Monthly Archives: August, 2016

ཨ་རིའི་ནང་དུ་རྟེན་གཞིན་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་ཨ་རིའི་སྲིད་འཛིན་འོས་མི་གཉིས་ལ་བོད་ཀྱི་གནད་དོན་དེ་གཙོ་གྲས་སུ་ངོས་འཛིན་དགོས་པའི་ཞུ་གཏུགས་ཀྱི་ལས་འགུལ་ཞིག་དབུ་འཛུགས་གནང་འདུག       དེའང་འདི་ལོའི་ཕྱི་ཟླ་ ༡༡ ཚེས་ ༨ ཉིན་ཨ་རིའི་འོས་བསྡུ་ཆེན་མོ་གནང་གཏན་འཁེལ་བ་དང་བསྟུན། རྒྱལ་སྤྱི་བོད་དོན་ལས་འགུལ་ཁང་གི་དྲ་གནས་ཐོག་ཏུ་མ་འོངས་པར་སྲིད་འཛིན་གྱི་འོས་མི་གཉིས་ལ་ཞུ་ཡིག་ཞིག་ཕུལ་རྒྱུའི་ལས་འགུལ་ཞིག་དབུ་འཛུགས་གནང་འདུག་པ་དང། ཞུ་སྙན་དེའི་ནང་དུ་ཨ་རིའི་སྲིད་འཛིན་གྱི་འོས་མི་གཉིས་པོར་ཁོང་གཉིས་ལས་སུ་ཞིག་སྲིད་འཛིན་དུ་འོས་འདེམས་བྱུང་རྗེས། གཙོ་བོ་ཨ་རིའི་གཞུང་ནས་གཏན་འབེབས་གནང་པའི་བོད་དོན་དང་འབྲེལ་བའི་སྲིད་བྱུས་འམ་ US Tibetan Policy Act 2002 ཞེས་པ་གཞིར་བཟུང་གིས་བོད་མིའི་མངོན་འདོད་དང་མི་རིགས་ཀྱི་ངོ་བོ་སྲུང་སྐྱོབ་ཀྱི་ལས་དོན་དེ་ཕྱག་བསྟར་གནང་རྒྱུའི་འགན་དབང་ཡོད་སྟབས། ཁོང་གཉིས་ཀྱིས་བཞེངས་ཕྱོགས་གཏན་པོ་ཞིག་གི་ཐོག་ནས་བོད་པའི་གནད་དོན་སེལ་རྒྱུ་དེ་ལས་འགན་གཙོ་གྲས་སུ་ངོས་འཛིན་དགོས་པའི་འབོད་སྐུལ་ཞུས་འདུག དེའང་རྒྱ་ནག་གཞུང་ལ་བོད་མིའི་ཆོས་ཕྱོགས་ཀྱི་གནང་སྒོའི་ཁག་ལ་ཆེས་དམ་དྲགས་དང་ཐེ་བྱུས་བྱེད་རྒྱུ་མཚམས་འཇོག་དགོས་པ་དང། ཞི་བའི་ཐོག་རང་གི་ཆབ་སྲིད་དང་ཆོས་ཕྱོགས་ཀྱི་སམས་བློ་འགྲེལ་བརྗོད་གནང་བའི་རྐྱེན་གྱིས་འཛིན་བཟུང་བྱས་པའི་བོད་མི་ཆབ་སྲིད་བཙོན་པ་རྣམས་འཕྲལ་མར་གློད་གྲོལ་གཏོང་དགོས་པ། དེ་བཞིན་རྒྱ་ནག་གི་དཔོན་རིགས་ཚོ་ཨ་རིའི་ས་ཁུལ་ཁག་ཏུ་རང་དབང་ཐོག་བསྐྱོད་བཅུག་གི་ཡོད་པ་དེ་མཚུངས་སུ་རྒྱ་གཞུང་གིས་ཀྱང་ Reciprocal Access ཞེས་ཨ་རིའི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་མི་སྣ་དང་། གསར་འགོད་པ། དེ་བཞིན་མི་སེར་དཀྱུས་མ་རྣམས་རང་དབང་ངང་བོད་དང་རྒྱ་ནག་ནང་དུ་བསྐྱོད་བཅུག་དགོས་པའི་གནད་དོན་ཐད་རྒྱ་གཞུང་ལ་གནོན་ཤུགས་ནན་པོ་སྤྲོད་དགོས་སྐོར་རེ་སྐུལ་ཞུས་འདུག རྩ་བའི་ཨ་རིའི་སྲིད་འཛིན་གྱི་འོས་བསྡུ་ཆེན་མོ་དེ་འདི་ལོའི་ཕྱི་ཟླ་ ༡༡ ཚེས་ ༨ ཉིན་གནང་གཏན་འཁེལ་ཡོད་པ་དང་།  དེའི་ནང་ཨ་རིའི་ཆབ་སྲིད་ཚོགས་པ་ཆེ་གྲས་གཉིས་ལས་མང་གཙོ་ཚོགས་པའི་འོས་གཞི་ཨ་རིའི་ཕྱི་སྲིད་བློན་ཆེན་ཟུར་པ་ལྕམ་ Hillary Clinton དང། སྤྱི་མཐུན་ཚོགས་པའི་འོས་གཞི་ཨ་རིའི་ནང་གི་ཚོང་གཉེར་བ་གྲགས་ཅན་ Donald Trump བཅས་ཡིན་པ་རེད།

