ཁ་སང་ཕྱི་ཟླ་ ༤ ཚེས་ ༡༣ ཉིན་ྋསྐྱབས་རྗེ་བླ་མ་བཟོད་པ་རིན་པོ་ཆེ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཡོད་པ་དང་ད་ལྟའི་ཆར་རིན་པོ་ཆེ་མཆོག་ཐུགས་དམ་ལ་བཞུགས་མུས་ཡིན་པ་རེད།
ཁ་སང་ྋསྐྱབས་རྗེ་བླ་མ་བཟོད་པ་རིན་པོ་ཆེ་མཆོག་དགོངས་པ་ཆོས་དབྱིངས་སུ་ཐིམ་མ་ཐག་རིན་པོ་ཆེ་མཆོག་གི་ཐེག་ཆེན་འཛིན་སྐྱོང་ཚོགས་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་སེང་ཞུས་པ་དང་སྦྲགས། ཡང་སྲིད་རིན་པོ་ཆེ་མྱུར་བྱོན་གྱི་གསོལ་འདེབས་སྐྱབས་འཇུག་ཞུས་འདུག་ལ། རིན་པོ་ཆེ་མཆོག་དགོངས་པ་གཞན་དོན་དུ་མ་གཤེགས་གོང་ནས་སྔོན་སྒྲིག་ལྟར་རིང་མིན་ཕྱི་ཟླ་ ༥ ཚེས་ ༢༤ ཉིན་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་བ་བཞིན་དེ་འབྲེལ་གནང་སྒོ་ཁག་འཐུས་ཚང་ཞུས་ཏེ་བརྟན་བཞུགས་བསྟར་འབུལ་ཞུ་རྒྱུ་རེད་འདུག
རླུང་འཕྲིན་ཁང་གིས་༸དཔལ་འོག་མིན་བྱང་ཆུབ་ཆོས་གླིང་ངམ་ཀོ་པན་དགོན་པའི་སློབ་སྤྱི་དགེ་བཤེས་ཐུབ་བསྟན་ཤེས་རབ་ལགས་སུ་ྋསྐྱབས་རྗེ་བླ་མ་བཟོད་པ་རིན་པོ་ཆེ་མཆོག་དགོངས་པ་ཆོས་དབྱིངས་སུ་ཐིམ་པ་དང་འབྲེལ་བའི་བཅར་འདྲི་ཞུས་ཡོད།
