ཟླ་བ་འདིའི་ཚེས་ ༡ རེས་གཟའ་པ་སངས་ཉིན་མོ་དེ་ནི་རྒྱ་ནག་དམར་པོའི་གཞུང་དབུ་བཙུགས་ནས་མི་ལོ་ ༧༢ འགྲོ་བའི་རྒྱལ་སྟོན་ཉིན་ལ་འཛམ་གླིང་ས་ཕྱོགས་གང་སར་གནས་སྡོད་བོད་མི་ཚོས་རྣམ་པ་འདྲ་མིན་ཐོག་ནས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་ལྟར་དེ་ཉིན་ཡོ་རོབ་རྒྱལ་ཁབ་དབྱིན་ཡུལ་དང་ཨོ་སི་ཀྲི་ཡ། ཕ་རན་སི། ཇར་མ་ནི། སུད་སི་སོགས་ཀྱི་ནང་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་དང་ཡུར་གུར་བ། ནང་སོག དེ་བཞིན་ཧོང་ཀོང་། བོད་དོན་རྒྱབ་སྐྱོར་བ་སོགས་ཀྱིས་ངོ་རྒོལ་གྱི་ལས་འགུལ་སྤེལ་ཡོད་པ་རེད།
ཉིན་འདིར་ཡོ་རོབ་རྒྱལ་ཁབ་ཨོ་སི་ཀྲི་ཡ་ལ་ཆ་མཚོན་ཨོ་སི་ཀྲི་ཡ་བོད་རིགས་ཚོགས་པས་གོ་སྒྲིག་གནང་སྟེ་བོད་མི་ཚོས་ཁུལ་དེའི་རྒྱལ་ས་Vienna ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་ལྷན་འཛོམས་ཀྱིས་བོད་མི་རྐང་འཁོར་བ་ཚོས་བོད་ཀྱི་རྒྱལ་དར་འཕྱར་ནས་རྒྱ་ནག་གཞུང་གིས་འདས་པའི་ལོ་ངོ་ ༦༠ ལྷག་གི་ནང་བོད་མིའི་ཐོག་སྤེལ་བཞིན་པའི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་གྱི་སྐད་འབོད་ལས་འགུལ་ཞིག་སྤེལ་བ་མ་ཟད། དེ་རྗེས་བོད་མི་རྐང་འཁོར་བ་ཚོས་རྒྱ་ནག་གཞུང་ཚབ་མདུན་དུ་རྐང་འཁོར་སྐོར་སྐྱོད་ཀྱི་ལས་འགུལ་དབུ་འཛུགས་ཀྱིས་ཁུལ་དེའི་རྒྱལ་ས་ Vienna ནང་ཡོད་པའི་རྒྱལ་སྤྱིའི་ལས་ཁུངས་ཁག་དང་ཁྲོམ་གཞུང་། དེ་བཞིན་ཕྱི་སྲིད་ལས་ཁུངས་བར་རྐང་འཁོར་སྐོར་སྐྱོད་གནང་འདུག་ཅིང་། སྐབས་དེར་བོད་མི་ལས་འགུལ་ཚོས་བོད་ཀྱི་རྒྱལ་དར་འཕྱར་ཏེ་བོད་ལ་རང་དབང་དགོས། རྒྱ་ནག་གཞུང་གིས་བོད་ནང་བོད་མི་དམར་གསོད་ཀྱི་བྱ་སྤྱོད་སྤེལ་བཞིན་ཁག་འཕྲལ་མར་མཚམས་འཇོག་དགོས། འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས་བོད་མིར་དྲང་བདེན་གནང་དགོས། རྒྱ་ནག་གིས་བཟོས་པའི་ཅ་དངོས་ཉོ་ཚོང་མཚམས་འཇོག་དགོས་ཞེས་པ་སོགས་ཀྱི་འབོད་ཚིག་སྒྲོག་བཞིན་རྔམ་སྟོན་གནང་ཡོད། 