བོད་མིའི་སྒྲིག་འཛུགས་འཕྲོད་བསྟེན་ཁྱབ་ཁོངས་སྨན་ཁང་ཁག་གི་རྩིས་པ་རྣམ་པར་རྩིས་དང་འབྲེལ་བའི་ཟབ་སྦྱོང་ཞིག་དབུ་འཛུགས་གནང་སོང་། དེ་རིང་ཟླ་ ༨ ཚེས་ ༢༢ ཉིན་གྱི་སྔ་དྲོ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་འོག་བཞུགས་སྒར་ཉེ་འདབས་སུ་རྟེན་གཞི་བྱས་པའི་དབུས་སྣེ་ལེན་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དབུ་བཞུགས་ཐོག་འཕྲོད་བསྟེན་ཁྱབ་ཁོངས་སྨན་ཁང་ཆེ་འབྲིང་ཆུང་གསུམ་བཅས་ཁྱོན་ ༦༠ ཡོད་པ་ལས་སྨན་ཁང་ ༢༠ འི་རྩིས་པ་ཁག་ཅིག་ལ་བོད་མིའི་སྒྲིག་འཛུགས་ཀྱི་རྨང་གཞིའི་རྩིས་ཀྱི་འགྲོ་སྟངས་སོགས་རྩིས་དང་འབྲེལ་བའི་ཟབ་སྦྱོང་ཞིག་དབུ་འཛུགས་གནང་ཡོད་པ་རེད། དེའང་ཐེངས་འདིའི་ཟབ་སྦྱོང་དེ་ལྟར་གནང་དོན་ནི་འདས་པའི་ལོ་ཤས་ནང་འཕྲོད་བསྟེན་ཁྱབ་ཁོངས་སྨན་ཁང་ཁག་གི་རྩིས་པ་མང་དག་ཞིག་འཕོ་འགྱུར་བྱུང་སྟབས། གསར་འདེབས་རྩིས་པ་རྣམ་པར་བོད་མིའི་སྒྲིག་འཛུགས་ཀྱི་རྨང་གཞིའི་རྩིས་ཀྱི་འགྲོ་སྟངས་གཙོས་པའི་འཕྲོད་ལས་སྨན་ཁང་ཁག་གི་སྔོན་རྩིས་འཆར་འགོད་གནང་སྟངས་དང་། རྩིས་ཁྲ་ཉར་ཕྱོགས། དེ་བཞིན་འཕྲལ་བབ་སྐོར་སོགས་ཉིན་རེའི་རྩིས་ཀྱི་ལས་དོན་དང་འབྲེལ་བའི་ཐོག་གོ་རྟོགས་ནུས་པ་འཕེལ་རྒྱས་ཡོང་བར་ཆེད་དམིགས་ཀྱིས་ཟབ་ཁྲིད་ཟབ་སྦྱོང་གོ་སྒྲིག་ཞུས་པ་ཞིག་ཆགས་ཀྱི་འདུག རྩ་བའི་ཨ་རིའི་རོགས་རམ་ཐེབས་རྩ་ཁང་ནས་ཕྱི་ལོ་ ༢༠༡༤ ལོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ལ་བཙན་བྱོལ་བོད་མིའི་འཕྲོད་བསྟེན་ཡར་རྒྱས་གཏོང་རྒྱུའི་ལས་གཞིར་ཨ་སྒོར་ས་ཡ་གསུམ་ལྷག་གི་རོགས་དངུལ་གནང་ཡོད་པ་དང་། རོགས་དངུལ་དེའི་འོག་ལ་སྨན་བཅོས་ལྟ་སྐྱོང་གི་ལས་གཞི་དང་། མ་དང་བྱིས་པའི་འཕྲོད་བསྟེན། འཕྲོད་ལས་ནུས་ཤུགས་རྒྱ་སྐྱེད། ཊི་སྦི་སྔོན་འགོག་དང་བཅོས་ཐབས། དེ་བཞིན་མང་ཚོགས་ཀྱི་འཕྲོད་བསྟེན་གོ་རྟོགས་ནུས་པ་གོང་འཕེལ་བཅས་ཡོད་པ་རེད། ད་ལན་གྱི་ཟབ་སྦྱོང་དེའང་རོགས་དངུལ་ལས་འཆར་དེའི་ཆ་ཤས་ཤིག་ཡིན་པ་མ་ཟད། དེ་རིང་ཟླ་ ༨ ཚེས་ ༢༢ ནས་དབུ་འཛུགས་ཀྱིས་ཟླ་འདིའི་ཚེས་ ༣༡ བར་འཚོགས་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་འདས་པའི་ཉིན་གྲངས་བཞིའི་རིང་ཞི་བའི་ཚལ་དུ་སྤྱོད་འཇུག་ཆེན་མོའི་བཀའ་ཆོས་བཀྲིན་བསྐྱངས་ཡོད་པ་ལྟར། ཁ་སང་ཚེས་ ༢༡ ཉིན་མགོན་པོ་མཆོག་གིས་ཐེངས་འདིའི་ཆོས་འབྲེལ་ཉིན་མཐའ་མའི་ཐོག་ཕྱི་ནང་གི་དད་ལྡན་མང་ཚོགས་ཁྲི་གཉིས་ལྷག་ལ་ཐུགས་རྗེ་ཆེན་པོའི་བཀའ་དབང་བཀྲིན་གནང་སོང་། སྐབས་དེར་༸གོང་ས་མཆོག་གིས་ཐོག་མར་མང་ཚོགས་ལ་ཐུགས་རྗེ་ཆེན་པོའི་དབང་འདི་ནི་དགེ་སློང་མ་པདྨོ་ནས་བརྒྱུད་པའི་གསང་སྔགས་རྡོ་རྗེ་ཐེག་པའི་ཆོས་འཁོར་ཞིག་ཆགས་ཡོད་པར་ངོ་སྤྲོད་དང་འབྲེལ། གསང་སྔགས་རྡོ་རྗེ་ཐེག་པ་ཞེས་པའི་ཚིག་དོན་སྐོར་དང་