ཁ་སང་ཕྱི་ལོ་་༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་དང་འབྲེལ་ནས་སྤྱི་ཚོགས་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། ལ་དྭགས་ནང་གི་བརྒྱ་ཤོག་བརྒྱད་པའི་ཁུལ་དུ་འོས་བསྡུ་གནང་བའི་སྐབས་སུ། ཁུལ་དེའི་ཡིག་རྨོངས་བ་རྣམས་ལ་རོགས་འདེགས་ཀྱི་ཆེད་དུ་ལ་དྭགས་བོད་ཁྱིམ་གྱི་དགེ་རྒན་ཞིག་བསྐོ་བཞག་བྱས་པ་དང་། ཁོང་གིས་ཡིག་རྨོངས་བ་ཞིག་ལ་རོགས་རམ་བྱས་པའི་བརྒྱུད་རིམ་ཁྲོད་དུ་སྲིད་སྐྱོང་གི་འོས་བསྡུའི་འགེངས་ཤོག་གི་ནང་དུ་དོ་བདག་གིས་སྲིད་སྐྱོང་གི་འོས་མི་རྒྱ་རི་སྒྲོལ་མ་ལགས་ཕྲིས་ཞེས་སྐུལ་མ་གནང་ཡོད་ཀྱང་། དགེ་རྒན་དེས་ཚོགས་ཟུར་སྤེན་པ་ཚེ་རིང་ལགས་ཀྱི་མཚན་བྲིས་ཡོད་པ་ར་འཕྲོད་བྱུང་ཡོད་ལུགས་ཀྱི་གནད་དོན་ཞིག་ཁྱབ་བརྡལ་འགྲོ་བཞིན་པ་རེད།
དེ་རིང་འདི་གའི་གསར་འགོད་པས་ལ་དྭགས་ཀྱི་ལ་སྤྱི་ཚེ་བརྟན་དབང་ཕྱུག་ལགས་སུ་ཞལ་པར་བརྒྱུད་ནས་གནས་ཚུལ་དེའི་ཐད་ལ་རྒྱུས་ལོན་བྱས་པར་ཁོང་གིས། གནས་ཚུལ་དེ་དངོས་བདེན་ཡིན་པ་དང་། ཡིག་རྨོངས་བ་རྣམས་ལ་རོགས་འདེགས་བྱེད་མཁན་གྱི་དགེ་རྒན་དེས་དོ་བདག་གིས་ཕྲིས་ཞེས་པ་དེ་མ་བྲིས་བར་འོས་མི་གཞན་ཞིག་གི་མཚན་བྲིས་ཡོད་པ་ཤེས་རྟོག་བྱུང་མ་ཐག་འཕྲལ་དུ་དགེ་རྒན་དེ་ཡུལ་དངོས་ཀྱི་འོས་བསྡུའི་ལས་གནས་ལས་གནས་དབྱུང་བཏང་ཡོད་སྐོར་ངོ་སྤྲོད་གནང་སོང་།
དེ་བཞིན་གསར་འགོད་པས་ལ་སྤྱི་ལགས་སུ་རོགས་འདེགས་བྱེད་མཁན་གྱི་དགེ་རྒན་དེའི་ཁོང་གིས་ཁ་སང་གི་འོས་བསྡུའི་རྙོག་གླེང་དེར་ཁས་ལེན་གནང་ཡོད་མེད་ཀྱི་ཐད་ནས་བཀའ་འདྲི་ཞུས་པར། རོགས་འདེགས་བྱེད་མཁན་གྱི་དགེ་རྒན་དེ་དང་འོས་ཤོག་འཕེན་མཉན་གྱི་དོ་བདག་གཉིས་ངོ་གཏུག་གིས་གནས་ཚུལ་ཞིབ་བསྡུར་བྱས་པའི་སྐབས་སུ་དགེ་རྒན་དེའི་སྐད་ཆར་ཆ་འཇོག་བྱེད་དཀའ་བའི་གནས་སུ་གྱུར་ཡོད་སྟབས། དབུས་འོས་བསྡུ་ལས་ཁང་ལ་སྙན་གསེང་ཞུས་ཏེ་འོས་ཤོག་འཕངས་ཟིན་པའི་མི་ ༡༩༢ གྱིས་བསྐྱར་དུ་འོས་ཤོག་འཕངས་ཡོད་པར་ངོ་སྤྲོད་གནང་སོང་།
