ཁ་སང་གསུམ་བཅུའི་དུས་དྲན་ཐེངས་ ༦༢ བ་དང་སྟབས་བསྟུན་གྱིས། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་བོད་ནང་དུ། རྒྱ་ནག་སྲིད་གཞུང་གིས་བོད་ཁུལ་གྱི་ནང་བསྟན་གྱི་དགོན་སྡེ་མང་པོ་ཞིག་རྒྱ་ནག་དམར་ཤོག་སྲིད་གཞུང་གི་སྟངས་འཛིན་དོ་དོམ་གྱི་འོག་ཏུ་བཅུག་སྟེ། དགོན་པ་དེ་དག་རྒྱ་ནག་གི་དྲིལ་བསྒྲགས་ཀྱི་ལག་ཆར་བེད་སྤྱོད་བྱེད་བཞིན་ཡོད་པའི་ཐད་ནས་སྙན་ཐོ་ཞིག་འདོན་སྤེལ་གནང་འདུག
སྙན་ཐོ་དེའི་ནང་དུ་གསལ་འདོན་བྱས་པ་ལྟར་ན། རྒྱ་ནག་གི་འཐབ་ཕྱོགས་གཅིག་གྱུར་ཁང་གི་བཀོད་འདོམ་གྱི་འོག་ཏུ། བོད་ཁུལ་གྱི་དགོན་པ་ཡོངས་སུ་རྒྱ་ནག་གི་ཉེན་རྟོག་པ་དང་སྲིད་གཞུང་གི་ཆེད་བསྐོས་ཀྱི་ལས་བྱེད་རྩ་འཛུགས་བྱས་པ་བརྒྱུད་ནས་རྒྱ་ནག་རྒྱལ་ཡོངས་ལ་གཅིག་སྒྲིལ་ཡོང་བའི་ཆེད་དུ་༸གོང་ས་མཆོག་ལ་མཚན་སྨོད་བྱེད་དུ་འཇུག་གི་ཡོད་པར་ཡོངས་གྲགས་གནང་བ་མ་ཟད། རྒྱ་ནག་གིས་དུས་རྒྱུན་ནས་བོད་བརྒྱུད་ནང་བསྟན་ཆོས་ལུགས་ནི་རྒྱ་ནག་དམར་ཤོག་སྲིད་གཞུང་ལ་ཉེན་འཚབ་ཆེ་བ་ཞིག་ཡིན་པར་ངོས་འཛིན་བྱེད་བཞིན་པ་ལྟར། ད་ཆ་རྒྱ་ནག་གི་བཀོད་འདོམ་སྣ་ཚོགས་ཀྱི་འོག་ཏུ་བོད་བརྒྱུད་ནང་བསྟན་དེ་རང་རྐྱ་ཐུབ་པའི་ཆོས་སྡེ་ངོ་བོར་གནས་རྒྱུར་ཉེན་ཁའི་གནས་སུ་ལྷུང་ཡོད་པར་གསལ་འདོན་གནང་འདུག
ལས་འགུལ་ཁང་གིས་ད་དུང་། བོད་ནང་གི་དགོན་སྡེ་ཁག་ལ་ཐད་གར་འབྲེལ་བ་ཡོད་པའི་རྒྱ་ནག་གི་འཐབ་ཕྱོགས་གཅིག་གྱུར་ཁང་གིས་ཕྱོགས་ཡོངས་ནས་བོད་ཁུལ་དུ་ལས་གཞི་སྣ་མང་ཞིག་རྩོམ་བཞིན་པའི་ཁྲོད་དུ། ཕྱི་ལོ་ ༢༠༡༦ ལོར་རྒྱ་ནག་འཐབ་ཕྱོགས་གཅིག་གྱུར་ཁང་གིས་བོད་རང་སྐྱོང་ལྗོངས་ཀྱི་ཁུལ་དུ་སྔོན་རྩིས་མ་དངུལ་རྒྱ་སྒོར་ས་ཡ ༢༣།༩ གཏན་འབེབས་གནང་ཡོད་པད་ང་། སྔར་ལོའི་ནང་དུ། སྔོན་རྩིས་མ་དངུལ་སྒོར་ས་ཡ་ ༦༢ ཙམ་བཏང་ཡོད་པ་དེ་ནི་སྔོན་གྱི་ལས་གཞིའི་མ་དངུལ་ལྡབ་གསུམ་ཆགས་ཡོད་པ་ཞིག་ཡིན་སྐོར་དང་། དེ་བཞིན་རྒྱ་ནག་གི་གསར་ལམ་ཁག་ཏུ་གནས་ཚུལ་ཐོན་པའི་ནང་དུ། ཕྱི་ལོ་ ༢༠༡༥ ལོ་ནས་རྒྱ་ནག་དམར་ཤོག་སྲིད་གཞུང་གི་ཆེད་བསྐོས་ཀྱི་ལས་བྱེད་གྲངས་ ༦༥༧༥ ལྷག་གིས་བོད་ཁུལ་གྱི་དགོན་སྡེ་གྲངས་ ༡༧༨༧ གྱི་ནང་དུ་ལྟ་རྟོག་གི་ལས་ཀ་བྱེད་ཀྱི་ཡོད་པར་འཁོད་ཡོད་པར་བལྟས་ན། མ་མཐའ་ཡང་དགོན་སྡེ་རེ་རེའི་ནང་དུ་རྒྱ་ནག་གིས་ཆེད་དུ་མངགས་གཏོང་བྱས་པའི་ལས་བྱེད་གསུམ་བཞི་རེ་ཡོད་པར་ཡོངས་གྲགས་གནང་འདུག
གཞན་ཡང་རྒྱ་ནག་གིས་དགོན་སྡེ་ཁག་གི་ནང་དུ་སློབ་གསོ་བཅོས་བསྒྱུར་གྱི་ལས་གཞི་སྤེལ་ནས་གྲྭ་བཙུན་རྣམས་རྒྱ་ནག་དམར་ཤོག་སྲིད་གཞུང་ལ་བློ་སེམས་དཀར་དགོས་བའི་གནོད་ཤུགས་སྤྲོད་ཀྱི་ཡོད་པ་མ་ཟད། རང་ཉིད་ཀྱི་ཆོས་ལུགས་ཀྱི་དད་མོས་ཡོངས་སུ་བློས་བཏང་ནས། རྒྱ་ནག་གིས་རྩ་འཛུགས་བྱས་པའི་རྩ་འཛིན་བཞི་ཞེས་པའི་སྲིད་བྱུས་བཙན་དབང་གིས་ལག་བསྟར་གྱིས། གྲྭ་བཙུན་རྣམས་རྒྱ་ནག་གི་དྲིལ་བསྒྲགས་པ་བྱེད་དུ་འཇུག་བཞིན་པ་དང་། དེ་བཞིན་རྒྱ་ནག་གིས་ད་ཆ་བོད་ཁུལ་དུ་གྲྭ་བཙུན་རྣམས་ལ་བཙན་དབང་གིས་༸གོང་ས་མཆོག་ལ་མཚན་སྨོད་བྱེད་དུ་འཇུག་བཞིན་པ་ཁོ་ན་ཞིག་མ་ཡིན་པར། ཐ་ན་གང་ཉིད་མཆོག་གི་ཡང་སྲིད་ཀྱི་ངོས་འཛིན་གྱི་བདག་དབང་ཡང་རྒྱ་ནག་ལ་ཡོད་པར་བསྙད་ནས་ཕྱོགས་ཡོངས་ནས་བོད་བརྒྱུད་ནང་བསྟན་དེ་རྒྱ་བསྒྱུར་བྱེད་བཞིན་པ་མངོན་གསལ་གནང་འདུག
དེ་ལྟ་བུའི་རྒྱ་ནག་གི་བྱེད་ཕྱོགས་དང་འབྲེལ་ནས། ལས་འགུལ་ཁང་གིས་དུས་རབས་མང་པོའི་རང་བོད་ཀྱི་ཆོས་དང་རིག་གཞུང་གི་ལྟེ་བར་གྱུར་བའི་བོད་ཁུལ་གྱི་དགོན་སྡེ་མང་པོ་ཞིག་རྒྱ་ནག་གི་བཙན་དབང་གི་དོ་དོམ་དྲག་གནོན་གྱི་འོག་ནས་རིམ་བཞིན་ཉམས་དམས་སུ་འགྲོ་བཞིན་ཡོད་པར་སེམས་འཚབ་ཡོད་པར་འཁོད་པ་དང་སྦྲགས། ད་ཆ་རྒྱ་ནག་གིས་རྩ་འཛུགས་བྱས་པའི་དགོན་སྡེ་ཁག་གི་སྒྲིག་སྲོལ་གྱི་ནང་དུ། གྲྭ་མང་གི་འགྲོ་འདུག་ལ་བཀག་སྡོམ་བྱས་ཡོད་སྟབས། གྲྭ་བཙུན་རྣམས་ཀྱིས་རང་དབང་གི་སྒོ་ནས་དགོན་སྡེ་ཕན་ཚུན་གྱི་བར་དུ་འགྲུལ་སྐྱོད་ཀྱིས་རང་ནང་ཆོས་འཆད་ཉན་གྱི་སློབ་དཔོན་བསྟེན་སྲོལ་གྱི་ལམ་ཁ་དེ་ཡང་ཡོངས་སུ་བཀག་ཟིན་པར་བརྗོད་འདུག
