དེ་རིང་བོད་དཀར་མཛེས་ཁུལ་ལྕགས་ཟམ་རྫོང་དུ་ས་གནས་ཀྱི་ཉིན་གུང་ཚོུད་ ༡༢༌༢༥ ཙམ་ལ་ས་ཡོམ་ཤུགས་ཚད་ ༦་༦ བྱུང་བ་དང་། དོན་རྐྱེན་དེའི་ཁྲོད་ད་བར་མི་བདུན་འདས་གྲོངས་སུ་གྱུར་ཡོད་པར་ཤེས་རྟོགས་བྱུང་ཡོད།
རྒྱ་ནག་གི་ས་འགུལ་འབྲེལ་མཐུད་བསྟི་གནས་ཁང་གིས་གཞུང་འབྲེལ་བརྒྱུད་ལམ་ཐོག་འགྲེལ་བརྗོད་བྱས་པར་གཏིང་ཚད་སྤྱི་ལེ་ ༡༢ ཅན་གྱི་ས་ཡོམ་དེའི་ཤུགས་རྐྱེན་ཁུལ་དེ་ནས་སྤྱི་ལེ་ ༡༠༠༠ ཙམ་གྱི་སར་ཆགས་པའི་ Changsha གྲོང་ཁྱེར་དང་སྤྱི་ལེ་ ༩༠༠ ལྷག་གི་སར་ཆགས་པའི་ Xian གྲོང་ཁྱེར་དུའང་ཚོར་ཡོད་པ་རེད།
རྒྱ་ནག་གི་གཞུང་འབྲེལ་ CCTV བརྙན་འཕྲིན་ཁང་གིས་ས་ཡོམ་དེའི་རྐྱེན་གྱིས་ལྕགས་ཟམ་རྫོང་གཡས་གཡོན་དུ་ས་རུད་བྱུང་བའི་ཁྲོད་མི་བདུན་འདས་གྲོང་སོང་བ་དང་། གྲོང་སྡེ་གཅིག་གི་ས་གནས་མང་ཚོགས་ཀྱི་སྡོད་ཁང་དང་གཞུང་ལམ་སོགས་ལ་གནོད་འཚེ་ཆེས་ཆེར་ཕོག་ཡོད་པ་བཀོད་འདུག
བོད་ནང་གི་ས་ཡོམ་གནས་ཚུལ་དེ་དང་འབྲེལ་ཏེ་དེ་རིང་སྤྱི་ཚོགས་དྲ་རྒྱར་ལྕགས་ཟམ་ཁུལ་གྱི་བོད་བཟོའི་ཁང་པ་ཞིག་ཡོད་པ་མངོན་རྒྱུ་འདུག་ལ། བོད་ཀྱི་རྩོམ་པ་པོ་གྲགས་ཅན་ཚེ་རིང་འོད་ཟེར་ལགས་ཀྱིས་ཁོང་ནས་ས་འགུལ་དང་འབྲེལ་བའི་གནས་ཚུལ་འདི་ཐོས་མ་ཐག་ཏུ་ལྕགས་ཟམ་རྫོང་དུ་རྟེན་གཞིས་བྱས་པའི་གློག་ཁང་འདི་བསམ་བློ་འཁོར་ཡོད་པ་དང་། དེ་སྔ་གློག་ཁང་འདིའི་རྐྱེན་གྱིས་ཉེ་འཁོར་གྱི་ས་རིན་ཆག་རྗེས་ད་ཆ་ས་ཡོམ་གྱིས་ངན་འབྲས་གང་འདྲ་ཞིག་ཡོང་ངམ་སྙམ་པའི་དངངས་སྐྲག་སྐྱེས་ཡོད་སྐོར་གསུངས་འདུག
སྤྱིར་དེང་སྐབས་བོད་དུ་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་ཆེས་ཆེར་འགྲོ་བའི་ངལ་བ་འཕྲད་བཞིན་པའི་ཁྲོད་ས་གནས་མང་ཚོགས་ཕལ་མོ་ཆེ་བ་ཐེམ་སྤང་བཀའ་རྒྱའི་འོག་གནས་མུས་ཡིན་པ་རེད། དེ་རིང་རྒྱ་ནག་གི་ Xinhua གཞུང་འབྲེལ་བརྒྱུད་ལམ་གྱིས་གནས་ཚུལ་སྤེལ་བར་གཞིགས་ན། ཁ་སང་རེས་གཟའ་ཉི་མའི་ཉིན་རྒྱ་ནག་ཁྱོན་ཡོངས་སུ་གཉན་རིམས་གསར་པ་ཕོག་མཁན་མི་གྲངས་ ༡༥༥༢ བྱུང་ཡོད་པའི་ཁོངས་ནས་ ༥༡༦ བོད་རང་སྐྱོང་ལྗོངས་ཟེར་བ་ནས་ཡིན་པ་དང་། མི་༩༥ མཚོ་སྔོན་ཁུལ་ནས་ཡིན་པར་བཤད་འདུག
