ཕྱི་ལོ་ ༢༠༢༦ ཚེས་མ་ཐག་ཏུ་འཛམ་གླིང་ས་ཕྱོགས་གང་སར་རྣམ་པ་མི་འདྲ་བའི་སྒོ་ནས་ཕྱི་ལོ་གསར་པ་བསུ་མ་བྱེད་སྐབས། རྒྱ་ནག་གྲོང་ཁྱེར་ཁྲིན་ཏུའུ་ནང་ཡོད་པའི་བོད་པའི་གཞོན་སྐྱེས་ཁག་གཅིག་མི་ཚོགས་སྟོང་ཕྲག་འདུ་འཛོམས་བྱས་ཡོད་པའི་སྲང་མདོར་བསྐྱོད་ནས་ལྒང་སྦུག་དམར་པོའི་ཐོག་ཏུ་དབྱིན་ཡིག་གི་ཡི་གེ་ནག་པོས་ I Love You འམ་ང་ཁྱེད་ལ་དགའ་ཞེས་པ་དང་། བོད་ཡིག་གི་ཡི་གེ་དཀར་པོས་རྒྱང་རིང་གི་ཨ་ཇོ་སྐུ་ཚེ་བརྟན་པར་ཤོག ༢༠༢༦ ལོར་བྱ་བ་ལམ་འགྲོ། ཞེས་བྲིས་ཏེ་ནམ་མཁར་བཏང་བ་དང་ལྷན་ཕྱི་ལོ་གསར་པར་བསུ་བ་བྱས་པ་དང་། སྨོན་ལམ་དང་ཀི་སྒྲས་ཁྲོད་དུ་དབུགས་ལྒང་སྟོང་ཕྲག་མང་པོ་མཁའ་དབྱིངས་སུ་ཐིམ་འདུག
རྩ་བའི་བོད་ཀྱི་གཞས་པ་སྐད་གྲགས་ཅན་ཤེར་བརྟན་ལགས་ཀྱིས་ཕྱི་ལོ་ ༢༠༠༥ ལོར་རྒྱང་རིང་གི་ཨ་ཇོ་ལགས་ཁྱེད་དྲན་བྱུང་། ཟེར་བའི་གླུ་གཞས་ཞིག་བླངས་ཡོད་པ་དང་། ཚིག་བཀྲ་བསོ་ལགས་ཀྱིས་བརྩམས་པའི་གླུ་གཞས་དེ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕུལ་བའི་གླུ་ཞིག་ལ་ངོས་འཛིན་གནང་གི་ཡོད་པ་རེད། གླུ་གཞས་དེ་ཉིད་སྐབས་དེར་བོད་ཁམས་ཡོངས་སུ་ཁྱབ་གདལ་ཆེན་པོ་སོང་ཡོད་པ་དང་རྒྱང་རིང་གི་ཨ་ཇོ་ནི་བོད་ནང་གི་བོད་པ་ཚོའི་སེམས་པའི་ཕུགས་སུ་ཉར་ཡོད་པའི་དད་པའི་རི་མོ་མཚོན་གྱི་ཡོད་པ་རེད་འདུག
ཐེངས་འདིར་རྒྱ་ནག་གི་ཁྲིན་ཏུའུ་གྲོང་ཁྱེར་ནང་ཡོད་པའི་བོད་པའི་གཞོན་སྐྱེས་དེ་དག་གིས་རྒྱང་རིང་གི་ཨ་ཇོ་སྐུ་ཚེ་བརྟན་པར་ཤོག་ཅེས་པའི་སྨོན་ཚིག་འཁོད་པའི་ལྒང་སྦུག་མཁའ་དབྱིངས་སུ་བཏང་ནས་ཕྱི་ལོ་གསར་པར་བསུ་མ་བྱས་པའི་བརྙན་ཐུང་དེ་དྲྭ་ལམ་དུ་སྤེལ་རྗེས་བོད་མི་མང་པོ་རང་གི་སེམས་ནང་གི་དད་འདུན་མཚོན་པའི་མཆན་དང་བཅས་བརྙན་ཐུང་དེ་ཉིད་བརྒྱུད་སྐུར་རྒྱ་གང་ཆེ་བྱས་ཏེ་དྲྭ་ལམ་ཡོངས་སུ་ཁྱབ་བསྒྲགས་ཤུགས་ཆེན་སོང་འདུག
