Monthly Archives: February, 2018

ཉེ་ཆར་ཕྱི་ཟླ་ ༡ ཚེས་ ༢༨ ཉིན་བོད་ཀྱི་རྒྱལ་ས་ལྷ་ས་ནས་གར་སོང་ཆ་མེད་དུ་གྱུར་བའི་བོད་མི་ཆབ་སྲིད་བཙོན་ཟུར་སོག་མཁར་བློ་གྲོས་སམ་བློ་གྲོས་རྒྱ་མཚོ་ལགས་ཀྱིས་ཕོ་བྲང་པོ་ཏ་ལའི་མདུན་ནས་རྒྱ་གཞུང་ལ་ངོ་རྒོལ་སྐད་འབོད་གནང་བར་བརྟེན་རྒྱ་གཞུང་ཉེན་རྟོག་མི་སྣས་ཁོང་འཛིན་བཟུང་གིས་སོག་རྫོང་གི་བཙོན་ཁང་དུ་བཀག་བསྐྱིལ་བྱེད་མུས་རེད་འདུག དེ་ཡང་འབྲེལ་ཡོད་མི་སྣ་ཞིག་གིས་ཁུངས་ལྡན་གནས་ཚུལ་མཁོ་སྤྲོད་གནང་དོན། བློ་གྲོས་རྒྱ་མཚོ་ལགས་ཀྱིས་ཚེས་ ༢༨ ཉིན་ལྷ་སའི་ཕོ་བྲང་པོ་ཏ་ལར་སྐོར་ར་ཚར་གཅིག་ཕེབས་རྗེས་པོ་ཏ་ལའི་མདུན་དུ་ཞི་བའི་སྐད་འབོད་གནང་ཡོད་པ་དང་། སྐབས་དེར་ཁོང་གིས་སྐད་འབོད་གནང་བའི་འབོད་ཚིག་གང་ཡིན་ཤེས་རྟོགས་ཐུབ་མེད་ཀྱང་། རྒྱ་གཞུང་ཉེན་རྟོག་མི་སྣས་ཁོང་བཙན་ཁྲིད་ཀྱིས་ཕྱི་ཉིན་ཙམ་ལ་སོག་རྫོང་གི་བཙོན་ཁང་དུ་བཀག་བསྐྱིལ་བྱེད་བཞིན་ཡོད་པ་ཤེས་རྟོགས་བྱུང་འདུག ཕྱི་ཚེས་ ༢༨ ཉིན་བློ་གྲོས་རྒྱ་མཚོ་ལགས་ནས་སྐད་འབོད་མ་གནང་བའི་སྔོན་དུ་ཁོང་གིས་དུས་ཡུན་སྐར་མ་ ༡ དང་སྐར་ཆ་ ༤༢ ཡོད་པའི་བརྙན་ཐུང་ཞིག་གི་བརྒྱུད་ཁོང་ནས་ད་བར་འཛམ་གླིང་ཞི་བདེ་ཆེད་དུ་ལས་འགུལ་རྒྱུན་ཆད་མེད་པ་སྤེལ་བཞིན་ཡོད་པ་ལྟར། ད་ལན་ཕྱི་ཟླ་ ༡ ཚེས་ ༢༨ ནས་སླར་ཡང་འཛམ་གླིང་ཞི་བདེའི་ལས་འགུལ་ཞིག་དབུ་འཛུགས་ཞུ་རྒྱུ་ཡིན་ཞེས་སོགས་གསུངས་པ་ཕྱིར་འགྱར་བྱུང་འདུག རྩ་བའི་ད་ལྟ་རང་ལོ་ ༥༧ ཡིན་པའི་བློ་གྲོས་རྒྱ་མཚོ་ལགས་ནི་བོད་ནག་ཆུ་ས་ཁུལ་སོག་རྫོང་ཚ་དབྲོག་ཡུལ་ཚོའི་སོག་མཁར་གྲོང་སྡེ་བ་ནས་ཡིན་ཞིང་། ལོ་ངོ་ ༢༡ རིང་རྒྱ་གཞུང་གི་བཙོན་འཇུག་འོག་མི་སྤྱོད་ལས་འདས་པའི་མནར་སྤྱོད་ཚད་མེད་མྱངས་བའི་ཆབ་སྲིད་ཟུར་ཞིག་ཡིན་པ་རེད།

