༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཞི་བདེའི་ལས་འཆར་འགན་ཁུར་བ་རྣམས་ལ་མཇལ་མོལ་དང་འབྲེལ་འགྲོ་བ་མི་གཅིག་གྱུར་གྱི་འདུ་ཤེས་འཛིན་པའི་ཐོག་ནས་ཞི་འགྲིག་ཕྱོགས་སུ་མདུན་བསྐྱོད་གནང་དགོས་པར་སྐུལ་ལྕག་གནང་འདུག
བཞུགས་སྒར་༸རྒྱལ་བའི་ཕོ་བྲང་དུ་ཁ་སང་དང་དེ་རིང་བཅས་ཉིན་གྲངས་གཉིས་རིང་ United States Institute of Peace ཞེས་པའི་ཞི་བདེའི་ལྟེ་གནས་ཁང་གིས་འཛམ་གླིང་ནང་ཆོས་ལུགས་དང་མི་རིགས་ཕན་ཚུན་དབར་རྩོད་རྙོག་ཤུགས་ཆེན་པོ་ཡོད་པའི་ས་ཁུལ་ཁག་ཏུ་ཞི་འགྲིག་ཡོང་སླད་ཕྱག་ལས་གནང་མཁན་གྱི་གཞོན་སྐྱེས་མགོ་ཁྲིད་ ༢༧ གདན་ཞུས་ཀྱིས་༸གོང་ས་མཆོག་དང་ལྷན་དུ་གླེང་མོལ་བརྒྱུད་འཛམ་གླིང་ནང་ཞི་བདེ་གོང་འཕེལ་ཡོང་ཆེད་ལམ་སྟོན་ཞུ་རྒྱུའི་ལས་འཆར་ཐེངས་གསུམ་པ་འཚོགས་བཞིན་པའི་ཁྲོད་དེ་རིང་བགྲོ་གླེང་གི་ཉིན་གཉིས་པར་མགོན་པོ་༸གང་ཉིད་མཆོག་གིས་ཐོག་མར་བོད་མི་དང་རྒྱ་གར་དབར་གྱི་ཐུན་མོང་མ་ཡིན་པའི་འབྲེལ་ལམ་བྱུང་སྟངས་དང་རྒྱ་གཞུང་གིས་བོད་བཙན་བཟུང་བྱས་ནས་ད་ཆ་ལོ་ངོ་ ༧༠ ལྷག་ཙམ་འགྲོ་མུས་རིང་བོད་མིའི་ཐོག་ཐབས་ལམ་འདྲ་མིན་བརྒྱུད་དྲག་གནོན་ཤུགས་ཆེ་བྱས་ཀྱང་བོད་མིའི་སྙིང་སྟོབས་དང་ལྷག་བསམ་ལ་འགྱུར་བ་གང་ཡང་བཏང་ཐུབ་མེད་སྟབས། ད་ཆ་རྒྱ་གཞུང་གིས་དངོས་ཡོད་གནས་ཚུལ་དང་མཐུན་པའི་མདུན་བསྐྱོད་བྱས་ཡོད་པར་བཀའ་བསྩལ་འདུག
དེ་བཞིན་མགོན་པོ་༸གང་ཉིད་མཆོག་གིས་ཆོས་དད་ཡོད་མེད་ལ་ལྟོས་མེད་འགྲོ་བ་མི་རྣམས་ཨ་མའི་བྱམས་བརྩེ་འོག་ནས་འཚར་ལོངས་བྱུང་བ་འབའ་ཞིག་ཡིན་པས་རང་ཆས་སུ་ཡོད་པའི་བྱམས་བརྩེའི་བསམ་པ་དེ་གོང་མཐོར་གཏང་དགོས་གལ་དང་ལྷག་དོན་བེུད་རྣམས་ལ་རང་བཞིན་ལྷན་སྐྱེས་ཀྱི་བྱམས་བརྩེའི་ནུས་པ་ཆེ་བ་ཡོད་སྟབས། སྤྱི་ཚོགས་ནང་འགྲོ་བ་མིའི་བཟང་སྤྱོད་ཀྱི་རིན་ཐང་གོང་འཕེལ་སླད་བེུད་ཚོར་འགན་འཁྲི་འཕར་མ་ཞིག་ཡོད་སྐོར་ལམ་སྟོན་རྒྱ་ཆེ་མཛད་ཡོད་པ་རེད།
