རྒྱ་ནག་གི་ཉམས་ཞིབ་པ་ Adrain Zenz ལགས་ཀྱིས་རྒྱ་གཞུང་གིས་བོད་ཁུལ་དུ་འཆར་གཞི་དང་ལྡན་པའི་ཕུགས་རྒྱང་རིང་པོའི་སྲིད་བྱུས་ལག་བསྟར་གྱིས་བོད་མིའི་ངོ་བོ་རྩ་མེད་བཟོ་བཞིན་ཡོད་སྐོར་གསུངས་སོང་།
ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ལྷན་ཚོགས་ཐེངས་ ༤༦ འཚོགས་བཞིན་པ་བསྟུན་ཁ་སང་ཕྱི་དྲོ་སུད་སི་བོད་ཀྱི་སྐུ་ཚབ་དོན་གཅོད་ཁང་གིས་ཐད་གཏོང་དྲྭ་ལམ་བརྒྱུད་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་ཟུར་ཚོགས་ཤིག་སྐོང་ཚོགས་གནང་ཡོད་པ་དང་། སྐབས་དེར་ཨ་རི་ནང་རྟེན་གཞི་བྱས་པའི་ Victims of Communism ཞེས་པའི་ཚོགས་པའི་རྒྱ་ནག་གི་ཉམས་ཞིབ་པ་དང་མཁས་དབང་སྐུ་ཞབས་ Adrain Zenz ལགས་ཀྱིས་ཉེ་ཆར་སྤེལ་བའི་དཔྱད་རྩོམ་བོད་ནང་རྒྱ་ནག་གཞུང་གིས་དམག་སྦྱོང་ལམ་ནས་བོད་མིའི་མང་ཚོགས་ལ་ལས་རིགས་སྦྱོང་བརྡར་སྤྲོད་བཞིན་ཡོད་ཅེས་པའི་བརྗོད་གཞི་ཐོག་གཏམ་བཤད་སྤེལ་བ་དང་འབྲེལ། ཁོང་གིས་རྒྱ་ནག་གཞུང་གིས་བོད་ཁུལ་དབུལ་སྒྲོལ་དགག་སྒྲོལ་ཞེས་པའི་ལས་གཞི་འོག་བོད་མིའི་འབྲོག་སྡེ་ཁག་གྲོང་སྡེར་གཏན་སྡོད་གཞི་སྤོ་རུ་འཇུག་པ་དང་། དེ་བཞིན་གྲོང་གསེབ་ཁུལ་གྱི་མང་ཚོགས་རྣམས་ལས་རིགས་སྦྱོང་བརྡར་དང་འབྲེལ་ནས་རྒྱ་ནག་ནང་བཟོ་གྲྭ་ཁག་ཏུ་བགོས་འགྲེམས་སོགས་ཐབས་བྱུས་དང་ཕུགས་རྒྱང་རིང་པོར་དམིགས་པའི་འཆར་གཞི་དང་ལྡན་པའི་སྲིད་བྱུས་ལག་བསྟར་བརྒྱུད་དེ་བོད་ཁྱོན་ཡོངས་ལ་སྟངས་འཛིན་སྟབས་བདེ་ཐུབ་རྒྱུ་དང་ལྷག་པར་དུ་བོད་མིའི་སྐད་ཡིག་དང་རིག་གཞུང། བོད་མི་རིགས་ཀྱི་ངོ་བོ་བཅས་ཕྱོགས་རྩ་མེད་བཟོ་བཞིན་ཡོད་ཅེས་གསུངས་ཡོད།
དེ་བཞིན་ཁ་སང་ལས་རིམ་ཐོག་གཏམ་བཤད་གནང་མཁན་བོད་དོན་མཁས་དབང་དང་རྩོམ་པ་པོ་ Kate Saunders ལགས་ཀྱིས་བོད་ནང་ཆོས་དད་དང་སྤྱི་མང་། དེ་བཞིན་རིག་གཞུང་ཐོབ་ཐང་གི་གནས་བབ་སྐོར་གཏམ་བཤད་སྤེལ་བ་དང་འབྲེལ་ནས་རྒྱ་ནག་གཞུང་གིས་དམ་དྲག་གི་སྲིད་བྱུས་འདྲ་མིན་ལག་བསྟར་བརྒྱུད་བོད་མིའི་ཆོས་དད་རང་དབང་དང་སྐད་ཡིག་རང་དབང་། རིག་གཞུང་རང་དབང་གི་གནས་བབ་ཉིན་རེ་བཞིན་ཆེས་རྡོག་རོལ་གཏོང་བཞིན་པར་བརྟེན་ཛ་དྲག་རང་བཞིན་དུ་གྱུར་ཡོད། ལྷག་དོན་ཉེ་ཆར་རྒྱ་གཞུང་གིས་བཙོན་འོག་ཏུ་འདས་གྲོངས་སུ་གྱུར་བའི་དཀོན་མཆོག་སྦྱིན་པ་ལགས་ཀྱི་གནས་ཚུལ་ལུང་འདྲེན་དང་སྦྲགས། ད་ཆ་བོད་ས་ཁྱོན་ཡོངས་སུ་རྒྱ་ནག་གཞུང་གིས་བོད་མིའི་འགྲོ་སྡོད་སྤྱོད་གསུམ་ལ་ཧ་ཅང་ལྟ་སྲུང་དང་དམ་དྲག་ཆེས་ཆེར་བྱེད་བཞིན་ཡོད་སྟབས་བོད་ནང་གི་དངོས་ཡོད་གནས་ཚུལ་ཕྱི་ཕྱོགས་སུ་མཁོ་སྤྲོད་གནང་རྒྱུར་བོད་ནང་གི་བོད་མི་ཚོའི་ཚེ་སྲོག་ལ་ཧ་ཅང་ཉེན་ཁ་ཆེན་པོ་ཆགས་པར་གསུངས་ཡོད།
གླེང་མོལ་རིམ་དེའི་ཐོག་སུད་སི་སྐུ་ཚབ་དོན་ཁང་གི་འགྲོ་བ་མིའི་ཐོབ་ཐང་གི་དམིགས་བསལ་སྲི་ཞུ་བ་འཕྲིན་ལས་ཆོས་སྐྱིད་ལགས་ཀྱིས་ཉེ་ཆར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱ་གཞུང་གི་ཕྱི་སྲིད་བློན་ཆེན་ Wang Yi ཡིས་བོད་ནང་འགྲོ་བ་མིའི་ཐོབ་ཐང་ཡར་རྒྱས་དང་མང་ཚོགས་ཀྱི་འཚོ་བར་འོད་སྟོང་འབར་བ་བྱུང་ཡོད་ཅེས་པའི་གཏམ་བཤད་ལ་སྤེལ་བར་དཔྱད་ཞིབ་ཀྱི་རང་བཞིན་ལྡན་པའི་ཐོག་ནས་དགག་ལན་ཚུལ་དུ་ད་བར་རྒྱལ་ཚོགས་ཀྱི་ཁྱད་ལས་རྟོག་ཞིབ་སྡེ་ཁག་དང་འགྲོ་བ་མིའི་ཐོབ་ཐང་སྲུང་སྐྱོབ་སྡེ་ཁག་གི་སྙན་ཐོ་ཁག་ལུང་འདྲེན་གྱིས་དོན་དངོས་ཐོག་རྒྱ་གཞུང་གིས་བོད་ནང་གི་བོད་མིའི་འགྲོ་སྡོད་སྤྱོད་གསུམ་ལ་དམ་དྲག་དང་ལྟ་སྲུང་གི་ལས་གཞི་ཁག་གི་ཐོག་ཚད་མཐོའི་ཡར་རྒྱས་ཕྱིན་པ་ལས་འགྲོ་བ་མིའི་ཐོབ་ཐང་གི་གནས་བབ་ཐད་ཡར་རྒྱས་གང་ཡང་ཕྱིན་མེད་སྐོར་གསུངས་ཡོད་པ་རེད།
རྣམ་ཀུན་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུ་དང་འབྲེལ་སྐོང་ཚོགས་གནང་སྲོལ་ཡོད་པའི་བོད་དོན་དང་འབྲེལ་བའི་ཟུར་ཚོགས་དེ་རིགས། རྒྱལ་ཚོགས་ཀྱི་ཚོགས་འདུ་དུས་མཉམ་རྒྱལ་ཚོགས་ནང་ཚོགས་ཀྱི་ཡོད་ཀྱང་། ད་ལྟའི་རྒྱ་ནག་ནས་མཆེད་པའི་ཏོག་དབྱིབས་ནད་ཡམས་རྐྱེན་གྱིས་ད་ལན་གྱི་རྒྱལ་ཚོགས་ཀྱི་ཚོགས་དུས་ཆ་ཚང་དྲྭ་ལམ་ཐོག་སྐོང་ཚོགས་གནང་དགོས་པ་བྱུང་ཡོད་རེད།
སུད་སི་བོད་ཀྱི་སྐུ་ཚབ་དོན་ཁང་གི་ངོས་ནས་ད་ལན་གྱི་ཟུར་ཚོགས་དེ་གཙོ་བོ་རྒྱལ་ཚོགས་ཀྱི་ཚོགས་འདུ་དང་འབྲེལ་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་མུ་མཐུད་གླེང་སློང་རྒྱུན་སྐྱོང་ཡོང་ཕྱིར་དྲྭ་ཐོག་ནས་གོ་སྒྲིག་ཞུས་པ་ཞིག་ཡིན་ཞེས་གསུངས་སོང་།