ཨ་རི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཕྱི་ལོ་ ༡༩༩༥ ལོ་ནས་འགོ་འཛུགས་ཀྱིས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་གཟེངས་སུ་ཐོན་པ་གནང་མཁན་གྱི་ཚོགས་སྒེར་ཁག་ལ་ཆེ་བསྟོད་དང་སྦྲགས། Light of Truth འམ་བདེན་པའི་སྒྲོན་མེ་ཞེས་པའི་གཟེངས་རྟགས་ཤིག་ཕུལ་སྲོལ་ཡོད་པ་ལྟར། འདི་ལོའི་གཟེངས་རྟགས་འདི་ཡུན་རིང་ནས་བོད་དོན་ལ་ཐུགས་འཁུར་བཞེས་མཁན་ལྕམ་ Grace Spring ལགས་ལ་འབུལ་གཏན་འཁེལ་འདུག དེ་ཡང་ཁ་སང་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་གནས་ཚུལ་སྤེལ་བར་ཚོགས་པ་དེའི་འགན་འཛིན་ལྷན་ཚོགས་རྣམས་ནས་འདི་ལོའི་བདེན་པའི་སྒྲོན་མེ་ཞེས་པའི་གཟེངས་རྟགས་དེ་འདས་པའི་ལོ་ངོ་བཅུ་ཕྲག་མང་པོའི་རིང་ནས་བོད་དོན་ཐོག་ཐུགས་འཁུར་ཆེ་བཞེས་ཀྱིས་བོད་དོན་དང་འབྲེལ་བའི་ལས་འགུལ་ནང་མཉམ་ཞུགས་གནང་མཁན་ལྕམ་ Grace Spring ལགས་ལ་འབུལ་རྒྱུ་ཡིན་པ་ཡོངས་བསྒྲགས་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་ཀྱིས་ལྕམ་ Grace Spring ལགས་ནི་དུས་རྒྱུན་དུ་འཇིགས་སྣང་མེད་པར་ལྷག་བསམ་རྣམ་དག་ཐོག་ནས་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་སོགས་འགྲེལ་བརྗོད་དང་སྦྲགས། འདི་ལོའི་བདེན་པའི་སྒྲོན་མེ་ཞེས་པའི་གཟེངས་རྟགས་དེ་ཁོང་གིས་ད་བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མིའི་བདེན་དོན་ཐོག་ཕྱག་ལས་བསྟུད་མར་གནང་བར་ཡི་རངས་བསྔགས་བརྗོད་ཀྱི་ཆེད་བསྟོད་མཚོན་ཕྱིར་འབུལ་རྒྱུ་ཡིན་ཞེས་གསུངས་འདུག གཞི་རྩའི་ལྕམ་ Grace Spring ལགས་དེ་སྔ་ཨ་རིའི་རྒྱལ་ས་ Washington DC ནང་བཞུགས་སྐབས་རྒྱལ་སྤྱིའི་བོད་དོན་ལས་འགུལ་ཁང་ཨ་བོད་མཐུན་ཚོགས་ནང་བོད་དོན་དང་འབྲེལ་བའི་ཕྱག་ལས་མང་དག་ཞིག་གནང་མྱོང་ཡོད་པ་དང་། ཁུལ་དེར་ཚོགས་པའི་བོད་དོན་ལས་འགུལ་ནང་མཉམ་ཞུགས་གནང་བ་དང་ལྷག་པར་དུ་ཕྱི་ལོ་ ༡༩༨༧ ལོར་བོད་ནང་ཞི་བའི་སྒེར་ལངས་གནང་རྗེས། རེས་གཟའ་པ་སངས་ནམ་ཡིན་ལ་རྒྱལ་ས་ཝ་ཤིང་ཊོན་ཌི་སིར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་བོད་ཀྱི་རྒྱལ་དར་དང་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་སོགས་བསྣམས་ནས་ལོ་ངོ་བཅུ་ལྷག་བསྟུད་མར་ཁེར་རྐྱང་གི་མར་མེ་ཁྲོམ་སྐོར་གྱི་ལས་འགུལ་སྤེལ་ཡོད་པ་རེད། ལས་འགུལ་དེ་དག་དང་འབྲེལ་དེ་སྔ་ཕྱི་ལོ་ ༡༩༨༩ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྕམ་ Grace Spring ལགས་ལ་འཚམས་འདྲི་ཞིག་གནང་བའི་བརྒྱུད་ཁོང་མོས་ད་བར་བོད་དོན་ཐོག་མུ་མཐུད་ལས་འགུལ་རིགས་སྤེལ་བཞིན་པར་ཐུགས་རྗེ་ཆེ་ཞུའི་བསྔགས་བརྗོད་དང་། ཁོ་མོ་ཁེར་རྐྱང་གིས་མར་མེ་ཁྲོམ་སྐོར་གནང་བ་དེས་ཨ་རིའི་མི་སེར་རྣམས་ནས་དུས་རྟག་ཏུ་བོད་མི་ཚོར་རྒྱབ་སྐྱོར་དང་གདུང་སེམས་མཉམ་བསྐྱེད་གནང་བ་ཞིག་མཚོན་གྱི་ཡོད་པ་བཀའ་བསྩལ་ཡོད། བོད་དོན་རྒྱབ་སྐྱོར་བ་ལྕམ་ Grace Spring ལགས་ལ་འདི་བོད་ཀྱི་ལོ་གསར་གྱི་ཚེས་ ༢ ཉིན་ Vermont བོད་རིགས་ཚོགས་པའི་ལོ་གསར་གྱི་འདུ་འཛོམས་སྐབས་དངོས་སུ་འབུལ་བཞེས་གནང་རྒྱུ་རེད་འདུག རྩ་བའི་རྒྱལ་སྤྱིའི་བོད་དོན་ལས་འགུལ་ཁང་ནས་ཕྱི་ལོ་ ༡༩༩༥ ལོ་ནས་བཟུང་ད་བར་གཟེངས་རྟགས་དེ་ བོད་དོན་དང་འབྲེལ་བའི་དངོས་ཀྱི་གནས་ཚུལ་ཁྱབ་སྤེལ་གནང་མཁན་ཨ་རི་ New York Times གསར་ཁང་གི་སྤྱི་ཁྱབ་རྩོམ་སྒྲིག་པ་སྐུ་ཞབས་དམ་པ་ Abraham Michael Rosenthal ལགས་དང་། མགོན་པོ་༸གང་ཉིད་མཆོག་དང་ཐུགས་ཉེ་བའི་བོད་དོན་རྒྱབ་སྐྱོར་གནང་མཁན་ཡི་ཤུའི་ཆོས་དཔོན་ Desmond Tutu མཆོག ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་ Vaclav Havel ལགས། དེ་བཞིན་རྒྱ་གར་མི་མང་དང་རྒྱ་རིགས་བོད་དོན་རྒྱབ་སྐྱོར་བ་སོགས་ཚོགས་སྒེར་ཁག་ཅིག་ལ་ཕུལ་མྱོང་ཡོད་པ་རེད།

ཕྱི་ལོ་ ༢༠༠༨ ལོ་དང་དེ་རྗེས་ནས་བཟུང་རྒྱ་གཞུང་གིས་བོད་ཐོག་འཛིན་པའི་དྲག་པོའི་སྲིད་བྱུས་ལག་བསྟར་འོག་བོད་ནང་བོད་མི་ཚོས་མ་བཟོད་པར་གཅིག་རྗེས་གཉིས་མཐུད་ཀྱིས་རང་བསྲེགས་གནང་བ་སོགས་ཀྱི་སྐོར་རྩོམ་ཡིག་སྤེལ་མཁན་བོད་མི་ཆབ་སྲིད་བཙོན་ཟུར་འགར་རྩེ་འཇིགས་མེད་ལགས་ཟླ་ ༢ ཚེས་ ༤ ཉིན་བཙོན་གྲོལ་བཏང་འདུག