ཟླ་བ་སྔོན་མའི་ཟླ་མཇུག་དང་། ཟླ་བ་འདིའི་ཚེས་འགོ་ལ། བཞུགས་སྒར་རྡ་རམ་ས་ལའི་ཉེ་འདབས་སུ་ཆགས་པའི་དཔལ་ལྡན་རྒྱུད་སྟོད་གྲྭ་ཚང་གི་ནང་དུ་ཏོག་དབྱིབས་རིམས་ནད་འགོས་ཁྱབ་ཆེ་ཆེར་བྱུང་སྟེ། གྲྭ་མང་ ༣༠༠ ལྷག་ཙམ་ལ་བརྟག་དཔྱད་བྱས་པའི་གྲུབ་དོན་དུ། གྲྭ་མང་གི་གཙོ་བྱས་པའི་མི་སྐྱ་རེ་ཟུང་སྟེ། ཁྱོན་རྒྱུད་སྟོད་གྲྭ་ཚང་གི་ནང་དུ་གནས་སྡོད་བྱེད་མཁན་གྱི་བོད་མི་ ༡༥༦ ལྷག་ལ་ནད་རྟགས་ཐོན་ནས་ད་ལྟའི་ཆར་རྒྱ་གར་དབུས་གཞུང་དང་། དབུས་བོད་མིའི་སྒྲིག་འཛུགས་ཀྱི་ལམ་སྟོན་ལྟར་གྲྭ་ཚང་རང་གི་ནང་དུ་ཟུར་བཀག་བྱས་འདུག
དེ་རིང་འདི་གའི་གསར་འགོད་པས་ཞལ་པར་བརྒྱུད་ནས་རྒྱུད་སྟོད་གྲྭ་ཚང་གི་ཤེས་ཡོན་འགན་འཛིན་བློ་བཟང་ཀླུ་སྒྲུབ་ལགས་སུ་ད་ལྟའི་གྲྭ་ཚང་གི་གནས་བབ་སྤྱི་ཡོངས་ཀྱི་ཆ་ནས་བཀའ་འདྲི་ཞུས་པར་ཁོང་གིས། སྤྱི་ཡོངས་ཀྱི་ཆ་ནས་བརྟག་དཔྱད་རིམ་པ་བྱས་པའི་བརྒྱུད་རིམ་གྱི་ཁྲོད་ནས་གྲྭ་ཚང་གི་ནང་དུ་ནད་པའི་གྲངས་ཐོ་གང་འཚམས་ཤིག་ཐོན་ཡོད་ནའང་། ནད་པ་གཅིག་ཏོག་ཙམ་ཛ་དྲག་གིས་ད་ལྟའི་ཆར་ཀང་ར་རྫོང་ཁོང་གི་ཊན་ཊྲ་སྨན་ཁང་དུ་སྨན་བཅོས་བྱེད་བཞིན་པ་མ་གཏོགས། ནད་རྟགས་ཐོན་པའི་ནད་པ་གཞན་རྣམས་ཟུར་བཀག་བྱས་པ་ཙམ་ལས་རིམས་ནད་ཀྱི་རྐྱེན་གྱིས་ཉེན་ཚབ་ཆེ་བའི་དཀའ་ངལ་ཆེན་པོ་གང་ཡང་འཕྲད་ཀྱི་མེད་པར་གསུངས་སོང་།
དེ་བཞིན་ཁོང་གིས། སྤྱི་ཡོངས་ཀྱི་ཆ་ནས་གྲྭ་ཚང་གི་ནང་དུ་རིམས་ནད་ཁྱབ་བརྡལ་གྱིས་གྲྭ་མང་གང་འཚམས་ཤིག་ཟུར་འགོག་བྱེད་བཞིན་ཡོད་ནའང་། རྒྱ་གར་དབུས་གཞུང་གི་བཀའ་དྲིན་དང་། རང་རེའི་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་གཙོ་བྱས་པའི་བདེ་ལེགས་སྨན་ཁང་སོགས་ཀྱི་རོགས་འདེགས་ཀྱི་འོག ནད་རྟགས་ཐོན་ནས་ཟུར་བཀག་བྱེད་བཞིན་པའི་གྲྭ་མང་ལ་དུས་ཐོག་ཏུ་གསོལ་སྨན་སྤྲོད་བཞིན་པ་ཡོད་སྟབས་དཀའ་ངལ་སོགས་གང་ཡང་མེད་སྐོར་གསུངས་བ་དང་སྦྲགས། བརྒྱུད་ལམ་ཁག་ཅིག་གི་ཐོག་གི་གནས་ཚུལ་ཁུངས་ལྡན་མ་ཡིན་པ་ཞིག་ཁྱབ་བཞིན་ཡོད་པ་ནི། དེང་སྐབས་རྒྱུད་སྟོད་གྲྭ་ཚང་