བོད་འབྲི་རུ་རྫོང་ནས་ཡིན་པའི་བོད་མི་ཤུར་མོ་ལགས་ཀྱིས་རྒྱ་གཞུང་གི་བོད་ཐོག་འཛིན་པའི་དྲག་པོའི་སྲིད་བྱུས་ལ་ངོ་རྒོལ་གྱིས་ལོ་ལྔའི་གོང་ལ་རང་ལུས་མེར་བསྲེགས་གནང་སྟེ་འདས་གྲོངས་གྱུར་བའི་གནས་ཚུལ་ཉེ་ཆར་གཞི་ནས་ཤེས་རྟོགས་བྱུང་བ་དང་རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་དཀར་མཛེས་སེལ་ཤུལ་རྫོང་རྫ་སྨད་དབོན་པོ་ཡུལ་ཚོའི་རྒྱ་གཞུང་ལས་ཁུངས་མདུན་དུ་བོད་རང་བཙན་དོན་དུ་འཐབ་རྩོད་བྱ་དགོས་ཞེས་དྲིལ་བསྒྲགས་ཡིག་ཆ་བརྒྱ་ཕྲག་མང་པོ་གཏོར་འགྲེམས་བྱས་པའི་དོགས་གཞིའི་འོག་འཛིན་བཟུང་བྱས་པ་དགོངས་གཞིའི་འོག་བོད་མི་བསྟན་འཛིན་ཉི་མ་ལགས་ལ་རྒྱ་གཞང་གིས་བཙོན་ཁང་ནང་སྡུག་སྦྱོང་མནར་གཅོད་ཚད་མེད་བཏང་རྐྱེན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བྱུང་བ་ལྟར། ཁ་སང་ཨ་རིའི་ New York གྲོང་ཁྱེར་དུ་བོད་མི་ཁག་ཅིག་གིས་རྒྱ་ནག་གཞུང་ཚབ་ལས་ཁུངས་མདུན་དུ་ངོ་རྒོལ་སྐད་འབོད་དང་མར་མེ་ཁྲོམ་སྐོར་གྱི་ལས་འགུལ་སྤེལ་བ་བརྒྱུད་ནས་བོད་མི་བློད་གཏོང་བ་གཉིས་ལ་གདུང་སེམས་མཉམ་བསྐྱེད་ཞུས་འདུག
ཨ་རིའི་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཁ་སང་ཉིན་རྒྱབ་ཕྱག་ཚོད་ ༣ ནས་ ༤ བར་ཁུལ་དེའི་རྒྱ་ནག་གཞུང་ཚབ་ལས་ཁུངས་མདུན་དུ་བོད་མི་བློས་གཏོང་བ་གཉིས་པོའི་སྐུ་པར་དང་བོད་ཀྱི་རྒྱལ་དར་འཆར་བཞིན་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག་པ་དང་། ཕྱི་དྲོར་ Jackson Height ཞེས་པའི་མི་མང་འཛོམས་ཆེ་སའི་ས་ཁུལ་དུ་བདེན་ཚིག་སྨོན་ལམ་དང་། སེམས་བསྐྱེད། མ་ཉི་་གསོག་སྒྲུབ་དང་འབྲེལ་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་གནང་འདུག