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ནི་བོད་གངས་ཅན་ལྗོངས་དང་དམིགས་བསལ་ལས་འབྲེལ་ཡོད་པ་སོགས་བཀའ་བསྩལ་དང་། ཁྱད་པར་དུ་༸གང་ཉིད་མཆོག་གིས་དབང་གྲལ་དུ་འཁོད་པའི་དད་ལྡན་པ་རྣམས་ལ་ལམ་སྟོན་བསྩལ་བའི་ཁྲོད་དབང་ཞུ་སྐབས་དམིགས་པ་གཞན་དོན་ཁོ་ནར་སེམས་བསྐྱེད་དགོས་གལ་ཆེ་བས་རང་ཉིད་ཀྱི་དམིགས་པ་བཞིན་ནམ་ཡང་ཀུན་སློང་འཕྱུག་རྒྱུ་མེད་པའི་ལམ་སྟོན་བསྩལ་ཡོད་པ་རེད། ༸གོང་ས་མཆོག་གིས་ཆོས་ཀྱི་སྙིང་པོ་མི་དང་སེམས་ཅན་གཞན་ལ་སེམས་བརྣག་མ་བྱེད་པར་སེམས་པ་བཟང་པོ་དང་དྲང་པོ། དེ་བཞིན་མིས་མི་ལ་རོགས་བྱ་རྒྱུ་གལ་ཆེ་བའི་བཀའ་བསྩལ་དང་ཆབས་ཅིག ཆོས་ཀྱི་བྱིན་རླབས་ཟེར་བ་དེ་གཙོ་བོ་ཉམས་ལེན་ལ་ཐུག་ཡོད་པ་བཀའ་གནང་ཡོད། ཉིན་གུང་ཚོུད་ ༡༡།༣༠ སྟེང་ཐུགས་རྗེ་ཆེན་པོའི་བཀའ་དབང་ཡོངས་སུ་གྲུབ་བསྟུན། ༸གོང་ས་མཆོག་གིས་ལ་དྭགས་པ་མང་ཚོགས་ལ་སང་ཞོགས་སླང་འཇལ་རྒྱུའི་བཀའ་བཞེས་བཟང་པོ་བསྩལ་སོང་བ་དང་། ལ་དྭགས་པ་རྣམས་ལ་ཁོར་ཡུག་ཐོག་དོ་སྣང་། སྒོས་སུ་ཤིང་སྣ་འདེབས་འཛུགས་དང་ཚལ་ཞིང་རིགས་དོན་གཉེར་བྱ་གལ་ཡིན་པའི་དམིགས་བསལ་བཀའ་སློབ་གནང་ཡོད་པ་རེད། ཐེངས་འདིའི་ཆིབས་སྒྱུར་གོ་སྒྲོག་ཚོགས་པ་ལ་དྭགས་ནང་པའི་ཚོགས་འདུའི་ཚོགས་གཙོ་སྐུ་ཞབས་ཚེ་དབང་འཕྲིན་ལས་ལགས་ཀྱིས་ཁ་སང་བཀའ་དབང་ལེགས་གྲུབ་རྗེས་༸གོང་ས་མཆོག་ལ་བླ་མ་མཁྱེན། གོང་མ་མཁྱེན། གོང་མའི་བདག་པོ་མཁྱེན་ཅེས་སོགས་གུས་ཕྱག་སྔོན་དུ་འགྲོ་བའི་ཐོག་ཐུགས་རྗེ་ཆེ་ཞུའི་གསུང་བཤད་གནང་སྐབས། ༸གང་ཉིད་མཆོག་ས་རེས་ས་གནས་སུ་ཟླ་བ་གཅིག་མན་ཙམ་རིང་ལ་༸ཞབས་སོར་བཀྲིན་བསྐྱངས་ནས་ཆོས་ཀྱི་འཁོར་ལོ་རྒྱ་ཆེ་སྐོར་བར་བཀྲིན་རྗེས་དྲན་གྱི་ཐུགས་རྗེ་ཆེ་ཞུ་དང་། ལྷག་པར་དུ་མགོན་པོ་མཆོག་གིས་ཐེངས་འདིའི་མཛད་འཕྲིན་ཁོངས་ཆོས་ལུགས་གཞན་གྱི་མི་སྣ་དང་མཇལ་མོལ་སྔར་ལྷག་གནང་ཡོད་པ་དེས་ལ་དྭགས་ཀྱི་མཐུན་སྒྲིལ་གོང་འཕེལ་སྲ་བརྟན་དུ་བཏང་ཡོད་སྐོར་ཞུས་པ་མ་ཟད། ལྷག་དོན་ལ་དྭགས་མང་ཚོགས་ནས་༸རྒྱལ་བའི་བཀའ་བཞིན་ཆོས་ལུགས་མཐུན་སྒྲིལ་སོགས་ཀྱི་ཐད་སྔར་ལྷག་འབད་བརྩོན་ཞུས་པའི་ཐོག་མགོན་པོ་༸གང་ཉིད་མཆོག་ཡང་ནས་ཡང་དུ་ལ་དྭགས་སུ་ཆིབས་བསྒྱུར་མཛད་སྐྱོང་ཡོང་བའི་གསོལ་འདེབས་ཞུས་ཡོད་པ་རེད། རྩ་བའི་༸གོང་ས་མཆོག་གིས་ལ་དྭགས་ཞི་བའི་ཚལ་དུ་ཉིན་གྲངས་བཞིའི་རིང་གི་བཀའ་ཆོས་སྩལ་བའི་ཐོག་ཆེད་བཅར་ཞུས་པའི་ལ་དྭགས་བྱང་ཐང་དང་ནུབ་ར། དེ་བཞིན་ཟངས་དཀར་སོགས་ལུང་ཁུག་ཁག་ཅིག་གི་དད་ལྡན་མང་ཚོགས་རྣམས་དྲིན་ཅན་རྩ་བའི་བླ་མར་དད་པ་དམ་ཚིག་གཡོ་བ་མེད་པའི་ངང་ལག་ཟུང་སྤྲལ་བར་བཀོད་དེ་གསོལ་བ་སྨོན་ལམ་དང་བཅས་རང་ཡུལ་ཕྱོགས་སུ་ཐོན་ཡོད་པ་རེད།

