བོད་དོན་ལས་འགུལ་བ་བསྟན་འཛིན་དོན་གྲུབ་ལགས་ཀྱིས་ཟླ་བ་གསུམ་རིང་བཞུགས་སྒར་རྒྱལ་བའི་ཕོ་བྲང་ནས་བྱང་ཤར་འབྲས་ལྗོངས་ཀྱི་རྣ་ཐོས་ལ་བར་དུ་ཉིན་གྲངས་ ༩༤ ལྷག་གི་རིང་ལ་སྤྱི་ལེ་ ༢༣༠༠ ལྷག་གི་གོམ་བགྲོད་ཀྱི་ལས་འགུལ་གྲུབ་མཚམས་སུ་དེ་རིང་སླར་ཡང་ཁོང་གིས་རྒྱ་གར་གྱི་གྲོང་ཁྱེར་བྷང་ལོར་ནས་དབུ་འཛུགས་ཀྱིས་གྲོང་ཁྱེར་ཆེ་ཁག་རྒྱལ་ས་ལྡི་ལི་དང་མཱོན་བྷེ་གསུམ་གྱི་ནང་དུ་སླར་བོད་དོན་དྲིལ་བསྒྲགས་ཀྱི་ལས་འགུལ་ཞིག་དབུ་འཛུགས་གནང་རྒྱུ་རེད་འདུག
གསར་འགོད་པས་ཁོང་ལ་ཞལ་པར་བརྒྱུད་ནས་ཁོང་གི་དྲིལ་བསྒྲགས་ཀྱི་ལས་གཞིའི་སྐོར་ནས་བཀའ་འདྲི་ཁག་ཅིག་ཞུས་པར་ཁོང་གིས་བོད་མི་རྣམས་རྒྱ་གར་དུ་བསྡད་ནས་མི་ལོ་ཧྲིལ་བོ་དྲུག་ཅུ་ལྷག་འགོར་ཡོད་ཀྱང་། ད་དུང་རྒྱ་གར་དུ་ནང་དུ་བོད་མི་ཆོས་དང་རིག་གཞུང་དང་འཐབ་རྩོད་སོགས་ཀྱི་སྐོར་ནས་གོ་རྟོག་ཞན་པོ་ཡིན་པར་འགྲེལ་བརྗོད་ཀྱིས་ཐེངས་འདིའི་ཁོང་གི་དྲིལ་བསྒྲགས་ཀྱི་ལས་འགུལ་གྱི་ནང་དུ་གཙོ་བོ་དགོས་འདུན་གསུམ་རྩལ་འདོན་བྱས་ཡོད་པ་ནི། བོད་ཀྱི་ཁོར་ཡུག་གི་གལ་གནད་དང་སྲུང་སྐྱོབ། དེ་བཞིན་བོད་དེ་རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ཡིན་པར་མི་མང་གིས་ཤེས་རྟོག་བྱེད་ཐབས་དང་། རྒྱ་གར་མི་མང་གིས་རྒྱ་ནག་གིས་ཐོན་སྐྱེད་བྱས་པའི་དངོས་ཟོག་རིགས་བཀག་སྡོམ་བྱེད་རྒྱུ་གལ་ཆེན་ཡིན་སྐོར་ལས་གཞི་རྩ་འཛུགས་བྱེད་རྒྱུ་ཡིན་པར་གསུངས་སོང་།
དེ་བཞིན་ཁོང་ལ་ཉེ་ཆར་རིང་ཟླ་བ་གསུམ་ལྷག་གི་རིང་ལ་གོམ་བགྲོད་ཀྱི་ལས་འགུལ་སྤེལ་ཚར་ཙམ་ཡིན་སྟབས། ད་ཆ་ཡང་ཟླ་གསུམ་གྱི་རིང་ལ་སླར་ཡང་གྲོང་ཁྱེར་ཆེ་ཁག་ཏུ་ལས་འགུལ་སྤེལ་རྒྱུར་ཁོང་ལ་འཕྲོད་བསྟེན་དང་དཔལ་འབྱོར་སོགས་ཀྱི་དཀའ་ངལ་ཡོད་མེད་ཀྱི་ཐད་ནས་བཀའ་འདྲི་ཞུས་པར་ཁོང་གིས། ཉེ་ཆར་གྱི་གོམ་བགྲོད་ཀྱི་ལས་འགུལ་སྐབས་སུ་གཞུང་ལམ་རྐྱང་བརྒྱུད་ནས་སོང་ཡོད་སྟབས་ལམ་བར་ནས་མི་མང་ལ་ཐུག་འཕྲད་བྱུང་བའི་མི