ཁ་སང་བུད་མེད་སྒེར་ལངས་ཐེངས་ ༦༣ ཉིན་མོར་རྒྱ་གར་གྱི་རྒྱལ་ས་ལྡི་ལིའི་བུད་མེད་ཚོས་ཇན་ཏར་མན་ཏར་ཁུལ་དུ་ངོ་རྒོལ་སྐད་འབོད་གནང་བའི་ཐོག་ནས་དུས་དྲན་དེ་སྲུང་བརྩི་ཞུས་ཡོད་པ་རེད། 
རྒྱལ་ས་ལྡི་ལིའི་ཁུལ་གྱི་བེུད་བརྒྱ་ལྷག་གིས་ཕྲེད་དར་སྣ་ཚོགས་བསྣམས་ཏེ་དེ་དག་གི་སྟེང་ལ་ཉེ་ཆར་སྐུ་ལུས་མེར་བསྲེགས་གནང་བའི་ཚེ་དབང་ནོར་བུ་ལགས་ཀྱི་སྐུ་པར་དང་ཀུན་གཟིགས་༸པཎ་ཆེན་༸སྐུ་གོང་མའི་སྐུ་པར། དེ་བཞིན་བོད་དོན་དང་འབྲེལ་བའི་འབོད་ཚིག་འདྲ་མིན་ཆེད་བཀོད་གནང་བ་དང་སྦྲགས། ལྷག་པར་དུ་བོད་ཀྱི་རྒྱལ་དང་བུད་མེད་ལྷན་ཚོགས་ཀྱི་དར་ཆ་བཅས་པ་མཁའ་དབྱིངས་སུ་འཕྱར་བ་མ་ཟད། བོད་མིར་རང་དབང་དགོས། བོད་ཀྱི་བདག་པོ་བོད་མི་ཡིན། རྒྱ་དམར་བོད་ནས་ཕར་རྒྱུགས་ཤིག་ཞེས་སོགས་སྐད་འབོད་གནང་ཡོད།
ཇན་ཏར་མན་ཏར་ཁུལ་དུ་ཆུ་ཚོད་གཅིག་ལྷག་ཙམ་རིང་ངོ་རྒོལ་སྐད་འབོད་གནང་རྗེས་ལས་འགུལ་གོ་སྒྲིག་ཞུ་མཁན་ལྡི་ལི་ས་གནས་བུད་མེད་ལྷན་ཚོགས་ཀྱི་ངོས་ནས་བུད་མེད་སྒེར་ལངས་དང་འབྲེལ་བའི་དུས་དྲན་གྱི་སྐུ་མགྲོན་དུ་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་ཚོགས་གཞོན་ཟུར་པ་ཨཱཙཱརྱ་ཡེ་ཤེས་ཕུན་ཚོགས་མཆོག། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་བཅས་གདན་ཞུ་ཕུལ་འདུག་པ་དང་། སྐབས་དེར་དབུ་དཀར་ཚང་གཡུ་སྒྲོན་ལགས་ཀྱིས་བཙན་བྱོལ་དུ་ཡོད་པའི་བོད་པའི་བུད་མེད་ཚོར་བོད་མིའི་རང་དབང་འཐབ་རྩོད་ཀྱི་ལས་འགན་དྲན་སྐུལ་དང་། རྒྱ་ནག་གིས་བོད་ནང་བོད་མི་ཤེས་ཡོན་ཅན་དང་སྒྱུ་རྩལ་མཁན་སོགས་ལ་དེང་སྐབས་དམིགས་བསལ་ལྡང་ཟུག་བྱེད་ཤུགས་ཆེས་ཆེར་ཕྱིན་ཡོད་སྐོར་གསུངས་པ་དང་ཆབས་ཅིག བོད་མིའི་ཆོས་རིག་དང་སྐད་ཡིག་བཅས་ཀྱི་གནས་སྟངས་ཆེས་ཛ་དྲག་ཆགས་ཡོད་པར་འགྲེལ་བརྗོད་གནང་བ་འབྲེལ་ཏེ། རྒྱ་ནག་གཞུང་གི་ངོས་ནས་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་ཐད་ཐེ་བྱུས་མཚམས་འཇོག་དགོས་སྐོར་སོགས་གསུངས་ཡོད།
དེ་བཞིན་ BTM རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་དྲུང་ཆེ་སྐུ་ཞབས་ Punkaj Goyal ལགས་དང་ Himalaya Parivar ཡི་དྲུང་ཆེ་སྐུ་ཞབས་ Rishi Walia ལགས་རྣམ་པ་གཉིས་ཀྱིས་ཀྱང་བོད་པའི་བུད་མེད་ཚོའི་ངོས་ནས་འཚེ་མེད་ཞི་བའི་སྒོ་ནས་རང་དབང་འཐབ་རྩོད་གནང་བཞིན་པའི་བཞེངས་ཕྱོགས་ལ་ཡི་རངས་བསྔགས་བརྗོད་དང་སྦྲགས། བོད་དོན་བདེན་མཐའ་མྱུར་དུ་གསལ་ཐུབ་པ་ཡོང་གི་རེད་ཅེས་གསུངས་སོང་།
གཞི་རྩའི་ས་གནས་བུད་མེད་ལྷན་ཚོགས་ཀྱི་ངོས་ནས་ཁ་སང་བུད་མེད་སྒེར་ལངས་ཐེངས་ ༦༣ པ་རྒྱལ་ས་ལྡི་ལིའི་ནང་ངོ་རྒོལ་སྐད་འབོད་དང་འབྲེལ་གོམ་བགྲོད་གནང་རྒྱུར་ཐུགས་རེ་གནང་འདུག་ཀྱང་། ས་གནས་སྐོར་སྲུང་བས་དེ་ལྟར་ཆོག་མཆན་གནང་མེད་སྟབས་དེར་ཐུགས་ཕམ་གནང་གི་འདུག
