དབྱིན་ཡུལ་དུ་གནས་སྡོད་བྱེད་མཁན་ཧོང་ཀོང་མང་གཙོ་དོན་གཉེར་བ་དང་ལས་འགུལ་བ་ Chi Hei Dai ལགས་ནས་ཡུལ་དེའི་ནང་ཡོད་པའི་རྒྱ་ནག་དཔོན་རིགས་ཚོས་དབྱིན་ཡུལ་རྒྱལ་ས་ལོན་ཌོན་དུ་རྒྱ་ནག་གཞུང་ཚབ་ཁང་གསར་རྒྱག་ཐད་ཞི་རྒོལ་གནང་མཁན་ཚོའི་པར་རིས་བླངས་ཡོད་པར་ཕྱིས་སུ་ཁོང་རྣམས་ལ་བདེ་འཇགས་ཀྱི་ཉེན་ཁ་ཡོང་སྲིད་པའི་ཉེས་འཛུགས་བྱས་འདུག
དེ་ཡང་ཁ་ཉིན་ཕྱི་ཚེས་ ༣ ཉིན་ The Times གསར་ཤོག་ཐོག་འདོན་སྤེལ་གནང་བའི་གནས་ཚུལ་ནང་། སྔ་ལོའི་ཕྱི་ཟླ་ ༢ པའི་ཚེས་ ༨ དང་ཕྱི་ཟླ་ ༣ པའི་ཚེས་ ༡༥ ཉིན་སོ་སོར་དབྱིན་ཡུལ་རྒྱལ་ས་ལོན་ཌོན་དུ་རྒྱ་ནག་གཞུང་ཚབ་གསར་རྒྱག་གི་ལས་གཞི་ཐད་ Chi Hei Dai ལྟ་བུ་ཧོང་ཀོང་བ་གཙོས་པའི་བོད་མི་དང་ཡུ་གུར་བ་དེ་བཞིན་རྒྱ་ནག་གི་དྲག་གནོན་འོག་མྱོང་བཞིན་པའི་མི་མང་བརྒྱ་ཕྲག་མང་པོས་མཉམ་རུབ་ཐོག་ཞི་རྒོལ་གྱི་ལས་འགུལ་ཤུགས་ཆེ་སྤེལ་ཡོད་པ་ལྟར། སྐབས་དེའི་ཚེ་དེ་དུས་རྒྱ་ནག་གཞུང་ཚབ་ཁང་གསར་རྒྱག་བྱེད་སའི་ས་ཚིགས་ Royal Mint Court ཞེས་པའི་ཕྱོགས་ནས་རྒྱ་ནག་དཔོན་རིགས་ཚོས་ཞི་རྒོལ་ནང་མཉམ་ཞུགས་གནང་མཁན་ Chi Hei Dai ཚུད་པའི་ལས་འགུལ་གཞན་ཚོའི་པར་རིས་ལེན་བཞིན་ཡོད་པ་ཤེས་རྟོགས་བྱུང་ཡོད་པ་རེད།
སྤྱིར་རྒྱལ་ས་ལོན་ཌོན་གྱི་ཉེ་འཁྲིས་སུ་ཆགས་པའི་ Royal Mint Court ཞེས་པ་དེ་ནི་ལས་ཁུངས་འདྲ་མིན་དང་མཉམ་སྤྱོད་བདག་དབང་ཅན་གྱི་ཁྱིམ་ཚང་ ༡༠༠ ཡོད་པའི་ས་ཁུལ་གྲགས་ཅན་ཞིག་ཡིན་པ་དང་། དེའང་རྒྱ་ནག་མི་མང་སྤྱི་མཐུན་རྒྱལ་ཁབ་ངོས་ནས་གཞུང་ཚབ་ལས་ཁང་ཆེ་གྲས་ཞིག་གསར་རྒྱག་ཆེད་ཕྱི་ལོ་ ༢༠༡༨ ལོར་ཉོས་པ་ཞིག་ཡིན་སྟབས། Chi Hei Dai ལགས་ཀྱིས་ཐོག་མའི་ཆར་ Royal Mint ས་ཚིགས་དེ་བཞིན་དབྱིན་ཡུལ་ཉེན་རྟོག་པའི་ཁྲིམས་ལུགས་ཞིབ་བཤེར་ཁྱབ་ཁོངས་ནང་ཚུད་ཀྱི་མེད་པར་དམིགས་བསལ་གྱི་རང་དབང་ཡོད་ཀྱི་རེད་ཅེས་སྙམ་སྟེ་ཁྲིམས་གཏུགས་ཉེས་འཛུགས་བྱས་མེད་པ་དེ་ལྟར་ཡང་། ཕྱིས་སུ་ཁོང་ནས་གནས་སྟངས་དེ་ལྟར་མིན་པ་ཤེས་རྟོགས་འབྱུང་མ་ཐག ཟླ་སྔོན་མའི་ཕྱི་ཚེས་ ༢༢ ཉིན་དབྱིན་ཡུལ་གྱིས་ཕྱི་རྒྱལ་ཁབ་ཀྱི་གནོན་ཤུགས་ལ་གདོང་ལེན་ཆེད་དུ་ ༢༠༢༣ ལོའི་རྒྱལ་ཁབ་བདེ་འཇགས་ཀྱི་ཁྲིམས་ཡིག་ནང་གསེས་དོན་ཚན་ ༣ པའི་འོག་རྒྱ་ནག་དཔོན་རིགས་ཚོས་ཁོང་དང་ལས་འགུལ་བ་གཞན་རྣམས་ཀྱི་པར་རིས་བླངས་ཏེ་རྒྱ་ནག་གཞུང་ལ་མཁོ་སྤྲོད་བྱས་ཡོད་པར་ཉེས་འཛུགས་བྱས་ཡོད་པ་རེད་འདུག