་མང་པོ་ཞིག་སློབ་སྦྱོང་མེད་མཁན་རིགས་ཡིན་སྟབས་ཁོང་གི་སྦྱར་ཡིག་བཀྲམ་རྒྱུའི་ལས་གཞིའི་ཐད་ནས་འདོད་བློ་ཁེངས་བ་ཞིག་ཡོང་མེད་སྟབས་སླར་ཡང་དྲིལ་བསྒྲགས་ཀྱི་ལས་གཞི་དེ་གྲོང་ཁྱེར་ཆེ་ཁག་ནང་གི་སློབ་སྦྱོང་ཡོད་མཁན་གྱི་མི་མང་ལ་དམིགས་ནས་འགོ་འཛུགས་ཞུ་རྒྱུ་ཡིན་པར་འགྲེལ་བརྗོད་ཀྱིས་དྲིལ་བསྒྲགས་ཀྱི་ལས་འགུལ་འདི་ནི་ཉེ་ཆར་སྤེལ་བའི་ལས་འགུལ་དང་བསྡུར་ན་དཀའ་ལས་ཆེན་པོ་མེད་པར་མ་ཟད། ལྷོ་ཕྱོགས་ཀྱི་སྤྱི་མཐུན་མཉམ་འབྲེལ་གྱི་འགན་འཛིན་ཟུར་པ་བཀྲ་ཤིས་དབང་འདུས་ལགས་ཀྱི་མཐུན་འགྱུར་གྱི་འོག་ཏུ། བྷང་ལོར་གྱི་ལས་གཞི་ཁག་མ་གྲུབ་བར་དུ་ཁོང་གི་མགྲོན་ཁང་དུ་གནས་སྡོད་བྱེད་རྒྱུ་ཡིན་སྐོར་ངོ་སྤྲོད་གནང་སོང་།
དེ་བཞིན་ཁོང་གིས་ཐེངས་འདིའི་ལས་འགུལ་དང་འབྲེལ་ནས་མི་མང་ལ་རེ་སྐུལ་ཞུ་དོན། ལྷོ་ཕྱོགས་ཀྱི་མངའ་སྡེ་ཀཱརནཱ་ཊཀ་ནི་བོད་མི་བཙན་བྱོལ་བ་རྣམས་ཀྱི་སེར་འབྲས་དགའ་གསུམ་གྱི་ཆོས་སྡེ་ཆེ་ཤོས་ཀྱི་གདན་ས་དང་། དེ་བཞིན་བོད་མི་འདུས་སྡོད་ཀྱི་གཞིས་ཆགས་ཆེ་ཤོས་གསུམ་གྱི་ས་ཁུལ་ཞིག་ཆགས་ཡོད་སྟབས། ཐེངས་འདིར་ཁོང་གི་བོད་དོན་དྲིལ་བསྒྲགས་ཀྱི་ལས་འགུལ་དང་འབྲེལ་ནས་མི་མང་གིས་མཉམ་ཞུགས་ཀྱིས། ཉིན་གཅིག་གི་རིང་ལ་སྦྱར་ཡིག་བཀྲམ་རོགས་བྱེད་ཐུབ་ནའང་སྤྱི་བའི་ལས་དོན་གྱི་ཆ་ཤས་ཤིག་ཏུ་འགྱུར་རྒྱུ་ཡིན་སྟབས། བོད་མི་མང་ཚོགས་ཀྱིས་ཁོང་གི་དྲིལ་བསྒྲགས་ཀྱི་ལས་འགུལ་ལ་འཛུལ་ཞུགས་གནང་སྐྱོང་ཡོང་བའི་འབོད་སྐུལ་གནང་སོང་།
གཞི་རྩའི་ཁོང་གི་ཐེངས་འདིའི་བོད་དོན་དྲིལ་བསྒྲགས་ཀྱི་ལས་འགུལ་དེ་ནི་རྒྱ་གར་གྱི་གྲོང་ཁྱེར་ལྡི་ལི་དང་བྷང་ལོར། དེ་བཞིན་མཱོ་བྷེ་སོགས་ཀྱི་ནང་དུ་རྟེན་གཞི་བྱས་པའི་རྒྱ་གར་གྱི་མཐོ་སློབ་ཁག་དང་། དེ་བཞིན་མང་ཚོགས་ཀྱི་འདུར་རྒྱུགས་རྒོད་པའི་གྲོང་ཁྱེར་གྱི་ཚོར་ར་ཆེན་པོ། དེ་བཞིན་ས་འོག་གི་མེ་འཁོར་ལྕགས་ལམ་སོགས་སུ་ཆེད་དམིགས་ཀྱིས་སྐོར་སྐྱོད་བྱེད་རྒྱུ་རེད་འདུག
