ད་བར་རྒྱལ་སྤྱིའི་སྙན་ཐོ་རིམ་པའི་ནང་རྒྱ་ནག་དེ་གསར་འགོད་རང་དབང་ཐོག་ལ་དམ་དྲག་ཤུགས་ཆེ་ཤོས་བྱེད་མཁན་གྱི་རྒྱལ་ཁབ་ཞིག་ཏུ་མངོན་གསལ་གནང་མུས་ཁྲོད་ཁ་སང་ Foreign Correspondent Club of China ཞེས་རྒྱ་ནག་ཏུ་ཕྱག་ལས་གནང་བཞིན་པའི་ཕྱིའི་རྒྱལ་ཁབ་ཀྱི་གསར་འགོད་པའི་མཐུན་ཚོགས་ཀྱི་སྙན་ཐོ་འདོན་སྤེལ་གནང་བར་སྔ་ལོ་ ༢༠༢༠ ལོར་རྒྱ་གཞུང་གིས་ཡུལ་དེར་ཕྱག་ལས་གནང་བཞིན་པའི་ཕྱིའི་གསར་འགོད་པ་དང་གསར་ཁང་ཁག་གི་ཐོག་དམ་དྲག་ཆེས་ཆེར་བྱས་ཡོད་པར་མ་ཟད་ལྷག་པར་དུ་ཏོག་དབྱིབས་གཉན་རིམས་སྔོན་འགོག་ལ་ཁ་གཡར་ནས་གསར་འགོད་པར་སུན་གཙེར་དང་མཐོང་མཆན་མ་སྤྲད་སོགས་ཀྱི་གནད་དོན་མང་དག་ཅིག་གི་ཐོག་ནས་དམ་དྲག་ཤུགས་ཆེ་བྱེད་བཞིན་ཡོད་སྐོར་གསུངས་འདུག
ཁ་སང་རྒྱ་ནག་ནང་གནས་སྡོད་བྱེད་བཞིན་པའི་ཕྱི་རྒྱལ་གསར་འགོད་པའི་མཐུན་ཚོགས་ཀྱིས་འདས་པའི་ཕྱི་ལོ་ ༢༠༢༠ ལོའི་གནས་སྟངས་དང་འབྲེལ་བའི་སྙན་ཐོ་འདོན་སྤེལ་གནང་བར་ལྷན་ཚོགས་ཀྱི་ངོས་ནས་རྒྱ་ནག་ཏུ་གསར་འགོད་ལས་དོན་གཉེར་བཞིན་པའི་གསར་ཁང་དང་གསར་འགོད་པ་བཅས་ལ་འདྲི་རྩད་གནང་སྐབས་ལན་འདེབས་གནང་མཁན་ ༡༥༠ ཙམ་ལས་བྱུང་མེད་པ་དང་། དེའི་ཁོངས་ནས་རྒྱ་ནག་ཏུ་གསར་འགོད་པའི་ལས་རིགས་གཉེར་ཕྱོགས་ཀྱི་གནས་སྟངས་ལ་ཡར་རྒྱས་ཕྱིན་འདུག་ཅེས་གསུང་མཁན་གང་ཟག་གཅིག་ཀྱང་བྱུང་མེད་པའི་ཁར་གནས་སྟངས་དེ་ལོ་གསུམ་གྱི་རིང་དེ་མུར་ལུས་ཡོད་པ་རེད་འདུག
སྙན་ཐོར་གཞིགས་ཚེ་སྔ་ལོར་རྒྱ་ནག་གཞུང་གིས་ལྟ་སྲུང་འཕྲུལ་ཆས་སོགས་གཉན་རིམས་འགོག་ཐབས་དང་འབྲེལ་བའི་ཐབས་བྱུས་ཡོངས་རྫོགས་སྤྱོད་དེ་ཕྱིའི་གསར་འགོད་པ་དང་དེ་དག་གི་རྒྱ་རིགས་ལས་རོགས། དེ་བཞིན་བཅར་འདྲི་ཞུ་ཡུལ་བཅས་ལ་འཇིགས་སྐུལ་དང་སུན་གཙེར་བཟོས་ཡོད་སྐོར་བཀོད་འདུག
དེ་བཞིན་ཉེན་རྟོག་པས་མང་ཚོགས་ཀྱི་འཕྲོད་བསྟེན་བདེ་འཇགས་ལ་ཁ་གཡར་བ་དང་བཙན་དབང་ཐོག་ནས་ཟུར་འཇོག་བྱ་རྒྱུ་སོགས་ཀྱི་ཉེན་བརྡ་བཏང་བར་མ་ཟད་རྒྱ་ནག་ཏུ་གནས་སྡོད་ཆོག་པའི་མཐོང་མཆན་བཀག་སྡོམ་བརྒྱུད་གསར་འགོད་པ་རྣམས་ལ་ཚོར་བ་རྣོ་བའི་ས་ཚིགས་ཁག་ཏུ་བསྐྱོད་རྒྱུར་དམ་དྲག་ཆེས་ཆེར་བྱེད་པའི་ཁྲོད་རྣམ་ཀུན་ལོ་གཅིག་གི་རིང་བསྡད་ཆོག་པའི་མཐོང་མཆན་རག་སར་སྔ་ལོར་གསར་འགོད་པ་ ༡༣ ཙམ་ལ་ཟླ་བ་དྲུག་དང་དེ་ལས་ཉུང་བའི་དུས་ཐུང་གི་ཆོག་མཆན་སྤྲད་འདུག་པ་དང་། ཨ་རི་དང་ལྷན་དུ་འབྲེལ་ལམ་སྡུག་ཏུ་སོང་བར་བརྟེན་རྒྱ་ནག་ནང་དུ་ལས་དོན་གཉེར་བཞིན་པའི་ཨ་རིའི་གསར་འགོད་པ་བཅུ་ལྷག་ཕྱིར་ཕུད་བཏང་བ་དང་དེ་བཞིན་ཨོ་སི་ཊོ་ལི་ཡའི་གསར་འགོད་པ་གཉིས་ལ་སུན་གཙེར་བཟོས་རྐྱེན་ཕྱིར་ལོག་གནང་དགོས་པའི་གནས་སྟངས་སོགས་བྱུང་ནས་གསར་འགོད་པ་རྣམས་ཆབ་སྲིད་ཀྱི་ལག་ཆ་ལྟ་བུར་སྤྱོད་ཀྱི་ཡོད་སྐོར་གསུངས་འདུག
ལྷག་པར་དུ་ཤིན་ཅང་ཁུལ་དུ་གསར་འགོད་ལས་དོན་གཉེར་བཞིན་པ་རྣམས་ལ་དམིགས་བསལ་གྱི་དམ་དྲག་ཆེ་བ་བྱེད་ཀྱི་ཡོད་པ་དང་སྔ་ལོར་རྒྱ་ནག་གི་གཞུང་འབྲེལ་བརྒྱུད་ལམ་ནང་ཕྱག་ལས་གནང་བྱེད་བཞིན་པའི་ཨོ་སི་ཊོ་ལི་ཡའི་མི་སེར་ཡིན་པའི་གསར་འགོད་པ་ Cheng Lei དང་དེའི་རྗེས་སུ་ Bloomberg གསར་ཁང་དུ་ཕྱག་ལས་གནང་བཞིན་པའི་རྒྱ་རིགས་གསར་འགོད་པ་ Haze Fan ལགས་གཉིས་ལ་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་པའི་ཉེས་མིང་འོག་འཛིན་བཟུང་གིས་དུས་ད་ལྟའང་བཙོན་འཇུག་འོག་ཡོད་པར་མངོན་གསལ་གནང་ཡོད་པ་རེད།
དེ་རིང་ AFP གསར་ཁང་གིས་སྙན་ཐོའི་སྐོར་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Wang Wenbin ལ་འདྲི་རྩད་བྱེད་སྐབས་ཁོ་པས་རྒྱ་ནག་གཞུང་གིས་ད་བར་ FCCC ལྷན་ཚོགས་དེ་ངོས་ལེན་བྱེད་ཀྱི་མེད་པ་དང་ལྷན་ཚོགས་ཀྱི་འདོན་སྤེལ་གནང་བའི་སྙན་ཐོ་དེ་རྙོག་གླེང་བཟོ་རྒྱུ་དང་འུར་སྒྲོག་བྱ་རྒྱུར་དམིགས་པ་ཞིག་ཡིན་པར་འགྲེལ་བརྗོད་དང་། རྒྱ་ནག་དེ་ཁྲིམས་ཀྱི་དབང་སྒྱུར་ལྡན་ཞིང་། རྒྱ་ནག་གིས་ཕྱིའི་གསར་ཁང་དང་གསར་འགོད་པ་རྣམས་ལ་རྒྱལ་ཁབ་ཀྱི་ཁྲིམས་གཞིར་བཟུང་ལས་དོན་གཉེར་བར་དགའ་བསུ་ཞུ་བཞིན་ཡོད་པ་ལྟར་གསར་འགོད་པ་དེ་དག་ལ་མུ་མཐུད་མཐུན་རྐྱེན་སྦྱོར་རྒྱུ་ཡིན་སྐོར་བརྗོད་པར་མ་ཟད། གསར་འགོད་རང་དབང་ལ་ཁ་གཡར་ནས་རྒྱ་ནག་ལ་མི་དགའ་བའི་གནས་ཚུལ་རྫུན་མ་སྤེལ་བཞིན་ཁག་ལ་དགག་པ་ཡོད་ཅེས་བཤད་འདུག
རྩ་བའི་ Foreign Correspondents’ Club of China ཞེས་པ་ནི་རྒྱ་ནག་ནང་ཕྱག་ལས་གནང་བཞིན་པའི་རྒྱལ་སྤྱིའི་གསར་འགོད་པའི་མཐུན་ཚོགས་ཤིག་ཡིན་པ་དང་མཐུན་ཚོགས་དེར་རྒྱལ་སྤྱིའི་རྒྱལ་ཁབ་འདྲ་མིན་ ༤༠ ཙམ་གྱི་གསར་འགོད་པ་དང་གསར་འགོད་ལས་རིགས་ཀྱི་མཁས་དབང་། དེ་བཞིན་གཞུང་འབྲེལ་གྱི་མི་སྣ་བཅས་ཡོད་པ་རེད།