ཨོ་སི་ཀྲི་ཡ་བོད་རིགས་ཚོགས་པས་ཁུལ་དེའི་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པར་རྒྱ་ནག་གཞུང་གིས་བོད་ནང་བོད་མིར་དྲག་གནོན་དང་བོད་ཀྱི་རིག་གཞུང་དང་སྐད་ཡིག་བཅས་པར་རྩ་མེད་གཏོར་བཞིན་ཡོད་པ་སོགས་ཆེད་བཀོད་ཡོད་པའི་ཞུ་སྙན་ཕུལ་བ་དང་འབྲེལ་ཏེ་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་དགོས་པ་དང་རྒྱ་གཞུང་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སོགས་སྤྲོད་དགོས་པའི་ཞུ་གཏུག་ཀྱང་གནང་ཡོད་པ་རེད།
དེ་བཞིན་དབྱིན་ཡུལ་ནང་ཡོད་པའི་བོད་མི་དང་ཡུ་གུར་བ། ཧོང་ཀོང་མང་ཚོགས་ཀྱིས་གཙོས་པའི་ས་གནས་སུ་ཡོད་པའི་གཞུང་འབྲེལ་མིན་པའི་ཚོགས་སྡེ་ཁག་བཅས་མཉམ་འབྲེལ་གྱིས་རྒྱལ་ས་ལོ་ཊོན་ནང་རྟེན་གཞི་བྱས་པའི་ Piccadilly ཐང་ཆེན་དུ་མང་ཚོགས་ཧ་ཅང་མང་པོ་འདུ་འཛོམས་གནང་ནས་རྒྱ་ནག་གཞུང་གི་རྒྱལ་སྟོན་དུས་ཆེན་ལ་ངོ་རྒོལ་གྱི་ལས་འགུལ་སྤེལ་བ་དང་། ལས་འགུལ་བ་རྣམས་ཀྱིས་ Piccadilly ནས་རྒྱ་ནག་གཞུང་ཚབ་ཁང་བར་ཞི་བའི་རྔམ་སྟོན་གྱི་ལས་འགུལ་སྤེལ་བ་མ་ཟད་རྒྱ་ནག་གཞུང་ཚབ་ཁང་དུ་ལས་འགུལ་བ་རྣམས་འདུ་འཛོམས་ཀྱིས་རྒྱ་ནག་གཞུང་གི་སྐར་མ་ལྔ་ཅན་གྱི་རྒྱལ་དར་མེར་བསྲེགས་དང་ཞི་བའི་སྐད་འབོད་སོགས་ཀྱི་ལས་འགུལ་སྤེལ་ཡོད།
ཕ་རན་སི་ནང་རྒྱལ་ས་པེ་རི་སིར་བོད་རང་བཙན་སློབ་ཕྲུག་ཚོགས་པས་སྣེ་ཁྲིད་དེ་ཕ་རན་སི་བོད་རིགས་ཚོགས་པ་དང་ས་གནས་བོད་ཀྱི་གཞོན་ནུ་ལྷན་ཚོགས། ཡུ་གུར་བ། ཧོང་ཀོང་། ནང་སོག དེ་བཞིན་ཐེ་ཝན་བཅས་རྒྱ་ནག་གཞུང་གིས་བཙན་གནོན་ཅན་གྱི་སྲིད་བྱུས་སྤེལ་བའི་འོག་དཀའ་སྡུག་མྱོང་བཞིན་པའི་མི་རིགས་རྣམས་ཀྱིས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་རེད། 
དེ་དང་ཕྱོགས་མཚུངས་སུ་ཉིན་དེར་ཡོ་རོབ་རྒྱལ་ཁབ་ཇར་མ་ནིའི་ Berlin དང་སུད་སི་གྲོང་ཁྱེར་ཇི་ནི་ཝའི་མཉམ་འབྲེལ་རྒྱལ་ཚོགས་བཅས་སུ་བོད་མི་དང་བོད་དོན་རྒྱབ་སྐྱོར་བ། དེ་བཞིན་ཡུ་གུར་བ་དང་ཧོང་ཀོང་མང་ཚོགས་སོགས་ཀྱིས་རྒྱ་ནག་གི་རྒྱལ་སྟོན་དུས་ཆེན་ལ་ངོ་རྒོལ་གྱི་ལས་འགུལ་སྤེལ་ཡོད་པ་རེད།
གཞན་ཡང་ཁེ་ན་ཌ་ནང་གནས་སྡོད་བོད་པའི་ན་གཞོན་གསུམ་གྱིས་མོན་ཏི་རུལ་གྲོང་ཁྱེར་དུ་ཡོད་པའི་རྒྱ་ནག་གཞུང་ཚབ་ཁང་ནས་དབུ་འཛུགས་ཀྱིས་ཊོ་རོན་ཊོ་གྲོང་ཁྱེར་དུ་ཡོད་པའི་རྒྱ་ནག་གཞུང་ཚབ་ཁང་བར་རྒྱལ་སྤྱི་དང་ཁེ་ན་ཌ་གཞུང་ལ་དགོས་འདུན་དོན་ཚན་བཞི་ཆེད་བཏོན་གནང་སྟེ་རྒྱང་སྐྱོད་བང་རྒྱུག་གི་ལས་འགུལ་ཞིག་ཀྱང་སྤེལ་ཡོད།
