ARCHIVE
Monthly Archives: July, 2016
རེས་གཟའ་ཕུར་བུ། ༢༠༡༦།༠༧།༠༧
vot.org -
ཉན་པ།: Listen
ཕབ་ལེན། Download
༸གོང་ས་མཆོག་གིས་བློ་གསལ་གླིང་ཆོས་ར་གསར་པ་དབུ་འབྱེད།
༸གོང་ས་མཆོག་དེ་རིང་མོན་གྷོ་འདོད་རྒུ་གླིང་ནས་བཞུགས་སྒར་དུ་ཕེབས་ཐོན་མཛད་པ།
བལ་ཡུལ་ཉེན་རྟོག་པས་འཛིན་བཟུང་བྱེད་པའི་བོད་མི་རྣམས་གློད་བཀྲོལ་བཏང་འདུག
རྒྱ་གཞུང་གི་དམ་དྲག་ལ་ལྟོས་མེད་ལི་ཐང་དང་བྲག་མགོར་འཁྲུངས་སྐར་སྲུང་བརྩི་ཞུས་འདུག
རྒྱ་གཞུང་ནས་བོད་ཡིག་པར་གློག་རྒྱབ་མི་ཆོག་པའི་བཀའ་རྒྱ་བཏང་འདུག
ཧོང་ཀོང་ནས་རྒྱ་གཞུང་ལ་སྐུ་ཞབས་Lam Kee ལགས་རྩིས་སྤྲོད་བྱ་རྒྱུ་མིན་པ་བརྗོད་འདུག
ཨ་རིའི་ Ithaca གྲོང་ཁྱེར་ནང་ཏཱ་ལའི་བླ་མའི་དཔེ་མཛོད་ཁང་དང་འགྲེམས་སྟོན་ཞེས་པ་ཞིག་གསར་འཛུགས།
Thursday 07/07/2016
Dalai Lama inaugurates new assembly hall of Drepung Loseling Monastery
Tibetans arrested by Nepalese police over trungkar celebration released
Tibetans inside Tibet celebrate Dalai Lama’s birthday despite Chinese ban
Dalai Lama concludes Mundgod trip, leaves for Dharamsala
Photocopy ban on Tibetan text in Lanzhou, China
Hong Kong refuses to return bookseller Lam Wing Kee to China
Ithaca chosen to host 14th Dalai Lama's library and museum
དགེ་ལུགས་ཡོངས་དང་མོན་གྷོ་སེར་སྐྱ་མི་མང་གིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུས་པ།
vot.org -
དེ་རིང་ཟླ་ ༧ ཕྱི་ཚེས་ ༦ ཉིན་གྱི་སྔ་དྲོ་ཚོུད་ ༨།༠༠ སྟེང་མོན་གྷོ་འབྲས་སྤུངས་བླ་སྤྱིའི་གཙུག་ལག་ཁང་དུ་དགེ་ལུགས་ཡོངས་དང་མོན་གྷོ་འདོད་རྒུ་གླིང་གི་སེར་སྐྱ་མི་མང་ཐོུང་གིས་༸རྒྱལ་བའི་༸སྐུའི་འཁྲུངས་སྐར་དང་བསྟུན་ཏེ་༸གོང་ས་༸སྐྱབས་མགོན་ཆེནེ་པོ་མཆོག་ལ་༸རྗེ་ཚེ་འཛིན་མའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གནང་སོང་།
དེའང་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་གི་ཆོས་རྗེ་རྣམ་གཉིས། འབྲས་སྤུངས་ཁྲི་པ་བཅས་ནས་སྤོས་སྣེ་དང་བཅས་མགོན་པོ་༸གང་ཉིད་མཆོག་འབྲས་སྤུངས་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གཟིམ་ཆུང་ནས་འབྲས་སྤུངས་ཚོགས་ཆེན་འདུ་ཁང་དུ་གདན་འདྲེན་ཞུས་ཏེ་བཞུགས་ཁྲིར་༸ཞབས་སོར་འཁོད་མཚམས་བརྟན་བཞུགས་ཀྱི་རྡོ་རྗེ་སློབ་དཔོན་དགའ་ལྡན་ཁྲི་པ་མཆོག་ནས་མཇལ་དར་ཕུལ་གནང་རྗེས། ༸རྒྱལ་བའི་འཁྲུངས་རབས་གསོལ་འདེབས་པཎ་གྲུབ་ ༡༧ གསོལ་འདེབས་སོགས་གསུང་འདོན་དང་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་གནང་སོང་།
བརྟན་བཞུགས་དངོས་གཞིའི་སྐབས་རྡོ་རྗེ་སློབ་དཔོན་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་ནས་མཎྜལ་ལྗགས་བཤད་གནང་པ་དང་། གཞུང་འབྲེལ་སྲུང་མ་གནས་ཆུང་ཆོས་རྒྱལ་ཆེན་པོ་མཆོག་སྤྱན་འདྲེན་ཞུས་ཡོད་པ་རེད།