ཉན་པ།: Listen ཕབ་ལེན། Download བོད་ཀྱི་བེུད་ལེ་ཚན། འོད་ཟེར་མངར་ཟས་ཀྱི་ཚོང་ལས་གཉེར་མཁན་བསྟན་སྲོལ་བཟང་མོ་ལགས་དང་གླེང་མོལ། གཟའ་འཁོར་སྐྱར་ཞིབ། Sunday 21/08/2016 Women of Tibet: In conversation with Tendol Sangmo owner of Woeser Bakery Week Review

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཁྲི་ཚོགས་བརྒལ་བར་བྱང་ཆུབ་ཀྱི་སེམས་ལས་ཕན་ཐོགས་ཆེ་བ་ཅི་ཡང་མེད་སྐོར་བཀའ་བསྩལ་སོང་། དེ་རིང་ཟླ་ ༨ ཚེས་ ༢༠ ཉིན་༸གོང་ས་༸སྐྱབས་མགོན་ཆེན་པོ་མཆོ་གིས་ལ་དྭགས་གླེར་རྟེན་གཞི་བྱས་པའི་ཞི་བ་ཚལ་གསུང་ཆོས་ར་བའི་བཞུགས་ཁྲིར་༸ཞབས་སོར་འཁོད་བསྟུན། ལ་དྭགས་ས་གནས་མི་དམངས་གཙོས་ཕྱི་ནང་གི་དད་ལྡན་ཆོས་ཞུ་བ་ཁྲི་ཚོགས་བརྒལ་བར་བྱང་ཆུབ་སེམས་ཀྱི་གལ་གནད་སྐོར་དང་ཚོགས་བསགས་སྒྲིབ་བྱང་གི་མཆོག རང་གཞན་ཀུན་གྱི་གནས་སྐབས་དང་མཐར་ཐུག་གི་བདེ་སྐྱིད་ཀྱི་རྩ་བ་ནི་བྱང་ཆུབ་སེམས་ཡིན་སྟབས། བྱང་ཆུབ་ཀྱི་སེམས་དེ་ལས་ཕན་ཐོགས་ཆེ་བ་ཅི་ཡང་མེད་སྐོར་ལམ་སྟོན་བསྩལ་གནང་སོང་། ༸གོང་ས་མཆོག་གིས་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེའུ་དང་པོ་བྱང་སེམས་ཀྱི་ཕན་ཡོན་སྐོར་ནས་ལེའུ་གསུམ་པ་བྱང་སེམས་ཡོངས་སུ་བཟུང་བའི་བར་བཀའ་ཆོས་ལེགས་གྲུབ་མཛད་པ་དང་ཆབས་ཅིག ཁྱད་པར་དུ་ནཱ་ལེནྡྲའི་ཆོས་བརྒྱུད་ཡོངས་རྫོགས་བོད་ཡོག་ཐོག་སློབ་གཉེར་བྱ་རྒྱུ་ཡོད་པས་སངས་རྒྱས་བཅོམ་ལྡན་འདས་ཀྱི་བཀའ་དགོངས་འཐུས་ཚང་ཞིག་རྟོགས་པར་བཀའ་འགྱུར་དང་དེའི་དགོངས་འགྲེལ་བསྟན་བཅོས་རྣམས་ལ་དོ་སྣང་དང་དེར་སློབ་སྦྱོང་གནང་གལ་ཆེ་བ་ཡིན་སྐོར་བཀའ་བསྩལ་ཡོད་པ་རེད། དེ་རིང་ཉིན་མཐའ་མའི་ཆོས་འབྲེལ་སྐབས་༸གོང་ས་མཆོག་གིས་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཆོས་འབྲེལ་ལེགས་དང་བསྟུན། གསུང་ཆོས་གོ་སྒྲིག་ཚོགས་ཆུང་ལ་དྭགས་ནང་པའི་ཚོགས་འདུ་ཚོགས་པས་༸གང་ཉིད་མཆོག་ལ་བཀྲིན་གཏང་རག་ཚུལ་དུ་མཎྜལ་འདེབས་འབུལ་དང་མང་ཚོགས་ཚོས་ཀྱང་སྟོན་པ་ཐུབ་དབང་གི་སྐུ་བརྙན་གཙོས་བརྟན་བཞུགས་ཀྱི་འབུལ་རྫས་རྣམས་འདེགས་འབུལ་ཞུས་ཡོད་པ་རེད། མཛད་འཆར་ལྟར་ན། སང་ཉིན་ཚེས་ ༢༡ སྟེ་ཆོས་འབྲེལ་ཉིན་མཐའ་མའི་ཐོག་༸གང་ཉིད་མཆོག་གིས་དད་ལྡན་མང་ཚོགས་རྣམས་ལ་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་གི་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་ལ་དྭགས་སུ་སྤྱོད་འཇུག་གི་ཆོས་འབྲེལ་ཉིན་མཐའ་མའི་ཐོག་བྱང་ཆུབ་ཀྱི་སེམས་ལས་ཕན་ཐོགས་ཆེ་བ་ཅི་ཡང་མེད་སྐོར་བཀའ་བསྩལ་བ། རྔ་པ་ཀིརྟི་དགོན་པའི་དགེ་འདུན་པ་ཚོས་གྱོད་དཔེ་ཀློག་དེབ་ཟེར་བར་གཟབ་སྦྱོང་གྱིས་ཤིག་ཅེས་བཙན་བཀའ་བཏང་འདུག