བགྲོ་གླེང་ཐོག་ཕེབས་པའི་གཞོན་སྐྱེས་ཁག་ཅིག་ནས་སོ་སོའི་གནས་ཡུལ་རྒྱལ་ཁབ་ཁག་ཏུ་ཞི་བདེ་ཆེད་ཕྱག་ལས་གནང་སྐབས་ཆབ་སྲིད་ཀྱི་གནད་དོན་འདྲ་མིན་རྐྱེན་པས་ལས་དོན་ཚགས་ཚུད་གནང་མ་ཐུབ་པས་སྐབས་རེ་སེམས་ཤུགས་ཆག་པའི་དཀའ་ངལ་དེ་དག་ལ་གདོང་ལེན་གནང་ཕྱོགས་སྐོར་ལམ་སྟོན་ཞུས་པར་དེ་དག་གི་སྙིང་སྟོབས་ལ་བསྔགས་བརྗོད་གནང་བ་དང་སྦྲགས། སྤྱིར་བཟང་སྤྱོད་ལྡན་པ་ཞིག་ཡོང་བར་མང་ཚོགས་ཁྲོད་དུ་ཤེས་ཡོན་གྱི་གོ་རྟོགས་གོང་འཕེལ་གནང་གལ་ཡིན་ཀྱང་དེང་སྐབས་སྤྱི་ཚོགས་ནང་དཀའ་ངལ་བཟོ་མཁན་མང་ཆེ་བ་དེ་ཤེས་ཡོན་ཡོད་པ་ཤ་སྟག་ཆགས་ཀྱི་ཡོད་སྟབས་དུས་ཀྱི་ཤེས་ཡོན་ལ་ཞན་ཆ་ཡོད་པ་གསལ་པོ་ཆགས་ཀྱི་ཡོད་པར་བརྟེན། ནང་སེམས་ཀྱི་ཞི་བདེ་གོང་འཕེལ་ཡོང་ཆེད་ཤུགས་སྣོན་གནང་གནད་ཡིན་པ་སོགས་ལམ་སྟོན་མཛད་པ་དང་ཆབས་ཅིག་ཏུ་འགྲོ་བ་མི་གཅིག་གྱུར་གྱི་འདུ་ཤེས་འཛིན་པའི་ཐོག་ནས་ཞི་འགྲིག་ཕྱོགས་སུ་མདུན་བསྐྱོད་གནང་དགོས་པར་སྐུལ་ལྕག་གནང་ཡོད།
མཐའ་དོན་བགྲོ་གླེང་ལས་རིམ་དེ་གོ་སྒྲིག་ཞུ་མཁན་ཁོངས་སུ་ཡོད་པའི་ལྕམ་ Diane Zeleny ལགས་ཀྱིས་ད་ལན་འདི་གར་ཕེབས་པའི་གཞོན་སྐྱེས་རྣམས་རྩོད་རྙོག་ཅན་གྱི་རྒྱལ་ཁབ་ཁག་ཏུ་ཞི་འཇམ་ཆེད་ཕྱག་ལས་གནང་སྐབས་སྙིང་སྟོབས་ཞུམ་པ་མེད་པར་དཀའ་ཚེགས་ལ་གདོང་ལེན་གནང་ཐུབ་ཆེད་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་དྲུང་ནས་ལམ་སྟོན་ཞུ་རྒྱུའི་གོ་སྐབས་བྱུང་བ་དེ་ནི་ཧ་ཅང་གི་སྐལ་པ་བཟང་པོ་དང་ལྷག་དོན་མགོན་པོ་མཆོག་གིས་བསྩལ་བའི་ལམ་སྟོན་རྣམས་གཞོན་སྐྱེས་ཚོས་སོ་སོའི་རྒྱལ་ཁབ་ནང་ཕྱག་ལས་གནང་སྐབས་ཧ་ཅང་ཐུགས་ཕན་གསོ་རྒྱུར་ཐུགས་རེ་གནང་བཞིན་ཡོད་ཅེས་གསུངས་ཡོད།
རྩ་བའི་ཨ་རིའི་ཞི་བདེ་བསྟི་གནས་ཁང་གིས་གོ་སྒྲིག་ཞུས་པ་ལྟར་གཞོན་སྐྱེས་ཞི་བདེའི་མགོ་ཁྲིད་མཁན་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལམ་སྟོན་བགྲོ་གླེང་ཐེངས་བཞི་ཞུས་ཡོད་པ་དང་། ཨ་རིའི་ཞི་བདེ་བསྟི་གནས་ཁང་དུ་ཐེངས་གཅིག་དང་། བཞུགས་སྒར་༸རྒྱལ་བའི་ཕོ་བྲང་དུ་ཐེངས་གསུམ་གནང་ཡོད་པ་རེད།