སྐབས་དེར་༸གོང་ས་མཆོག་གིས་བཀའ་སློབ་སྩལ་བའི་ནང་ཐེངས་འདིའི་བརྟན་བཞུགས་འདི་ནི་སྔར་གྱི་ལམ་ལུགས་སྲོལ་ཙམ་མིན་པར་གཉན་འཕྲང་ཅན་གྱི་དུས་སྐབས་འདིར་ལྷག་བསམ་དང་མོས་གུས་གདུང་ཤུགས་དྲག་པོས་ཕུལ་བ་ཞིག་ཆགས་ཡོད་སྟབས། བདེན་པའི་ནུས་པ་ཞིག་གཏན་གཏན་ཡོད་པ་ཙམ་དུ་མ་ཟད། ལྷག་དོན་བསྟན་སྲུང་དམར་ནག་གཉིས་གཙོ་བོར་གྱུར་བའི་དཀར་ཕྱོགས་སྐྱོང་བའི་སྲུང་མ་ཚོས་ཀྱང་གྲོགས་དང་འཕྲིན་ལས་མཛད་བཞིན་ཡོད་སྐོར་བཀའ་བསྩལ་སོང་།
༸གོང་ས་མཆོག་གིས་༸གང་ཉིད་དགུང་ལོ་ ༡༡༣ བར་བཞུགས་ཐུབ་རྒྱུར་ལྷ་དང་བླ་མའི་ལུང་བསྟན་དང་གཟིམ་ལམ་སོགས་མང་པོ་ཞིག་ནས་རྟགས་མཚན་དུ་མ་བྱུང་ཡོད་སྐོར་དང་། མགོན་པོ་མཆོག་གིས་ཀྱང་རྒྱུན་དུ་༸སྐུ་ཚེ་ཡུན་དུ་འཚོ་བཞེས་ཐུབ་ཏེ་འགྲོ་དོན་རྒྱ་ཆེ་མཛད་ཐུབ་པའི་ཐུགས་སྨོན་གནང་བཞིིན་ཡོད་པ་བཀའ་བསྩལ་གནང་པ་དང་ཆབས་ཅིག ལྷག་དོན་༸གོང་ས་མཆོག་དགུང་ལོ་ ༡༡༣ བར་བཞུགས་ཐུབ་མིན་གཙོ་བོ་ནི་རྒྱུ་རྐྱེན་གྱི་རྟེན་འབྲེལ་མང་པོ་ཞིག་ལ་ལྟོོས་དགོས་པས་ཆོས་ཕྱོགས་ནས་བླ་སློབ་ཀྱི་དམ་ཚིག་དེ་གལ་ཆེན་པོ་ཡིན་སྟབས། བླ་མའི་༸སྐུ་ཚེ་སྲིང་མིན་གལ་ཆེ་ཤོས་ནི་དད་པ་དང་དམ་ཚིག་གཙང་མ་དགོས་པ་དེ་རེད་ཅེས་བཀའ་བསྩལ་མཛད་ཡོད་པ་རེད།
གཞན་ཡང་ཤར་པ་ཆོས་རྗེ་རིན་པོ་ཆེ་མཆོག་ནས་གཏང་རག་གི་མཎྜལ་འདེགས་འབུལ་དང་ས་གནས་གཞིས་འགོ་ནས་མཎྜལ་རྟེན་གསུམ་འདེགས་འབུལ་ཞུས་པ་དང་འབྲེལ་དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་ཚོགས་མིི་རྣམས་དང་ས་གནས་ཀྱི་འཐུས་མི་གསུམ་བཅས་ལ་མཇལ་ཁ་གནང་ནས་བརྟན་བཞུགས་ཀྱི་མཛད་སྒོ་མཇུག་སྒྲིལ་གནང་སོང་།
བལ་ཡུལ་ནང་༸གོང་ས་མཆོག་གི་འཁྲུངས་སྐར་སྲུང་བརྩི་ཞུ་བཅུག་མི་འདུག
vot.org -
དེ་རིང་བལ་ཡུལ་གཞུང་ནས་ཁུལ་དེའི་ནང་གི་བོད་མི་ཚོར་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་བཅུག་མེད་པ་མ་ཟད། མཆོད་འབྱོར་ས་གནས་འགོ་འཛིན་ཡང་ཉེན་རྟོག་པསའཛིན་བཟུང་བྱས་འདུག
དེའང་དེ་རིང་བཙན་བྱོལ་ནང་གི་བོད་མིའི་གཞིས་སྡོད་གང་སར་བྱེད་སྒོ་འདྲ་མིན་བརྒྱུད་ནས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༡ ཕེབས་པའི་༸སྐུའི་འཁྲུངས་སྐར་དུས་ཆེན་ལ་དགའ་དད་སྤྲོ་གསུམ་གྱིས་དགའ་སྐྱིད་དཔལ་ལ་རོལ་བཞིན་སྲུང་བརྩི་ཞུ་བཞིན་ཡོད་ཀྱང་། བལ་ཡུལ་ནང་དེ་རིང་བལ་ཡུལ་གཞུང་གིས་ཁུལ་དེའི་ནང་གི་བོད་མི་ཚོར་༸གང་ཉིད་ཀྱི་༸སྐུའི་འཁྲུངས་སྐར་སྲུང་བརྩི་ཞུ་བཅུག་མི་འདུག