སྲིད་སྐྱོང་མཆོག་དབུ་བཞུགས་ཐོག་བོད་རིགས་ན་གཞོན་འགོ་ཁྲིད་ལྷན་ཚོགས་འཚོགས་བཞིན་པ། རྒྱ་ནག་གི་འགོ་ཁྲིད་རྣམས་ལ་རྣམ་དཔྱོད་ཡོད་ན་བེད་སྤྱོད་བྱ་རྒྱུའི་དུས་ལ་བབ་ཡོད་པ་གསུངས་འདུག བོད་རིགས་ཨོ་རྩལ་བ་ཆོས་དབྱིངས་སྐྱིད་ལགས་ཀྱི་རྩེད་འགྲན་ལ་བོད་མི་ཚོས་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་འདུག Saturday 20/08/2016 Dalai Lama concludes Choejug teaching in Ladakh Self immolation, protesting with Dalai Lama picture a crime, China issues new rule book Over 150 young Tibetans gather in DC for YTLS 2016 Time for China to take action for Tibet, says RSS Chief Tibetans express overwhelming support to Olympian Choeyang Kyi

ཁ་ཉིན་ཟླ་ ༨ ཚེས་ ༡༨ ཉིན་ཨ་རིའི་བོད་ཀྱི་སྐུ་ཚབ་དོན་ཁང་དང་བོད་མིའི་ཁྱད་ལས་དང་བླངས་ཞབས་ཁང་གཉིས་ཟུང་སྦྲེལ་གྱིས་གོ་སྒྲིག་འོག་ཨ་རིའི་ནིའུ་ཡོག་མངའ་སྡེའི་གྷེ་རེ་སོན་བསྟི་གནས་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་ ༢༠༡༦ ལོའི་བོད་རིགས་ན་གཞོན་འགོ་ཁྲིད་ལྷན་ཚོགས་དེ་འཚོགས་ཡོད་པ་རེད། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་ཀྱི་གནས་བབ་དང་ལས་དོན་བཀོད་སྒྲིག་གནང་ཕྱོགས་སོགས་གསུངས་པ་དང་འབྲེལ།  བོད་དོན་འཐབ་རྩོད་ཀྱི་དཀའ་རྙོག་སེལ་ཕྱིར་བཀའ་ཤག་སྐབས་ ༡༥ པའི་ལྔ་དང་ལྔ་བཅུའི་སྲིད་བྱུས་དེའི་གོ་དོན་གང་ཡིན་ངོ་སྤྲོད་གནང་པ་མ་ཟད། ལྷག་དོན་ད་ལན་གྱི་ལྷན་ཚོགས་དེའི་ཐོག་བཅར་བའི་གཞོན་སྐྱེས་ཚོས་བོད་དོན་ཆེད་ད་ལྟའི་བཀའ་ཤག་དང་དབུས་བོད་མིའི་སྒྲིག་འཛུགས་ཀྱི་ལས་དོན་གང་སྤེལ་ཐད་རམ་འདེགས་ཞུ་རྒྱུར་འགན་ཇི་ལྟར་བཞེས་དགོས་སྐོར་སོགས་གསུངས་ཡོད་པ་རེད།    ལྷན་ཚོགས་དེ་ཟླ་འདིའི་ཚེས་ ༡༨ ནས་འགོ་འཛུགས་ཀྱིས་ཚེས་ ༢༡ བར་ཚོགས་གནང་གི་ཡོད་པ་དང་། དེའི་ཐོག་བྱང་ཨ་རི་དང་ཁེ་ན་ཌ། ཡུ་རོབ་བཅས་ནས་ཤེས་རིག་སམ་ལས་རིགས་འདྲ་མིན་གྱི་རྒྱབ་ལྗོངས་ཡོད་པའི་བོད་མི་གཞོན་སྐྱེས་ཁྱོན་ ༡༥༠ ཙམ་གྱིས་མཉམ་ཞུགས་གནང་འདུག ལྷན་ཚོགས་དེ་ལྟར་སྐོང་ཚོགས་གནང་དོན་ནི་འཛམ་གླིང་ཡུལ་གྲུ་གང་སར་གནས་པའི་བོད་པའི་ན་གཞོན་འགོ་ཁྲིད་རྣམ་པ་འདུ་སྐོང་གིས་ཕན་ཚུན་མྱོང་བ་སྦྱང་ཤེས་དང་བློ་སྤོབས་འཕེལ་ཐབས་གཙོས།  བོད་རྒྱ་ཆེ་མང་ཚོགས་དང་དེའི་སྤྱི་ཚོགས། སྒོས་སུ་བོད་མིའི་འཐབ་རྩོད་མདུན་བསྐྱོད་བྱ་རྒྱུར་ད་ཡོད་འགོག་རྐྱེན་རྣམས་མེད་པ་བཟོ་རྒྱུའི་ཐབས་ལམ་འཚོལ་ཞིབ་ཀྱིས་རྒྱལ་སྤྱིའི་ཐོག་ཁ་ཡོད་ལག་ཡོད་ཀྱི་འགྱུར་ལྡོག་ཡོང་བར་གདོང་ལེན་ཐུབ་མཁན་གྱི་སྤྱི་ཚོགས་ཤིག་བསྐྲུན་ཐབས་གནང་རྒྱུར་ཆེད་དམིགས་གནང་པ་ཞིག་ཡིན་འདུག