ཆེས་མཐོའི་ཁྲིམས་ཞིབ་ཁང་གི་ཟུང་དྲུང་པདྨ་བཟང་པོ་ལགས་ནས་ལ་དྭགས་བོད་མིའི་ས་གནས་ཁྲིམས་ཞིབ་པའི་ལས་ཁུར་དམ་འབུལ་ཞུས་སོང་།
དེ་རིང་སྔ་དྲོ་འི་ཚོུད་ ༡༠ ཐོག་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོགས་ཁང་དུ་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གི་མདུན་ནས་ཆེས་མཐོའི་ཁྲིམས་ཞིབ་ཁང་གི་ཟུང་དྲུང་པདྨ་བཟང་པོ་ལགས་ཀྱིས་ལ་དྭགས་བོད་མིའི་ས་གནས་ཁྲིམས་ཞིབ་ཁང་དུ་ཁྲིམས་ལུགས་རིག་པའི་ཁྲིམས་ཞིབ་པ་ཞིག་གསར་དུ་བསྐོ་གཞག་མ་གནང་བའི་བར་དུ་འཕྲལ་སེལ་རིང་ལ་དྭགས་བོད་མིའི་ས་གནས་ཁྲིམས་ཞིབ་པའི་ལས་ཁུར་དམ་འབུལ་ཞུས་ཡོད།
པདྨ་བཟང་པོ་ལགས་ནི་ལ་དྭགས་བྱང་ཐང་ཧན་ལེ་རུ་སྐྱེས་ཤིང་སློབ་མཐར་སོན་རྗེས་ཕྱི་ལོ་ ༢༠༡༣ ལོར་དང་ཐོག་འཕྲལ་སེལ་གྱི་ངོ་བོའི་ཐོག་ལ་དྭགས་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་དྲུང་དང་རྩིས་པ་གཅིག་ལྕོགས་ཏུ་བསྐོ་གཞག་གནང་ནས་ཕྱིས་སུ་ཡིག་རྒྱུགས་ཀྱི་ལམ་ནས་ ༢༠༡༣ ལོར་དྲུང་གཞོན་གནས་རིམ་ཐོག་ལ་དྭགས་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་དྲུང་དང་རྩིས་པ་གཅིག་ལྕོགས་ཏུ་བསྐོ་གཞག་གནང་ཡོད། 
དེ་རྗེས་ ༢༠༡༧ ལོར་ནང་སྲིད་ལས་ཁུངས་སུ་གནས་སྤོས་གནང་། ༢༠༢༡ ཕྱི་ཟླ་ ༥ པའི་ནང་ཟུང་དྲུང་དུ་གནས་སྤར་དང་། ༢༠༢༡ ཕྱི་ཟླ་ ༧ པའི་ནང་ཆེས་མཐོའི་ཁྲིམས་ཞིབ་ཁང་གི་ཟུང་དྲུང་དུ་གནས་སྤོས་ཀྱིས་ཁྱོན་མི་ལོ་བརྒྱད་ལྷག་གི་རིང་ལ་སྲི་ཞུ་བའི་ཞབས་ཞུ་བསྒྲུབས་ཡོད།