བལ་ཡུལ་གྱི་ཉེན་རྟོག་པས་འཁྲུངས་སྐར་གྱི་མཛད་སྒོ་མ་འཚོགས་གོང་ནས་ཁུལ་དེའི་མཆོད་འབྱོར་ས་གནས་འགོ་འཛིན་སྐལ་བཟང་དོན་གྲུབ་ལགས་བཙན་འཁྲིད་ཀྱིས་འཛིན་བཟུང་བྱས་པ་མ་ཟད། ས་གནས་ཀྱི་བོད་མི་ཚོར་༸གང་ཉིད་ཀྱི་༸སྐུའི་འཁྲུངས་སྐར་སྲུང་བརྩིའི་མཛད་སྒོ་མཚམས་འཇོག་དགོས་པའི་བཀོད་ཁྱབ་བཏང་དགོས་པའི་གནོན་ཤུགས་སྤྲད་ཡོད་པ་རེད། ད་ལྟའི་ཆར་འཁྲུངས་སྐར་གྱི་མཛད་སྒོ་ཚོགས་ཡུལ་སྲོང་བཙན་སློབ་གྲྭའི་མཐའ་འཁོར་དུ་བལ་ཡུལ་ས་གནས་ཉེན་རྟོག་པ་འཕོན་ཆེ་འགྲེམས་འཇོག་གིས་བོད་མི་ཚོ་སློབ་གྲྭའི་ར་བའི་ནང་བཀག་དཀྱིལ་བྱས་འདུག
རྩ་བའི་ད་ལྟའི་ཆར་བལ་ཡུལ་ནང་བོད་མི་ ༡༢༠༠༠ ལྷག་ཡོད་པ་དང་རྒྱ་གཞུང་གི་གནོན་ཤུགས་འོག་བོད་མི་དེ་དག་ལ་རྒྱལ་ཁབ་དེའི་ནང་གནས་སྡོད་ཆོག་པའི་ཡིག་ཆ་རག་རྒྱུར་ངལ་བ་ཤུགས་ཆེ་འཕྲད་བཞིན་ཡོད་པ་མ་ཟད། ས་གནས་སུ་རྒྱུན་དུ་བོད་མི་ཚོ་བོད་དོན་དང་འབྲེལ་བའི་ལས་འགུལ་དང། ༸གོང་ས་མཆོག་གི་སྐུའི་འཁྲུངས་སྐར་སོགས་སྲུང་རྩི་ཞུ་རྒྱུར་དམ་དྲག་བྱེད་བཞིན་ཡོད་པ་རེད།
རེས་གཟའ་ལྷག་པ། ༢༠༡༦།༠༧།༠༦
vot.org -
ཉན་པ།: Listen
ཕབ་ལེན། Download
འདོད་རྒུ་གླིང་དུ་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག
བཞུགས་སྒར་དུ་༸གོང་ས་མཆོག་གི་འཁྲུངས་སྐར་སྲུང་བརྩི།
དགེ་ལུགས་ཡོངས་དང་འདོད་རྒུ་གླིང་མང་ཚོགས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུས་པ།
བལ་ཡུལ་ནང་འཁྲུངས་སྐར་སྲུང་བརྩི་ཞུ་འཇུག་མི་འདུག
བོད་མི་ཚོས་༸གོང་ས་མཆོག་ལ་འཚམས་འདྲི་ཞུས་པ།
Wednesday 06/07/2016
Dalai Lama graces 81st birthday celebration in Mundgod
CTA extends greetings to Dalai Lama, calls for unity of Tibetans
Tenshug Ceremony for His Holiness the Dalai Lama in Mundgod
Tibetans in Nepal barred from celebrating Dalai Lama’s birthday
‘Trungkhar’ greetings to His Holiness the Dalai Lama
༸གོང་ས་མཆོག་དབུ་བཞུགས་ཐོག་ནང་པའི་ལྟ་གྲུབ་དང་དེང་དུས་ཤེས་ཡོན་དབར་བགྲོ་གླེང་གནང་པ།
vot.org -
དེ་རིང་ཟླ་ ༧ ཚེས་ ༥ ཉིན་རྒྱབ་ཚོུད་ ༢ སྟེང་འབྲས་སྤུངས་བླ་སྤྱིའི་གཙུག་ལག་ཁང་དུ་༸གོང་ས་མཆོག་དབུ་བཞུགས་ཐོག་གྲོང་ཁྱེར་སྦེང་ལོར་ནང་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་ཕྲུག་དང་དགའ་ལྡན་བྱང་རྩེ་གྲྭ་ཚང་གི་དགེ་འདུན་པའི་དབར་ལ་ནང་པའི་ལྟ་གྲུབ་དང་དེང་དུས་ཤེས་ཡོན་གོ་རྟོགས་སྤེལ་རེས་ཀྱི་བགྲོ་གླེང་ཚོགས་ཡོད་པ་རེད།
དེའང་དགེ་འདུན་པ་དང་སློབ་ཕྲུག་དབར་ལ་ནང་པའི་དབུ་མ་པ་དང་སེམས་ཙམ་པའི་ལྟ་གྲུབ། འཛམ་གླིང་མང་གཙོའི་ལམ་ལུགས་སྤྱི་དང་སྒོས་སུ་བོད་ཀྱི་མང་གཙོའི་སྐོར། རྒྱ་ནག་གཞུང་ནས་བོད་དེ་རྒྱ་ནག་གི་མངའ་ཁོངས་ཡིན་སྟངས་སྐོར་ལོ་རྒྱུས་ཀྱི་འཁྱོག་བཤད་བྱེད་སྟངས། བོད་པ་དང་དེང་དུས་འཕྲུལ་ལས་བར་གྱི་འབྲེལ་བ་དང་ཤེས་པའི་སྐོར་བཅས་བརྗོད་གཞི་ཁག་མི་འདྲ་བ་དྲུག་ཙམ་གི་ཐོག་ལ་གཏམ་བཤད་དང་དྲི་བ་དྲི་ལན་གནང་སོང་།
