ཁ་སང་དབུས་འོས་བསྡུ་ལས་ཁང་གིས་དྲྭ་ལམ་ཐད་གཏོང་བརྒྱུད་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ཆེན་མོའི་གྲུབ་འབྲས་གཞུང་འབྲེལ་ཐོག་གསལ་བསྒྲགས་གནང་བ་དང་སྦྲགས། སྤྱི་འཐུས་ཚོགས་ཟུར་སྤེན་པ་ཚེ་རིང་ལགས་སུ་ཁྱོོན་འོས་གྲངས་ ༣༤༣༢༤ དང་དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་སུ་ཁྱོན་འོས་གྲངས་ ༢༨༩༠༧ བཅས་ཐོབ་སྟེ་སྤེན་པ་ཚེ་རིང་ལགས་སུ་སྲིད་སྐྱོང་གི་འོས་བསྡུའི་རྒྱལ་ཁ་ཐོབ་ཡོད་པ་གསལ་བསྒྲགས་གནང་ཡོད་པ་རེད་།
བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁ་སང་ཕྱི་དྲོ་རང་ཉིད་ཀྱི་ངོ་དེབ་བརྒྱུད་འོས་བསྡུ་གྲུབ་འབྲས་དང་འབྲེལ་བའི་གཏམ་བཤད་གནང་བའི་ནང་དུ་ཁོང་ལ་འོས་བསྡུའི་རྒྱལ་ཁ་ཐོབ་པར་ཚོར་བ་ཅི་བྱུང་སྐོར་དང་འབྲེལ། འོས་བསྡུའི་འགྲན་རྩོད་ནང་ཞུགས་སྐབས་གཅིག་ལ་རྒྱལ་ཁ་དང་གཅིག་ལ་ཕམ་ཉེས་བྱུང་གི་ཡོད་པ་དེ་རང་བཞིན་ཆོས་ཉིད་ཡིན་པས་རྒྱལ་ཁབ་ཐོབ་པར་དམིགས་བསལ་དགའ་བ་སྒོམ་དགོས་དོན་གང་ཡང་མེད་པ་དང་དེ་ལས་ང་ཚོས་སེམས་ཤུགས་མ་ཆགས་པར་མུ་མཐུད་ནས་མདུན་བསྐྱོད་ཞུས་ཏེ་མི་རིང་བར་བོད་རྒྱའི་དཀའ་རྙོག་སེལ་བའི་ཉིན་མོ་ཞིག་ཤར་ཚེ་དེ་ཉིན་གཞིས་བྱེས་བོད་མི་ཡོངས་ནས་དོན་དངོས་ཀྱི་དགའ་བ་སྒོམ་དགོས་པ་དང་ཉིན་མོ་དེའི་ཆེད་དུ་ཚང་མས་མཉམ་རུབ་ཀྱིས་ནུས་པ་སྤུངས་རོགས་ཞེས་འབོད་སྐུལ་བསྐྱར་ནན་ཞུས་འདུག
ཁ་སང་དབུས་འོས་བསྡུ་ལས་ཁང་གིས་གསལ་བསྒྲགས་དེ་གནང་མ་ཐག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་སེང་གེ་མཆོག་ནས་བོད་ཀྱི་བརྙན་འཕྲིན་བརྒྱུད་བཀའ་ཤག་གི་ཚབ་ཞུས་ཏེ་བདམས་ཐོན་སྲིད་སྐྱོང་དང་སྤྱི་འཐུས་རྣམ་པར་དགའ་བསུའི་འཚམས་འདྲི་གནང་ཞིང་ས་ག་ཟླ་བའི་ཚས་ ༡༥ ཉིན་དེ་དམ་འབུལ་ཉིན་མོར་གཏན་འཁེལ་གནང་བའི་ཐག་གཅོད་གསལ་བསྒྲགས་གནང་བ་མ་ཟད། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་ཞལ་པར་ཕུལ་ཏེ་བཀའ་ཤག་ནས་འཚམས་འདྲི་དང་ཁོང་གི་ལས་ཡུན་སྐབས་ཕྱག་ལས་ལེགས་འགྲུབ་ཡོང་བའི་སྨོན་འདུན་ཡང་ཞུས་འདུག
བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁ་སང་ཕྱི་དྲོ་ཕྱག་ཚོད་ ༨ ཐོག་རང་ཉིད་ཀྱི་ངོ་དེབ་བརྒྱུད་མང་ཚོགས་ལ་གནང་པའི་གསུང་བཤད་དེའི་སྐབས། ཁོང་གིས་ད་ལན་མི་མང་གིས་ཁོང་ལ་འོས་ཤོག་ཕངས་ནས་འགན་སྐུར་བའི་ཁས་ལེན་ཡོངས་རྫོགས་ལྷག་བསམ་རྣམ་དག་དང་འཇིགས་ཞུམ་ཆགས་སྡང་མེད་པར་སྤྱི་སྙོམ་དྲང་བདེན་ཐོག་ནས་ལག་བསྟར་གྱིས་གོམ་པ་མདུན་སྤོ་བྱ་རྒྱུའི་དམ་བཅའ་བརྟན་པོ་ཡོད་པ་གསུངས་འདུག
དེ་བཞིན་སྤེན་པ་ཚེ་རིང་ལགས་ཀྱིས་ལྟ་བ་ལངས་ཕྱོགས་དང་ཆོལ་ཁའི་དཀའ་ངལ་ཁག་ལ་གདོང་ལེན་གནང་ཕྱོགས་དང་འབྲེལ་ང་ཚོས་བོད་མདོ་དབུས་ཁམས་གསུམ་གྱི་ལོ་རྒྱུས་ཙམ་མིན་པར་ཁྱིམ་མཚེས་རྒྱལ་ཁབ་ཁག་དང་བྲེ་བྲག་རྒྱ་ནག་གི་འབྲེལ་བའི་སྐོར་ཞིབ་ཚགས་མཁྱེན་པ་གནང་རྒྱུ་དེ་གལ་ཆེ་ཡིན་པས་དེའི་ཐོག་འབད་བརྩོན་གནང་རྒྱུ་དང་ལྷག་དོན་སྤྱི་ཚོགས་ནང་རྙོག་དྲ་རིགས་ཡོང་བཞིན་པ་དེ་དངོས་ཡོད་གནས་སྟངས་མ་རྟོགས་པའི་དབང་གིས་ཡིན་སྟབས་འབྱུང་འགྱུར་བཀའ་ཤག་ངོས་ནས་བོད་དང་བཙན་བྱོལ་སྤྱི་ཚོགས་ནང་གི་དངོས་ཡོད་གནས་སྟངས་ཐོག་ཞིབ་འཇུག་ཚད་ལྡན་གྱིས་དེ་དག་མང་ཚོགས་མདུན་ལ་མཁོ་སྤྲོད་གནང་རྒྱུ་དེ་ལས་འགན་གཙོ་གྲས་སུ་ངོས་འཛིན་གྱི་ཡོད་པར་གསུངས་འདུག
གཏམ་བཤད་དེའི་ནང་ཁོང་གིས་ད་དུང་སྲིད་སྐྱོང་གི་དམ་འབུལ་རྗེས་ཀྱིས་ལས་དོན་དང་དེ་བཞིན་བཀའ་ཤག་གསར་བའི་གྲ་སྒྲིག་ཡིན་པའི་འགྲེལ་བརྗོད་གནང་འདུག
