བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དེ་རིང་ཕྱི་ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལིར་གཞུང་འབྲེལ་ཕྱོགས་ཕེབས་སླད་ཕེབས་ཐོན་གནང་འདུག
གནས་ཚུལ་ཤེས་རྟོགས་བྱུང་བར་སྲིད་སྐྱོང་མཆོག་དེ་རིང་ནས་དབུ་འཛུགས་ཀྱིས་ཕྱི་ཚེས་ ༡༦ བར་ལྡི་ལིར་གནད་ཡོད་མི་སྣ་མཇལ་འཕྲད་དང་ལྡི་ལིར་གནས་བཞུགས་བོད་མི་ཚོ་དང་མཇལ་འཕྲད་གནང་གི་འདུག 
གཞི་རྩའི་སྲིད་སྐྱོང་མཆོག་ཉེ་ལམ་ཧི་མཱ་ཅལ་མངའ་སྡེ་ནང་རྟེན་གཞི་བྱས་པའི་གདན་ས་༸དཔལ་སྤུངས་ཤེས་རབ་རྣམ་པར་རྒྱལ་བའི་གླིང་དང་སྦིར། ཅོན་ཏཱ་ར་ཁྱབ་ཁོངས་དགོན་སྡེ་ཁག་དང་སློབ་གྲྭ། ས་གནས་ཀྱི་འཕྲོད་བསྟེན་སྨན་ཁང་སོགས་སུ་འཚམས་གཟིགས་ཀྱིས་མང་ཚོགས་དང་མཇལ་འཕྲད་གནང་སྟེ་གསུང་བཤད་གནང་ཡོད།
སྦིར་དང་ཅོན་ཏཱ་ར་ཁུལ་གྱི་མཛད་འཆར་ཐོག་མར་སྲིད་སྐྱོང་མཆོག་ནས་ཟླ་ ༧ ཚེས་ ༧ ཉིན་སྦིར་ཉེ་འདབས་སུ་ཆགས་པའི་གདན་ས་༸དཔལ་སྤུངས་ཤེས་རབ་རྣམ་པར་རྒྱལ་བའི་གླིང་དུ་ཕེབས་འབྱོར་གྱིས་ཀཱན་ཏིང་ཏཱའི་སི་ཏུ་རིན་པོ་ཆེ་མཆོག་དང་མཇལ་འཕྲད་ཞུས་ཏེ་ཤེས་རབ་གླིང་གི་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་གྱི་སྐབས་དང་པོའི་སྨན་རྩིས་སློབ་གཉེར་བ་རྣམས་སློབ་ཐོན་དང་། ཉམས་གསོག བསྙེན་མཚམས་བཅས་ཡོངས་སུ་ལེགས་པར་གྲུབ་པའི་བསླབ་པ་མཐར་སོན་གྱི་མཛད་སྒོའི་སྐུ་མགྲོན་གཙོ་བོར་ཕེབས་ཡོད་པ་མ་ཟད། དེ་རྗེས་མཛད་སྒོར་ཕེབས་པའི་སྐུ་མགྲོན་ལྷན་རྒྱས་དང་ལྷན་རིག་གནས་མཐོ་སློབ་ཀྱི་སྡེ་ཚན་སྨན་གྱི་ལྡུམ་ར་དང་། བརྟག་དཔྱད་སྨན་ཁང་། འཇམ་དཔྱད་ཁང་། འགྲེམས་སྟོན་ཁང་། བཟོ་རིག མཐོ་སློབ་ཀྱི་ཡིག་ཚང་། སྨན་སྦྱོར་ཁང་བཅས་ལ་གཟིགས་སྐོར་གནང་ཡོད། 
དེ་བཞིན་སྲིད་སྐྱོང་མཆོག་གིས་ཕྱི་ཚེས་ ༨ ཉིན་སྦིར་སྡེ་དགེ་དང་སྦིར་བོད་ཚོགས་ཀྱི་ས་གནས་མང་ཚོགས་ལ་གསུང་བཤད་གནང་བའི་ཁྲོད་བོད་མི་མང་ཚོགས་ཀྱིས་བོད་ཀྱི་ལོ་རྒྱུས་གནས་བབ་སྤྱི་དང་བཙན་བྱོལ་བོད་མིའི་མང་གཙོའི་འཕེལ་རིམ། དེ་བཞིན་༸གོང་ས་མཆོག་གི་བཀའ་སློབ་ཕེབས་ཁག་ལ་སློབ་སྦྱོང་གནང་གལ་དང་། ཁྲིམས་དང་སྒྲིག་གཞིའི་སྐོར་སློབ་སྦྱོང་གནང་དགོས་སྐོར་གསུངས་ཡོད་པར་མ་ཟད། མི་འབོར་གྲངས་བཤེར་སོགས་ཀྱི་སྐོར་འགྲེལ་བརྗོད་དང་འབྲེལ་ཏེ། བོད་མི་ནང་ཁུལ་མཐུན་སྒྲིལ་གནང་བའི་དགེ་མཚན་ཇི་ཡོད་སྐོར་གསུངས་པ་དང་ཆབས་ཅིག མང་ཚོགས་ཀྱི་བཀའ་འདྲི་ཞུས་པ་ཁག་ལ་བཀའ་ལན་གནང་ཡོད་པ་རེད།
ཕྱི་ཚེས་ ༩ ཉིན་སྲིད་སྐྱོང་མཆོག་གིས་ཅོན་ཏཱ་ར་བོད་ཁྱིམ་སློབ་གྲྭའི་དགེ་ལས་སློབ་ཕྲུག་ཡོངས་དང་ཅོན་ཏཱ་ར་སཾ་བྷོ་ཊ་སློབ་གྲྭའི་དགེ་ལས་སློབ་ཕྲུག ཅོན་ཏཱ་ར་ནང་ཆེན་གཞིས་ཆགས་ཀྱི་མི་མང་སོགས་ལ་གསུང་བཤད་གནང་བར་བོད་ཀྱི་ལོ་རྒྱུས་གནས་བབ་ཤེས་རྒྱུ་ཧ་ཅང་གལ་ཆེན་ཡིན་པ་དང་ལྷག་པར་གཞོན་སྐྱེས་རྣམས་ཀྱི་ངོས་ནས་བོད་ཀྱི་མི་རབས་རྒན་པ་རྣམས་ཀྱིས་སྐུ་ལས་བསྐྱོན་གནང་ཡོད་པ་དེ་དག་བཀའ་དྲིན་རྗེས་སུ་དྲན་དགོས་གལ་ཡིན་སྐོར་གསུངས་ཡོད་ལ། དེ་བཞིན་བོད་མི་རྣམས་ནས་དགོས་མེད་ཀྱི་སྲང་ལམ་ཁྲོད་ཀྱི་བཀའ་མོལ་ལ་དབུ་མ་འཁོར་བར་བོད་མི་ནང་ཁུལ་འཆམ་མཐུན་གནང་གལ་ཡིན་སྐོར་སོགས་གསུངས་ཡོད། འབྲེལ་ཡོད་པར་ཁག་གི་བདག་དབང་སྲིད་སྐྱོང་སྤེན་པ་ཚེ་རིང་མཆོག་གི་ངོ་དེབ།