སྐབས་དེར་༸གོང་ས་མཆོག་གིས་མང་གཙོ་དང་འབྲེལ་བའི་བཀའ་སློབ་སྩལ་དོན་ལ། མང་གཙོའི་ལམ་ལུགས་ཡག་པོ་ཡོང་དང་མི་ཡོང་གཙོ་བོ་ནི་མིའི་ལྷག་བསམ་དང་བྱེད་ལས་ལ་རག་ལས་ཡོད་སྐོར་སོགས་བཀའ་བསྩལ་སོང་། དེ་བཞིན་༸གང་ཉིད་ཀྱིས་ཤེས་པ་ཕྲ་མོའི་ཐོག་ལ་བསམ་བློ་གཏོང་དགོས་གལ་ཡིན་པ་བཀའ་སློབ་གནང་སོང་། དེ་བཞིན་སློབ་ཆུང་སློབ་མ་ཁག་ཅིག་གིས་རྟགས་གསལ་སྤྱན་འབུལ་ཞུས་གྲུབ་མཚམས་༸གང་ཉིད་ནས་སློབ་ཕྲུག་ཚོས་ཀྱང་རང་ཉིད་ཀྱི་རིག་པ་གསལ་ཕྱིར་རིགས་ལམ་རྟགས་གསལ་ལ་དོ་སྣང་བྱ་དགོས་པ་མ་ཟད། རིགས་ལམ་དེའང་སློབ་ཚན་ཚང་མའི་ནང་བེད་སྤྱོད་ཡོད་པ་ཞིག་ཡིན་སྟབས་དེར་དོ་སྣང་བྱ་གལ་ཆེ་བ་ཡིན་པ་སོགས་ཀྱི་བཀའ་སློབ་ཟབ་མོ་བསྩལ་ཡོད་པ་རེད།
གོང་ཚེས་ཉིན་གྱི་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་འདུན་པ་ ༧༢ ལ་བསྙེན་རྫོགས་ཀྱི་སྡོམ་པ་བསྩལ་གྲུབ་རྗེས། དགེ་སློང་སྒྲུབ་གནང་རྒྱུའི་མཛད་རིམ་རེ་ཞིག་མཇུག་སྒྲིལ་གནང་ཡོད་པ་དང་། ཟླ་འདིའི་ཕྱི་ཚེས་ ༢ ནས་དབུ་འཛུགས་ཀྱིས་དེ་རིང་བར་དུ་ཁྱོན་དགེ་འདུན་ཞལ་གྲངས་ ༣༣༣ ལ་བསྙེན་རྫོགས་སྒྲུབ་གནང་ཡོད་པ་རེད།
རྩ་བའི་སང་ཕྱི་ཚེས་ ༦ ཉིན་༸གོང་ས་མཆོག་འབྲས་སྤུངས་བླ་སྤྱིར་སྔ་ཐོག་དགེ་ལུགས་ཡོངས་དང་མོན་གྷོ་གཞིས་ཆགས་ཀྱི་སེར་སྐྱ་མི་མང་ཀུན་ཐུན་མོང་གིས་༸གང་ཉིད་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུས་གནང་རྒྱུ་ཡིན་འདུག དེ་རྗེས་སུ་༸སྐུའི་འཁྲུངས་སྐར་གྱི་མཛད་སྒོར་དབུ་བཞུགས་གནང་རྒྱུ་དང་ཉིན་རྒྱབ་ཏུ་འབྲས་སྤུངས་བློ་གསལ་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་རྒྱུ་རེད་འདུག
རེས་གཟའ་མིག་དམར། ༢༠༡༦།༠༧།༠༥
vot.org -
ཉན་པ།: Listen
ཕབ་ལེན། Download
༸གོང་ས་མཆོག་གིས་དབུ་བཞུགས་ནང་པའི་ལྟ་གྲུབ་དང་དེང་དུས་ཤེས་ཡོན་ཐོག་བགྲོ་གླེང་གནང་འདུག
རྒྱ་རིགས་ཁྲིམས་རྩོད་པའི་བཟའ་ཟླ་ཁག་ཅིག་ནས་ནས་ངོ་རྒོལ་ལས་འགུལ་སྤེལ་བ།
འཕྲོད་བསྟེན་སྨན་ཞབས་པ་ཁག་ལ་གཞི་རིམ་ནད་གཞི་བཅོས་ཐབས་ཀྱི་ཟབ་སྦྱོང་གནང་བཞིན་པ།
ཏཱ་ལའི་བླ་མ་མཐོ་སློབ་དེ་བཞིན་མེ་སོར་གཙུག་ལག་སློབ་ཁང་ནས་ངོས་འཛིན་ཐོབ་རྗེས་བསླབ་པ་མཐར་སོན་གྱི་མཛད་སྒོ་ཐོག་མ་ཚོགས་པ།
ཕྱི་རྒྱལ་ཡུལ་གྲུ་ཁག་ནས་ཕེབས་པའི་བོད་རིགས་སློབ་མའི་དབྱར་དུས་འཛིན་གྲྭ་འགོ་འཛུགས།
Tuesday 05/07/2016
Dalai Lama graces debate on Buddhist Philosophy and Modern Educatio in Mundgod
Wives of China's human rights lawyers protest in Beijing
DoH holds workshop on Basic Life Support: Pune
Dalai Lama Institute for Higher Education celebrates its first graduation ceremony
TCV hosts annual summer camp
རྒྱ་གཞུང་གིས་ཆབ་སྲིད་དམ་དྲག་འོག་ཧོང་ཀོང་ནང་གི་གསར་འགོད་པའི་རང་དབང་ཉམས་རྒུད་འགྲོ་བཞིན་པ་བརྗོད་འདུག
vot.org -
