Monthly Archives: October, 2017

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གློག་བརྙན་བཟོ་སྐྲུན་གནང་མཁན་བོད་རིགས་ན་གཞོན་གསུམ་ལ་མ་དངུལ་ཧིན་སྒོར་འབུམ་གསུམ་རེ་གནང་བ་དང་འབྲེལ། སྒྱུ་རྩལ་དང་གློག་བརྙན་བརྒྱུད་ནས་བོད་ཕྱི་ནང་གཉིས་སུ་སྙོབ་ཐུབ་པ་གནང་རྒྱུ་དེ་ཆེས་གནད་ཆེ་ཆགས་ཡོད་པ་གསུངས་སོང་། རྩ་བའི་འདི་ལོའི་ཕྱི་ཟླ་ ༥པའི་ནང་དུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་ཀྱི་བརྙན་འཕྲིན་ཚན་པས་བཙན་བྱོལ་ནང་གི་བོད་མི་གློག་བརྙན་བཟོ་ལས་པ་ཚོར་ཆེ་མཐོང་དང་དཔལ་འབྱོར་རམ་འདེགས། དེ་བཞིན་གློག་བརྙན་སྐྲུན་ཐོག་དོ་དབྱིངས་དང་སེམས་ཤུགས་སྤར་རྒྱུ་སོགས་ལ་དམིགས་ཏེ།བཙན་བྱོལ་ནང་གི་བོད་མི་གློག་བརྙན་བཟོ་སྐྲུན་པ་ཚོར་མ་དངུལ་ཧིན་སྒོར་འབུམ་གསུམ་རེ་གནང་རྒྱུའི་ཡོངས་བསྒྲགས་གནང་ཡོད་པ་རེད། དེ་རིང་སྔ་དྲོ་དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོགས་བློ་བཟང་སེང་གེ་མཆོག་དང། བོད་མིའི་སྒྲིག་འཛུགས་ཀྱི་ཕྱི་འབྲེལ་དང་དྲིལ་བསྒྲགས་དྲུང་ཆེ་རྣམ་གཉིས་ལྷན་འཛོམས་ཐོག་ཕྱི་དྲིལ་བོད་ཀྱི་བརྙན་འཕྲིན་ཚན་པས་ཕྱི་ལོ་ ༢༠༡༧ ལོའི་གློག་བརྙན་མ་དངུལ་ཐོབ་མཁན་མིང་གཞུང་ཡོངས་བསྒྲགས་ཀྱི་གསར་འགོད་ལྷན་ཚོགས་བསྐོང་ཚོགས་གནང་བ་དང་འབྲེལ། སྒྱུ་རྩལ་དང་གློག་བརྙན་བརྒྱུད་ནས་བོད་ཕྱི་ནང་གཉིས་སུ་སྙོབ་ཐུབ་པ་གནང་རྒྱུ་དེ་ཆེས་གནད་ཆེ་ཆགས་ཡོད་པ་གསུངས་སོང། སྤྱིར་ཧིན་སྒོར་འབུམ་གསུམ་གྱི་མ་དངུལ་ཞུ་མཁན་ཚོའི་ངོས་ནས་བཟོ་སྐྲུན་བྱེད་དགོས་པའི་གློག་བརྙན་བརྗོད་ཁག་ནི། བཙན་བྱོལ་ནང་གི་མང་གཙོ། བོད་གཞིས་བྱེས་གཉིས་ཀྱི་མཐོུང་གི་མངོན་འདོད། དེ་བཞིན་ཕོ་མོ་འདྲ་མཉམ་དང་བེུད་ནུས་སྟོབས་གོང་སྤེལ་བཅས་གང་རུང་ཐོག་བཟོ་དགོས་ཀྱི་ཡོད་པ་དང། ཐོག་མར་ལས་འཆར་དེའི་ནང་དུ་ཞུ་སྙན་ཕུལ་མཁན་གྱི་མི་འགྲོ་ ༡༢ བྱུང་འདུག་པ་དང་། དེ་ནས་དངོས་གཞིའི་ཟབ་སྦྱོང་དང་འདེམས་སྒྲུག་འགྲན་རྩོད་ནང་དུ་ཞུགས་མཁན་མི་འགྲོ་ ༩ ཡོད་པའི་ཁྲོད་ནས་མཐར་འདེམས་སྒྲུག་བརྒྱུད་ནས་ཐེངས་འདིའི་མ་དངུལ་འབུམ་གསུམ་རེ་ཐོབ་མཁན་བོད་མི་གློག་བརྙན་བཟོ་སྐྲུན་པ་གསུམ་གྱི་མིང་གཞུང་ཡོངས་བསྒྲགས་གནང་ཡོད་པ་རེད། དེའང་ཕོ་མོ་འདྲ་མཉམ་དང་བེུད་ནུས་སྟོབས་གོང་སྤེལ་ཐོག་གློག་བརྙན་བཟོ་མཁན་ཐུབ་བསྟན་བསོད་ནམས་རྡོ་རྗེ་དང། བཙན་བྱོལ་ནང་གི་མང་གཙོ་བརྗོད་གཞིའི་ཐོག་གློག་བརྙན་བཟོ་མཁན་སྐལ་བཟང་འཇིགས་མེད། དེ་བཞིན་བོད་གཞིས་བྱེས་གཉིས་ཀྱི་མཐོུང་གི་མངོན་འདོད་ཞེས་པའི་བརྗོད་གཞིའི་ཐོག་གློག་བརྙན་བཟོ་མཁན་འཇམ་དཔལ་ཤེས་རབ་བཅས་ཡིན་པ་རེད། རྩ་བའི་ཐེངས་འདིའི་གློག་བརྙན་དེ་དབྱིན་བོད་སྐད་ཡིག་གང་རུང་ཐོག་བཟོ་དགོས་པ་དང་འདི་བཞིན་དུས་ཡུན་སྐར་མ་བཅུ་ལས་མ་མང་བ་ཞིག་དགོས་ཀྱི་ཡོད་པ་རེད། མ་དངུལ་ཐོབ་མཁན་རྣམས་ནས་ལོ་རྗེས་མའི་ཕྱི་ཟླ་ ༢ ཚེས་ ༢༠ ཉིན་བཟོ་སྐྲུན་བྱས་པའི་གློག་བརྙན་དེ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་ཀྱི་བརྙན་འཕྲིན་ཚན་པར་དབུལ་དགོས་ཀྱི་ཡོད་པ་རེད།