གཞི་རྩའི་རྒྱ་གར་གྱི་ནང་ཁུལ་ལྟ་བུར་མཚོན་ན་ཁ་སང་གི་འོིས་བསྡུ་དེ་ཞོགས་པའི་ཆུ་ཚོད་ ༨ པ་ནས་དགོང་དྲོའི་ཆུ་ཚོད་ལྔ་བའི་བར་དུ་འོས་འཕེན་གནང་གྲུབ་དགོས་བའི་དབུས་འོས་ལས་ཁང་གི་སྒྲིག་གཞི་སྔོན་སོང་ལྟར། གསར་འགོད་པས་འོས་བསྡུ་བསྐྱར་དུ་གནང་བ་བརྒྱུད་ནས་དགོང་དྲོའི་ཆུ་ཚོད་ ༧ པའི་བར་དུ་འོས་བསྡུ་མཚམས་འཇོག་གནང་མ་ཐུབ་པའི་གནས་ཚུལ་ཞིག་ཡོང་བཞིན་པ་དེར་དབུས་འོས་བསྡུ་ལྷན་ཁང་གི་ཆོག་མཆན་ཐོབ་ཡོད་མིན་དང་། འོས་བསྡུའི་ཁྲིམས་སྒྲིག་གི་དགོངས་དོན་དང་འགལ་འཛོལ་བྱུང་བར་ངོས་འཛིན་གནང་གི་ཡོད་མེད་ཀྱི་ཐད་ནས་བཀའ་འདྲི་ཞུས་པར་ཁོང་གིས། འོས་བསྡུ་བསྐྱར་དུ་བྱེད་དུས་ཆུ་ཚོད་གསུམ་པ་ཡིན་པར་བརྟེན་ཆུ་ཚོད་ཏོག་ཙམ་འཕར་འགྱངས་ཞུ་དགོས་བར་འཁེལ་ཡོད་པ་དང་། དེ་ནི་ས་གནས་འོས་བསྡུ་ལས་ཁང་གི་འགན་དབང་འོག་གི་གུ་ཡངས་ཀྱི་རྣམ་པ་ཞིག་ཡིན་པར་ངོས་འཛིན་གནང་བཞིན་ཡོད་པར་གསུངས་སོང་།
དེ་བཞིན་ཁོང་གིས་གཞི་རྩའི་འོས་བསྡུ་བསྐྱར་དུ་བྱས་པ་བརྒྱུད་ནས། མི་མང་གི་སེམས་སུ་འོས་བསྡུའི་ལས་རིམ་དེ་དྲང་པོ་མ་བྱུང་བ་ལྟ་བུའི་དོགས་གཞི་རིགས་ཡོངས་སུ་སེལ་ཟིན་ནའང་། མང་ཚོགས་ཀྱིས་དགེ་རྒན་དེའི་དྲང་བདེན་མིན་པའི་འགལ་འཛོལ་གྱི་བྱས་ཉེས་དེར་འོས་བསྡུའི་ཁྲིམས་སྒྲིག་གི་དགོངས་དོན་འོག་ཉེས་ཆད་གཅོད་དགོས་བའི་དགོངས་ཚུལ་བྱུང་གི་ཡོད་པ་ལྟར། དེ་རིང་དེར་འབྲེལ་གྱི་ཚོགས་འདུ་ཞིག་འཚོག་རྒྱུ་ཡིན་པར་གསུངས་སོང་།
གཞི་རྩའི་ཁ་སང་གི་འོས་བསྡུའི་ལས་རིམ་དེ་སྤྱི་ཡོངས་ཀྱི་ཆ་ནས་རྙོག་གླེང་གི་རིགས་མེད་པར་ལེགས་འགྲུབ་བྱུང་ཡོད་ནའང་། མི་རེ་འགའི་རང་འོས་ཤོག་གི་ངོ་བཤུས་པར་བླངས་ཏེ་རང་གི་ངོ་དེབ་ཏུ་སྤེལ་བ་སོགས་ཀྱི་གནད་དོན་ཁག་ཅིག་སྤྱི་ཚོགས་དྲ་ལམ་དུ་ཐོན་ཡོད་པ་དང་། དེ་བཞིན་རང་བཙན་ལག་དེབ་དེབ་སྐྱེལ་གྱི་ཁྲོད་ནས་མི་སྒེར་གྱི་ཆོལ་ཁོངས་དེབ་སྐྱེལ་བྱས་བ་ནོར་བ་དང་། གཞན་ཡང་དེབ་སྐྱིལ་བྱས་ཟིན་ནའང་། སྲིད་སྤྱི་ཞེས་པའི་ཡིག་འབྲུ་གཉིས་འཁོད་མེད་པ་སོགས་ཀྱི་གནད་དོན་དང་འབྲེལ་ནས་མི་འགའ་ཞིག་གིས་དུས་ཐོག་ཏུ་འོས་ཤོག་བླུགས་མ་ཐུབ་སོགས་ཀྱི་གནད་དོན་ཁག་ཅིག་བྱུང་འདུག