ཧོང་ཀོང་གསར་འགོད་པ་མཐུན་ཚོགས་འམ་ Hong Kong Journalist Association ནས་རྒྱ་ནག་གཞུང་གིས་རྒྱལ་ཁབ་གཅིག་ལ་ལམ་ལུགས་གཉིས་ཞེས་པའི་སྲིད་བྱུས་འོག ཆབ་སྲིད་ཀྱི་དམ་དྲག་དང་བསམ་བློའི་སློབ་གསོ་སོགས་སྤེལ་ཏེ་རྒྱ་ནག་ནང་ཙམ་མ་ཟད། ཧོང་ཀོང་ནང་གི་གསར་འགོད་པའི་རང་དབང་ཉམས་རྒུད་གཏོང་བཞིན་ཡོད་སྐོར་བརྗོད་འདུག
དེ་ཡང་ཉེ་ཆར་འདས་པའི་རེས་གཟའ་ཕུར་བུའི་ཉིན་ཧོང་ཀོང་གསར་འགོད་པ་མཐུན་ཚོགས་ནས་ཧོང་ཀོང་ནང་གི་གསར་འགོད་པའི་རང་དབང་དང་འབྲེལ་བའི་ལོ་འཁོར་སྙན་ཐོ་ཞིག་འདོན་སྤེལ་གནང་པ་དེའི་མིང་བྱང་ལ་ཚོགས་པས་ཟུར་ཟ་དང་བཅས་ཏེ་རྒྱལ་ཁབ་གཅིག་ལ་རྨི་ངན་གཉིས་སམ་ One Country, Two Nightmares ཞེས་བཀོད་འདུག
སྙན་ཐོ་དེའི་ནང་ཚོགས་པ་དེའི་ངོས་ནས་འདས་པའི་ལོ་ངོ་གཅིག་ནང་རྒྱ་ནག་གཞུང་གིས་ཧོང་ཀོང་ཐོག་འཛིན་བཞིན་པའི་སྲིད་བྱུས་འོག ཆབ་སྲིད་ཀྱི་དམ་དྲག་དང་བསམ་བློའི་སློབ་གསོ་མི་ཉུང་བ་ཞིག་སྤེལ་བཞིན་པ་དེས་ཧོང་ཀོང་ནང་གསར་འགོད་པའི་རང་དབང་སྔར་ལྷག་ཉམས་རྒྱུད་དུ་བཏང་ཡོད་སྐོར་གསུངས་པ་འདུག་ལ། ད་ལྟ་རྒྱ་གཞུང་གིས་ཧོང་ཀོང་ཐོག་འཛིན་བཞིན་པའི་རྒྱལ་ཁབ་གཅིག་ལ་ལམ་ལུགས་གཉིས་ཞེས་པའི་སྲིད་བྱུས་དེ་ཇི་ཙམ་འོས་འཚམས་ཡོད་མེད་ལ་བློ་དོག་ཡོད་ཅེས་གསུངས་ཡོད་པ་རེད།
དེ་བཞིན་ཚོགས་པ་དེའི་ཚོགས་གཙོ་ལྕམ་ Shum Yee lan ལགས་ཀྱིས་དེ་སྔ་རྒྱ་ནག་གཞུང་གིས་ཧོང་ཀོང་ནང་དུ་རྒྱ་ནག་དང་འབྲེལ་བའི་ལོ་རྒྱུས་དང་གསར་འགྱུར། འཚར་གཏམ་སོགས་ཀྱི་དཔེ་དེབ་པར་བསྐྲུན་དང་འགྲེམས་སྤེལ་གནང་མཁན་གྱི་ལས་བྱེད་ལྔ་ལྷག་འཛིན་བཟུང་ བྱས་སྐབས་དེ་འབྲེལ་ཧོང་ཀོང་སྲིད་གཞུང་ནས་གནད་དོན་དེར་དོ་སྣང་དེ་ཙམ་བྱས་མེད་སྐོར་འགྲེལ་བརྗོད་དང་སྦྲགས། ཧོང་ཀོང་ནང་གསར་འགོད་པའི་རང་དབང་སྲུང་སྐྱོབ་གནང་ཐབས་སུ་ཧོང་ཀོང་སྲིད་གཞུང་གི་ལས་བྱེད་རྣམས་ནས་ཐུགས་འགན་ཆེ་ཙམ་བཞེས་དགོས་པ་མ་ཟད། ཁྱད་པར་དུ་འབྲེལ་ཡོད་ཁྲིམས་བཟོ་ལྷན་ཚོགས་ཀྱི་ཚོགས་མི་རྣམས་ནས་ཀྱང་ཧོང་ཀོང་མི་སེར་རྣམས་ལ་གཞུང་གི་ཡིག་ཆ་དང་གནས་ཚུལ་རྣམས་མཁོ་བསྒྲུབ་ཐུབ་པར་གསར་འགྱུར་བརྒྱུད་ལམ་ཞིག་ཆེད་བསྐྲུན་བྱེད་དགོས་པ་མ་ཟད། ལྷག་དོན་ཧོང་ཀོང་ནང་ཡོད་པའི་གསར་འགོད་པར་ཆབ་སྲིད་ཀྱི་ཟིང་འཁྲུག་སོགས་ཀྱི་གནས་ཚུལ་གང་ཡིན་ལ་ལྟོས་མེད་གནོན་ཤུགས་གང་ཡང་མེད་པར་གསར་འགྱུར་འགོད་ཆོག་པའི་ཁྲིམས་ལུགས་ཤིག་གཏན་འབེབས་བྱ་དགོས་པ་འབོད་སྐུལ་ཞུས་འདུག
ལོ་འཁོར་སྙ་ཐོ་ཕྱོགས་སྒྲིག་གནང་མཁན་ Mak Yin Ting ལགས་ནས་ད་ལྟའི་ཆར་ཧོང་ཀོང་ནང་གསར་ཁང་ཆེ་གྲས་ཉི་ཤུ་རྩ་དྲུག་ཡོད་ཀྱང་གསར་ཁང་དྲུག་ཙམ་རྒྱ་ནག་གཞུང་དང་ཐད་འབྲེལ་ཆེ་བའི་ཚོང་པ་སོགས་ཀྱི་སྟངས་འཛིན་འོག་ལས་ཀ་བྱེད་བཞིན་ཡོད་སྟབས། ད་ལྟ་ནས་ཧོང་ཀོང་ནང་གསར་འགོད་པའི་རང་དབང་སྲུང་སྐྱོབ་མ་གནང་ཚེ་རྒྱ་གཞུང་གིས་ཧོང་ཀོང་ཆ་ཚང་དབང་སྒྱུར་བྱ་རྒྱུའི་སྲིད་བྱུས་དེ་དག་ལམ་ལྷོང་ཡོང་སྲིད་པའི་ཉེན་བརྡ་ཞིག་ཀྱང་བཏང་ཡོད།