ཨ་རིའི་གྲོང་ཁྱེར་ནིའུ་ཡོག་ནང་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཉེ་ཆར་ཕྱི་ཚེས་ ༢༢ ཉིན་རྒྱ་ནག་གཞུང་གི་ལྟ་སྲུང་ལས་གཞི་དང་འབྲེལ་བའི་སྙན་ཐོ་ཞིག་འདོན་སྤེལ་གནང་འདུག་པ་དང་། དེའི་ནང་ལ་གཙོ་བོ་རྒྱ་ནག་གཞུང་ནས་ལྟ་སྲུང་ལས་གཞི་རྒྱ་སྐྱེད་གཏང་ཆེད་ཕྱི་ལོ་ ༢༠༡༢ ལོ་ནས་བཟུང་དེང་དུས་ཀྱི་འཕྲུལ་ཆས་རིགས་སྤྱོད་པའི་བརྒྱུད Voice Biometric Database ཞེས་མང་ཚོགས་ཀྱི་སྒྲ་སྐད་གསོག་འཇོག་བྱེད་སའི་སྒྲ་མཛོད་ཁང་གསར་རྒྱག་བྱེད་བཞིན་པ་མངོན་གསལ་གནང་འདུག དེ་ཡང་རྒྱ་ནག་གཞུང་ནས་ཁུལ་དེར་རྟེན་གཞི་བྱས་པའི་སྒྲའི་འཕྲུལ་ཆས་བཟོ་ལས་ཁང་ iFlytek ཞེས་པ་དང་འབྲེལ་བ་བྱེད་ཐོག་ཁ་པར་གཙོས་པའི་དེང་དུས་སྤྱི་ཚོགས་ཀྱི་འབྲེལ་མཐུད་སྐད་ཕྲིན་ Wechat སོགས་ཀྱི་ཐོག་གླེང་སློང་གནང་པའི་མང་ཚོགས་ཀྱི་སྒྲ་སྐད་རྣམས་བསྡུ་རུབ་བྱ་རྒྱུ་དང་། ལྷག་པར་དུ་རྒྱ་གཞུང་གི་དོགས་གཞི་དང་དམིགས་ཚད་ངེས་ཅན་ཡོད་པའི་གཞི་རིམ་མང་ཚོགས་རྣམས་ཀྱི་སྒྲ་སྐད་ཆེད་བསྡུ་སླད་སྒྲ་མཛོད་ཁང་གསར་རྒྱག་བྱེད་མུས་ཡིན་པ་དང་། དེང་དུས་འཕྲུལ་ཆས་ཀྱི་གོང་འཕེལ་དང་འབྲེལ་མུ་མཐུད་ཡར་རྒྱས་གཏོང་བཞིན་ཡོད་པ་བཀོད་འདུག ལྷག་པར་དུ་སྙན་ཐོ་དེའི་ནང་དུ་རྒྱ་ནག་གཞུང་ནས་མིའི་སྒྲ་སྐད་གསོག་འཇོག་བྱ་རྒྱུའི་འཕྲུལ་ཆས་རིགས་བེད་སྤྱོད་བྱེད་བཞིན་པ་དེ་ནི་དེ་སྔ་ནས་ཡོད་བཞིན་པའི་ལྟ་སྲུང་གི་ལས་གཞིའི་ཁྲོད་ལས་གཞི་གསར་ཤོས་ཤིག་ཡིན་ཀྱང་། རྒྱ་ནག་སྤྱི་བདེ་ལས་ཁུངས་ནས་ལས་གཞི་དེ་ཐོག་མར་ཕྱི་ལོ་ ༢༠༡༢ ལོར་འགོ་འཛུགས་བྱས་པ་ནས་བཟུང་ཕྱི་ལོ་ ༢༠༡༥ ནང་ཚུད་ལ་མང་ཚོགས་ཀྱི་སྒྲ་སྐད་མི་འདྲ་བ་སྟོང་ཕྲག་བདུན་ཅུ་ལྷག་གསོག་སྒྲུབ་བྱས་ཡོད་པ་མ་ཟད། ཕྱི་ལོ་ ༢༠༡༦ ལོར་རྒྱ་ནག་གཞུང་གི་ལས་གཞི་དེ་རྒྱ་ནག་ཁྱོན་ཡོངས་ཙམ་མིན་པར་ཚོར་བ་རྣོ་བའི་ཤིན་ཅང་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་རྒྱ་སྐྱེད་བཏང་སྟེ། མང་ཚོགས་ཀྱི་སྒྲ་སྐད་བསྡུ་རུབ་བྱ་རྒྱུའི་འཕྲུལ་རིགས་ཆེད་འཛུགས་བྱེད་བཞིན་ཡོད་པ་འགྲེལ་བརྗོད་གནང་འདུག དེ་སྔོན་མང་ཚོགས་སྒེར་གྱི་གསང་བའི་གནས་ཚུལ་བསྡུ་རུབ་ཆེད་དུ་ DNA བརྟག་དཔྱད་ཡོ་བྱད་འཕྲུལ་རིགས་དང་། Lie Detection test ཞེས་འདྲི་རྩད་སོགས་བྱེད་བདེ་ཡོང་བར་འཕྲུལ་ཆས་གསར་རྒྱག་དང་རིམ་པས་རྒྱ་སྐྱེད་བཏང་སྟེ་རྒྱ་ནག་རྒྱལ་ཁབ་ཀྱི་བདེ་འཇགས་དང་འཇིགས་སྐུལ་རིང་ལུགས་པའི་བྱ་སྤྱོད་འགོག་ཐབས་སོགས་ལ་དམིགས་པ་ཡིན་ཞེས་འགྲེལ་བརྗོད་བྱས་ཡོད་པ་རེད། འོན་ཀྱང་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་སྐུ་ Sophie Richardson ལགས་ཀྱིས་ད་ལྟའི་ཆར་རྒྱ་ནག་ནང་ལ་མང་ཚོགས་སྒེར་གྱི་གནས་ཚུལ་གསང་རྒྱུའི་རང་དབང་མེད་པ་དང་། ཁྲིམས་ཐོག་ནས་སྲུང་སྐྱོབ་གང་ཡང་མེད་པའི་དུས་སྐབས་འདིར་རྒྱ་ནག་གཞུང་ནས་མུ་མཐུད་རྒྱལ་ཁབ་ཀྱི་བདེ་འཇགས་སོགས་ལ་ཁ་གཡར་ཏེ། མང་ཚོགས་སྒེར་གྱི་གསང་བའི་གནས་ཚུལ་བསྡུ་རུབ་བྱེད་དེ་གསང་ལྟ་ལས་གཞི་རྒྱ་སྐྱེད་གཏོང་བཞིན་པ་དེ་ནི་སེམས་འཚབ་དང་ཚོར་བ་རྣོ་བའི་གནས་སྟངས་ཤིག་ཡིན་སྟབས་ལས་གཞི་དེ་ངེས་པར་དུ་མཚམས་འཇོག་བྱེད་དགོས་པ་གསུངས་འདུག གཞི་རྩའི་རྒྱ་ནག་གཞུང་ནས་རྒྱ་ནག་སྤྱི་དང་ཆབ་སྲིད་ཀྱི་ཚོར་བ་རྣོ་བའི་བོད་དང་ཤིན་ཅང་ས་ཁུལ་གྱི་མང་ཚོགས་རྣམས་ཀྱི་ལས་དོན་སྤྱི་ལ་ཚོད་འཛིན་དམ་དྲག་ཐུབ་ཐབས་སོགས་ལ་དམིགས་ཏེ། ས་གནས་མི་མང་རྣམས་ཕྱིར་བསྐྱོད་སོགས་བྱེད་སྐབས་རང་ཉིད་ཀྱི་མིང་དང་སྐྱེས་ལོ་སྐྱེས་ཚེས་ཙམ་མ་ཟད། རྫུབ་ཐེལ་དང་རིགས་རྒྱུད། དེ་བཞིན་ཁྲག་གི་དབྱེ་བ་གང་ཡིན་སོགས་ཚང་མ་ས་གནས་རྒྱ་གཞུང་ལས་ཁུངས་སུ་ཐོ་འགོད་བྱེད་དགོས་པའི་དམ་དྲག་ཅན་གྱི་ལམ་ལུགས་མང་དག་གསར་སྣོན་བྱེད་བཞིན་ཡོད་པ་དང་། དེང་དུས་ཀྱི་འཕྲུལ་ཆས་བརྒྱུད་ DNA ཞེས་མིའི་རིགས་རྒྱུད་བརྟག་དཔྱད་བྱེད་རྒྱུ་དང་། Voice Biometric Database ཞེས་མིའི་སྒྲ་སྐད་གསོག་སྒྲུབ་བྱེད་ཐོག་མང་ཚོགས་སྒེར་པ་ཚོའི་གསང་གནས་ཤེས་རྟོགས་ཡོང་ཐབས་སུ་ལྟ་སྲུང་གི་ལས་གཞི་རྒྱ་ཆེ་སྤེལ་བཞིན་ཡོད་པ་རེད།

ཉན་པ།: Listen ཕབ་ལེན། Download བོད་ཀྱི་སྲིད་བྱུས་ཉམས་ཞིབ་ཁང་དང་མ་ཌ་རས་ནང་གི་རྒྱ་ནག་ཉམས་ཞིབ་པའི་དབར་འབྲེལ་བ་དམ་གཟབ་ཏུ་གཏང་རྒྱུ། རྒྱ་གཞུང་གིས་ཁྲི་འདུ་རྫོང་ནས་བོད་མི་ཁག་ཅིག་འཛིན་བཟུང་བཀག་ཉར་བྱས་འདུག ཨ་རིའི་གྲོས་ཚོགས་འཐུས་མི་གཉིས་ནས་ཀུ་ཤུ་རྟགས་ཅན་བཟོ་ལས་ཁང་ནས་VPNབཀག་རྒྱུ་མེད་པའི་འབོད་སྐུལ་ཞུསའདུག རྒྱ་ནག་ནང་གི་སློབ་གྲྭའི་སློབ་ཚན་ཁོངས་ཞི་ཅིང་ཕིང་གི་ཆབ་སྲིད་ལྟ་གྲུབ་ཅེས་པ་འཇོག་རྒྱུ། བོད་ཀྱི་མཛངས་པའི་འགྲན་བསྡུར་ནང་རྒྱལ་ཁ་ཐོབ་མཁན་དེ་རྒྱལ་སྤྱིའི་འགྲན་བསྡུར་ནང་མཉམ་ཞུགས་ཐུབ་ཐབས་གནང་གི་ཡིན་གསུངས་སོང་། སློབ་དཔོན་ཟམ་གདོང་རིན་པོ་ཆེ་མཆོག་གིས་འབྲས་སྤུངས་སུ་ཆོས་འབྲེལ་གནང་བཞིན་པ། Tuesday 24/10/2017 TPI signs memorandum of understanding with Chennai Center for China Studies US Senators demand answer from Apple over removal of VPN apps Xi Jinping’s political ideology to be taught in Chinese schools Fiver contestants for Mr. Tibet meet the press Samdhong Rinpoch’s teaching underway at Drepung Monastery, South India

དེ་རིང་ཕྱི་ཟླ་ ༡༠ ཕྱི་ཚེས་ ༢༣ ཉིན་མོ་འདི་ནི་ཕྱི་ལོ་ ༡༩༦༠ ལོར་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཤེས་ཡོན་གྱི་ལྟེ་གནས་ཆེ་གྲས་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་མི་ལོ་ ༥༧ འཁོར་བའི་དུས་ཚིགས་དང་བསྟུན། དེ་རིང་སྔ་ཐོག་ཚོུད་ ༩།༠༠ སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེན་མཆོག་གིས་གཙོས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་བཞུགས་སྒར་ཉེ་འཁོར་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། རྡ་སྟེང་བོད་ཁྱིམ་གཙོས་པའི་ཉེ་འཁོར་ཡན་ལག་བོད་ཁྱིམ་སློབ་གྲྭ་ཁག་གི་འགན་འཛིན་དང་སློབ་སྤྱི། གཞན་ཡང་སློབ་ཕྲུག་དང་ས་གནས་མང་ཚོགས་བཅས་ལྷན་འཛོམས་ཐོག་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༥༧ འཁོར་བའི་དུས་དྲན་སྲུང་བརྩི་ཞུས་གནང་སོང་། དུས་དྲན་གྱི་མཛད་སྒོའི་ཐོག་མར་རྡ་སྟེང་བོད་ཁྱིམ་སློབ་གྲྭའི་མཉའ་ཁྲི་དང་སྲོང་བཙན། ཁྲི་སྲོང་དང་ཁྲི་རལ་བཅས་ཁང་ཚན་བཞིའི་སློབ་མ་རྣམས་ནས་རྔ་རོལ་དང་བཅས་རུ་སྒྲིག་བཏང་ཟིན་མ་ཐག