གི་ཆོས་ཐོག་གི་དུས་ཚིགས་དང་ཁེལ་ཡོད་སྟབས། ཕྱི་ནས་ཆོས་ཐོག་ལ་ཕེབས་པ་ཁག་ཅིག་ཡོད་པ་ལྟར། མང་ཚོགས་ཀྱི་ཁྲོད་དུ་ཐེངས་འདིའི་རིམས་ནད་འགོས་ཁྱབ་དེ་ཕྱི་ནས་ཕེབས་མཁན་རྣམས་བརྒྱུད་ནས་ཁྱབ་བརྡལ་བྱུང་བཞིན་ཡོད་སྐོར་བརྗོད་མཁན་བྱུང་ཡོད་ནའང་། བརྟག་དཔྱད་རིམ་པ་བྱས་པའི་ནང་དུ་ཕྱི་ནས་ཕེབས་མཁན་རྣམས་ཀྱི་ཁྲོད་དུ་རིམས་ནད་འགོས་ཁྱབ་བྱུང་མཁན་གཅིག་ཀྱང་མེད་པར་གསུངས་སོང་།
གཞན་ཡང་གསར་འགོད་པས་རྩ་བའི་རྒྱ་ནག་གི་རིམས་ནད་འདི་རྒྱལ་སྤྱིའི་ས་ཆ་གང་སར་ཁྱབ་བརྡལ་འགྲོ་བཞིན་ཡོད་པ་ལྟར། ཐེངས་འདིར་རྒྱུད་སྟོད་གྲྭ་ཚང་གི་ནང་དུ་ཡང་ཁྱབ་བརྡལ་བྱུང་སྟེ་གྲྭ་མང་བརྒྱ་དང་ལྔ་བཅུ་ལྷག་ལ་འགོས་ཁྱབ་བྱུང་ཡོད་སྟབས། ཁུལ་གནས་སྡོད་བྱེད་བཞིན་པ འི་ཡུལ་མི་རྣམས་ཀྱིས་རྣམ་འགྱུར་གྱི་ཐད་ནས་བཀའ་འདྲི་ཞུས་པར་ཁོང་གིས། ཡུལ་མི་རྣམས་ཀྱིས་སྡང་སྡུག་གི་རྣམ་འགྱུར་སོགས་གང་ཡང་བསྟན་མེད་པར་ཞི་བདེ་ལྷིང་འཇགས་ཀྱི་ངང་གནས་ཡོད་པར་གསུངས་སོང་།
དེ་བཞིན་ཁོང་གིས། རྒྱུད་སྟོད་གྲྭ་ཚང་དང་འབྲེལ་ཡོད་ཀྱི་དད་ལྡན་མང་ཚོགས་རྣམས་ཀྱིས་ནད་པའི་དྲང་ཐོ་ལ་གཞིགས་ཏེ་ཐུགས་ཁྲལ་གནང་མཁན་བྱུང་གི་ཡོད་ནའང་། ནད་རྟགས་ཐོན་པའི་གྲངས་ཀ་ཙམ་ལས། དཀའ་ངལ་ཆེན་པོ་གང་ཡང་འཕྲད་མེད་སྐོར་ངོ་སྤྲོད་ཀྱིས། རྒྱུད་སྟོད་གྲྭ་ཚང་དང་འབྲེལ་ཡོད་རྣམས་ཀྱིས་ཐུགས་ཁུར་རྩ་མ་ནས་གནང་མི་དགོས་ཞེས་འབོད་སྐུལ་ཞུས་སོང་།
གཞི་རྩའི་རྒྱུད་སྟོད་གྲྭ་ཚང་གི་ནང་དུ་སྤྱི་ཡོངས་ཀྱིས་གྲྭར་ཞུགས་བྱས་ཡོད་མཁན་གྲྭ་མང་ ༤༠༠ ལྷག་ཡོད་ནའང་། ཐེངས་འདིར་ཁག་ཅིག་ས་གནས་ཀྱི་དགོན་པའི་ཡན་ལག་ཁག་ཏུ་ཕེབས་པ་དང་། ཁག་ཅིག་དུས་བསྟུན་གྱིས་གུང་གསེང་ལ་ཕྱིན་ཡོད་སྟབས། ད་ཆ་གྲྭ་མང་༣༢༠ ཙམ་ལས་མེད་པ་ལྟར་ཚང་མ་བརྟག་དཔྱད་བྱས་ཟིན་ཡོད་པ་དང་། ཟུར་བཀག་བྱས་པའི་ནད་པ་རྣམས་ལ་བདུན་ཕྲག་གཉིས་ཀྱི་ནང་དུ་ནད་རྟགས་ངན་པ་གང་ཡང་མ་ཐོན་ན་བསྐྱར་དུ་བརྟག་དཔྱད་བྱེད་མི་དགོས་བར་རྒྱུན་ལྡན་ལྟར་ཆོས་ཞུགས་བྱས་ཆོག་པར་གོང་རིམ་ནས་ལམ་སྟོན་གནང་འདུག