གཞི་རྩའི་ཧོང་ཀོང་གསར་འགོད་པ་མཐུན་ཚོགས་དེ་ཧོང་ཀོང་ནང་གི་གསར་འགོད་པའི་རང་དབང་སྲུང་སྐྱོབ་དང་གསར་འགྱུར་བརྒྱུད་ལམ་རྒྱ་སྐྱེད་གཏོང་ཐབས་སུ་ལོ་ལྟར་སྙན་ཐོ་དེ་ལྟར་འདོན་སྤེལ་གནང་བཞིན་ཡོད་པ་དང་། ད་རེས་ཀྱི་སྙན་ཐོ་དེའི་ནང་རྒྱ་གཞུང་གིས་བསམ་བློའི་སློབ་གསོས་གསར་འགོད་པར་དོ་ཕོག་བཏང་བཞིན་པ་དང་། བརྒྱུད་ལམ་ཁག་ལ་ཚོད་འཛིན་བྱེད་བཞིན་པ། གསར་འགོད་པའི་རང་དབང་རྡོག་རོལ་གཏོང་བཞིན་པ། མི་མང་ཁྲོད་གཞུང་འབྲེལ་གྱི་གནད་དོན་བཀག་སྡོམ་བྱེད་བཞིན་པ། དེ་བཞིན་གསར་འགྱུར་བརྒྱུད་ལམ་ཁག་ལ་ཆེས་དམ་དྲག་དང་གསར་འགོད་པར་འཇིགས་སྐུལ་བྱེད་པ་སོགས་ཁྱོན་སྡེ་ཚན་མི་འདྲ་བ་དྲུག་ཐོག་འགྲེལ་བརྗོད་གནང་འདུག
སྙན་ཐོའི་དྲ་གནས་གཤམ་དུ་གཟིགས་རོགས།
༸གོང་ས་མཆོག་གིས་སྐུ་ཞབས་ཝི་སེལ་མཆོག་དམ་པ་དེ་ཉིད་ནས་མི་ཚེ་དོན་སྙིང་ལྡན་པ་ཞིག་སྐྱེལ་ཡོད་པ་གསུངས་འདུག
vot.org -
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེའི་ལས་འགུལ་བ་དང་རྩོམ་པ་པོ་གྲགས་ཅན། དེ་བཞིན་འཛམ་གླིང་ཞི་བདེའི་གཟེངས་རྟགས་བཞེས་མྱོང་མཁན་བོད་ཀྱི་གྲོགས་པོ་སྐུ་ཞབས་ Elie Wiesel ལགས་ཁ་ཉིན་ཚེས་ ༢ ཉིན་གུང་གྲངས་ ༨༧ ཐོག་ཨ་རིའི་ནིའུ་ཡོག་གྲོང་ཁྱེར་དུ་འདས་གྲོངས་སུ་གྱུར་ཡོད་པའི་གནས་ཚུལ་ཐོན་པར་དམ་པ་དེ་ཉིད་ཀྱི་ནང་མིར་ཐུགས་གསོ་བསྩལ་འདུག
དེའང་མགོན་པོ་༸གང་ཉིད་མཆོག་གིས་ཁ་སང་ཕྱི་ཚེས་ ༣ ཉིན་ཁོང་གི་སྐུ་ཟླ་ Marion Wiesel མཆོག་གི་མཚན་ཐོག་ཏུ་བསྩལ་བའི་ནང་། སྐུ་ཞབས་ Wiesel ཁོང་འདས་གྲོངས་སུ་གྱུར་བར་༸གང་ཉིད་མཆོག་ཐུགས་ཕམ་ཆེན་པོ་བྱུང་སྐོར་བཀའ་གནང་བ་དང་སྦྲགས། སྐུ་ཞབས་ Elie Wiesel དམ་པ་དེ་ཉིད་དང་མགོན་པོ་མཆོག་གཉིས་ནས་འཛམ་གླིང་ཞི་བདེའི་དེད་དཔོན་གཞན་རྣམས་དང་ལྷན་དུ་གྲོས་མོལ་དང་འཆམ་མཐུན་གྱི་ལམ་ནས་འཛམ་གླིང་ནང་ཞི་བདེ་བསྐྲུན་ཐབས་བཅས་ཀྱི་ཐོག་ལ་ཕྱག་ལས་གནང་མྱོང་ཡོད་པ་དང། ད་ཆ་ཁོང་འདས་གྲོངས་སུ་གྱུར་བའི་དུས་སྐབས་འདིར་༸གང་ཉིད་ནས་ཁོང་གི་ལྷག་བློ་ཆེ་བའི་བྱམས་བརྩེའི་དགོངས་པ་རྣམས་ལ་རྗེས་དྲན་ཞུ་བཞིན་ཡོད་པ་དང། དམ་པ་དེས་སྐུ་འཚོ་བཞུགས་རིང་དོན་སྙིང་ལྡན་པའི་མི་ཚེ་སྐྱེལ་ཡོད་ལྟར། ང་ཚོས་དམ་པ་དེ་ཉིད་ལ་རྗེས་དྲན་ཞུ་སྟངས་ལེགས་ཤོས་ནི་ཁོང་གིས་ཐུགས་གཉེས་པའི་འགྲོ་བ་མི་ཕན་ཚུན་མཛའ་འབྲེལ་དང་མཆེད་གྲོགས་བཅས་གོང་སྤེལ་གྱི་འདུ་ཤེས་འཛིན་པའི་མི་ཚེའི་རིན་ཐང་རྣམས་གོང་སྤེལ་གཏོང་གལ་ཡིན་པ་སོགས་བཀའ་སྩལ་གནང་པ་དང་ཆབས་ཅིག དམ་པ་ཁོང་ལ་ཡོན་ཏན་མང་དག་ཞིག་ཡོད་པ་ལས་གཅིག་ནི་ཁོང་བོད་ཀྱི་གྲོགས་པོ་བརྟན་པོ་ཞིག་ཡིན་པ་དང། ༸གང་ཉིད་མཆོག་གིས་བསྔོ་སྨོན་དང་བཅས་ཤུལ་ལུས་ནང་མི་རྣམས་ལ་ཐུགས་གསོ་མཛད་འདུག
