རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ ༡༩ ཁྱབ་གདལ་ཕྱིན་ནས་ལོ་གཅིག་ལྷག་འགྲོ་མུས་ཁྲོད་འདིར། མང་ཚོགས་རྣམས་ནས་གནས་སྟངས་ཇེ་བཟང་མ་འགྲོ་བར་དུ་ནད་ཡམས་སྔོན་འགོག་གི་ཐབས་ལམ་ཁ་རས་བཞེས་རྒྱུ་དང་ཕྱིར་མ་མ་འགྲོ་བར་རྩོལ་འདོན་གནང་དགོས་པ་དང་། ལྷག་པར་ནད་ཡམས་ཀྱི་ཛ་དྲག་དུས་ཚིགས་འདིར་ཚང་མས་ནུས་པ་མཉམ་སྤུངས་དགོས་པའི་གཞེན་སྐུལ་གནང་སོང་། 
དེ་ཡང་དེ་རིང་ཕྱི་དྲོ་བོད་མིའི་སྒྲིག་འཛུགས་ཀྱི་ COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༠ པའི་ཐོག བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས། ཛ་དྲག་གི་གནས་སྟངས་ཁྲོད་མང་ཚོགས་རྣམས་ནས་ནད་ཡམས་སྔོན་འགོག་གི་ཐབས་ལམ་ཁག་མུ་མཐུད་བསྟེན་གནང་ཡོང་བ་བསྐྱར་ནན་གནང་བ་དང་སྦྲགས། ལྷག་པར་ད་ལྟའི་ཛ་དྲག་གནས་སྟངས་ཁྲོད་ཚོགས་སྒེར་མང་པོས་མདུན་དུ་ཐོན་ནས་ཕྱག་ལས་གནང་བར་ཡི་རང་བསྔགས་བརྗོད་དང་ཐུགས་རྗེ་ཆེ་ཞུས་སོང་བ་མ་ཟད། ད་ལྟའི་ཛ་དྲག་གི་དུས་ཚིགས་སུ་ནད་ཡམས་ལས་ཐར་བར་ང་ཚོ་ཚང་མ་མཉམ་རུབ་ཀྱིས་ནུས་པ་སྤུངས་དགོས་སྐོར་གསུངས་སོང་།
གཞི་རྩའི་གཟའ་འཁོར་འདིའི་ནང་རྒྱ་བལ་གཉིས་ཀྱི་བོད་མིའི་སྤྱི་ཚོགས་ནང་ཁྱོན་ནད་གཞི་ཕོག་མཁན་མི་གྲངས་ ༦༣༦ དང་དེའི་ཁྲོད་ལོ་ན་བགྲེས་ཤོས་དེ་ ༩༨ དང་ཆུང་ཤོས་བྱིས་པ་ལོ་གཅིག་ཆགས་ཀྱི་འདུག ནད་གཞི་ཕོག་མཁན་ཁྲོད་ཕལ་མོ་ཆེར་ནད་རྟགས་ཅུང་མངོན་པ་དང་། གཟའ་འཁོར་འདིར་ནད་ཡམས་རྐྱེན་བོད་མི་ ༡༨ འདས་གྲོངས་སུ་སོང་འདུག
རྩ་བའི་རྒྱ་གར་ནང་ནད་རླབས་གཉིས་པ་དང་འབྲེལ་ནད་གཞི་ཕོག་མཁན་དང་འདས་གྲོངས་སུ་སོང་མཁན་མང་དག་ཅིག་བྱུང་ཡོད་པའི་ཁྲོད་འདིར་བོད་མིའི་འདུས་སྡོད་ཁག་ཏུའང་གནས་སྟངས་ཛ་དྲག་ཏུ་གྱུར་ཡོད་པ་རེད། ནད་ཡམས་དེའི་རྐྱེན། ད་བར་རྒྱ་བལ་གཉིས་ཀྱི་བོད་མིའི་འདུས་སྡོད་དུ་ནད་གཞི་ཕོག་མཁན་ ༤༠༡༣ དང་དྲག་སྐྱེད་བྱུང་མཁན་ ༢༣༨༨ དེ་བཞིན་འདས་གྲོངས་སུ་སོང་མཁན་༡༠༡ དང་ནད་མནར་བཞིན་པ་ ༡༥༢༤ ཆགས་ཀྱི་ཡོད་པ་རེད།