གཞི་རྩའི་བྱང་ཨ་རིའི་སྐུ་ཚབ་དོན་ཁང་གིས་གོ་སྒྲིག་འོག་ཕྱི་ལོ་ ༢༠༠༧ ལོར་བྱང་ཨ་རིའི་གཙུག་ལག་སློབ་གཉེར་ཁང་གི་སློབ་ཕྲུག་ཚོགས་ཆེན་དང་། དེ་བཞིན་ ༢༠༠༩ ལོར་ཆེད་ལས་བོད་མིའི་ཚོགས་ཆེན་བཅས་སྐོང་ཚོགས་གནང་ཡོད་ཀྱང་། ད་ལྟའི་ལྷན་ཚོགས་དེ་སྔར་དང་མི་འདྲ་བའི་བོད་རིགས་སློབ་མ་གཙོས་པའི་ཁུལ་དེར་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ནང་ཕྱག་ལས་གནང་བཞིན་ཡོད་པའི་བོད་རིགས་གཞོན་སྐྱེས་དང་སྒྱུ་རྩལ་བ། ལྷག་པར་དུ་གསར་འགོད་པ་སོགས་ཤེས་རིག་འདྲ་མིན་གྱི་རྒྱབ་ལྗོངས་ཡོད་པའི་བོད་པའི་ན་གཞོན་ཁྱིན་ ༡༥༠ ཙམ་གྱིས་མཉམ་ཞུགས་གནང་འདུག     རྩ་བའི་བྱང་ཨ་རིའི་བོད་ཀྱི་སྐུ་ཚབ་དོན་ཁང་དང་བོད་མིའི་ཁྱད་ལས་དང་བླངས་ཞབས་ཁང་གཉིས་ཟུང་སྦྲེལ་གྱིས་གོ་སྒྲིག་ཞུས་པའི་ལྷན་ཚོགས་དེ་ཆེས་ཐོག་མ་དེ་ཆགས་ཀྱི་འདུག

དེའང་ཟླ་བ་གོང་མའི་ནང་རྔ་བ་རྫོང་གི་འབྲེལ་ཡོད་ལས་བྱེད་པས་རྔ་བ་ཀིརྟིའི་དགོན་གྱི་གྲྭ་ཤག་རེ་རེ་བཞིན་དུ་དགོན་པའི་གྱོད་དཔེ་ཀློག་དེབ་ཟེར་བའི་དེབ་ཆུང་ཞིག་སྤྲད་དེ་དགེ་འདུན་པ་ཚོས་དེར་སློབ་སྦྱོང་གཟབ་ནན་བྱེད་དགོས་པའི་བཙན་བཀའ་བཏང་འདུག རྒྱ་གཞུང་གིས་བཙན་བཤད་ཀྱིས་འདི་ལོའི་ཟླ་ ༧ ཚེས་ ༢༨ ཉིན་ཆེད་སྤྲད་བྱས་པའི་དགོན་པའི་གྱོད་དཔེ་ཀློག་དེབ་དེའི་ནང་དུ་གཞིས་བཞུགས་བོད་མི་ཚོས་རང་ལུས་མེར་སྲེག་གིས་ཞི་རྒོལ་སྐད་འབོད་གནང་པ་དང་། ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཁའ་དབྱིངས་སུ་འཕྱར་ནས་ཞི་བའི་གོམ་བགྲོད་གནང་བ་སོགས་སྤྱི་ཚོགས་ཀྱི་བདེ་འཇགས་ལ་གནོད་འཚེ་བཟོས་པའི་ཁྲིམས་འགལ་ཡིན་པས་དེ་དག་ལ་ཉེས་ཆད་གཅོད་དགོས་པ་དང་། དེ་བཞིན་སྐད་འཕྲིན་གཙོས་སྤྱི་ཚོགས་ཀྱི་བརྒྱུད་ལམ་ཁག་སྤྱོད་དེ་ཕྱི་ཕྱོགས་ལ་ས་གནས་ཀྱི་གནས་ཚུལ་སྐུར་བ་སོགས་རྒྱལ་ཁབ་ཀྱི་གསང་དོན་ཕྱི་ལ་བསྒྲགས་པའི་ཁྲིམས་འགལ་གྱི་ཉེས་ཆད་གཅོད་རྒྱུ་སོགས་དོན་ཚན་ལྔ་ཅན་འཁོད་པའི་བོད་རྒྱ་གཉིས་ཀྱི་ཡིག་རིགས་ཡོད་པ་ཞིག་ཆེད་སྤྲད་ཀྱིས་དགེ་འདུན་པ་ཚོས་དེར་སློབ་སྦྱོང་གཟབ་ནན་བྱེད་དགོས་པའི་བཙན་བཀའ་བཏང་ཡོད་པ་རེད། འདི་ག་རླུང་འཕྲིན་ཁང་ལ་བོད་གནས་མཁོ་སྤྲོད་པ་ཀིརྟི་དགོན་པའི་གྲྭ་བློ་བཟང་ཡེ་ཤེས་ལགས་ཀྱིས་འདི་ལོའི་ཟླ་བ་ ༧ ཚེས་ ༢༨ ཉིན་རྒྱ་གཞུང་གིས་རྔ་བ་རྫོང་གི་དགོན་པ་ཁག་ ༤༠ ལྷག་གི་འཐུས་མི་ཆེད་སྐོང་ཐོག་ཚོགས་འདུ་ཚོགས་ཤིང་བཅའ་ཁྲིམས་དགོན་པར་བསྐྱལ་བའི་ལས་དོན་དེ་ལེགས་གྲུབ་བྱུང་སོང་ཅེས་རྔ་བའི་གསར་འགྱུར་བརྒྱུད་ལམ་ཐོག་སྤྱི་བསྒྲགས་བྱས་ཡོད་པ་གསུངས་སོང་།    