ཉེ་ཆར་ཟླ་ ༧ ཚེས་ ༡༤ ནས་ ༡༦ བར་ཉི་ཧོང་གི་རྒྱལ་ས་ Tokyo ནང་ International Tibet Network འམ་རྒྱལ་སྤྱིའི་བོད་དོན་ལས་འགུལ་ཁང་གི་ཨེ་ཤ་ཡ་ཁྱབ་ཁོངས་ཀྱི་ཚོགས་ཆེན་ཐེངས་ ༧ པ་ཚོགས་འདུག་པ་དང། ཚོགས་འདུའི་ཐོག་འདི་ལོ་རྒྱལ་ཚོགས་ནང་རྒྱ་ནག་གི་དུས་བཀག་བསྐྱར་ཞིབ་དང་བསྟུན། བོད་ནང་གི་གནས་སྟངས་གསལ་སྟོན་དང་བོད་དོན་ཞུ་གཏུགས་གནང་ཕྱོགས་སོགས་ཀྱི་སྐོར་གྲོས་བསྡུར་གནང་འདུག
ཚོགས་འདུའི་ཐོག་ཉི་ཧོང་ནང་གི་བོད་རང་བཙན་སློབ་ཕྲུག་ཚོགས་པ་གཙོ་གྱུར་བོད་དོན་རྒྱབ་སྐྱོར་ཚོགས་པ་ ༤ ཙམ་དང། ཐེ་ཝན། ཨིན་ཌོ་ནི་ཤ་ཡ། རྒྱ་གར། ཨོ་སི་ཊེ་ལི་ཡ། དེ་བཞིན་ཀིན་ཡ་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་མི་གཅིག་བཅས་ཁྱོན་མི་གྲངས་ ༤༥ ནས་མཉམ་ཞུགས་གནང་འདུག
རིང་མིན་ལོ་འདིའི་ཕྱི་ཟླ་ ༡༡ ནང་རྒྱལ་ཚོགས་ནང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་དུས་བཀག་བསྐྱར་ཞིབ་ཐེངས་གསུམ་པ་འཚོགས་རྒྱུ་ཡིན་པ་དང་བསྟུན། ཉི་ཧོང་གཙོ་གྱུར་ རྒྱལ་སྤྱིའི་གཞུང་ཚོགས་ཁག་ནས་རྒྱ་ནག་ལ་བོད་ནང་གི་ཆེས་ཞན་པའི་གནས་སྟངས་ཡར་རྒྱས་གཏོང་དགོས་པའི་ཐད་རྒྱ་ནག་ལ་གནོན་ཤུགས་སྤྲད་རྒྱུ་དང། ༸ཀུན་གཟིགས་པཎ་ཆེན་རིན་པོ་ཆེ་མཆོག་དང་བཀྲིས་དབང་ཕྱུག་ལགས་ཀྱིས་གཙོས་བོད་མི་ཆབ་སྲིད་བཙོན་པའི་གནད་དོན། བོད་ནང་གི་ཇེ་ཞན་ཇེ་སྡུག་ཏུ་འགྲོ་བཞིན་པའི་ཁོར་ཡུག་གི་གནས་སྟངས། དེ་བཞིན་བོད་མི་རྣམས་བཙན་བྱོལ་སུ་འབྱོར་ནས་ལོ་ངོ་ ༦༠ ཧྲོལ་པོ་འཁོར་བ་དང་བསྟུན་ལས་འགུལ་ཇི་སྤེལ་བཅས་ཀྱི་ཐོག་གྲོས་བསྡུར་གནང་འདུག
རྩ་བའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཨེ་ཤ་ཡ་ཁྱབ་ཁོངས་ཚོགས་ཆེན་འདི་ལོ་ལྟར་ཚོགས་གནང་གི་ཡོད་པ་ལྟར་ད་རེས་ཚོགས་ཆེན་ཐེངས་ ༧ པ་ཆགས་ཀྱི་ཡོད་ཀྱང། ཉི་ཧོང་ནང་ཚོགས་འདུ་བསྐོང་ཚོགས་གནང་བ་ཆེས་ཐོག་མ་ཡིན་པ་དང་ཚོགས་འདུ་འདི་འབྲེལ་མཐུད་ལས་ཁང་དང་འབྲེལ་བ་ཡོད་པའི་ཨེ་ཤ་ཡ་ནང་གི་བོད་དོན་རྒྱབ་སྐྱོར་ཚོགས་པ་དང་ལས་འགུལ་ཁང་དབར་འབྲེལ་མཐུད་གནང་རྒྱུ་དང། ལས་འགུལ་སྤེལ་ཕྱོགས་དང་ཐབས་བྱུས་གསར་པ་ངོ་སྤྲོད། འགྲོ་བ་མིའི་ཐོབ་ཐང་དང་མང་གཙོའི་འཐབ་རྩོད་ཐད་ཨེ་ཤ་ཡ་ས་ཁུལ་གྱི་གལ་གནད་ལ་གཞིགས་ནས་ལོ་ལྟར་གནད་ཆེར་ངོས་འཛིན་ཐོག་ཚོགས་གནང་གི་ཡོད་པ་རེད།