ཚོགས་ཆུང་གི་གསར་འགོད་འབྲེལ་མཐུད་པ་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས། ཐུགས་སྣང་ལམ་སྟོན་དང་སྦྲགས། རྒྱ་གར་ནང་ནད་རླབས་གཉིས་པའི་དུས་ཚིགས་འདིའི་ཁྲོད་བོད་མིའི་འདུས་སྡོད་ཁག་ཏུའང་ནད་གཞི་ཕོག་མཁན་དང་འདས་གྲོངས་སུ་སོང་མཁན་རིམ་པའི་མང་དག་ཞིག་བྱུང་ཡོང་དུས། མང་ཚོགས་རྣམས་ནས་ནད་རྟགས་མངོན་སྐབས་འཕྲལ་མར་བརྟག་དཔྱད་དང་རབ་བྱུང་ན་ནད་ཡམས་ཁྱབ་གདལ་བཀག་འགོག་ཆེད་ཟུར་བཀག་ལ་བཞུགས་དགོས་པ་གསུངས་སོང་། ཕྱོགས་མཚུངས་ཁོང་གི་ཟས་སྤྱོད་གཉིས་ཚུལ་ལྡན་བསྟེན་དགོས་སྐོར་འདི་ལྟར་ལམ་སྟོན་གནང་སོང་། 
མ་ཟད། བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་སྒྲོན་ལགས་ཀྱིས་སྔོན་ཁབ་དང་འབྲེལ་རྒྱ་གར་གཞུང་ནས་ལམ་སྟོན་གསལ་བསྒྲགས་གནང་བའི་དོན་ཚན་ཁག་ཅིག་སྐོར་འགྲེལ་བརྗོད་གནང་བ་དང་ཆབས་ཅིག བོད་མི་རྣམས་ནས་སྔོན་ཁབ་ངེས་པར་དུ་བསྐྱོན་གནང་དགོས་པའི་ལམ་སྟོན་གནང་སོང་།
ཡང་དེའི་བར་ན་ཧི་མ་ཅལ་མངའ་སྡེ་ནང་ནད་མནར་བཞིན་པའི་གྲངས་ཐོ་དེ་བཞིན་སྐབས་རེ་ཆག་པ་དང་ཡང་སྐབས་རེ་རེ་ཞིག་འཕར་བའི་གནས་སྟངས་ཆགས་འདུག དེའི་ཁྲོད་ཉེ་ལམ་རྡ་སྟེང་བོད་ཁྱིམ་དུ་ཐོག་མར་སློབ་ཕྲུག་གསུམ་ལ་ཏོག་དབྱིབས་ནད་གཞི་ཕོག་འདུག་པ་དང་། དེ་ནས་རིམ་པའི་ནད་གཞི་ཁྱབ་གདལ་ཕྱིན་ནས་སློབ་ཕྲུག་ ༦༠ ལྷག་ལ་ནད་གཞི་འགོས་འདུག རླུང་འཕྲིན་ཁང་ནས་དེ་འབྲེལ་རྡ་སྟེང་བོད་ཁྱིམ་གྱི་ངེས་སྟོན་པ་ཚུལ་ཁྲིམས་རྡོ་རྗེ་ལགས་སུ་བཀའ་འདྲི་ཞུ་སྐབས། ད་ལྟ་སློབ་ཕྲུག་ནད་གཞི་ཕོག་མཁན་ཁག་ཅིག་ནད་ལས་དྲག་སྐྱེད་བྱུང་ཡོད་པ་དང་། ནད་གཞི་ཕོག་ཡོད་པའི་སློབ་ཕྲུག་རྣམས་བདེ་པོ་ཐང་པོ་དང་ཛ་དྲག་ཡོད་པ་སུ་ཞིག་ཀྱང་མེད་པ་མ་ཟད། ལྷག་པར་ད་ལྟ་ནད་རྟགས་ཡོད་པ་ཚོར་ནད་གཞི་ཕོག་ཡོད་མེད་ཀྱི་བརྟག་དཔྱད་འགྲོ་བཞིན་ཡོད་སྐོར་གསུངས་སོང་།
