བཙན་བྱོལ་བོད་མིའི་སྤྱི་ཚོགས་ཁྲོད་རྩེད་མོའི་རིགས་སྣ་མང་ལ་དགའ་ཞེན་དང་། ལྷག་དོན་དུ་རྐང་རྩེད་སྤོ་ལོ་ལ་དམིགས་བསལ་གྱི་དགའ་སྣང་ཆེན་པོ་གནང་བཞིན་པའི་ཁྲོད་འདིར། དེ་རིང་རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་དུ་ཕྱི་ལོ་ ༢༠༢༦ ལོའི་སྐུ་ཞབས་ནི་ཇ་ལིང་གྷ་པའི་དྲན་རྟེན་གསེར་གྱི་བུམ་པའི་རྐང་སྤོལ་རྩེད་འགྲན་འགོ་འཛུགས་གནང་འདུག་པ་དང་། དབུ་འབྱེད་ཀྱི་རྩེད་འགྲན་དེ་བཞིན་སྦེལ་ཀོབ་བདེ་སྐྱིད་སླར་གསོ་དང་ཧུན་སུར་རབ་རྒྱས་གླིང་གི་རུ་ཁག་གཉིས་བར་འགྲན་རྩོད་གནང་འདུག
དེ་ཡང་ཧུན་སུར་རབ་རྒྱས་གླིང་གིས་གོ་སྒྲིག་འོག་རྒྱ་གར་ལྷོ་ཕྱོགས་ཁུལ་ཡོངས་ཀྱི་བོད་ཀྱི་རྐང་སྤོལ་རུ་ཁག་དབར་གྱི་འགྲན་བསྡུར་དེ་བཞིན་འདི་ཚེས་ ༢༧ ནས་དབུ་འཛུགས་ཀྱིས་ཕྱི་ཟླ་ ༣ ཚེས་ ༩ བར་གནང་གཏན་ཁེལ་བ་དང་། ཐེངས་འདིའི་རྩེད་འགྲན་དེའི་ཐོག ཀོ་ལེ་གྷལ་དོན་ལྡན་གླིང་དང་ཧུན་སུར་རབ་རྒྱས་གླིང་རུ་ཁག་ཀ་དང་ཁ། སྦེལ་ཀོབ་བདེ་སྐྱིད་སླར་གསོའི་རུ་ཁག་དང་། གོ་ལ་ཐ་ལ། མོན་གྷོ་འདོད་རྒུ་གླིང་། Bangalore རུ་ཁག གྷོ་ཝ་རུ་ཁག་སོགས་རུ་ཁག་བཅུ་མཉམ་ཞུགས་གནང་འདུག
འདི་ག་རླུང་འཕྲིན་ཁང་གིས་ཧུན་སུར་རབ་རྒྱས་གླིང་གི་རྩེད་འགྲན་ཚོགས་པའི་ཚོགས་གཙོ་ཚེ་རིང་རྡོ་རྗེ་ལགས་སུ་ཐེངས་འདིའི་རྩེད་འགྲན་དང་འབྲེལ་བཀའ་འདྲི་ཞུས་སྐབས་ཁོང་གིས། རྩ་བའི་རྩེད་འགྲན་དེ་ལྟར་གོ་སྒྲིག་གནང་དགོས་པའི་དམིགས་ཡུལ་གཙོ་བོ་ནི་ཀར་ན་ཌ་ཀ་མངའ་སྡེའི་སྤྱི་ཁྱབ་བློན་ཆེན་ནི་ཇ་ལིང་གྷ་པ་དམ་པ་དེ་ཉིད་ཀྱི་བཀའ་དྲིན་རྗེས་དྲན་ཆེད་ཡིན་པ་སོགས་ངོ་སྤྲོད་གནང་བ་དང་འབྲེལ། དེ་ལྟ་བུའི་རྩེད་འགྲན་གྱིས་བོད་པའི་གཞོན་སྐྱེས་རྣམས་ལ་དམིགས་བསལ་གྱི་འཕྲོད་བསྟེན་ལ་དོ་སྣང་འདྲེན་པར་ཕན་ཐོགས་ཆེན་པོ་ཡོད་པ་དང་། མ་ཟད་གཞོན་སྐྱེས་ཕན་ཚུན་འཆམ་མཐུན་ཡོང་རྒྱུར་ཡང་ཕན་ཐོགས་ཆེན་པོ་ཡོང་གི་ཡོད་སྐོར་འགྲེལ་བརྗོད་གནང་སོང་།
ཐེངས་འདིའི་སྐུ་ཞབས་ནི་ཇ་ལིང་གྷ་པའི་དྲན་རྟེན་གསེར་གྱི་བུམ་པའི་རྐང་སྤོལ་རྩེད་འགྲན་དེ་བཞིན་ཐེངས་ལྔ་པ་ཆགས་ཀྱི་ཡོད་པ་དང་། སྔ་ལོ་ཧུན་སུར་རབ་རྒྱས་གླིང་རུ་ཁག་ལ་རྩེད་འགྲན་བཞི་པའི་མཐའ་མའི་རྒྱལ་ཁ་ཐོབ་ཡོད་པ་རེད།
མ་ཟད་རྩ་བའི་བཙན་བྱོལ་ནང་རྒྱ་གར་ལྷོ་ཕྱོགས་ཀྱི་རྩེད་འགྲན་དེ་བཞིན་ཁོ་ན་མ་ཡིན་པར་ལོ་ལྟར་བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་འོག་བཞུགས་སྒར་གཙོས་པའི་བོད་མི་གནས་སྡོད་ས་གནས་གང་སར་རྒྱ་གར་ཕྱི་ནང་གི་རྩེད་འགྲན་པ་བརྒྱ་ཕྲག་མཉམ་ཞུགས་ཡོད་པའི་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་རྩེད་འགྲན་འཚོག་མུས་དང་། ལོ་གྲངས་ ༤༠ ཡན་གྱི་པཱ་ལགས་ཚོའི་ཆེད་དུའང་ཨ་ཕའི་རྐང་སྤོལ་རྩེད་འགྲན་དེ་ལྟར་གོ་སྒྲིག་གནང་གི་ཡོད་པ་རེད།
