Tibetan Royal Year of 2151 | Year of the Wood Dragon

བལ་གཞུང་གིས་ནང་བསྟན་སློབ་གཉེར་བ་ ༣༨༠ བརྒལ་བར་སློབ་མཐར་སོན་པའི་གཟེངས་བསྟོད་གནང་བ།

Tibetan News Headlines

  • Gongma Rinpoche at 80: An in-depth interview with Sakya Gongma Trichen Rinpoche uncovering his life journey and biography

རེས་གཟའ་སྤེན་པ། ༢༠༢༤།༠༤།༢༧

  • དམིགས་བསལ་ལས་རིམ། ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་གི་༧སྐུ་ཚེའི་མཛད་རྣམ་སྙིང་བསྡུས།

ཁ་ཉིན་ཕྱི་ཟླ་ ༥ ཚེས་ ༡༢ ཉིན་བལ་ཡུལ་གཞུང་གིས་བལ་ཡུལ་ནང་ཡོད་པའི་རིས་མེད་ནང་པའི་དགོན་སྡེ་ཁག་གི་དགེ་བཤེས་དང་མཁན་པོ། སློབ་དཔོན། དཔེ་ཁྲིད་དགེ་རྒན། གསང་སྔགས་ཉམས་ལེན་པ།  དེ་བཞིན་སིངྒ་ལ་དང་ཐེ་ལན་ཌི་བཅས་ནང་སློབ་ཉེར་གནང་བའི་གནས་བརྟན་སྡེ་པའི་ལུགས་ཀྱི་དགེ་འདུན་པ་བཅས་ཁྱོན་སེར་སྐྱ་མང་ཚོགས་ ༣༨༠ ལ་བལ་ཡུལ་ནང་སྲིད་བློན་ཆེན་མཆོག་ནས་ནང་པའི་གཞུང་ལ་སློབ་གཉེར་མཐར་ཕྱིན་པར་ངོས་འཛིན་གནང་སྟེ་ཆེ་བསྟོད་ཕྱག་འཁྱེར་བསྩལ་འདུག བསླབ་པ་མཐར་སོན་གྱི་ཕྱག་འཁྱེར་དེ་ནི་བལ་ཡུལ་གཞུང་འབྲེལ་གྱི་ངོས་འཛིན་ཡོད་པའི་ནང་པའི་ལྟ་གྲུབ་གོང་འཕེལ་དང་དགོན་པ་ཡར་རྒྱས་ལྟ་རྟོག་ཚོགས་པས་བལ་ཡུལ་གཞུང་ལ་ཆོག་མཆན་ཞུས་དོན་བཞིན་སྔ་ལོ་ཕྱི་ལོ་ ༢༠༡༨ ལོར་ཆོས་འཁོར་དུས་ཆེན་ཉིན་ཐེངས་དང་པོར་བལ་ཡུལ་སྲིད་བློན་མཆོག་གི་ཕྱག་ནས་གནང་ཡོད་པ་དང་། ད་ལོ་ཐེངས་གཉིས་པ་དེ་ཆགས་ཀྱི་འདུགགཟེངས་བསྟོད་ཕྱག་འཁྱེར་དེ་ཐོབ་པར་བལ་ཡུལ་གྱི་མི་སེར་ལག་འཁྱེར་ཡོད་དགོས་པ་མ་ཟད་གདན་ས་གྲྭ་ཚང་སོགས་རང་གི་ཁྱབ་ཁོངས་དགོན་སྡེ་སོ་སོ་ནས་བསླབ་པ་མཐར་སོན་གྱི་ངོས་འཛིན་ཕྱག་འཁྱེར་གནང་བ་དེར་གཞིར་བཞག་ནས་གནང་གི་ཡོད་པ་རེད་འདུག