གནས་ཚུལ་ནང་གསལ་ལྟར་ན། དབྱིན་ཡུལ་ས་གནས་ཉེན་རྟོག་པས་ Chi ལགས་ཀྱི་གྱོད་གཞིའི་གནད་དོན་དེ་བཞིན་དབྱིན་ཡུལ་ནང་གི་ཡུལ་མི་ཚོར་འཇིགས་སྐུལ་དང་དོགས་སྲུང་གི་བྱ་འགུལ་རྒྱ་ཆེ་བའི་ཆ་ཤས་ཤིག་ཡིན་སྲིད་པ་བརྗོད་དེ། གནད་དོན་དེ་ཉིད་དབྱིན་ཡུལ་གྱི་ Counter Terrorism Policing འམ་དྲག་སྤྱོད་རིང་ལུགས་གདོང་ལེན་གྱི་ཉེན་རྟོག་ལས་ཁུངས་སུ་རྩིས་སྤྲོད་ཀྱིས་ད་ལྟའི་ཆར་ཞིབ་བཤེར་འགྲོ་མུས་ཡིན་པ་གསུངས་འདུག
གནད་དོན་དེ་འབྲེལ། དབྱིན་ཡུལ་གྲོས་ཚོགས་གོང་མའི་འཐུས་མི་ Ian Duncan Smith མཆོག་གིས། རྒྱ་ནག་དཔོན་རིགས་ཚོའི་བྱ་སྤྱོད་དེར་སྐྱོན་བརྗོད་ཀྱིས་དབྱིན་ཡུལ་ས་གནས་ཉེན་རྟོག་ལས་ཁུངས་ཀྱི་སྤྱི་ཁྱབ་འགན་འཛིན་ Mark Rowley ལགས་སུ་ཕྱག་བྲིས་ཤིག་གི་བརྒྱུད་གྱོད་གཞི་དེར་ཁྲིམས་ལུགས་ལག་བསྟར་དགོས་པའི་སྐུལ་མ་བྱས་འདུག་པ་དང་འབྲེལ། ཞི་རྒོལ་བའི་པར་རིས་དེ་དག་ཕྱིས་སུ་རྒྱ་ནག་གཞུང་གིས་བེད་སྤྱོད་བྱས་ཏེ་ལས་འགུལ་བ་རྣམས་ཀྱི་ཐོག་རྒྱལ་མཚམས་ལས་བརྒལ་བའི་དྲག་གནོན་སྤེལ་སྲིད་པའི་ཉེན་བརྡ་བཏང་འདུག
མ་ཟད། IPAC ཞེས་རྒྱ་ནག་ལ་གདོང་ལེན་གནང་མཁན་གྱི་རྒྱལ་སྤྱིའི་གྲོས་ཚོགས་འཐུས་མིའི་མཐུན་ཚོགས་ཀྱི་སྤྱི་ཁྱབ་ངེས་སྟོན་པ་ Luke De Pulford ཚུད་པའི་འགྲོ་བ་མིའི་ཐོབ་ཐང་འཐབ་རྩོད་པ་རྣམས་ཀྱིས་ཀྱང་རྒྱ་ནག་དཔོན་རིགས་ཚོས་ཞི་རྒོལ་བའི་པར་རིས་བླངས་པའི་གནད་དོན་དེར་སྐྱོན་བརྗོད་ནན་པོ་དང་སྦྲགས། རྒྱ་ནག་གིས་དུས་རྒྱུན་ནས་དེ་ལྟ་བུའི་པར་རིས་བརྒྱུད་རང་དང་ལྟ་སྤྱོད་མི་འཐུན་གྱི་ལས་འགུལ་བ་ཚོ་དང་ཁོང་རྣམ་པའི་ནང་མི་ཉེ་འབྲེལ་ཐོག་རྒྱལ་མཚམས་ལས་བརྒལ་ནས་དྲག་གནོན་རྒྱ་ཆེར་སྤེལ་གྱི་ཡོད་པ་མངོན་གསལ་གནང་འདུག
གཞི་རྩའི་དེ་སྔ་ཕྱི་ལོ་ ༢༠༢༢ ལོར་དབྱིན་ཡུལ་གྱི་གྲོང་ཁྱེར་ Manchester ནང་དུ་ཡང་རྒྱ་ནག་དཔོན་རིགས་ཚོས་ཧོང་ཀོང་གི་ཞི་རྒོལ་བ་གཅིག་རྒྱ་ནག་གཞུང་ཚབ་ཁང་ནང་དུ་དྲུད་དེ་ཉེས་རྡུང་བཏང་བ་ཞིག་གསང་བའི་བརྙན་མིག་ནང་དུ་མངོན་གསལ་བྱུང་བར། ཕྱིས་སུ་འབྲེལ་ཡོད་རྒྱ་ནག་གཞུང་ཚབ་མི་སྣ་ ༦ དབྱིན་ཡུལ་ནས་ཕྱིར་ཐོན་བྱས་ཡོད་ཀྱང་། དབྱིན་ཡུལ་སྲིད་གཞུང་ནས་རྒྱ་ནག་དཔོན་རིགས་དེ་དག་གི་ཐོག་ཁྲིམས་མཐུན་གྱི་ཉེས་ཆད་རིགས་གང་ཡང་བཀལ་མེད་པས་འགྲོ་བ་མིའི་ཐོབ་ཐང་རྩོད་ལེན་གནང་མཁན་ཚོགས་སྒེར་ཁག་ནས་སྐྱོན་བརྗོད་ཤུགས་ཆེ་བྱས་ཡོད་པ་རེད།