བོད་ཕྲུག་ཁྱིམ་སྡེའི་སྤྱི་ཁྱི་ཁྱབ་དབུ་འཛིན་ཐུབ་བསྟན་རྡོ་རྗེ་ལགས་ནས་རྡ་སྟེང་བོད་ཁྱིམ་སློབ་གྲྭ་ཐོག་མར་གསར་འཛུགས་གནང་དགོས་པའི་དམིགས་ཡུལ་དང་བྱུང་རབས་ངོ་སྤྲོད་གནང་པ་དང་སྦྲགས། བོད་ཕྲུག་ཁྱིམ་སྡེའི་སློབ་གྲྭ་སྤྱི་ཡོངས་ཀྱི་ནང་ལ་བོད་ཀྱི་སྐད་ཡིག་གཙོས་པའི་རིགས་རམ། ལྷག་པར་དུ་༸གོང་ས་སྐྱབས་མགོན་ཆེན་པོ་མཆོག་གི་དགོངས་གཞི་གཙོ་གྲས་ཆོས་ལུགས་ལ་མ་བརྟེན་པའི་བཟང་སྤྱོད་ཐོག་སློབ་འཁྲིད་བྱེད་བཞིན་ཡོད་པ། དེ་བཞིན་ལོ་སྔོན་མའི་ནང་བོད་ཁྱིམ་སྤྱི་ཡོངས་ཀྱི་ཡིག་རྒྱུགས་གྲུབ་འབྲས་དང་འཕྲོད་བསྟེན་ཀྱི་ལས་གཞི་སྤེལ་བ་སོགས་ལོ་འཁོར་ལས་བསྡོམས་སྙན་སྒྲོན་ཞུས་གནང་ཡོད། གཞི་རྩའི་འདི་ལོ་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༥༧ འཁོར་བའི་དུས་དྲན་སྲུང་བརྩིའི་བརྗོད་གཞི་གཙོ་བོ་ནི། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཆོས་ལུགས་ལ་མ་བརྟེན་པའི་བཟང་སྤྱོད་གཙོ་བཟུང་ཐོག་དགེ་ལས་སློབ་ཕྲུག་དང་མང་ཚོགས་རྣམས་ལ་དེ་འབྲེལ་གོ་རྟོགས་སྤེལ་ཐབས་གནང་གི་ཡོད་དང་། སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གི་དགོངས་གཞི་གཙོ་བཟུང་ཐོག་ཕྱག་ལས་གནང་ཐུབ་པ་དེ་ནི་དུས་ཀྱི་དགོས་མཁོ་དང་འཚམས་པ་ཞིག་རེད་ཅེས་བསྔགས་བརྗོ་གནང་སོང་བ་དང་། བོད་པའི་སྤྱི་ཚོགས་ནང་འོས་བསྡུའི་ལས་རིམ་སོགས་རྐྱེན་པས་སྤྱི་ཚོགས་ནང་ཆོལ་ཁའི་འཐེན་འཁྱེར་རིགས་བྱུང་ཡོད་པ་མ་ཟད། ད་ཆ་སློབ་གྲྭའི་དགེ་ལས་རེ་ཟུང་ནས་ཆབ་སྲིད་འཁྲབ་སྟེ་སློབ་ཕྲུག་ནང་ལ་བརྡབ་གསིལ་བཏང་པའི་རྣམ་པ་མངོན་རྒྱུ་ཡོད་སྐོར་སོགས་འགྲེལ་བརྗོད་དང་སྦྲགས། མང་ཚོགས་རྣམས་ནས་སྤྱི་ཚོགས་ཡོངས་ཀྱི་ཁྲོད་དུ་ཆོལ་ཁའི་འཐེན་འཁྱེར་རིགས་གནང་རྒྱུ་མེད་པ་དང་། ལྷག་པར་དུ་སློབ་གྲྭའི་ནང་དེ་ལྟར་གནང་ཚེ་རིམ་བཞིན་སློབ་གྲྭ་དེ་ཆབ་སྲིད་ཀྱི་སྡིངས་ཆ་ཞིག་ཆགས་ངེས་ཡིན་པའི་ལམ་སྟོན་གནང་ཡོད། དེ་རྗེས་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེན་མཆོག་ནས་ད་བར་བོད་ཁྱིམ་གྱི་ལས་དོན་སྤྱི་ཡོངས་ལ་བསྔགས་བརྗོད་དང་སྦྲགས། བོད་ནང་རྒྱ་གཞུང་གིས་དབང་བསྒྱུར་དང་བཙན་དབང་བྱས་པར་ལྟོས་མེད་ཀྱིས་གཞིས་ལུས་རྒྱ་ཆེ་མང་ཚོགས་ནས་བོད་མི་རིགས་ཀྱི་སྐད་ཡིག་ལ་དོ་སྣང་དང་སྦྱང་བརྩོན་ཆེན་པོ་གནང་བཞིན་པའི་སྐབས་འདིར་བཙན་བྱོལ་རང་དབང་ལུང་པའི་ནང་ཡོད་པའི་བོད་རིགས་ཚོས་བོད་མི་རིགས་ཀྱི་རིག་གཞང་སྤྱི་དང་སྒོས་སུ་སྐད་ཡིག་ཐོག་འབད་བརྩོན་རྒྱ་གང་ཆེ་གནང་དགོས་གལ་ཡིན་པ་གསུངས་སོང་། རྩ་བའི་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༥༧ འཁོར་བའི་དུས་དྲན་སྲུང་བརྩི་སྐབས་སུ་རྡ་སྟེང་བོད་ཁྱིམ་སློབ་གྲྭའི་སློབ་ཟུར་ཁག་ཅིག་མཉམ་འཛོམས་གནང་སྲོལ་ཡོད་པ་ལྟར། འདི་ལོ་ཕྱི་ལོ་ ༡༩༩༢ ལོར་བསླབ་པ་མཐར་སོན་པའི་སློབ་ཟུར་ ༣༠ ཙམ་ནས་ལྷན་ཞུགས་གནང་འདུག་པ་མ་ཟད། ཁོང་རྣམས་ནས་བཀའ་དྲིན་རྗེས་དྲན་དང་འབྲེལ་ཏེ་སློབ་གྲྭའི་ལས་དོན་སླད་ཧིན་སྒོར་འབུམ་བདུན་ལྷག་ཞལ་འདེབས་ཕུལ་འདུག དེ་བཞིན་བོད་ཕྲུག་ཁྱིམ་སྡེའི་ནང་ཞབས་སྤྱི་ཞུས་ཏེ་ཞབས་ལོ་ཧྲི་པོ་ ༢༠ འཁོར་བའི་ལས་བྱེད་ ༣༢ ལ་གཟེངས་བསྟོད་ཕྱག་འཁྱེར་དང་། རྡ་སྟེང་བོད་ཁྱིམ་སློབ་གྲྭའི་བུམ་སྐྱོན་གསུམ་དང་བྲལ་བའི་བུ་དང་བུ་མོའི་སློབ་མ་རྩེ་ཕུད་གཉིས་དང་། ཕྱི་ལོ་ ༢༠༡༧ ལོའི་རྒྱ་གར་རྒྱལ་ཡོངས་འཛིན་རིམ་ ༡༢ ཁྲོད་བརྒྱ་ཆ་ ༩༠ ཡན་སོན་པའི་སློབ་མ་བཅས་ལ་དམིགས་བསལ་གཟེངས་རྟགས་གནང་ཡོད་པ་མ་ཟད། ཉིན་རྒྱབ་ཏུ་མུ་མཐུད་ཉེ་འཁོར་བོད་ཁྱིམ་སློབ་གྲྭ་ཁག་ནས་མང་ཚོགས་རྣམས་ལ་གཞས་སྣ་ཁག་གཟིགས་འབུལ་ཞུ་གྱི་ཡོད་པ་རེད། སང་ཉིན་རྡ་སྟེང་བོད་ཁྱིམ་སློབ་གྲྭའི་ཁང་ཚན་བཞིའི་དབར་རྒྱུག་མཆོང་འཕེན་གསུམ་གྱི་རྩེད་རིགས་འགྲན་བསྡུར་གནང་གི་ཡོད་པ་རེད།

