉིན་མཚོ་སྔོན་མི་རིགས་སློབ་ཆེན་དང་། རྒྱལ་ཡོངས་བོད་ཀྱི་ཡིག་གཟུགས་དུས་ཆེན་གྲ་སྒྲིག་ཚོགས་ཆུང་གཉིས་ཀྱིས་གོ་སྒྲིག་འོག་རྒྱལ་ཡོངས་བོད་ཀྱི་ཡིག་གཟུགས་བགྲོ་གླེང་ཚོགས་འདུ་སྐབས་དང་པོའི་ཐོག་མང་མོས་ཀྱིས་ཐག་གཅོད་ལྟར། ཕྱི་ཟླ་ ༤ ཚེས་ ༣༠ ཉིན་མོར་བོད་ཡིག་གི་དབྱངས་བཞི་དང་གསལ་བྱེད་སུམ་བཅུ་མཚོན་པར་བྱེད་པའི་དུས་ཆེན་ལ་གཏན་འབེབས་གནང་ཡོད།