རྩ་བའི་སྐུ་ཞབས་ Elie Wiesel མཆོག་ནི་ Romania ནང་དུ་སྐུ་འཁྲུངས་ཤིང། ཕྱི་ལོ་ ༡༩༣༩ ནས་ ༤༥ བར་བྱུང་བའི་འཛམ་གླིང་དམག་ཆེན་གཉིས་པའི་ཁྲོད། Germany ཡི་དབང་ཆ་གཅིག་བསྡུས་རིང་ལུགས་པ་ Hitler ཡིས་དབང་གྱུར་འོག Jew མི་རིགས་རྩ་གཏོར་གྱི་དཀའ་སྡུག་དངོས་སུ་མྱངས་མྱོང་ཡོད་མཁན་ཞིག་ཡིན་པ་མ་ཟད། འཛམ་གླིང་ཁྱོན་ཡོངས་ལ་མུན་ནག་ཅན་གྱི་དུས་ཚོད་བྱུང་རིམ་ཁག་ལ་བདེན་དཔང་གནང་མཁན་གཙོ་གྲས་ཤིག་དང། འཛམ་གླིང་ནང་འཚེ་བ་དང་བཙན་གནོན། མི་རིགས་དབྱེ་འབྱེད་སོགས་ལ་གདོང་ལེན་གྱིས་སྐུ་ཚེ་ཧྲིལ་པོའི་རིང་ཞི་བདེའི་ཆེད་དུ་ཕྱག་ལས་མང་དག་གནང་སྟབས། ཕྱི་ལོ་ ༡༩༨༦ ལོར་ཁོང་ལ་ནོ་སྦེལ་ཞི་བདེའི་གཟེངས་རྟགས་ཕུལ་བ་དང་། དེ་སྔོན་ཕྱི་ལོ་ ༡༩༨༥ ལོར་ཨ་རིའི་གྲོས་ཚོགས་ཀྱི་ཚད་མཐོའི་གཟེངས་རྟགས་ Congressional Gold Medal ཞེས་པ་དེའང་བཞེས་མྱོང་ཡོད་པ་མ་ཟད། དེ་བཞིན་ཕྱི་ལོ་ ༢༠༠༥ ལོར་རྒྱལ་སྤྱིའི་བོད་དོན་ལས་འགུལ་ཁང་ནས་ཆེད་སྒྲིག་ཞུས་པའི་ Light of Truth འམ་བདེན་པའི་སྒྲོན་མེའི་གཟེངས་རྟགས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་ནས་བཞེས་མྱོང་ཡོད་པ་རེད། དེ་མཚུངས་སུ་ཕྱི་ལོ་ ༢༠༠༧ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལའང་ཨ་རིའི་གྲོས་ཚོགས་ཀྱི་གཟེངས་རྟགས་ Congressional Gold Medal དེ་འབུལ་བཞེས་མཛད་པའི་སྐབས་ཁོང་ཆེད་ཕེབས་ཀྱིས་༸གང་ཉིད་ལ་ཆེ་བསྟོད་དང་བཅས་༸གོང་ས་མཆོག་ལ་ཆེ་བསྟོད་ཀྱི་གཟེངས་རྟགས་ཕུལ་དོན་ངོ་སྤྲོད་གནང་པའི་བརྒྱུད། ཨ་རིའི་སྲིད་འཛིན་དང་གྲོས་ཚོགས་འཐུས་མི་རྣམས་ནས་བདེན་པའི་ནུས་སྟོབས་ཤུགས་ཆེ་རུ་བཏང་ཡོད་སྐོར་གསུངས་ཡོད་པ་མ་ཟད། ༸གོང་ས་མཆོག་ལ་གྲོགས་པོ་༸གང་ཉིད་སྐྱབས་བཅོལ་ནང་ཇི་སྲིད་བར་དུ་བཞུགས་ཀྱང་ཁེར་ཀྱང་རྩ་བ་ནས་མིན་པ་དང། ང་ཚོའི་རང་དབང་གྱི་འདོད་དོན་དེ་དུས་རྟག་ཏུ་ཁྱེད་ཀྱི་ལྷན་དུ་ཡོད་པ་དང། གལ་སྲིད་ང་གསོན་པོར་གནས་ཚེ་ཉིན་གཅིག་ང་གཉིས་མཉམ་དུ་བོད་ལ་ཕྱིར་ལོག་གནང་ཆོག་གི་རེད་ཅེས་མཛའ་བརྩེས་གསུང་བཤད་གནང་ཡོད་པ་རེད།
༸གོང་ས་མཆོག་གིས་དགེ་འདུན་པ་ ༩༠ སྐོར་ཞིག་ལ་བསྙེན་རྫོགས་ཀྱི་སྡོམ་པ་སྩལ་བཞིན་པ།
vot.org -
༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་འདིའི་ཚེས་ ༢ ནས་དབུ་འཛུགས་ཀྱིས་གདན་ས་ཆེན་པོ་སེ་འབྲས་དགའ་གསུམ་གྱི་གྲྭ་ཚང་དྲུག་དང་། རྭ་སྟོད། རྒྱུད་གྲྭ་སྟོད་སྨད། བཀྲི་ཤིས་ལྷུན་པོ། རྫོང་དགའ་ཆོས་སྡེ་བཅས་ཀྱི་གྲྭ་ཚང་དགུའི་དགེ་འདུན་པ་ཞལ་གྲངས་ ༩༠༠ ལ་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་རྟེན་གཞི་བྱས་པའི་འབྲས་སྤུངས་ཚོགས་ཆེན་དུ་བསྙེན་རྫོགས་ཀྱི་སྡོམ་པ་འབོག་ཆོག་གནང་བཞིན་ཡོད་པ་རེད།
དེའང་ཁ་ཉིན་ཕྱི་ཚེས་ ༢ ཉིན་འབྲས་སྤུངས་ཀྱི་དགེ་འདུན་པ་ཞལ་གྲངས་ ༨༡ ལ་བསྙེན་རྫོགས་ཀྱི་སྡོམ་པ་བསྩལ་ཡོད་པ་དང་། དེ་རྗེས་ཕྱི་ཚེས་ ༣ ཉིན་དགའ་ལྡན་དགོན་པའི་དགེ་འདུན་པ་ཞལ་གྲངས་ ༩༠ ལ་བསྙེན་རྫོགས་ཀྱི་སྡོམ་པ་བསྩལ་ཡོད་པ་རེད། དེ་རིང་ཕྱི་ཚེས་ ༤ ཉིན་སེ་ར་ཐེག་ཆེན་གླིང་གི་དགེ་འདུན་པ་ཞལ་གྲངས་ ༩༠ ལ་བསྙེན་རྫོགས་ཀྱི་སྡོམ་པ་བསྩལ་ཡོད།