ཁ་སང་ཕྱི་ཚེས་ ༢༢ ཉིན་ཉི་ཧོང་གི་འོས་བསྡུ་ཆེན་མོའི་ནང་དུ་ད་ལྟའི་ཉི་ཧོང་གི་སྲིད་འཛིན་ལས་ཐོག་སྐུ་ཞབས་ Shinzo Abe མཆོག་དང་ཁོང་གི་སྣེ་ཁྲིད་པའི་ LDP འམ་གུ་ཡངས་མང་གཙོ་ཚོགས་པར་ཚད་མཐོའི་རྒྱལ་ཁ་ཐོབ་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་རྣམ་གཉིས་ཀྱིས་དགའ་བསུའི་འཚམས་འདྲི་གནང་འདུག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་སྐུ་ཞབས་ Shinzo Abe མཆོག་ལ་སླར་འོས་བསྡུའི་རྒྱལ་ཁ་ཐོབ་པར་དགའ་བསུའི་འཚམས་འདྲི་དང་འབྲེལ་སྲིད་འཛིན་ཁོང་ནས་ཉི་ཧོང་མི་མང་གི་རེ་བ་དང་ཡིད་ཆེས་གནང་དོན་ལྟར་ལས་དོན་གནང་རྒྱུར་ཡིད་ཆེས་བརྟན་པོ་ཡོད་པ་བཀའ་བསྩལ་འདུག ༸གོང་ས་མཆོག་གིས་འཛམ་གླིང་ས་ཕྱོགས་གང་སར་ཟིང་ཆ་ཆེ་བའི་དུས་སྐབས་འདིར་གྲོས་མོལ་དང་ཐབས་བྱུས་ཀྱི་ཐོག་ནས་དཀའ་རྙོག་སེལ་རྒྱུའི་ཐད་ཤུགས་སྣོན་འཕར་མ་རྒྱག་རྒྱུ་ཧ་ཅང་གི་གནད་ཆེ་ཡིན་པ་དང། འདི་ལོ་ ICAN ཞེས་པའི་རྒྱལ་སྤྱིའི་ཁྲོད་རྡུལ་འཕྲན་མཚོན་ཆ་མེད་པ་བཟོ་རྒྱུའི་ཐད་ཕྱག་ལས་གནང་མཁན་གྱི་ཚོགས་པར་ནོ་སྦེལ་ཞི་བདེའི་གཟེངས་རྟགས་ཐོབ་པ་དེ་ནས་མཚོན་ཆ་དེ་དག་གིས་འགྲོ་བ་མིའི་རིགས་ལ་ཉེན་ཁ་ཆེན་པོ་ཇི་ཙམ་ཆགས་ཀྱི་ཡོད་པ་མངོན་གསལ་ཆགས་ཡོད་སྐོར་བཀའ་གནང་བ་དང་འབྲེལ། ༢༠༡༥ ལོར་དེ་སྔོན་དམག་ཆེན་གཉིས་པའི་སྐབས་ཉི་ཧོང་གི་གྲོང་ཁྱེར་ Hiroshima ཐོག་རྡུལ་འཕྲན་འབར་རྫས་གཡུག་ནས་ལོ་ ༧༠ ཁོར་བའི་ཉིན་མོ་རྗེས་དྲན་གྱི་མཛད་སྒོར་སྲིད་འཛིན་ Abe མཆོག་ནས་འཛམ་གླིང་ཁྱོན་ཡོངས་སུ་རྡུལ་འཕྲན་གོ་མཚོན་བཀག་སྡོམ་གནང་རྒྱུའི་གསུང་བཤད་གནང་པ་དེས་བཟང་ཕྱོགས་ཐོག་གོམ་པ་མདུན་སྤོ་བྱེད་པ་ལྟ་བུ་མཚོན་གྱི་ཡོད་པ་རེད་ཅེས་བ་ཀའ་སྩལ་བ་དང་ཆབས་ཅིག རྡུལ་འཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་ཕྱིར་ཕྱག་ལས་དེ་ལས་ལྷག་པ་གནང་རྒྱུར་རེ་བ་ཆེན་པོ་ཡོད་ཅེས་བཀའ་ནན་བསྩལ་འདུག དེ་དེ་བཞིན་༸གོང་ས་མཆོག་གིས་དེང་སྐབས་རྒྱ་གར་དང་ཉི་ཧོང་གཉིས་དབར་འབྲེལ་བ་དམ་ཟབ་འགྲོ་བ་བཞིན་པར་ཐུགས་བློ་ཚིམ་པོ་བྱུང་ཡོད་པ་བཀའ་གནང་བ་དང་འབྲེལ། ༸གང་ཉིད་མཆོག་ལ་དུས་ནས་དུས་སུ་ཉི་ཧོང་ནང་དུ་ཆིབས་བསྒྱུར་གནང་པའི་ཁྲོད། ཉི་ཧོང་གི་མང་ཚོགས་ནས་མགོན་པོ་མཆོག་གིས་གསུངས་པའི་མིའི་རིན་ཐང་དང་ཆོས་ལུགས་མཐུན་སྒྲིལ་གོང་འཕེལ་གཏང་རྒྱུར་རྒྱབ་སྐྱོར་དང་དོ་སྣང་གནང་བར་ཡི་རང་བསྔགས་བརྗོད་ཡོད་པ་བཀའ་བསྩལ་འདུག དེ་མཚུངས་སུ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་སྐུ་ཞབས་ Shinzo Abe མཆོག་ལ་འོས་བསྡུའི་རྒྱལ་ཁ་ཐོབ་པར་འཚམས་འདྲིའི་ཕྱག་བྲིས་ཤིག་གནང་འདུག་པ་དང། དེའི་ནང་སྲིད་སྐྱོང་མཆོག་གིས་ད་བར་ཉི་ཧོང་གཞུང་མང་གཉིས་ནས་བོད་མིའི་མང་གཙོ་དང་འཚེ་མེད་ཞི་བའི་ཐབས་རྩོད་ལ་རྒྱབ་སྐྱོར་དང་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ཉི་ཧོང་ནང་དུ་ཕེབས་མཁན་བཙན་བྱོལ་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་དང་། ཉེ་སྔོན་སྲིད་སྐྱོང་མཆོག་ཡུལ་དེར་གཞུང་འབྲེལ་ཕྱོགས་བསྐྱོད་གནང་སྐབས་ཕེབས་བསུ་སྣེ་ལེན་གཟབ་རྒྱས་ཞུས་པར་བཀའ་དྲིན་ཆེ་ཞུ་དང་སྦྲགས། སྲིད་སྐྱོང་མཆོག་གིས་བོད་མི་ཡོངས་ཀྱི་ཚབ་ཞུས་ཏེ་སྐུ་ཞབས་ Shinzo Abe མཆོག་དང་ཁོང་གི་སྣེ་ཁྲིད་པའི་གུ་ཡངས་མང་གཙོ་ཚོགས་པར་འོས་བསྡུའི་ཁྲོད་ཚད་མཐོའི་རྒྱལ་ཁ་ཐོབ་པར་དགའ་བསུའི་མཚམས་འདྲི་དང་ལས་དོན་མཐའ་དག་ལམ་ལྷོངས་ཡོད་བར་ཡིད་སྨོན་ཞུས་འདུག སྲིད་འཛིན་ཁོང་ནས་བོད་མིའི་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་ཀྱི་གནད་དོན་སེལ་བར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཡང་གནང་འདུག རྩ་བའི་སྲིད་སྐྱོང་མཆོག་དེ་སྔོན་ཕྱི་ལོ་ ༢༠༡༢ ལོར་ཉི་ཧོང་ནང་གཞུང་འབྲེལ་ཕྱོགས་བསྐྱོད་ཁྲོད་སྐུ་ཞབས་ Abe མཆོག་དང་ལྷན་མཇལ་བྱུང་སྐབས་ཁོང་གིས་བོད་ཀྱི་གནད་དོན་དེ་ཉི་ཧོང་ནང་དུ་ཆབ་སྲིད་ཚོགས་པ་ཐུན་མོང་ནས་རྒྱབ་སྐྱོར་ཡོད་པའི་གནད་དོན་འགའ་ཤས་ལས་མེད་པའི་ཁོངས་ནས་གཅིག་ཡིན་པ་དང། ཁོང་རང་ཉིད་ཀྱི་ངོས་ནས་བོད་ཀྱི་གནས་སྟངས་ཡར་རྒྱས་འགྲོ་ཆེད་གང་ཐུབ་གནང་རྒྱུ་ཡིན་སྐོར་གསུངས་པ་མ་ཟད། ལོ་དེའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེར་ཆིབས་བསྒྱུར་མཛད་སྐབས་སུའང་སྐུ་ཞབས་ཨ་བྷེ་མཆོག་གིས་བོད་དོན་རྒྱབ་སྐྱོར་གནང་རྒྱུར་ཞལ་བཞེས་གནང་སྐོར་མངོན་གསལ་གནང་འདུག ཐེངས་འདིའི་ཉེ་ཧོང་གི་འོས་བསྡུ་ཆེན་མོའི་ནང་དུ་སྐུ་ཞབས་ Shinzo Abe མཆོག་གི་སྣེ་ཁྲིད་པའི་ Liberal Democratic Party འམ་གུ་ཡངས་མང་གཙོ་ཚོགས་པ་དང། Komeito ཞེས་པའི་མཉམ་འབྲེལ་ཚོགས་པ་གཉིས་ལ་གྲོས་ཚོགས་འོག་མའི་ནང་དུ་ཁྱོན་ཞབས་སྟེགས་ ༤༦༥ ཡོད་པ་ལས་ཞབས་སྟེགས་ ༢༡༣ ཐོབ་པ་དང་སྦྲགས་ནས་ཚད་མཐོའི་རྒྱལ་ཁ་ཐོབ་ཡོད་པ་རེད། དེའང་ཉེ་སྔོན་རྙོག་གླེང་དུ་མའི་ནང་ཚུད་པའི་སྲིད་འཛིན་ལས་ཐོག་ Shinzo Abe མཆོག་གིས་ཁྱད་པར་ཅན་གྱི་རྒྱལ་ཁ་ཞིག་ཏུ་ངོས་འཛིན་གནང་བཞིན་ཡོད་པ་རེད་འདུག དཔྱད་ཞིབ་པ་རྣམས་ཀྱིས་གསུངས་པར་དེང་སྐབས་ཉི་ཧོང་གི་ཁྱིམ་མཚེས་རྒྱལ་ཁབ་བྱང་ཀོ་རི་ཡའི་དམག་དོན་ལས་གཞི་སྣ་མང་ཞིག་སྤེལ་བཞིན་པའི་ཉེན་ཁ་དང་འབྲེལ། ད་རེས་སྐུ་ཞབས་ཨ་བྷེ་མཆོག་སླར་གཞུང་འཛིན་པར་བསྐོ་གཞག་བྱུང་རྗེས་འགྱུར་བ་ཆེ་ཤོས་ཤིག་ནི་ཁོང་གིས་ཡུན་རིང་ནས་རྩོད་བཞིན་པའི་དམག་ཆེན་གཉིས་པའི་རྗེས་ཀྱི་ཉི་ཧོང་གི་རྩ་ཁྲིམས་དོན་ཚན་ ༩ པ་སྟེ། རྒྱལ་སྤྱིའི་དཀའ་རྙོག་སེལ་ཆེད་མཚོན་ཆ་དང་དྲག་སྤྱོད་ཀྱི་ཐབས་བྱུས་བེད་སྤྱོད་བྱེད་རྒྱུ་མེད་པ་དེ་ལ་བསྒྱུར་བཅོས་གཏང་ངེས་ཡིན་པ་གསུང་མཁན་འདུག ཐེངས་འདིའི་འོས་བསྡུའི་རྒྱལ་ཁ་དང་བསྟུན་གལ་སྟེ་སྐུ་ཞབས་ Shinzo Abe ཁོང་གི་ལས་ཡུན་ཆ་ཚང་རིང་བཞུགས་ཚེ་ཉི་ཧོང་གི་ལོ་རྒྱུས་ནང་སྲིད་འཛིན་ལོ་ཡུན་རིང་ཤོས་གནང་མཁན་དེ་ཆགས་ཀྱི་ཡོད་པ་རེད།

ཉན་པ།: Listen ཕབ་ལེན། Download ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་དགོངས་གཞི་གཙོ་བཟུང་ཐོག་རྡ་སྟེང་བོད་ཁྱིམ་དབུ་བརྙེས་པའི་ཉིན་མོ་སྲུང་བརྩི་ཞུས་སོང་། རྒྱ་གཞུང་གི་འགོ་ཁྲིད་རྒན་གྲས་ཤིག་གིས་ཏཱ་ལའི་བླ་མ་དང་མཇལ་འཕྲད་ཀྱི་གནད་དོན་ལ་གསལ་བཤད་འགྲོ་ས་མེད་བཤད་འདུག ༸གོང་ས་མཆོག་དང་སྲིད་སྐྱོང་མཆོག་ནས་ཤིན་ཇོ་ཨ་བེ་མཆོག་ལ་འཚམས་འདྲི་གནང་འདུག རྒྱ་གར་ནང་གི་བོད་མི་རྣམས་ལ་ཕྱིར་ཐོན་ཡིག་ཆ་ཞུ་མི་དགོས་པ་བཟོ་འཆར། ཀརྨ་པ་རིན་པོ་ཆེ་མཆོག་གི་སྐོར་ལ་དཀྲོག་གཏམ་སྤེལ་བཞིན་པ་ལ་མང་ཚོགས་དབུ་མ་འཁོར་རོགས་གསུངས་འདུག