ལར་ནས་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་ཁོང་གིས་སྲིད་སྐྱོང་གི་ལས་ཡུན་ཁྲོད་ཕྱག་ལས་གང་གནང་བ་དེ་དག་ལྷག་བསམ་རྣམ་དག་གི་སྒོ་ནས་གནང་རྒྱུའི་ཁས་ལེན་དང་འབྲེལ་མང་ཚོགས་ལ་རྒྱབ་སྐྱོར་གྱི་འབོད་སྐུལ་གནང་བ་མ་ཟད་བོད་ནང་གི་བོད་མི་ཚོར་བརྡ་ལན་དེ་འདྲ་ཞིག་གནང་འདུག
དེ་བཞིན་སྲིད་སྐྱོང་གི་དངོས་གཞིའི་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་ཁོང་སྒེར་གྱི་ངོ་དེབ་ཐོག་འོས་བསྡུའི་གྲུབ་འབྲས་དང་འབྲེལ། མཇུག་བསྡོམས་གསལ་བསྒྲགས་ཤིག་སྤེལ་བའི་ནང་ལ། ༢༠༢༡ ལོའི་དངོས་གཞིའི་སྲིད་སྐྱོང་འོས་མིར་ཚུད་ཐུབ་པ་བྱུང་བ་ནི་མི་ཚེ་འདིའི་ནང་གི་གཟི་བརྗིད་ཆེ་ཤོས་ཀྱི་བྱ་བཞག་ཅིག་ལ་ངོས་འཛིན་ཞུ་བཞིན་ཡོད་པ་དང་། འོས་བསྡུའི་ཐོག་མཐའ་བར་གསུམ་གྱི་ལས་དོན་ཁྲོད་རྒྱབ་བསྐྱོར་གནང་མཁན་སྤྱི་ལ་ཐུགས་རྗེ་ཆེ་ཞུས་དང་སྦྲགས། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ལ་འཚམས་འདྲི་བཀྲ་ཤིས་བདེ་ལེགས་དང་། ད་ལྟའི་དཀའ་རྙོག་དང་འགྱུར་འགྲོས་ཆེ་བའི་དུས་སྐབས་འདིར་ལས་དོན་རྣམས་ལེགས་འགྲུབ་ཡོང་བ་དང་སྐུ་གཟུགས་བདེ་ཐང་ཡོང་བའི་འཚམས་འདྲི་ཞུས་གནང་བ་མ་ཟད་བོད་རིགས་སྤུན་ཟླ་ཡོངས་ལ་འོས་བསྡུའི་གྲུབ་འབྲས་ཅི་བྱུང་ལ་ངོས་ལེན་གནང་དགོས་པའི་རེ་སྐུལ་དང་སྲིད་སྐྱོང་གསར་བར་མཐུན་འགྱུར་རོགས་རམ་ཞུ་དགོས་བའི་སྐུལ་མ་གནང་ཡོད་པ་རེད།
གཞི་རྩའི་ཐེངས་འདིའི་བཙན་བྱོལ་བོད་མིའི་འོས་བསྡུ་ཆེན་མོའི་ནང་འོས་འཕེན་པའི་མིང་གཞུང་དེབ་འགོད་གནང་མཁན་བོད་མི་གྲངས་ ༨༣,༠༨༠ བྱུང་བའི་བྱུང་བའི་ཁོངས་ནས་སྲིད་སྐྱོང་གི་དངོས་གཞིའི་འོས་ཤོག་དངོས་སུ་འཕེན་མཁན་གྱི་བོད་མི་གྲངས་ ༦༣,༩༩༡ བྱུང་ཡོད་པ་བཅས་ཆ་སྙོམས་འོས་འཕེན་པའི་རྒྱ་ཆ་ ༧༧་༠༢ ཆགས་ཀྱི་ཡོད་པ་དེ་ནི། ད་བར་བཙན་བྱོལ་བོད་མིའི་འོས་བསྡུའི་ལས་རིམ་ནང་འོས་འཕེན་པ་ཆ་ཤས་བཞེས་མཁན་གྱི་གྲངས་འབོར་མཐོ་ཤོས་དེ་ཆགས་ཡོད་པ་རེད།