དེའང་དེ་རིང་བོད་ཀྱི་པེན་རྩོམ་པ་པོ་མཐུན་ཚོགས་ཀྱི་ངོ་དེབ་ཐོག་འགར་རྩེ་འཇིགས་མེད་ལགས་གློད་བཀྲོལ་བཏང་བའི་གནས་ཚུལ་ཡོངས་བསྒྲགས་གནང་བའི་ནང་ཁོང་གི་འདྲ་པར་ཁག་ཅིག་ཕྱིར་འགྱུར་བྱུང་བའི་འགར་རྩེ་འཇིགས་མེད་ལགས་བཙོན་གྲོལ་ཐོབ་སྟེ་འགར་རྩེ་དགོན་པར་འབྱོར་བ་དང། དགོན་པའི་དགེ་འདུན་པ་རྣམས་ནས་ཁོང་ལ་དཀར་གཙང་མཇལ་དར་སྒྲོན་ནས་ཕེབས་བསུ་གཟབ་རྒྱས་ཞུ་བཞིན་པའི་རྣམ་པ་མངོན་རྒྱུ་འདུག རྩ་བའི་རྩོམ་པ་པོ་འགར་རྩེ་འཇིགས་མེད་ལགས་ནི། ད་ལྟ་རང་ལོ་ ༤༡ ཡས་མས་ཤིག་ཡིན་པ་དང་ཁོང་བོད་མདོ་སྨད་རྨ་ལྷོ་ཁུལ་རྩེ་ཁོག་རྫོང་ཁོངས་མགོན་ཤུལ་ཚོ་བ་བཅུའི་ནང་ཚན་སྒར་བ་ནས་རེད་འདུག ཁོང་ཆུང་དུས་སྐབས་འགར་རྩེ་དགོན་པར་ཆོས་བཞུགས་གནང་ནས་བོད་བརྒྱུད་ནང་པའི་མདོ་བསྔགས་རིག་གནས་ལ་སློབ་གཉེར་གནང་ཞིང་། ཕྱི་ལོ་ ༢༠༠༢ ལོར་ཕར་ཕྱིན་རབ་བྱམས་པའི་དམ་བཅའ་བཞག་ཡོད་པ་དང། རིམ་བཞིན་རྩོམ་རིག་གི་ལས་ལ་བཞུགས་འདུག དེའི་ཁྲོད་ནས་ཁོང་གིས་སྦྲང་ཆར་དང་བླ་སྲོག བོད་ཀྱི་སློབ་གསོ་སོགས་དུས་དེབ་ཁག་གི་ཐོག་བོད་ཀྱི་སྐད་ཡིག་དང་རིག་གཞུང་སོགས་དང་འབྲེལ་བའི་རྩོམ་ཡིག་ ༢༠༠ ལྷག་སྤེལ་ཡོད་པ་མ་ཟད། ཕྱི་ལོ་ ༢༠༠༥ ལོར་ཁོང་གིས་<<བསམ་གཞིགས་མྱུལ་བའི་ཟིན་ཐོ་>>ཞེས་པ་གསར་རྩོམ་བྱས་ཏེ་སྤྱི་ཚོགས་ཐོག་དགའ་བསུ་ཆེན་པོ་ཐོབ་འདུག དེ་རྗེས་ ༢༠༠༨ ལོར་ཁོང་གིས་བཙན་པོའི་སྙིང་སྟོབས་ཞེས་པའི་དེབ་ཕྲེང་དང་པོ་པར་འགྲེམས་བྱས་ནས་རྒྱ་གཞུང་གི་བཙན་གནོན་འོག་བོད་མི་རིགས་ལ་འཕྲད་བཞིན་པའི་དཀའ་སྡུག་གི་གནས་སྟངས་རྣམས་གསལ་འདོན་གནང་ཡོད་སྟབས། རྒྱ་གཞུང་གིས་ཁོང་ལ་སྔ་རྗེས་སུ་འདྲི་གཅོད་གནོན་ཤུགས་སྤྲད་མཐར་གློད་བཀྲོལ་བཏང་ཡོད། དེ་རྗེས་ཁོང་གིས་བཙན་པོའི་སྙིང་སྟོབས་ཀྱི་དེབ་ཕྲེང་གཉིས་པ་པར་འགྲེམས་ཞུས་པའི་ནང་བོད་ནང་གི་རང་ལུས་མེར་སྲེག་གི་གནད་དོན་གཙོ་གྱུར་རྒྱ་གཞུང་གིས་བོད་ས་ཡོངས་ལ་བཙན་གནོན་དབང་བསྒྱུར་བྱས་པ་ནས་བཟུང་བོད་ནང་བོད་མི་ཚོས་སྔ་རྗེས་སུ་ཞི་བའི་ངོ་རྒོལ་གྱི་གནས་སྟངས་སྤྱི་དང་། ལྷག་ཏུ་༸གོང་ས་མཆོག་དང་༸པཎ་ཆེན་རིན་པོ་ཆེ་མཆོག་རྣམ་གཉིས་དབུས་པའི་བོད་ཀྱི་བླ་མ་དང་དཔོན་པོ། མཁས་པ། རྩོམ་པ་པོ། གླུ་བ། ལས་བྱེད། སློབ་ཕྲུག་སོགས་ཀྱི་ཐོག་རྒྱ་གཞུང་གི་འཛིན་པའི་ཆབ་སྲིད་ཀྱི་ལྟ་སྟངས། དེ་བཞིན་བོད་ནང་གི་འགྲོ་བ་མིའི་ཐོབ་ཐང་དང་མི་རིགས་ཀྱི་སྐད་དང་རིག་གནས། རང་བྱུང་ཁོར་ཡུག་བཅས་ཀྱི་ཉམས་ཆག སྐབས་དེའི་བོད་ཀྱི་དགོན་སྡེ་དང་སློབ་གྲྭ། ཚོང་ལས་དཔལ་འབྱོར་བཅས་ཀྱི་ཡ་ང་བའི་གནས་སྟངས་སོགས་གསལ་བཏོན་གནང་ཡོད་པ་ལྟར། ཕྱི་ལོ་ ༢༠༡༣ ལོའི་ཕྱི་ཟླ་ ༡ ཚེས་ ༡ ཉིན་རྒྱ་གཞུང་གིས་འགར་རྩེ་འཇིགས་མེད་ལགས་ཀྱི་ཕྱག་དེབ་དེའི་ནང་ཁ་བྲལ་གྱི་བརྗོད་བྱ་ཡོད་པའི་ཉེས་འཛུགས་འོག་འཛིན་བཟུང་བཙན་ཁྲིད་བྱས་རྗེས་ལོ་དེའི་ཕྱི་ཟླ་ ༥ པའི་ནང་རྨ་ལྷོ་རྫོང་མི་དམངས་ཁྲིམས་ཁང་ནས་ཁོང་ལ་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག་ལོ་ ༥ རིང་གི་བཙོན་འཇུག་ཁྲིམས་ཐག་བཅད་ཡོད་པ་རེད། དེ་རིང་འབྲེལ་ཡོད་མི་སྣ་ཞིག་གིས་ཁུངས་ལྡན་གནས་ཚུལ་མཁོ་སྤྲོད་གནང་བར་འགར་རྩེ་འཇིགས་མེད་ལགས་བཙོན་གྲོལ་ཐོབ་རྗེས་རང་དགོན་དུ་ཕྱིར་ཕེབས་མི་ཆོག་པ་དང་། ཚོགས་པ་དང་གྲོང་པ་ཁག་གི་ནང་དུ་གཏམ་བཤད་དང་ཆབ་སྲིད་ཀྱི་ཕྱག་ལས་གང་ཡང་གནང་མི་ཆོག་པ་བཟོས་པ་མ་ཟད། ཁོང་ལ་ལྟ་རྟོག་བྱེད་མི་ཁ་ཤས་ཆེད་འཛུགས་བྱས་ཡོད་སྐོར་གསུངས་སོང་། ཁོང་ད་བར་ཟི་ལིང་ཁུལ་གྱི་བཙོན་ཁང་ཞིག་ཏུ་བཞག་ཡོད་པ་དེ་ནས་ཉེ་ཆར་བཙོན་གྲོལ་བཏང་ཡོད་པ་རེད་འདུག བཙོན་ཁང་དེར་བཙོན་པ་སྟོང་ཕྲག་ལྔ་དྲུག་ཞིག་ཡོད་པ་དང། བཙོན་འཇུག་རིང་མགར་རྩེ་འཇིགས་མེད་ལགས་ལ་ཟེ་མ་རང་མགོ་དང། གོས་བཟོ་རྒྱུ། དེ་བཞིན་སྐྲ་རྫུན་བཟོ་རྒྱུ་སོགས་ཀྱི་ལས་ཀ་མང་པོ་སྐུལ་བཞིན་ཡོད་པ་རེད་འདུག ཁོང་ལ་བཙོན་འཇུག་སྐབས་ལས་ཀ་མང་པོ་སྐུལ་རྐྱེན་གཟུགས་གཞིའི་གནས་སྟངས་ཞན་པོ་ཆགས་ཡོད་པ་དེ་ལྟར་ཡང། ཉེ་ཆར་བཙོན་གྲོལ་སྐབས་གཟུགས་གཞིའི་གནས་སྟངས་ཇི་ལྟར་ཡོད་མེད་ཀྱི་གནས་ཚུལ་གསལ་པོ་ཤེས་རྟོགས་ཐུབ་ཀྱི་མེད་པ་རེད་འདུག