རྩ་བའི་ཕྱི་ལོ་ ༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོའི་སྒེར་ལངས་བྱུང་བའི་རྗེས་སུ་རྒྱ་གཞུང་གིས་བོད་ནང་སྔར་ལས་དམ་དྲག་ཤུགས་ཆེར་བྱས་ཡོད་པ་དང་འབྲེལ། ཕྱི་ལོ་ ༢༠༠༩ ལོ་ནས་ད་བར་བོད་མི་ ༡༥༥ ཙམ་གྱིས་རྒྱ་གཞུང་གི་དྲག་པོའི་སྲིད་བྱུས་ལ་ངོ་རྒོལ་གྱི་རང་ལུས་མེར་བསྲེགས་གནང་བ་དང་བོད་མི་མང་ཚོགས་དང་ཁྱེར་རྐྱང་བཅས་ཀྱིས་ལས་འགུལ་མང་དག་ཅིག་སྤེལ་ཡོད་པ་རེད། དེའི་ཁྲོད་བོད་མི་ཤུར་མོ་ལགས་ནི་རང་ལུས་མེར་བསྲེགས་གནང་མཁན་ ༡༤༣ པ་དེ་ཆགས་ཀྱི་ཡོད་པ་རེད། ཤུར་མོ་ལགས་ནི་ད་ལྟ་རང་ལོ་ ༢༦ ཙམ་ཡིན་པ་དང་ཕྱི་ལོ་ ༢༠༡༥ ཟླ་ ༩ ཚེས་ ༡༧ ཉིན་གྱི་ཉིན་རྒྱབ་ཕྱག་ཚོད་ ༡ ཙམ་ལ་ཁོང་གིས་འབྲི་རུ་རྫོང་ཤག་ཆུ་གྲོང་རྡེལ་གྱི་སྤྱི་སྤྱོད་རླངས་འཁོར་བབས་ཚུགས་ཉེ་འགྲམ་དུ་རྒྱ་གཞུང་ལ་ངོ་རྒོལ་གྱི་རང་ལུས་མེར་བསྲེགས་གནང་སྐབས་སུ་ཉེན་རྟོག་པས་ཁོང་འཛིན་བཟུང་གིས་ས་གནས་སྨན་ཁང་དུ་ཁྱེར་ཡོད་ཀྱང་ཉིན་དེར་འདས་གྲོངས་སུ་གྱུར་བའི་གནས་ཚུལ་བྱུང་ཡོད་པ་རེད། ཁོང་གིས་རང་ལུས་མེར་བསྲེགས་གནང་བའི་གནད་དོན་དང་འབྲེལ་བ་བཏགས་ནས་ཁོང་གི་ཉེ་འབྲེལ་གསུམ་ལ་སྐབས་དེར་འཛིན་བཟུང་བྱས་ཡོད་པ་ལྟར་ད་བར་ཁོང་རྣམས་གར་ཡོད་སོགས་ཀྱི་གནས་ཚུལ་གང་ཡང་ཤེས་རྟོགས་མེད་པར་ལུས་ཡོད་པ་རེད། དེ་བཞིན་བོད་མི་བསྟན་འཛིན་ཉི་མ་ལགས་ཀྱིས་སྤྱི་ལོ་ ༢༠༡༩ ལོའི་ཟླ་བ་༡༡ པའི་ནང་བོད་རང་བཙན་གྱི་སྦྱར་ཡིག་འགྲེམ་སྤེལ་བྱས་པར་བརྟེན་ནས་རྒྱ་གཞུང་ཉེན་རྟོགས་པས་འཛིན་བཟུང་བྱས་པའི་རྗེས་སུ། བཙོན་ཁང་ནང་དུ་གཅར་རྡུང་གི་རྐྱེན་གྱིས་ནད་གཅོང་དུ་གྱུར་ནས་སྔར་ལོའི་ཟླ་བ་ ༡༢ པའི་ཚེས་ ༡ ཉིན་འདས་གྲོངས་སུ་ཕྱིན་ཡོད་པ་རེད།
དེ་བཞིན་དེ་རིང་བཞུགས་སྒར་དྷརྨ་སཱ་ལཱར་ས་གནས་གཞོན་ནུ་དང་བེུད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མིན་པའི་ཚོགས་པ་གསུམ་གྱིས་ཕྱི་དྲོ་ཕྱག་ཚོད་ ༥་༣༠ ཐོག་རྒྱལ་གཅེས་པ་ཁོང་རྣམ་གཉིས་ལ་གདུང་སེམས་མཉམ་བསྐྱེད་ཀྱི་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་བཞིན་འདུག