ཤེས་པའི་རྣམ་གཞག་ཐོག་ལ་བགྲོ་གླེང་། Monday 23/10/2017 Dalai Lama congratulates Japan’s Shinzo Abe on re-election TCV marks 57th founding anniversary, highlights Secular Ethics as its theme this year India set to simplify travel rules for Tibetan refugees No excuses for foreign officials meeting Dalai Lama, Says China Karmapa’s office issues clarification on US stay, assures his return soon

རྒྱ་གར་ནང་དུ་ལག་དེབ་སེར་པོ་ཉར་མཁན་སྐྱབས་བཅོལ་བོད་མི་རྣམས་ལ་ཕྱིན་ཆད་ཕྱིའི་རྒྱལ་ཁབ་ནང་དུ་བསྐྱོད་སྐབས་ Exit Permit ཞེས་པའི་རྒྱ་གར་ནས་ཕྱིར་ཐོན་ཆོག་པའི་ཡིག་ཆ་འཕར་མ་དེ་ཞུ་མི་དགོས་པ་བཟོ་རྒྱུ་རེད་འདུག དེ་ཡང་དེ་རིང་ The Hindu གསར་ཁང་གིས་གནས་ཚུལ་སྤེལ་བར་ད་ལྟའི་ཆར་རྒྱ་གར་ནང་དུ་ཡོད་པའི་སྐྱབས་བཅོལ་བོད་མི་རྣམས་རྒྱལ་ཁབ་གཞན་དུ་བསྐྱོད་སྐབས་དོ་བདག་རྒྱལ་ཁབ་སོ་སོ་ནས་མཐོང་མཆན་ཞུས་པ་དང་སྦྲགས། རྒྱ་གར་ནས་ཕྱིར་ཐོན་ཆོག་པའི་ཡིག་ཆ་འཕར་མ་ཞིག་ཀྱང་ཞུས་དགོས་ཀྱི་ཡོད་པ་དེ་ལྟར་ཡང། རྒྱ་གར་གྱི་འབྲེལ་ཡོད་གཞུང་འབྲེལ་མི་སྣ་ཞིག་གིས་གསར་ཁང་དེར་འགྲེལ་བརྗོད་གནང་བར་གཞིགས་ན། བོད་མི་ཚོར་ཐོག་མར་ཕྱིར་སྐྱོད་ལག་འཁྱེར་རམ་ལག་དེབ་སེར་པོ་དེ་གནང་སྐབས་དོ་བདག་སོ་སོའི་རྒྱབ་ལྗོངས་ཆ་ཚང་རྟོག་ཞིབ་མཐིལ་ཕྱིན་གནང་རྗེས་གནང་པ་ཞིག་ཆགས་ཀྱི་ཡོད་སྟབས་ད་ཆ་ Exit Permit ཞེས་པ་དེ་ནི་དགོས་མེད་ཀྱི་ཆ་རྐྱེན་འཕར་མ་ཞིག་ཡིན་པ་དང། ད་ཆ་རྒྱ་གར་གཞུང་གི་ངོས་ནས་བོད་མི་ཚོར་དགོས་མེད་ཀྱི་ཡིག་ཆ་དེ་ཞུ་མི་དགོས་པ་བཟོ་འཆར་ཡོད་སྐོར་གསུངས་འདུག རྒྱ་གར་ནང་གནས་སྡོད་བོད་མི་རྣམས་ལ་ Identity Certificate འམ་རྒྱ་གར་གཞུང་གི་ངོ་སྤྲོད་ལག་དེབ་སེར་པོ་དེ་ཐོག་མར་བཟོ་སྐབས་ No Objection Certificate འམ་ཕྱིའི་རྒྱལ་ཁབ་ནང་དུ་བསྐྱོད་རྗེས་རྒྱ་གར་ལ་ཕྱིར་ལོག་བྱེད་པར་དགག་བྱ་མེད་པའི་དམ་ཕྲུག་ཞིག་གནང་གི་ཡོད་པ་ལྟར་བོད་མི་རྣམས་ལ་ཕྱིའི་རྒྱལ་ཁབ་ནང་དུ་བསྐྱོད་ཆེད་རྒྱ་གར་གཞུང་གི་ངོས་ནས་གནང་བའི་དམ་ཕྲུག་དེས་གོ་ཆོད་རྒྱུ་ཡིན་པ་གསུངས་འདུག ལས་བྱེད་པ་དེས་གསུངས་པར་རྒྱ་གར་ནང་སྲིད་ལས་ཁུངས་ཀྱི་ངོས་ནས་ Cabinet Committee on Security འམ་རྒྱ་གར་གྱི་བདེ་སྲུང་དང་འབྲེལ་བའི་འཛིན་སྐྱོང་ཚོགས་ཆུང་ནས་ངོས་ལེན་ཐོབ་རྗེས་རྒྱ་གར་ཕྱི་སྲིད་ལས་ཁུངས་ནས་ཕྱི་རྒྱལ་གཞུང་ཚབ་ཁང་ཆ་ཚང་ལ་ཕྱིན་ཆད་བོད་མི་རྣམས་ལ་ Exit Permit བཟོ་མི་དགོས་པའི་གྲུ་དོན་སྙན་གསེང་ཞུ་རྒྱུ་ཡིན་པ་གསུངས་འདུག འདི་ག་རླུང་འཕྲིན་ཁང་ནས་ཡུན་རིང་ནས་གནད་དོན་དེའི་ཐོག་རྒྱ་གར་གཞུང་དང་འབྲེལ་བ་གནང་མུས་ཡིན་པའི་ལྡི་ལི་སྐུ་ཚབ་དོན་ཁང་གི་དྲུང་ཆེ་ཨརྱ་ཚེ་དབང་རྒྱལ་པོ་ལགས་སུ་བཀའ་འདྲི་ཞུས་པར་ཁོང་གིས་བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གཞུང་དང་ལྷན་དུ་ Exit Permit ཙམ་མ་ཡིན་པར་རྒྱ་གར་ནང་ཕྱིར་ལོག་ཆོག་པའི་མཐོང་མཆན་ Return Visa ཞུ་ཕྱོགས་དང་ Identity Certificate འམ་ངོ་སྤྲོད་ལག་ཁྱེར་དེ་ Travel Document