ཧི་མ་ཅཱལ་མངའ་སྡེས་སློབ་གྲྭ་ཁག་གི་དགེ་ལས་སློབ་ཕྲུག་ཁག་ཅིག་ལ་ཏོག་དབྱིབས་གཉན་རིམས་ཕོག་པའི་རྐྱེན་གྱིས་སླར་ཡང་སློབ་གྲྭ་དང་ཤེས་ཡོན་གྱི་སྡེ་ཁག་ཕྱིར་བཤོལ་གནང་དགོས་པའི་བཀོད་ཁྱབ་གནང་འདུག
ཁ་སང་བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ཚེ་ཟླ་ ༡༡ ཚེས་ ༢ ཉིན་ཧི་མ་ཅཱལ་མངའ་སྡེ་ནང་གི་སློབ་གྲྭ་གཙོས་མཐོ་སློབ་དང་ཤེས་ཡོན་གྱི་ལྟེ་གནས་རྣམས་རིམ་བཞིན་དབུ་འཛུགས་ཡོད་པ་དེ་ལྟར་ཡང་། ཉེ་ལམ་སློབ་གྲྭ་ཁག་གི་དགེ་ལས་སློབ་ཕྲུག་ཚོར་ཏོག་དབྱིབས་གཉན་རིམས་བརྟག་དཔྱད་གནང་འབྲས་སུ་གཉན་རིམས་ཕོག་མཁན་མང་དག་ཅིག་ཐོན་ཡོད་སྟབས། ཁ་སང་ཧི་མ་ཅཱལ་མངའ་སྡེས་སློབ་གྲྭ་དང་མཐོ་སློབ། ཤེས་ཡོན་ལྟེ་གནས་རྣམས་ཁ་སང་ཚེས་ ༡༡ ཉིན་ནས་དབུ་འཛུགས་ཀྱིས་ཚེས་ ༢༥ བར་ཁྱོན་ཉིན་གྲངས་བཅོ་ལྔའི་རིང་སླར་ཡང་ཕྱིར་བཤོལ་གནང་དགོས་པའི་བཀོད་ཁྱབ་གནང་འདུག
སློབ་གྲྭ་དང་ཤེས་ཡོན་གྱི་སྡེ་ཁག་ནས་གཉན་རིམས་ཕོག་མཁན་གྱི་གྲངས་ཐོ་རིམ་པ་འཐོན་མུས་དང་འབྲེལ་ཏེ་མངའ་སྡེ་གཞུང་ནས་མངའ་ཁུལ་ནང་ཏོག་དབྱིབས་གཉན་རིམས་ཀྱི་གནས་སྟངས་ཐད་གཟིགས་ཞིབ་ནན་པོ་གནང་བཞིན་ཡོད་པ་དང་གཉན་རིམས་ཕོག་མཁན་ཚོར་བརྟག་དཔྱད་གང་མང་གནང་རྒྱུ་དང་ལྷག་དོན་འབྲེལ་གཏུག་རྩད་གཅོད་གང་མགྱོགས་གནང་དགོས་པར་ཐག་གཅོད་གནང་འདུག
གཞི་རྩའི་སློབ་གྲྭ་དང་ཤེས་ཡོན་གྱི་སྡེ་ཁག་སླར་དབུ་འཛུགས་གནང་བ་དང་སྦྲགས། བོད་སློབ་ཁག་གི་འཛིན་རིམ་བཅུ་པ་དང་བཅུ་གཉིས་ཀྱི་སློབ་ཕྲུག་རྣམས་རིམ་བཞིན་སོ་སོའི་སློབ་གྲྭར་ཕྱིར་ཕེབས་གནང་ཡོད་པ་རེད། དེའི་ཁོངས་སུ་ཉེ་ལམ་སུ་ཇཱ་དང་ཅོན་ཏཱ་ར་བོད་ཁྱིམ་གྱི་དགེ་ལས་སློབ་ཕྲུག་ཁྱོན་ ༡༠༤ ལ་ཏོག་དབྱིབས་གཉན་རིམས་ཕོག་པའི་གནས་ཚུལ་བྱུང་ཡོད་ཀྱང་། ད་ལྟའི་ཆར་དམིགས་བསལ་གྱི་ཛ་དྲག་གནས་སྟངས་མེད་པ་དང་ཁོང་རྣམས་ཟུར་བཀག་ཏུ་བཞུགས་མུས་ཡིན་པ་རེད། 
རྩ་བའི་བོད་ཁྱིམ་ནང་གཉན་རིམས་ཕོག་མཁན་གྱི་གནས་ཚུལ་ཐོན་མ་ཐག་འདི་ག་རླུང་འཕྲིན་ཁང་ནས་བོད་ཁྱིམ་གྱི་ཡན་ལག་སློབ་གྲྭ་གཞན་ཚོར་དེ་འབྲེལ་བཀའ་འདྲི་ཞུས་པར་སེ་ལ་ཀུའི་དང་གོ་པཱལ་པུར་བོད་ཁྱིམ་གཉིས་ཀྱི་སློབ་ཕྲུག་རྣམས་ལ་བརྟག་དཔྱད་གནང་འབྲས་སུ་ནད་རྟགས་ཐོན་མེད་པ་ཤེས་རྟོགས་བྱུང་བ་དང་། འོན་ཀྱང་སྐབས་དེར་དྷ་སྟེང་བོད་ཕྲུག་ཁྱིམ་སྡེའི་སློབ་ཕྲུག་རྣམས་ལ་བརྟག་དཔྱད་གནང་ཡོད་ཀྱང་གྲུབ་འབྲས་འབྱོར་མེད་པ་རེད། དྷ་ཤོད་བོད་ཁྱིམ་གྱི་སློབ་མ་རྣམས་བརྟག་དཔྱད་གནང་རྒྱུ་ཡིན་ཞེས་གསུངས་ཡོད་པ་ལྟར། དེ་རིང་སླར་ཡང་དེ་འབྲེལ་ཐོག་བཀའ་འདྲི་ཞུས་སྐབས་དྷ་སྟེང་བོད་ཕྲུག་ཁྱིམ་སྡེའི་སློབ་ཕྲུག་ ༩༢ ལ་བརྟག་དཔྱད་གནང་བའི་གྲུབ་འབྲས་འབྱོར་མེད་པ་དང་། དེ་བཞིན་དྷ་ཤོད་བོད་ཁྱིམ་ནང་སློབ་ཕྲུག་ ༢༣ འབྱོར་བའི་ཁྲོད་ད་ཆ་སློབ་ཕྲུག་ ༧ དང་དགེ་རྒན་ ༡༣ ལ་བརྟག་དཔྱད་གནང་འབྲས་སུ་དགེ་སློབ་དེ་དག་ཆ་ཚང་ལ་ཏོག་དབྱིབས་གཉན་རིམས་ཕོག་མེད་པའི་གྲུབ་འབྲས་སོན་འདུག
རྩ་བའི་ད་བར་ཧི་མཱ་ཅལ་ནང་ཏོག་དབྱིབས་གཉན་རིམས་ཕོག་མཁན་ ༢༧༤༡༨ བྱུང་བའི་ཁོངས་ནས་ ༤༠༢ འདས་གྲོངས་གྱུར་ཡོད་པ་དང་། མི་གྲངས་ ༢༡༣༨༦ ལྷག་དྲག་སྐྱེད་བྱུང་བ་དང་ད་ལྟའི་ཆར་ནད་ཀྱིས་མནར་བཞིན་པ་ ༥༦༣༠ ཆགས་ཀྱི་འདུག
གཞན་ཡང་རྒྱ་བལ་གཉིས་ཀྱི་བོད་མིའི་འདུ་སྡོད་ཁག་ཏུ་མཚོན་པ་ཡིན་ན་གཟའ་འཁོར་འདིའི་ནང་ཏོག་དབྱིབས་གཉན་རིམས་ཕོག་མཁན་བོད་མི་ ༡༣༤ དང་ ༣ འདས་གྲོངས་སུ་ཕྱིན་འདུག དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༣ སྤེལ་བའི་ཐོག་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་རྒྱ་གར་དང་བལ་ཡུལ་གཉིས་ཀྱི་བོད་མིའི་འདུ་སྡོད་ཀྱི་ས་ཁུལ་ཁྲོད་བོད་མི་ ༡༣༤ ལ་ཏོག་དབྱིབས་གཉན་རིམས་ཕོག་ཡོད་པ་དང་དེའི་ཁོངས་རྒྱ་གར་ནས་བོད་མི་ ༡༢༥ དང་བལ་ཡུལ་ཁུལ་ནས་ ༩ དེ་བཞིན་ནད་ཡམས་དེའི་རྐྱེན་གྱིས་རྒྱ་གར་ལྷོ་ཕྱོགས་སྦེལ་ཀོབ་ནས་སྐྱེས་པ་རང་ལོ་ ༨༥ ལ་སོན་པ་དང་ལ་དྭགས་ཁུལ་ནས་སྐྱེས་པ་རང་ལོ་ ༦༨ དང་ ༧༨ ལ་སོན་པ་གཉིས་བཅས་བོད་མི་གསུམ་འདས་གྲོངས་སུ་གྱུར་ཡོད་པ་གསུངས་སོང་།
སྨན་པ་མཚམས་གཅོད་ལགས་ཀྱིས་སྤྱིར་གཟའ་འཁོར་འདིའི་ནང་གཉན་རིམས་ཕོག་མཁན་རྣམས་ཀྱི་གནས་སྟངས་ཆེས་ཛ་དྲག་ཆེ་བའི་ངལ་བ་མེད་ཀྱང་། བདུན་ཕྲག་འདིར་གཉན་རིམས་ཕོག་མཁན་གྱི་གྲངས་ཐོ་ཏོག་ཙམ་འཕར་ ཡོད་སྟབས་མང་ཚོགས་ཚོས་ངེས་པར་དུ་སྔོན་འགོག་གི་ལམ་སྟོན་ཁག་མུ་མཐུད་གནང་སྐྱོང་ཡོང་བའི་གཞེན་སྐུལ་གནང་ཡོད།
གཞི་རྩའི་ད་བར་རྒྱ་བལ་གཉིས་ནང་བཙན་བྱོལ་བོད་མིའི་ཁྲོད་བོད་མི་ ༡༡༦༥ ལ་ཏོག་དབྱིབས་གཉན་རིམས་ཕོག་ཡོད་པ་དང་དེའི་ཁོངས་ནས་ ༧༧༢ དྲག་སྐྱེད་དང་ ༢༦ འདས་གྲོངས་སུ་གྱུར་ཡོད། ད་ཆར་ནད་ཀྱིས་མནར་བཞིན་པ་ ༣༦༧ ཆགས་ཀྱི་ཡོད་པ་རེད།