ད་དུང་ཁོང་གིས་བོད་ནང་བོད་མི་ཚོས་རྒྱ་གཞུང་གིས་བོད་ཐོག་ལ་གདུག་རྩུབ་ཆེ་བའི་བྱ་སྤྱོད་སྤེལ་བར་མ་བཟོད་ནས་དེ་འབྲེལ་ཞི་རྒོལ་སྐད་འབོད་གནང་པ་མཚོན་ལས་འགུལ་ཕྲན་བུ་སྤེལ་བར་ཆེས་གདུག་རྩུབ་ཅན་གྱི་སྲིད་བྱུས་ལག་བསྟར་གྱིས་དྲག་གནོན་བྱས་དང་བྱེད་བཞིན་པ་མ་ཟད། རྒྱ་གཞུང་རང་གིས་བོད་ཐོག་སྤེལ་བའི་ཁྲིམས་འགལ་གྱི་ལས་རིགས་གང་སྤེལ་ཡང་དེ་དག་ཐམས་ཅད་ཁྲིམས་མཐུན་ལུགས་ཡིན་སྐོར་བཤད་ཀྱི་ཡོད་པ་གསུངས་སོང་། དེ་བཞིན་རྒྱ་གཞུང་གིས་བོད་མི་ཚོས་རང་ལུས་མེར་སྲེག་དང་ཞི་བའི་གོམ་བགྲོད་སོགས་ཀྱི་ལས་འགུལ་སྣ་མང་སྤེལ་བར་བརྟེན་རྒྱལ་གཅེས་པ་དེ་དག་གི་ནང་མི་ཉེ་འབྲེལ་གཙོས་དགེ་རྒན་སོགས་ལ་ཉེས་ཆད་བཏང་ཡོད་པ་རེད་ལ། དེ་སྔོན་རྒྱལ་གཅེས་པ་ཀིརྟི་དགོན་གྱི་གྲྭ་བློ་བཟང་ཕུན་ཚོགས་ཀྱི་ཨ་ཁུ་དང་ཤག་གི་དགེ་རྒན་ཡིན་པའི་དགེ་འདུན་པ་བློ་བཟང་བརྩོན་འགྲུས་ལགས་ལ་གྲྭ་བློ་བཟང་ཕུན་ཚོགས་ལགས་བཀྲོངས་པའི་ཉེས་མིང་འོག་ལོ་ ༡༡ རིང་བཙོན་འཇུག་ཁྲིམས་ཐག་བཅད་ཡོད་པ་དང་། དེ་བཞིན་ ༢༠༡༣ ལོར་ཀིརྟི་དགོན་པའི་གྲྭ་བློ་བཟང་དཀོན་མཆོག་གིས་རང་ལུས་མེར་སྲེག་ལ་བརྒྱུད་སྐུལ་བྱས་པའི་ཉེས་མིང་འོག་བཙོན་འཇུག་ལོ་ ༢ ནར་འགྱང་གིས་སྲོག་ཐོག་གི་ཁྲིམས་ཆད་བཅད་ཡོད་ཀྱང་ད་ལྟའི་ཆར་ཁོང་གི་གནས་སྟངས་ཇི་ཆགས་ཤེས་རྟོགས་ཐུབ་ཀྱི་མེད་པ་རེད། གཞན་ཡང་མཛོད་དགེ་རྫོང་ནས་དཀོན་མཆོག་དབང་མོས་རང་ལུས་མེར་སྲེག་གནང་བ་དེ་ཁོ་མོ་རང་གི་ཟླ་བོ་སྒྲོལ་མ་སྐྱབས་ལ་བཟའ་ཟླ་བཀྲོངས་པའི་ཉེས་མིང་གཡོག་ནས་སྲོག་ཐོག་གི་ཉེས་ཆད་བཅད་པ་སོགས་རང་ལུས་མེར་སྲེག་གཏོང་མཁན་རྣམས་ཀྱི་ཤུལ་ལུས་ནང་མི་འབྲེལ་སྤུན་མཆེད་སོགས་ལ་མི་སྤྱོད་ལས་འདས་པའི་མནར་གཅོད་བཏང་ཡོད་པ་རེད། རྩ་བའི་ཐེངས་འདིའི་དེབ་དེ་དགོན་པའི་གྲྭ་ཤག་རེ་རེ་བཞིན་ཆེད་སྤྲད་བྱེད་དོན་ནི་མ་འོངས་པར་དགོན་ཁག་གི་དགེ་འདུན་པ་ཚོས་ལས་འགུལ་དེ་རིགས་སྤེལ་ཚེ་ཁྲིམས་ཐག་ནན་པོ་གཅོད་རྒྱུ་ཡིན་པའི་དཔང་ཡིག་ལྟ་བུ་ཞིག་ཡིན་པ་རེད་འདུག

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ལ་དྭགས་ཞི་བའི་ཚལ་དུ་ཆོས་འབྲེལ་ཉིན་གཉིས་པ་བཀྲིན་བསྐྱངས་པའི་ཁྲོད། ད་ལྟའི་དུས་འདིར་བརྟག་དཔྱད་དང་ཚན་རིག་སློབ་སྦྱོང་བྱ་རྒྱུ་གལ་གནད་ཆེ་སྐོར་སྩལ་དང་སྦྲགས་ཏེ་ནང་པའི་ལྟ་གྲུབ་ཀྱི་ཆ་ནས་བཤད་ན་ཚན་རིག་པ་ང་ཚོའི་གྲོགས་པོ་ཆགས་ཡོད་པ་རེད་ཅེས་བཀའ་བསྩལ་སོང་། དེ་རིང་ཟླ་ ༨ ཚེས་ ༡༩ ཉིན་གྱི་སྔ་དྲོ་ཚོུད་ ༨།༣༠ སྟེང་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཞི་བ་ཚལ་གསུང་ཆོས་ར་བའི་བཞུགས་ཁྲིར་༸ཞབས་སོར་འཁོད་བསྟུན་པཎ་གྲུབ་ ༡༧ གསོལ་འདེབས་གསུང་འདོན་མཛད་པ་དང་ཆབས་ཅིག  