བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཚོུད་ ༩ ཙམ་ལ་ཁ་སང་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གྱི་གསུང་ཆོས་ར་བར་དབུ་འཛུགས་མཛད་པའི་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཁྲིད་དང་། ཕྱི་ལོ་ ༢༠༡༥ ལོར་གདན་ས་བཀྲ་ཤིས་ལྷུན་པོ་རུ་གནང་བའི་ཚད་མ་རྣམ་འགྲེལ་གྱི་བཀའ་ཁྲིད་འཕྲོ་སྐྱོང་དང་སྦྲགས་ཕྱི་ནང་གི་དད་ལྡན་མང་ཚོགས་ཁྲི་ཚོ་བརྒལ་བར་དགེ་བསྙེན་དང་བྱང་ཆུང་སེམས་པའི་སྡོམ་པ་འབོག་བཀའ་དྲིན་མཛད་སོང་། 
དེ་རིང་ཆོས་འབྲེལ་གྱི་ཉིན་གཉིས་པ་དེ་ཀོ་རི་ཡ་དང་ཝི་ཏི་ནམ་གྱི་སྐད་ཐོག་ནས་བཀྲ་ཤིས་པའི་མདོ་གསུང་འདོན་དང་སྦྲགས་བཀའ་ཆོས་དངོས་གཞི་དབུ་འཛུགས་བསྐྱངས་ཡོད་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་གྱི་སྤྱི་བཤད་དང་འབྲེལ་སངས་རྒྱས་ཀྱི་བསྟན་པ་ཁྱབ་ཀྱང་ཉམས་པར་གྱུར་བའི་ནང་པའི་ཡུལ་གྲུ་ཁག་གི་ནང་དུ་བསྟན་པ་སླར་གསོ་གནང་དགོས་གལ་ཡིན་པར་ལམ་སྟོན་བཀའ་བསྩལ་སོང་།
མགོན་པོ་༸གང་ཉིད་མཆོག་ནས་ཡི་ཤུའི་ཆོས་པ་ཚོས་སྤྱི་ཚོགས་སློབ་གསོ་དང་འཕྲོད་བསྟེན་སོགས་ཀྱི་ཐད་ལ་ཞབས་འདེགས་ཤུགས་ཆེ་སྒྲུབ་བཞིན་པ་སོགས་བཀའ་འགྲེལ་དང་སྦྲགས། ང་ཚོ་ནང་པའི་ཁྲོད་དེ་ལྟར་གནང་མཁན་དཀོན་པོ་ཡིན་སྟབས་ང་ཚོས་ཡི་ཤུའི་ཆོས་པ་ཚོའི་གནང་སྟངས་ལ་དཔེ་ལྟོས་དགོས་ཞེས་བཀའ་བསྩལ་ཡོད།
ཆོས་འབྲེལ་གྱི་སྤྱི་བཤད་གྲུབ་མཚམས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཁྲིད་འཕྲོ་སྐྱོང་ལེགས་པར་གྲུབ་པ་མཛད་དེ་སང་ཉིན་མཛད་འཆར་ཡོད་པའི་འཇིགས་བྱེད་དཔལ་གཅིག་གི་བཀའ་དབང་གི་སྔོན་འགྲོའི་ཚུལ་དུ་ཐེངས་འདིའི་བཀའ་ཆོས་ཐོག་བཅར་བའི་ཕྱི་ནང་གི་དད་ལྡན་མང་ཚོགས་ཁྲི་ཚོ་བརྒལ་བར་དགེ་བསྙེན་དང་བྱང་ཆུང་སེམས་པའི་སྡོམ་པ་འབོག་བཀའ་དྲིན་མཛད་ཡོད།