དེ་བཞིན་དམར་ཤོག་སྲིད་གཞུང་གིས་དགོན་སྡེ་ཁག་་གི་སྲོལ་རྒྱུན་གྱི་ཤེས་ཡོན་སློབ་གསོའི་ལམ་ལུགས་ལ་བསྒྱུར་བཅོས་བཏང་སྟེ། ཕྲུ་གུ་རྣམས་ཀྱིས་ལོ་ན་གཞོན་དུས་ནས་ནང་ཆོས་ལ་སློབ་སྦྱོང་བྱེད་རྒྱུའི་ལམ་ལུགས་ལ་བཀག་སྡོམ་བྱས་ཡོད་སྟབས། ད་ཆ་བོད་ནང་གི་དགོན་པ་ཁག་གི་ནང་དུ་མི་རབས་བརྗེ་བསྒྱུར་གྱི་བར་ནས་ནང་ཆོས་འཆད་ཉན་གྱི་འབྲེལ་ལམ་ལ་དོ་ཐོག་བྱུང་སྟེ། ཕན་ཚུན་གྱི་བར་དུ་ཧེ་བག་ཆེན་པོ་ཤོར་བཞིན་པ་དང་། དེ་བཞིན་རྒྱ་ནག་གིས་དགོན་པ་ཁག་གི་ནང་དུ་དོ་དམ་ཇེ་ཆེར་བཏན་ནས་གྲྭ་བཙུན་མང་པོ་ཕྱིར་འབུད་གཏོང་གི་ཡོད་པ་དང་། རེ་འགའ་རང་བཞིན་གྱིས་དེ་ལྟ་བུའི་ཁོར་ཡུག་ནས་འདུག་མ་བཟོད་པར་དགོན་པ་ཁག་ནས་ཐོན་བཞིན་པའི་གནས་ཚུལ་ཇེ་མང་དུ་འགྲོ་བཞིན་ཡོད་པ་ལྟར། བོད་ཁུལ་གྱི་འབྲེལ་ཡོད་ཀྱིས་གནས་ཚུལ་མཁོ་སྤྲོད་བྱས་པའི་ནང་དུ། བོད་ཁུལ་སྤྱི་ཡོངས་སུ་གྲྭ་བཙུན་གྱི་གྲངས་ཚད་ཇེ་ཉུང་དུ་འགྲོ་བཞིན་པ་མ་ཟད། གྲྭ་བཙུན་གྱི་དགོན་ཁག་རེ་འགའ་ད་ལྟ་སྟོང་བར་གྱུར་ཡོད་པར་གསུངས་ཡོད་པ་ལུང་འདྲེན་གནང་འདུག
ལས་འགུལ་ཁང་གིས། རྒྱ་ནག་གིས་བོད་ས་བཙན་བཟུང་བྱས་ཏེ་སྲིད་དབང་སྒེར་གཅོད་བྱས་ནས་མི་ལོ་དྲུག་ཅུ་འཁོར་བའི་སྐབས་འདིར། ད་ཆ་བོད་བརྒྱུད་ནང་བསྟན་ཀྱི་གཞི་རྩའི་འཚོ་གནས་ལ་ཉེན་འཚབ་ཆེན་པོ་ཞིག་འཕྲད་བཞིན་པ་མངོན་གསལ་གྱིས། ལས་འགུལ་ཁང་གི་ཐེངས་འདིའི་བོད་ནང་གི་ཆོས་ལུགས་དང་འབྲེལ་བའི་གནད་དོན་དེས་རྒྱ་ནག་གིས་བོད་བརྒྱུད་ནང་བསྟན་རྒྱ་བསྒྱུར་བྱེད་བཞིན་པ་དེ་གསལ་འདོན་བྱེད་ཐུབ་པར་རེ་བ་བྱེད་ཀྱི་ཡོད་པར་བསྒྲགས་པ་དང་ལྷན་དུ། རྒྱལ་སྤྱིའི་སྤྱི་ཚོགས་ཡོངས་ཀྱིས་བོད་ནང་གི་བོད་མིའི་ཆོས་ལུགས་རང་དབང་གི་ཆེད་དུ་མངོན་གསལ་གྱིས་གསུང་འབྱོན་དགོས་བར་རེ་སྐུལ་ཞུས་འདུག