གསོལ་འདེབས་སྨོན་ལམ་དེའི་མཛད་བྱང་ལས། རང་རེ་སངས་རྒྱས་ཀྱི་རྗེས་འཇུག་པ་རྣམས་སངས་རྒྱས་ཀྱི་ཆོས་ཚུལ་ལ་ཤེས་ནས་དད་པ་ཐོབ་པ་ཞིག་དགོས་གལ་ཤིན་ཏུ་ཆེ་བས་གཟུ་བོའི་བློས་ཐེ་ཚོམ་གྱི་སྒོ་ནས་ཞིབ་མོར་བརྟགས་ཤིང་དཔྱད་སྟེ། ཞེས་སོགས་ལས། སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་པར་དབང་རྣོན་ཆོས་ཀྱི་རྗེས་འབྲངས་ལྟར་རྒྱུ་མཚན་བརྟག་དཔྱད་བྱེད་དགོས་རྒྱུ་ནི་ཤིན་ཏུ་ནས་གལ་ཆེ་ཡིན་པ་མ་ཟད། ལྷག་དོན་ཐེ་ཚོམ་དགོས་རྒྱུ་དེའང་གནད་ཆེ་ཡིན་པར་བཀའ་གནང་ཡོད་པ་རེད། ཁྱད་པར་དུ་མགོན་པོ་མཆོག་གིས་སྐབས་དེར་བརྟག་དཔྱད་དང་ཚན་རིག་སློབ་སྦྱོང་བྱ་རྒྱུ་གལ་འགངས་ཆེན་པོ་ཡིན་སྐོར་དང་འབྲེལ།  ༸གང་ཉིད་མཆོག་གིས་ད་བར་འདས་པའི་ལོ་ངོ་ ༣༠ ཙམ་ནས་ཚན་རིག་པ་འདྲ་མིན་དང་ལྷན་དུ་གཞི་རྐང་། སེམས་ཁམས་རིག་པ་དང་ཀླད་རྩའི་ཚན་རིག འཇིག་རྟེན་ཆགས་རིམ་དང་དངོས་ཁམས་རིག་པ་བཅས་བརྗོད་གཞི་བཞིའི་ཐོག་བཀའ་བསྡུར་གནང་པའི་ཁྲོད་སྐབས་རེ་ཚན་རིག་གྲུབ་དོན་ནས་ཤེས་བྱ་ནང་འདྲེན་བྱ་རྒྱུ་ཡོད་པ་དང་། མཚམས་རེ་ནང་ཆོས་ཀྱིས་ཕར་ཕན་ཐོགས་གྲུབ་ཡག་ཡོད་སྟབས། ཁ་ཅིག་གིས་མཐོང་ཚུལ་ལ་ཚན་རིག་དེ་ཆོས་དང་འགལ་བ་ཡིན་པ་དང་དེ་བཞིན་དོན་མེད་པ་བཟོ་མཁན་ཞིག་ཏུ་འདོད་མཁན་ཡོད་རུང་། ནང་པའི་ལྟ་གྲུབ་ཀྱི་ཆ་ནས་ཚན་རིག་པ་ང་ཚོའི་གྲོགས་པོ་ཆགས་ཡོད་པ་བཀའ་གནང་སོང་།  ༸གོང་ས་མཆོག་གིས་མུ་མཐུད་རབ་བྱུང་ཕོ་མོ་གཙོར་གྱུར་པའི་དད་ལྡན་སྐྱ་སེར་མང་ཚོགས་ཚང་མས་ཚན་རིག་དང་ནང་པའི་ལྟ་གྲུབ་ལ་སློབ་སྦྱོང་བྱེད་པའི་ཐོག་ནས་སངས་རྒྱས་ཀྱི་བསྟན་པ་རྒྱས་པ་བྱ་དགོས་ཀྱི་རེད་ཅེས་ལམ་སྟོན་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཉིན་གཉིས་པའི་བཀའ་ཆོས་སྐབས་སྤྱོད་འཇུག་ཆེན་མོའི་ལེའུ་དགུ་པ་ཤེས་རབ་ཀྱི་ལེའུ་ནས་གཞུང་དངོས་དབུ་འཛུགས་མཛད་ཡོད་ཀྱང་། སྐབས་དེར་༸གང་ཉིད་མཆོག་གིས་ཁ་སང་དང་དེ་རིང་གི་ཆོས་ཐུན་དུས་ཚོད་མང་ཆེ་བ་དེ་ནང་ཆོས་ངོ་སྤྲོད་དང་ཤེས་རབ་སྙིང་པོ་སྤྱི་བཤད། དེ་བཞིན་པཎ་གྲུབ་ ༡༧ གསོལ་འདེབས་ཐོག་བཀའ་ཁྲིད་བསྩལ་དོན་ནི་སྔོན་བྱོན་ནཱ་ལེཎྡྲའི་མཁས་པ་དེ་དག་གིས་གཏན་ལ་ཕབ་པའི་གཞུང་དག་དེང་སང་དུས་རབས་ཉེར་གཅིག་པ་འདིའི་ནང་ཁ་ཡོད་ལག་ཡོད་ཀྱི་ཕན་ཐོགས་ཀྱི་ཡོད་སྐོར་བཀའ་བསྩལ་མཛད་ཡོད། མཛད་འཆར་ལྟར་ན། སང་ཚེས་ ༢༠ ཉིན་གསུང་ཆོས་གོ་སྒྲིག་ཚོགས་ཆུང་ལ་དྭགས་ནང་པའི་ཚོགས་འདུས་ཀྱིས་༸གོང་ས་མཆོག་ལ་༸སྐུ་ཚེ་བསྐལ་བརྒྱར་བརྟན་ཕྱིར་བརྟན་བཞུགས་རྒྱས་པ་ཞིག་བསྟར་འབུལ་ཞུ་གྲུབ་རྗེས། ༸གང་ཉིད་མཆོག་གིས་སྤྱོད་འཇུག་གི་བཀའ་ཆོས་མུ་མཐུད་སྩལ་གནང་མཛད་ཀྱི་ཡོད་པ་དང་།  གནངས་ཚེས་ ༢༡ ཉིན་༸གོང་ས་མཆོག་གིས་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་གི་ཡོད་པ་རེད།