རྒྱ་གར་ནང་ཉིན་རེ་བཞིན་ཏོག་དབྱིབས་གཉན་རིམས་ ༡༩ ཕོག་མཁན་གྱི་གྲངས་འབོར་ཇེ་མང་དུ་འགྲོ་བཞིན་ཁྲོད་འདིར་གཟའ་འཁོར་འདིའི་ནང་རྒྱ་གར་དུ་གནས་བཞུགས་བཙན་བྱོལ་བོད་མིའི་སྤྱི་ཚོགས་ཁྲོད་གཉན་རིམས་ཕོག་མཁན་བོད་མི་ ༣༦ དང་གཉན་རིམ་དེའི་རྐྱེན་གྱིས་བོད་མི་ ༢ འདས་གྲོངས་ཕྱིན་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་དེ་རིང་ཕྱི་དྲོ་ཚོུད་ ༤༌༣༠ སྟེང་གོ་སྒྲིག་གནང་བའི་གསར་འགོད་གསལ་བསྒྲགས་ཐོག་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་བོད་མི་ ༣༦ ལ་ནད་གཞི་ཕོག་པའི་ཁོངས་ནས་ སོ་ན་ཌ་ནས་ ༢ ཅོན་ཏཱ་ར་ནས་ ༢ ཀོ་ལེ་གྷལ་ནས་ ༡ དི་ལྡི་ནས་ ༤ སྦེལ་ཀོབ་ནས་ ༤ བསྟན་འཛིན་སྒང་ནས་ ༡ མེའོ་ནས་ ༢ མེན་སྤར་ནས་ ༡ ཧུན་སུར་ནས་ ༡ རཱཀ་པུར་ནས་ ༡ མོན་གྷོ་འདོད་རྒུ་གླིང་ནས་ ༡༣ ཨུ་ཌི་ཤ་ནས་ ༢ སྡེ་ར་ལྡུན་ནས་ ༡ ལ་དྭགས་ནས་ ༡ བཅས་བོད་མིའི་གཞིས་ཆགས་ཀྱི་ཡོད་པ་གསུངས་སོང་།
དེ་རིང་གི་གསར་འགོད་ལྷན་ཚོགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སྒོ་རྒྱ་དམ་བསྒྲགས་ལྷོད་ཡངས་ཐེངས་བཞི་པ་དང་ལྔ་པར་དམིགས་ནས་བཀའ་ཤག་བརྒྱུད་མང་ཚོགས་ལ་དོན་ཚན་ ༡༤ ཅན་གྱི་འབོད་སྐུལ་གསོལ་འདེབས་ཞུས་ཡོད་པ་ངོ་སྤྲོད་དང་འབྲེལ། ད་རེས་སླར་ཡང་ ཁ་སང་རྒྱ་གར་དབུས་གཞུང་ནས་རྒྱ་གར་ནང་སྒོ་རྒྱ་དམ་བསྒྲགས་ལྷོད་ཡངས་ཐེངས་ ༥ པའི་བཀོད་ཁྱབ་གནང་དོན་ལྟར་ཉེན་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་སློབ་གྲྭ་རིམ་བཞིན་སྒོ་ཕྱེ་ནས་ལས་དོན་གཉེར་ཆོག་པའི་བཀོད་ཁྱབ་ཕེབས་ཡོད་པ་བཞིན་བོད་སློབ་ཁག་གི་འབྲེལ་ཡོད་ཚོས་དང་ཐོག་དེར་འབྲེལ་ཐུག་ཞིབ་བཤེར་རམ་ Contract Tracing Staff ལས་བྱེད་ཆེད་བསྐོ་གནང་སྟེ་སྔོན་འགོག་གི་ལས་དོན་ཁག་འཐུས་ཚང་གནང་དགོས་པ་དང་། འཛིན་གྲྭ་དངོས་སུ་ཚོགས་སྐབས་དགེ་རྒན་རེ་མོས་བྱས་ནས་འཛིན་གྲྭར་ཕེབས་སྐབས་རྒྱང་ཐག་བསྟེན་དགོས་པ། སློབ་ཕྲུག་དེ་དག་སྡེ་ཚན་ཆ་བགོས་གནང་དགོས་པ་མ་ཟད། རེས་གཟའ་ཉི་མ་ལའང་སློབ་གྲྭ་རང་དུ་བཞུགས་བཅུག་དགོས་པ་དང་དགེ་རྒན་དགུང་ལོ་ ༦༥ ཡན་ཅན་ཚོས་སྔོན་འགོག་གི་གནང་སྒོ་ཁག་འཐུས་ཚང་གནང་དགོས་པ་སོགས་ཀྱི་དོན་གནད་གསུམ་གྱི་ཐོག་ནས་ལམ་སྟོན་གནང་སོང་། 
ཁོང་གིས་ད་དུང་འགོག་དབྱེ་ཟུར་འཇོག་ཁང་དུ་བཞུགས་རྒྱུར་འཇིགས་སྣང་གང་ཡང་གནང་མི་དགོས་པའི་ལམ་སྟོན་དང་། དེ་བཞིན་བོད་མིའི་གནས་སྡོད་གནང་ཡུལ་ས་གནས་གང་སར་གོ་སྒྲིག་ཞུས་པའི་འགོག་དབྱེ་ཟུར་འཇོག་ཁང་དུ་དགོངས་པ་ཆེ་བཞེས་ཀྱིས་བཞུགས་དགོས་གནད་ཡིན་པར་གཞེན་སྐུལ་ནན་པོ་གནང་ཡོད།
གཞི་རྩའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གཞིས་ཆགས་ཁག་ཏུ་གཟའ་ཁོར་འདིའི་ནང་བོད་མི་ ༣༦ ལྷག་ལ་ནད་རྟགས་ཡོད་མེད་ཀྱི་རྟོག་ཞིབ་གནང་བ་ལྟར་བོད་མི་ ༢༣ ལ་ནད་དེ་ཐོན་ཡོད་པ་དང་དེ་དག་ལས་མི་ ༡༣ ལ་ནད་རྟགས་གང་ཡང་མེད་པ་རེད་འདུག ད་ལྟའི་ཆར་རྒྱ་གར་དང་བལ་ཡུལ་ནང་གི་ས་གནས་འདྲ་མིན་ ༣༦ ནང་བོད་མི་ཁྱོན་ ༦༤༠༥ ལ་ནད་རྟགས་ཡོད་མེད་བརྟག་དཔྱད་གནང་འདུག་པ་དང་། ལོ་ན་ ༦༠ ཡན་གྱི་བོད་མི་ ༥༠༢༢ དང་། དེ་བཞིན་ཉེན་ཚབས་ཆེ་བའི་བོད་མི་ ༡༣༨༣ བཅས་ལ་དེ་ལྟར་གནང་ཐུབ་འདུག གངས་སྐྱིད་ཁུལ་དུ་མི་ ༡༨༨༨ ལ་རྟོག་ཞིབ་དང་སེམས་ཁམས་འཕྲོད་བསྟེན་དང་འབྲེལ་ནས་བོད་མི་ ༡༠༠ ལ་ལམ་སྟོན་གནང་བ་མ་ཟད། ད་བར་བོད་མི་ ༢༡༡༥༡ ལ་བོད་ཀྱི་གསོལ་སྨན་རིན་མེད་ཐོག་གནང་འདུག
