ཕྱི་ལོ་ ༢༠༡༨ ལོར་རྒྱ་གཞུང་གིས་དོགས་ཡོད་བོད་མི་ ༣༠ ཙམ་གང་བྱུང་དུ་འཛིན་བཟུང་གིས་བཀག་ཉར་བྱས་པའི་ཁོངས་སུ་ཡོད་པ་ཁམས་འབྲི་རུ་རྫོང་ཤོང་ཆུ་གྲོང་བརྡལ་གྱི་བྲག་ར་གྲོང་ཚོ་ནས་ཡིན་པ་ཆབ་སྲིད་བཙོན་པ་དོན་རྒྱལ་ལགས་ད་ལྟའི་ཆར་རྒྱའི་བཙོན་ཁང་དུ་གཟུགས་གཞིའི་གནས་སྟངས་ཆེས་ཞན་པས་ཚེ་སྲོག་ལ་ཉེན་ཁ་ཡོད་པ་རེད་འདུག
དེ་སྔ་ཕྱི་ལོ་ ༢༠༡༨ ཕྱི་ཟླ་ ༢ པའི་ཟླ་མཇུག་ཙམ་ནས་ཁམས་འབྲི་རུ་རྫོང་ཤོང་ཆུ་གྲོང་བརྡལ་དང་ཐག་ཉེ་བའི་སེབ་ཁྲ་རྫ་རྒན་ཞེས་པའི་གནས་རི་ནས་ས་གནས་མང་ཚོགས་ཀྱི་འདོད་པ་ཡོད་མེད་ལ་མ་ལྟོས་པར་བཙན་ཤེད་ཀྱིས་གཏེར་ཁ་སྔོག་འདོན་བྱ་རྒྱུའི་ལས་གཞིར་མོས་མཐུན་གྱི་མིང་རྟགས་བཀོད་དུ་བཅུག་པ་དང་དེར་ས་གནས་མང་ཚོགས་ཀྱིས་ཞི་རྒོལ་གནང་བར་བརྟེན་ས་གནས་སྲིད་གཞུང་གིས་ཛ་དྲག་ཚོགས་འདུ་ཚོགས་པ་བརྒྱུད་དོགས་ཡོད་བོད་མི་ ༣༠ ཙམ་བཙན་ཤེད་ཀྱིས་གང་བྱུང་དུ་འཛིན་བཟུང་གིས་བཀག་ཉར་བྱས་ཏེ་དེ་དག་གི་ཁྲོད་ནས་བོད་མི་དགུའི་འདྲ་པར་དང་བོད་མི་བདུན་གྱི་མཚན་སོགས་འབྲེལ་ཡོད་བརྒྱུད་ནས་ཕྱིར་བསྒྲགས་བྱུང་ཡོད་ཀྱང་ད་བར་ཁོང་རྣམས་ཀྱི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད་པ་རེད།
བོད་མིའི་སྒྲིག་འཛུགས་ཀྱི་དྲ་གནས་ཐོག་དེ་འབྲེལ་གནས་ཚུལ་སྤེལ་བར་སྐབས་དེར་རྒྱ་གཞུང་གིས་བོད་མི་གང་ཙམ་འཛིན་བཟུང་བཀག་ཉར་བྱས་ཡོད་པའི་ཁོངས་རང་ལོ་ ༥༡ ཡིན་པ་དོན་རྒྱལ་ལགས་ཀྱི་སྐོར་གནས་ཚུལ་གསར་གསར་པ་ཤེས་རྟོགས་བྱུང་བར་གཞིགས་ན་སྐབས་དེར་རྒྱ་གཞུང་གིས་དོན་རྒྱལ་ལགས་སུ་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་ཀྱང་ད་ཆ་ཁོང་འབྲི་རུ་རྫོང་གི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་དང་བཙོན་ཁང་ནང་ཉེས་བརྡུང་ཚད་མེད་བཏང་རྐྱེན་གཟུགས་པོ་གཅོང་ཅན་དུ་གྱུར་བར་བརྟེན་ཚེ་སྲོག་ལའང་ཉེན་ཁ་ཡོད་པ་རེད་འདུག
གཞི་རྩའི་དོན་རྒྱལ་ལགས་ནི་ཤོང་ཆུ་གྲོང་བརྡལ་བྲག་ར་གྲོང་ཚོ་ནས་ཡིན་ཞིང་། དེ་སྔ་འཛིན་བཟུང་མ་བྱས་གོང་འབྲི་རུ་རྫོང་དུ་ཚོང་གཉེར་གནང་བཞིན་པའི་ཐོག་ཁོར་ཡུག་སྲུང་སྐྱོབ་ལས་དོན་ཐེངས་མང་སྤེལ་བར་ས་གནས་སྲིད་གཞུང་གིས་ཕྱི་ལོ་ ༢༠༡༣ དང་ ༢༠༡༤ ཙམ་ལ་ཁོར་ཡུག་སྲུང་སྐྱོབ་ཀྱི་གཟེངས་རྟགས་ཀྱང་ཐོབ་མྱོང་ཡོད་པ་རེད།