སྙེན་རྫོགས་ཀྱི་སྡོམ་པ་དེ་གནད་ཆེ་ཆུང་ཇི་ཡིན་སྐོར་སྐུ་བཅར་དགེ་བཤེས་ལྷ་རམས་པ་ཡང་སྟེང་རིན་པོ་ཆེར་བཅར་འདྲི་ཞུས་པར་ཁོང་གིས་གསུང་དོན། དེེ་ནི་ཧ་ཅང་གལ་ཆེན་པོ་ཡིན་ཞིང་སྤྱིར་སྡོམ་པ་ལ་དབྱེ་བ་གསུམ་ཙམ་ཡོད་པ་ལས་དགེ་སློང་གིི་སྡོམ་པ་དེ་ནི་ལུས་ངག་གཉིས་ཀྱི་ཉེས་སྤྱོད་མཐའ་དག་སྡོམ་པའི་ཁས་ལེན་ཞིག་ཡིན་པ་དང་། ལྷག་དོན་སྡོམ་པ་དེ་ནི་སྡོམ་པ་ཀུན་གྱི་ནང་ནས་གནས་རིམ་མཐོ་ཤོས་དང་གལ་ཆེ་ཤོས་དེ་ཡིན་པ་མ་ཟད། སངས་རྒྱས་ཀྱི་བསྟན་པ་གནས་དང་མི་གནས་དེ་བསྙེན་རྫོགས་ཀྱི་སྡོམ་པ་ཚུལ་བཞིན་དུ་སྲུང་མཁན་གྱི་འདུལ་བ་འཛིན་པ་དགེ་སློང་གནས་དང་མི་གནས་ལ་རག་ལུས་ཡོད་ཅེས་འགྲེལ་བརྗོད་གནང་སོང་།
དེ་བཞིན་ཁོང་གིས་དགེ་སློང་བསྒྲུབ་མཁན་གང་ཟག་དེ་ལོ་ཚད་ཀྱི་ཆ་ནས་ལོ་ངོ་ ༢༠ ཧྲིལ་པོ་ལོན་དགོས་པ་དང་འདི་བཞིན་བསམ་བློ་དང་ལུས་ཀྱི་ཐོག་ནས་ཀྱང་ཆ་རྐྱེན་མང་པོ་ཞིག་ཚང་དགོས་པ་གསུངས་པ་མ་ཟད། བོད་བརྒྱུད་ནང་བསྟན་གྱི་དགེ་སློང་གི་སྡོམ་རྒྱུན་དང་ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གི་དགེ་སློང་གི་སྡོམ་རྒྱུན་དེ་ནི་ཡོངས་འཛིན་གླིིང་རིན་པོ་ཆེ་མཆོག་གི་དྲུང་ནས་ཞུས་པ་ཞིག་དང་། དེ་ཡང་འདི་ནས་ཡར་ཁུངས་གཏུག་ན་མཁན་ཆེན་ཞི་འཚོ་ལ་ཐུག་གི་ཡོད་པ་གསུངས་ཡོད།
གཞི་རྩའི་ཐེངས་འདིའི་བསྙེན་རྫོགས་སྒྲུབ་རྒྱུ་དེའང་འབྲས་སྤུངས་དགོན་པར་གནང་དོན་ནི་སྔ་ལོ་འབྲས་སྤུངས་དགོན་པའི་ངོས་ནས་འདི་ལོའི་༸སྐུའི་འཁྲུངས་སྐར་སྐབས་འདིར་ཆིབས་བསྒྱུར་མཛད་གནང་ཡོང་བའི་གསོལ་འདེབས་ཡང་ཡང་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་པ་ཞིག་དང་། ༸སྐུའི་འཁྲུངས་སྐར་སྐབས་གསུང་ཆོས་རིགས་དམིགས་བསལ་མི་དགོས་པར་བསྙེན་རྫོགས་སྒྲུབ་རྒྱུ་མང་པོ་ཞིག་ལྷག་བསྡད་ཡོད་པ་དེ་རྣམས་ལ་བསྙེན་རྫོགས་སྒྲུབ་གནང་རྒྱུའི་མཛད་འཆར་ཞིག་ཆགས་ཀྱི་འདུག
དེ་ཡང་ཐོག་མའི་འཆར་ཉིན་གྲངས་དགུའི་རིང་སྒྲུབ་གནང་རྒྱུ་ཐུགས་གཏན་འཁེལ་ཡོང་ཀྱང་། ཉེ་ལམ་༸གོང་ས་མཆོག་ཨ་རིར་གཟའ་འཁོར་གཉིས་ལྷག་གི་མཛད་འཕྲིན་བསྐྱངས་པ་དང་། དེ་མིན་མཛད་འཕྲིན་གཞན་ཁག་ཅིག་གི་རྐྱས་པས་ཐེངས་འདིར་ཉིན་གྲངས་བཞིར་ཐུགས་གཏན་འཁེལ་བ་ཞིག་ཡིན་པ་རེད་འདུག
རྩ་བའི་ཐེངས་འདིར་གདན་ས་གྲྭ་ཚང་ཁག་ནས་དགེ་སློང་སྒྲུབ་མཁན་ཐོ་གཞུང་གནང་དོན་ལྟར་ན། དགེ་འདུན་ཞལ་གྲངས་ ༩༠༠ ལྷག་ཙམ་ཡོད་ནའང་ཉིན་བཞིའི་རིང་ཉིན་རེར་དགེ་འདུན་པ་གྲངས་ ༦༠ ནས་ ༩༠ བར་སྒྲུབ་གནང་རྒྱུ་ཡིན་པ་དང། སང་ཕྱི་ཚེས་ ༥ ཉིན་མཐའ་མའི་སྐབས་འཕྲོས་རྣམས་ལ་གང་ཚར་ཚར་ཞིག་ལ་བསྙེན་རྫོགས་ཀྱི་སྡོམ་པ་བསྩལ་རྒྱུ་དང་།
དེ་མིན་བལ་ཡུལ། མོན། ལ་དྭགས་སོགས་ཕྱོགས་མཐའ་ཁག་ནས་ཕེབས་མཁན་རྣམས་ལོ་རྗེས་མ་ཕྱི་ཟླ་ ༡ ནང་སྒྲུབ་འཆར་ཡོད་པ་རེད་འདུག