ཁ་སང་དབྱིན་ཡུལ་དུ་རྟེན་གཞི་བྱས་པའི་ Free Tibet ཞེས་པས་རྒྱ་ནག་དམར་ཤོག་སྲིད་གཞུང་གིས་བོད་ཁུལ་མཛོད་དགེ་ཁུལ་དུ་ཞིང་འབྲོག་མང་ཚོགས་ལ་བཙན་བཀའ་བཏང་ནས་རང་ཁྱིམ་དུ་ཞི་ཅིན་ཕིང་གི་པར་སྒྲིག་གཤོམ་བྱེད་དུ་བཅུག་པའི་གནས་ཚུལ་བྱུང་འདུག 
དམར་ཤོག་སྲིད་གཞུང་གིས་བོད་མིར་རྣམས་ལ་བཙན་དབང་གིས་ལས་འགུལ་དེ་འདྲ་ཞིག་སྤེལ་དོན་ནི་བོད་རིགས་མི་མང་གིས་སྲིད་གཞུང་ལ་བློ་སེམས་དཀར་བའི་མཚོན་བྱེད་ཀྱི་ལས་གཞི་གསར་པ་ཞིག་ཡིན་པར་འགྲེལ་བརྗོད་གནང་འདུག
སྔོན་ཆད་རྒྱ་ནག་གི་དབུལ་སྐྱོར་མཁྲེགས་གཏོར་གྱི་སྲིད་བྱུས་ཀྱི་འོག་ན་ཡོད་པའི་ཁྱིམ་ཚང་རྣམས་ཀྱིས་ངེས་བར་དུ་རང་ཁྱིམ་དུ་རྒྱ་ནག་དམར་ཤོག་གི་འགོ་ཁྲིད་རིམ་པའི་པར་སྒྲིག་གསོམ་བྱེད་དགོས་པ་ལས་བོད་ཁྱིམ་གཞན་རྣམས་ལ་ལས་གཞི་དེ་སྤེལ་མེད་ཀྱང་ད་ཆ་མཛོད་དགེ་ཁུལ་དུ་གཅིག་གྱུར་གྱིས་ཁྱིམ་ཚང་ཡོངས་ཀྱིས་དམར་ཤོག་འགོ་ཁྲིད་ཀྱི་པར་སྒྲིག་གཤོམ་བྱེད་དུ་འཇུག་གི་ཡོད་པ་ཡོངས་གྲགས་གནང་འདུག
དེ་བཞིན་ Tibet watch ཞེས་པའི་བོད་གནས་ཉམས་ཞིབ་ཁང་གིས་གནས་ཚུལ་མཁོ་སྤྲོད་བྱས་པ་ལྟར་ན་བོད་ཁུལ་གྱི་རྒྱ་ནག་གི་དཔོན་རིགས་ཀྱིས་ས་གནས་མི་མང་ལ་རྒྱ་ནག་དམར་ཤོག་སྲིད་གཞུང་གི་བཀའ་དྲིན་དྲན་དགོས་པ་དང་། སྲིད་གཞུང་གི་ལམ་སྟོན་འོག་ཤར་སྐྱོད་བྱེད་དགོས་ལུགས་བརྗོད་ཡོད་པ་མ་ཟད་མཛོ་དགེ་ཁུལ་གྱི་དགོན་པ་དང་སློབ་གྲྭ དེ་བཞིན་ཞིང་འབྲོག་གི་ཁྱིམ་ཚང་ཡོངས་ཀྱིས་རྒྱ་ནག་གི་དམར་ཤོག་ཚོགས་པའི་འགོ་ཁྲིད་ཀྱི་པར་སྒྲིག་གཤོམ་དགོས་པའི་བཙན་བཀའ་བཏང་ཡོད་པར་ཡོངས་གྲགས་གནང་འདུག
ལས་འཆར་དེའི་འོག་ནས་རྒྱ་ནག་སྲིད་གཞུང་གིས་བོད་ཁུལ་དུ་དམར་ཤོག་ཚོགས་པའི་འགོ་ཁྲིད་ཀྱི་པར་བཀྲམས་ནས་རང་ཁྱིམ་གྱི་མཆོད་གཤོམ་དུ་སྒྲིག་གཤོམ་དགོས་པའི་སྐུལ་མ་བཏང་བ་མ་ཟད། འབྲེལ་ཡོད་དཔོན་རིགས་ཀྱིས་ཁྱིམ་ཚང་དང་དགོན་པ། སློབ་གྲྭ་རེ་རེ་འགྲིམ་ནས་པར་སྒྲིག་གཤོམ་བྱས་ཡོད་མེད་བརྟག་མུས་ཡིན་ཡོངས་གྲགས་གནང་འདུག
གཞན་ཡང་བོད་ཁུལ་དུ་ཕྱི་ལོ་ ༢༠༡༢ ལོ་ནས་བཟུང་རྒྱ་ནག་གིས་བོད་ཁུལ་དུ་དམར་ཤོག་སྲིད་གཞུང་ལ་བློ་དཀར་དགོས་ཤིང་། རྒྱལ་གཅེས་ཀྱི་ལྟ་བ་སྤེལ་དགོས་པའི་ལས་གཞི་མང་དག་ཅིག་བོད་ཁུལ་དུ་སྤེལ་འགོ་ཚུགས་པ་ལྟར་ ༢༠༡༧ ལོ་ནས་བཟུང་རྒྱ་ནག་གིས་ཁ་བྲལ་རིང་ལུགས་པར་འཐབ་རྩོད་ཅེས་པའི་མིང་ཐོག་ནས་བོད་ཁུལ་དུ་ལས་འགུལ་སྤེལ་ཚད་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག
གཞི་རྩའི་རྒྱ་ནག་གིས་བོད་ཁུལ་དུ་རྒྱལ་གཅེས་ཆོས་གཅེས་ཀྱི་སློབ་གསོ་རྒྱ་ཆེར་སྤེལ་དོན་གཙོ་བོ་ནི་བོད་རིགས་མི་མང་གིས་༸གོང་ས་ཏཱ་ལའི་བླ་མ་མཆོག་དང་ནང་བསྟན་ཆོས་ལུགས་ལ་བློ་སེམས་དཀར་བའི་འབྲེལ་ལམ་དེ་རྩ་གཏོར་བཏང་ནས་བོད་རིགས་མང་ཚོགས་ཀྱིས་རྒྱ་ནག་གི་སྲིད་གཞུང་ལ་བློ་སེམས་དཀར་བའི་བསམ་བློའི་རྨང་གཞིར་འགྱུར་བ་གཏོང་ཐབས་ཤིག་ཡིན་པར་འགྲེལ་བརྗོད་ཀྱིས་སྲིད་འཛིན་ཞི་ཅིན་ཕིང་གིས་ཆབ་སྲིད་ཀྱི་དབང་ཆ་བཟུང་བ་དང་ལྷན་བོད་ཁུལ་དུ་དམ་དྲག་བྱེད་ཤུགས་ཆེ་རུ་བཏང་སྟེ་བོད་རིགས་མང་ཚོགས་ཀྱི་བློ་ཁ་སྲིད་གཞུང་གི་ཕྱོགས་སུ་བསྒྱུར་ཐབས་ལ་འབད་བཞིན་ཡོད་པར་ཡོངས་གྲངས་གནང་འདུག