སྔ་ལོར་འདི་ལོའི་གཟེངས་བསྟོད་ཕྱག་འཁྱེར་བཞེས་མཁན་ཁོངས་སུ་གདན་ས་གྲྭ་ཚང་ཁག་ནས་ཕེབས་པའི་དཔེ་ཁྲིད་དགེ་རྒན་དང་དེ་བཞིན་རྒྱ་གར་ལྷོ་ཕྱོགས་གདན་ས་གསུམ་དང་རྣམ་གྲོལ་གླིང་སོགས་རིས་མེད་དགོན་སྡེ་ཁག་ནང་སློབ་གཉེར་གནང་མྱོང་པའི་བལ་པོའི་མི་ཁོངས་ཡིན་པ་རྣམས་ཡོད་པ་རེད། སྤྱིར་བལ་ཡུལ་ནི་ལོ་རྒྱུས་ཀྱི་ཐོག་ནས་ནང་ཆོས་དར་སའི་རྒྱལ་ཁབ་གཙོ་གྲས་ཤིག་ཡིན་ཀྱང་དེང་སྐབས་བལ་ཡུལ་གྱི་མི་འབོར་བརྒྱ་ཆ་ ༨༢ ནི་ཧིཾ་དུ་དང་བརྒྱ་ཆ་ ༩  ནང་པ། བརྒྱ་ཆ་ ༤ ཡེ་ཤུ། དེ་བཞིན་བརྒྱ་ཆ་ ༣  བལ་ཡུལ་གྱི་གདོད་མའི་ཆོས་ལུགས་རྗེས་འབྲང་པ་རེད་འདུག དེ་སྔ་བོད་ལ་དུས་འགྱུར་མ་བྱུང་གོང་དུ་བལ་ཡུལ་ནང་ནང་པའི་ལྟ་གྲུབ་ཐོག་སློབ་གཉེར་གནང་སའི་དགོན་སྡེ་ཧ་ལམ་མེད་པ་རེད། བོད་ལ་དུས་འགྱུར་བྱུང་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་མེད་བླ་ཆེན་རྣམས་བཙན་བྱོལ་ལ་ཕེབས་པ་དང་ཆབས་ཅིག་ཏུ་བཤད་སྒྲུབ་ཀྱི་བསྟི་གནས་རིས་མེད་དགོན་སྡེ་ཁག་རྒྱ་བལ་འབྲུག་གསུམ་ནང་སླར་གསོ་གནང་བ་མ་ཟད། བལ་ཡུལ་དུའང་ནང་པའི་གཞུང་ལ་སློབ་གཉེར་གནང་སའི་ཀོ་པན་འོག་མིན་བྱང་ཆུབ་ཆོས་གླིང་དགོན་གྱིས་མཚོན་པའི་རིས་མེད་དགོན་སྡེ་མང་དག་ཅིག་གི་ནང་གྲྭ་བཙུན་སྟོང་ཕྲག་གིས་བཤད་སྒྲུབ་གཉིས་ཀྱི་ཐོག་ནས་འཆད་ཉན་གནང་བཞིན་ཡོད་པ་རེད། ལྷག་དོན་བལ་ཡུལ་གྱི་ཡུལ་མི་ཡིན་པའི་བུ་ཕྲུག་བརྒྱ་ཕྲག་མང་པོ་ཞིག་ཀྱང་རྒྱ་གར་ལྷོ་ཕྱོགས་དུ་རྟེན་གཞི་བྱས་པའི་གདན་ས་གསུམ་དང་རྣམ་གླིང་དགོན་པ་སོགས་ཆོས་བརྒྱུད་རིས་མེད་དགོན་སྡེ་ཁག་ཏུ་སློབ་གཉེར་གནང་དང་གནང་བཞིན་ཡོད་པ་ལྟར། སློབ་ཐོན་ཟིན་པ་རྣམས་ཀྱིས་དེང་སྐབས་བལ་ཡུལ་ནང་རང་གི་མི་རིགས་ལ་ཞབས་འདེགས་ཆེན་པོ་བསྒྲུབས་དང་སྒྲུབ་བཞིན་ཡོད་པ་བཅས་ལ་བརྟེན་ནས་དེ་སྔ་ནང་པའི་རྒྱལ་ཁབ་ཡིན་པའི་བལ་ཡུལ་གྱི་མཚན་སྙན་སླར་གསོ་ཡོང་བར་དགེ་མཚན་མི་དམན་པ་བྱུང་ཡོད་པ་རེད།

འབྲེལ་ཡོད་གསར་གནས།

གསར་གནས།