འམ་འགྲུལ་བཞུད་ལག་འཁྱེར་དུ་བསྒྱུར་དགོས་པ་སོགས་ཀྱི་གནད་དོན་འདྲ་མིན་དྲུག་ཙམ་གྱི་ཐོག་ཡུན་རིང་ནས་གྲོས་མོལ་གནང་མུས་ཡིན་པ་དང། ད་ལྟའི་ཆར་གནད་དོན་ཁག་ཅིག་གི་ཐོག་ཐག་གཅོད་གནང་རན་ཡོད་སྐོར་གསུངས་སོང། རྩ་བའི་ཉེ་བའི་ཆར་རྒྱ་གར་ནང་བོད་མི་མི་ཉུང་བ་ཞིག་གིས་རྒྱ་གར་གྱི་རྩ་ཁྲིམས་ནང་འཁོད་པའི་ཐོབ་ཐང་རྩོད་དེ་རྒྱ་གར་གྱི་མི་སེར་ཐོབ་ཐང་ཞུས་དང་ཞུ་མུས་ཡིན་པ་ལྟར་བཙན་བྱོལ་བོད་མིའི་སྤྱི་ཚོགས་ཁྲོད་གནད་དོན་དེ་འགྲིག་མིན་གྱི་བགྲོ་གླེང་ཤུགས་ཆེ་གནང་བཞིན་ཡོད་པ་དང། རྒྱ་གར་ཡུལ་མིའི་ཐོབ་ཐང་རྩོད་མཁན་བོད་མི་ཁག་གཅིག་གིས་དེ་ལྟར་གནང་དགོས་པའི་རྒྱུ་མཚན་གཙོ་བོ་ནི། ལག་དེབ་གསེར་པོའི་ཐོག་ཕྱིའི་རྒྱལ་ཁབ་ཁག་ཏུ་བསྐྱོད་སྐབས་རྒྱ་གར་གཞུང་ནས་ Exit permit འམ་རྒྱ་གར་ནས་ཐོན་ཆོག་པའི་ཡིག་ཆ་དང་དེ་བཞིན་return visa འམ་རྒྱ་གར་ལ་ཕྱིར་ལོག་ཆོག་པའི་མཐོང་མཆན་སོགས་ཡིག་ཆ་འཕར་མ་མང་དག་ཞིག་ཞུ་དགོས་པ་དང། ཕྱིའི་རྒྱལ་ཁབ་དང་གནམ་ཐང་དུ་ལག་དེབ་སེར་པོ་དེ་གང་ཡིན་མིན་ཤེས་རྟོགས་མེད་པའི་ངལ་བ་མང་དག་འཕྲད་པ་ལུང་འདྲེན་གནང་མུས་ཡིན་པ་རེད།

བཞུགས་སྒར་ཉེ་འཁྲིས་སུ་རྟེན་གཞི་བྱས་པའི་མཚུར་ཕུ་བླ་བྲང་ནས་དཔལ་༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རིན་པོ་ཆེ་མཆོག་ད་ལྟ་ཨ་རིར་བཞུགས་བཞིན་པའི་སྐོར་དང་འབྲེལ་ནས་ཡོངས་ཁྱབ་གསལ་བསྒྲགས་ཤིག་སྤེལ་ཏེ། རིན་པོ་ཆེ་མཆོག་གི་སྐོར་ལ་དཀྲོག་གཏམ་སྤེལ་བཞིན་པ་ལ་དད་ལྡན་རྒྱ་ཆེ་མང་ཚོགས་རྣམས་དབུ་མ་འཁོར་རོགས་གསུངས་འདུག དེ་ཡང་སྒྲུབ་བརྒྱུད་བསྟན་པའི་གསལ་བྱེད་དཔལ་༸རྒྱལ་བ་ཀརྨ་པ་རིན་པོ་ཆེ་མཆོག་འདས་པའི་ཟླ་ཤས་ནས་དབྱིན་ཡུལ་དང་ཁེ་ན་ཌ། དེ་བཞིན་ཨ་རི་དང་འཇར་མ་ནི་བཅས་སུ་ཆོས་འབྲེལ་མཛད་འཕྲིན་ཁག་ཅིག་ལེགས་གྲུབ་རྗེས་རིན་ཆེ་མཆོག་སླར་ཡང་ཨ་རིར་ཕེབས་ནས་ད་བར་བཞུགས་མུས་ཡིན་པའི་ཐད། ཉེ་ལམ་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་ཁག་ཅིག་ཐོག་རིན་པོ་མཆོག་ཨ་རིར་སྐྱབས་བཅོལ་ཞུས་ནས་གཏན་འཇགས་བཞུགས་གནང་རྒྱུ་ཡིན་ལུགས་དང་། ཁག་ཅིག་གིས་རིན་པོ་ཆེ་སྙུང་གཞི་ཚབས་ཆེན་པོ་བཞེས་ཡོད་པ་སོགས་བརྗོད་ནས་སྤྱི་ཚོགས་ནང་གནས་ཚུལ་མང་དག་འགྲེམས་སྤེལ་བྱེད་བཞིན་ཡོད་སྟབས། མཚུར་ཕུ་བླ་བྲང་ནས་ཁ་ཉིན་ཟླ་ ༡༠ ཚེས་ ༢༡ ཉིན་ཡོངས་ཁྱབ་གསལ་བསྒྲགས་ཤིག་གི་ཐོག་ནས་དད་ལྡན་མང་ཚོགས་ཀུན་ལ་རིན་པོ་ཆེ་མཆོག་ད་རེས་འཇར་མི་ནི་ནས་སླར་ཨ་རིར་ཕེབས་དགོས་དོན་གཙོ་བོ་ནི་རིན་པོ་ཆེ་མཆོག་གི་ཞབས་ཕྱི་སྐུ་བགྲེས་པ་དགུང་ལོ་ ༨༠ ཕེབས་ཡོད་པ་སྒྲུབ་རྣམ་ལགས་གློ་བུར་དུ་སྙུང་གཞི་དྲག་པོར་གྱུར་ཡོད་སྟབས་ཁོང་གཟིགས་རྟོག་ཆེད་དུ་ཡིན་པ་དང་། དེ་བཞིན་རིན་པོ་ཆེ་མཆོག་ས་གནས་སུ་ཕེབས་ཞོར་དུ་༸སྐུའི་འཕྲོད་བཞེས་བརྟག་དཔྱད་གནང་སྐབས་སྨན་པས་རིན་པོ་ཆེ་མཆོག་ལ་སྐུ་ངལ་གསོ་བཞུགས་གནང་གལ་ཡིན་པའི་ལམ་སྟོན་ཕུལ་བ་གཞིར་བཞག་ད་བར་ཨ་རིར་བཞུགས་དགོས་བྱུང་ཡོད་པ་གསལ་བཤད་གནང་འདུག ལྷག་པར་དུ་དད་ལྡན་མང་ཚོགས་ཀུན་ལ་ཀརྨ་པ་རིན་པོ་ཆེ་མཆོག་གི་༸སྐུའི་འཕྲོད་བཞེས་ཛ་དྲག་དང་བློ་འཚབ་བྱེད་དགོས་པ་ཞིག་རྩ་ནས་མེད་སྟབས། དཀྲོག་གཏམ་དང་འཆལ་གཏམ་སྤེལ་བཞིན་པར་དབུ་མ་འཁོར་བ་གནང་རོགས་ཞེས་འབོད་སྐུལ་ཞུས་འདུག མཚུར་ཕུ་བླ་བྲང་གི་འགན་འཛིན་རྒྱལ་མ་ཚན་བསོད་ནམས་ལགས་སུ་དེ་རིང་བཀའ་འདྲི་ཞུས་པར་ཁོང་གིས་རིན་པོ་ཆེ་མཆོག་སྨན་བཅོས་ལེགས་གྲུབ་རྗེས་གང་མགྱོགས་བཞུགས་སྒར་དུ་ཕེབས་རྒྱུ་ཡིན་པ་གསུངས་ཀྱི་འདུག