བོད་དོན་རྒྱབ་སྐྱོར་བ་ཞིག་གི་སྐུ་ཟླ་འདས་གྲོངས་སུ་གྱུར་བར་བོད་མི་ཚོས་མཆོད་འབུལ་སྨོན་ལམ་ཚོགས་པ།

རེས་གཟའ་སྤེན་པའི་ཉིན་འདི་ག་རྒྱ་གར་གྱི་རྒྱལ་ས་ལྡི་ལིར་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་རྒྱུན་རིང་ནས་ཞལ་ཞེ་གཉིས་མེད་ཀྱིས་བོད་དོན་རྒྱབ་སྐྱོར་གནང་མཁན་སློབ་དཔོན་ Anand Kumar མཆོག་གི་སྐུ་ཟླ་ལྕམ་སྐུ་ Manjula Rathore མཆོག་སྙུང་གཞི་བཞེས་རྐྱེན་སྐུ་ཚེའི་འཕེན་པ་རྫོགས་སྟབས་ལྡི་ལི་ཁུལ་དུ་ཡོད་པའི་བོད་མི་ཚོས་གདུང་སེམས་མཉམ་བསྐྱེད་ཀྱི་མཆོད་འབུལ་སྨོན་ལམ་ཚོགས་སོང་།རྒྱལ་ས་ལྡི་ལིར་རྟེན་གཞི་བྱས་པའི་ཧིན་བོད་མཛའ་འབྲེལ་ཚོགས་པའི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་སློབ་དཔོན་ཨཱ་ནཾད་ཀུ་མཱར་མཆོག་ནི་རྒྱ་གར་གྱི་སྤྱི་ཚོགས་རིང་ལུགས་ཀྱི་ལྟ་གྲུབ་འཛིན་མཁན་ཆབ་སྲིད་དཔོན་རིགས་གོང་མ་ཚོའི་རྗེས་འཇུག་པ་ཞིག་ཡིན་པ་མ་ཟད་ཞལ་ཞེ་གཉིས་མེད་ཀྱིས་མེས་པོ་དེ་དག་གི་བཞེངས་ཕྱོགས་ལྟར་བོད་དོན་ལ་རྒྱབ་སྐྱོར་རྒྱུན་སྐྱོང་གནང་མཁན་ཞིག་དང་། ཁོང་གིས་དེ་ལྟར་གནང་རྒྱུའི་རྒྱབ་རྟེན་གཙོ་བོ་ནི་ཁོང་གི་སྐུ་ཟླ་དམ་པ་དེ་ཉིད་ཡིན་པ་འགྲེལ་བརྗོད་སོགས་གནང་ཡོད། རྒྱལ་ས་ལྡི་ལིའི་གྷཾན་དྷཱི་ཞི་བའི་ཐེབས་རྩར་གོ་སྒྲིག་ཞུས་པའི་མཆོད་འབུལ་སྨོན་ལམ་གྱི་མཛད་སྒོ་ཐོག་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་དང་ལྡི་ལི་ས་གནས་འགོ་འཛིན་གྱིས་དབུས་པའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམས་མཉམ་ཞུགས་གནང་ཡོད་པ་དང་། ལྷག་དོན་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་འགན་འཛིན་སྐུ་ཞབས་ Rinchen Khandu Krimey མཆོག་དང་བོད་ཀྱི་གྲོགས་པོ་ཚོགས་པའི་དྲུང་ཆེ་ Manoj Kumar ལགས་སོགས་མཆོད་འབུལ་སྨོན་ལམ་སྐབས་ཐུགས་གསོའི་གསུང་བཤད་གནང་ཡོད།