དེའང་བོད་མི་ཁག་གཅིག་གིས་མཆན་ནང་ “རྒྱང་རིང་ཡུལ་ལ་བཞུགས་པའི།། ཨ་ཇོ་ལྷ་མོ་དོན་འགྲུབ།། གཞིས་སྡོད་སྤུན་ཟླ་ཡོངས་ཀྱི།། སེམས་ཀྱི་སྨྲེང་བ་འཕྲེང་ཡོ།།” “བླ་མའི་སྐུ་ཚེ་བརྟན་པ་དང་།། བསྟན་པ་རྒྱས་པར་བྱིན་གྱིས་རློབས།།” ཅེས་པ་དང་། ཁག་གཅིག་གིས་ “ང་ཚོ་རིན་པོ་ཆེ་དང་ལྷན་འཛོམས་ཡོང་པར་ཤོག” “ཞི་བདེའི་དེད་དཔོན་མགོན་པོ་༸གང་ཉིད་སྐུ་ཚེ་བརྟན་ཅིང་མཛད་འཕྲིན་རྒྱས་པ་དང་ཆོལ་གསུམ་གདོང་དམར་བ་རྣམས་མཐུན་སྒྲིལ་དང་སྐད་ཡིག་གཙང་མ་དང་མི་རིགས་གཙང་མ་ཉི་ཟླའི་བགྲོད་དང་མཉམ་པར་ཤོག” ཅེས་བྲིས་ཏེ་རང་ཉིད་ཀྱི་རེ་བ་དང་དད་པ་མཚོན་པ་བྱས་འདུག
སྤྱིར་རྒྱང་རིང་གི་ཨ་ཇོ་ལགས་ཁྱེད་དྲན་བྱུང་ཞེས་པའི་གླུ་གཞས་ནང་།
རྒྱ་རིང་གི་ཨ་ཇོ་ཁྱེད་མེད་པའི་ཕོ་བྲང་དམར་པོ།
རྒྱ་རིང་གི་ཨ་ཇོ་མི་མེད་པའི་བྲག་ཕུག་སྟོང་བ།
ཨོ་་་གསེར་སེར་པོའི་རྒྱ་ཕིབས་མཐོང་དུས།
རྒྱང་རིང་གི་ཨ་ཇོ་ཁྱེད་མེད་པའི་སེམས་པ་སྐྱོ་བྱུང།
རྒྱང་རིང་གི་ཨ་ཇོ་ཁྱེད་མེད་པའི་ཉི་མ་ལྷ་ས།
རྒྱང་རིང་གི་ཨ་ཇོ་བྱ་མེད་པའི་རྒོད་ཚང་མཐོར་རོ།
རྒྱང་རིང་གི་ཨ་ཇོ་ནོར་གླིང་གི་སྐྱེད་ཚལ་མཐོང་དུས།
རྒྱང་རིང་གི་ཨ་ཇོ་ཁྱེད་མེད་པའི་སེམས་པ་སྐྱོ་བྱུང།
རྒྱང་རིང་གི་ཨ་ཇོ་ཁྱེད་མེད་པའི་གདོང་དམར་བོད་པ།
རྒྱང་རིང་གི་ཨ་ཇོ་ཕ་མེད་པའི་དྭ་ཕྲུག་འཁྱམ་པོ།
རྒྱང་རིང་གི་ཨ་ཇོ་ཕན་ཚུན་གྱི་སྐྱིད་སྡུག་གླེང་སྐབས།
རྒྱང་རིང་གི་ཨ་ཇོ་ཁྱེད་མེད་པའི་སེམས་པ་སྐྱོ་བྱུང།
རྒྱང་རིང་གི་ཨ་ཇོ་ལམ་སྟོན་གྱི་ཉི་མ་སེར་པོ།
རྒྱང་རིང་གི་ཨ་ཇོ་ཞི་བདེ་ཡི་ཟླ་བ་དཀར་པོ།
རྒྱང་རིང་གི་ཨ་ཇོ་ཆོལ་གསུམ་གྱི་སྙིང་གི་ནོར་བུ།
རྒྱང་རིང་གི་ཨ་ཇོ་ཁྱེད་བསྒུག་ནས་ལོ་ཟླ་བརྩེགས་ཡོད། ཅེས་བཀོད་ཡོད།
