བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་བསྐོ་བཞག་སྩལ་བ་བཞིན། སྤྱི་ཟུར་འཇིགས་མེད་འབྱུང་གནས་ལགས་ཀྱིས་དེ་རིང་ནས་ལྡི་ལི་སྐུ་ཚབ་དོན་གཅོད་ཀྱི་ལས་འཁུར་ཐུགས་འགན་དངོས་སུ་བཞེས་ཡོད་པ་རེད།
![Jigmey Jungney Delhi Bureau](https://vot.org/wp-content/uploads/2024/06/449282238_867819188716211_6793559234379851891_n.jpg)
གཞི་རྩའི་འཇིགས་མེད་འབྱུང་གནས་ལགས་ལོ་ངོ་ ༤༠ ཙམ་གྱི་རིང་སྤྱི་ཚོགས་ལས་དོན་དང་འབྲེལ་བའི་མཐོང་ཐོས་མྱོང་གསུམ་གྱི་ཉམས་མྱོང་ལྡན་པའི་མི་སྣ་ཞིག་ཏུ་ངོས་འཛིན་གནང་གི་ཡོད་ཀྱང་། ཁོང་དངོས་སུ་ཕྱི་འབྲེལ་སྲིད་བྱུས་ཀྱི་ལས་དོན་དང་འབྲེལ་བ་ཡོད་པའི་ལས་འཁུར་ནང་བཞུགས་པ་ད་རེས་ཐེངས་དང་པོ་དེ་ཆགས་ཀྱི་ཡོད་སྟབས། ངོ་བོ་མི་འདྲ་བའི་ལས་འཁུར་གསར་པ་དེའི་ཐོག་གདོང་ལེན་གནང་རྒྱུའི་ཆར་གཞི་དང་གྲ་སྒྲིག་ཇི་འདྲ་གནང་ཡོད་མེད་སྐོར་བཀའ་འདྲི་ཞུས་པ་གོང་གི་སྒྲ་སྒམ་ནས་གསན་ཐུབ།
![Jigmey Jungney Delhi Bureau](https://vot.org/wp-content/uploads/2024/06/449477649_867819332049530_7310616310776126446_n.jpg)
ལྡི་ལི་དོན་གཅོད་གསར་པ་འཇིགས་མེད་འབྱུང་གནས་ལགས་ཀྱིས་སྐབས་ ༡༥ པའི་སྤྱི་འཐུས་གནང་ཡོད་པ་མ་ཟད། ཕྱི་ལོ་ ༡༩༨༣ ལོར་གཞུང་ཞབས་སུ་བཞུགས་ཏེ་མཉམ་འབྲེལ་དྲུང་ཆེ་དང་། ས་གནས་འགོ་འཛིན། སྦེང་ལོར་དུ་ལྷོ་ཕྱོགས་ཀྱི་གཞིས་སྤྱི། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་རྩིས་ཞིབ་ལས་ཁུངས་བཅས་ཀྱི་དྲུང་ཆེ་བཅས་གནང་མྱོང་ཡོད་པ་མ་ཟད། ལྷག་པར་དུ་ཁོང་ནས་སྦེལ་ཀོབ་བདེ་སྐྱོད་སླར་གསོའི་གཞིས་ཆགས་ཀྱི་སྤྱི་མི་དང་། ས་གནས་རང་བདེན་ཚོགས་ཆུང་དང་མཉམ་འབྲེལ་གྱི་འཐུས་མི། ས་གནས་གཞོན་ནུའི་ཚོགས་གཙོ་ལ་སོགས་པའི་སྤྱི་ཚོགས་དང་ཐད་ཀར་འབྲེལ་བའི་ལས་དོན་སྣ་མང་ཞིག་གི་ནང་ཕྱག་ལས་གནང་མྱོང་ཡོད་པ་རེད།
![Jigmey Jungney Delhi Bureau](https://vot.org/wp-content/uploads/2024/06/449451229_867819255382871_3672828116298410668_n.jpg)
ཁོང་ལ་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་དགུ་པའི་ནང་གསེས་ ༡ པོའི་དགོངས་དོན་བཞིན། ཕྱི་རྒྱལ་སྐུ་ཚབ་དོན་གཅོད་རྣམས་སྲིད་སྐྱོང་དང་བཀའ་བློན་ཚང་འཛོམས་ཞིབ་གྲོས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚབ་ཀྱི་མཚན་གནས་བསྩལ་རྒྱུ་ཞེས་གསལ་བ་ལྟར། འདི་ལོའི་ཕྱི་ཟླ་ ༡ ཚེས་ ༢༩ ཉིན་ལྡི་ལི་སྐུ་ཚབ་དོན་གཅོད་དུ་བསྐོ་བཞག་བསྩལ་ཡོད་ནའང་། ད་བར་དངོས་སུ་ལས་བཅར་ཞུ་མ་ཐུབ་པ་དེ་ནི་ཕྱོགས་གཅིག་ནས་ཡིག་ཆའི་བཀའ་ངལ་དང་། ཕྱོགས་གཞན་ནས་སྒེར་གྱི་ལས་དོན་ཁག་གཅིག་སྔ་ས་ནས་གྲ་སྒྲིག་ཡོད་པ་བཅས་ཀྱིས་ད་བར་ལས་འཁུར་དངོས་སུ་བཞེས་ཐུབ་མེད་པའི་འགྲེལ་བརྗོད་གནང་གི་འདུག།
![Jigmey Jungney Delhi Bureau](https://vot.org/wp-content/uploads/2024/06/449062617_867819385382858_649081473177831085_n.jpg)
གཞི་རྩའི་དེ་རིང་ཕྱི་ཚེས་ ༢༨ ཉིན་གྱི་སྔ་དྲོར་ལྡི་ལི་སྐུ་ཚབ་དོན་གཅོད་ཀྱི་ལས་འགན་རྩིས་སྤྲོད་རྩིས་ལེན་ལེགས་གྲུབ་རྗེས་སུ། ལྡི་ལིའི་ས་གནས་འགོ་འཛིན་གྱིས་གཙོས་བརྒྱ་དཔོན་འཐུས་མི་དང་། གཞུང་འབྲེལ་མིན་པའི་ཚོགས་པ་ཁག་གི་རྒྱུན་ལས་ཁག་གཅིག་ནས་ལྡི་ལིའི་སྐུ་ཚབ་དོན་གཅོད་གསར་པ་འཇིགས་མེད་འབྱུང་གནས་ལགས་སུ་ཕེབས་བསུའི་འཚམས་འདྲིའི་མཛད་སྒོ་སྟབས་བདེ་ཞིག་ཚོགས་གནང་འདུག་པ་དང་། རྩིས་ལེན་རྩིས་སྤྲོད་སྐབས་སྤྲོད་དཔང་དུ་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཆེད་བཅར་གནང་འདུགལྡི་ལི་ས་གནས་འགོ་འཛིན་གྱི་དབུས་པའི་ལྡི་ལི་བོད་སྒར་བསམ་ཡས་གླིང་དང་ལ་དྭགས་རྡ་རམ་ཤ་ལ་བཅས་ཀྱི་འཐུས་མི་རྣམ་པ་དང་། དོན་གཅོད་ཀྱི་ལས་བྱེད་པ་བཅས་ནས་ཁོང་ལ་འཚམས་འདྲི་ཞུས་ཡོད་པ་རེད།
![Jigmey Jungney Delhi Bureau](https://vot.org/wp-content/uploads/2024/06/449448290_867819445382852_3871277057089191819_n.jpg)