ཉན་པ།: Listen ཕབ་ལེན། Download རྩོམ་པ་པོ་འགར་རྩེ་འཇིགས་མེད་ལགས་བཙོན་གྲོལ་ཐོབ་འདུག ནང་སྲིད་བཀའ་བློན་མཆོག་ནས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་གནང་འདུག མདོ་སྨད་རེབ་གོང་ནང་དུ་ལོ་གསར་ཐད་སྒྲིག་གཞི་གཏན་འབེབས་བྱས་འདུག དབྱིན་ཡུལ་ Royal Court Theaterནས་བོད་དོན་ལས་རིམ་ཞིག་ཕྱིར་འཐེན། བོད་ཀྱི་རྒྱལ་རབ་དང་ལོ་རྒྱུས་ངོ་སྤྲོད། ༸རྒྱལ་མཆོག་༸་་སྐུ་ཕྲེང་གསུམ་པའི་སྐོར། Monday 05/02/2018 Tibetan writer released after 5 years imprisonment CTA Home Kalon meets with Sikkim Chief Minister New rule compels Rebkong Tibetans to celebrate Losar in grandeur London’s Royal Court Theatre in row over shelving of Tibet play HISTORY FEATURE: The 3rd Dalai Lama Sonam Gyatso

འདི་ལོ་བོད་རྒྱལ་ལོ་ ༢༡༤༥ རབ་གནས་ས་ཁྱི་ལོའི་གནམ་ལོ་གསར་དུ་བཞེད་ལ་ཉེ་བ་དང་བསྟུན་བོད་མདོ་སྨད་རེབ་གོང་དང་རྩེ་ཁོག་རྫོང་སོགས་ཀྱི་སྡེ་བ་ཁག་ནང་སྡེ་དཔོན་དང་གྲོང་གི་སྐུ་ཚབ་རྣམས་ནས་རང་རང་སོ་སོའི་སྡེ་བའི་ནང་བོད་ཀྱི་ལོ་གསར་གཏོང་ཕྱོགས་སྐོར་གྱི་སྒྲིག་གཞིག་ཁག་ཅིག་གཏན་འབེབས་གནང་བ་དང་། མི་མང་ཚོར་རང་མི་རིགས་ཀྱི་སྲོལ་རྒྱུན་ལྟར་ལོ་གསར་གཏོང་དགོས་པ་ལས་རྒྱའིི་ལུགས་སྲོལ་ལྟར་ཁྲ་ཁྲ་ཟིང་ཟིང་དང་། ལུས་སེམས། འཕྲོད་བསྟེན། དེ་བཞིན་ཁོར་ཡུག་བཅས་པ་གནོད་པའི་ཟས་སྤྱོད་རིགས་སྤོང་དགོས་པའི་འབོད་སྐུལ་གནང་འདུག ལྷག་དོན་རེབ་གོང་སྒོ་མར་སྡེ་བའི་ལོ་གསར་སྐབས་བླང་དོར་ཀྱི་སྒྲིག་གཞི་དོན་ཚན་བཅུ་ཅན་ཞིག་གཏན་འབེབས་གནང་ཡོད་པ་རེད་འདུག སྒོ་དམར་སྡེ་བའི་ལོ་གསར་སྐབས་ཀྱི་གནང་སྒོ་དང་འབྲེལ་བའི་སྒྲིག་གཞི་ཁག་ནི། བླ་སྤྲུལ་སོགས་ལ་ལོ་གསར་ཕུལ་སྐབས་ཁ་བཏགས་མཉམ་དུ་སྒོར་མོ་དང་ཡང་ན་གོ་རེ་འབུལ་རྒྱུ་ལས་ཞོ་དང་འོ་མ། ཁུ་ནག་རིགས། ཤིང་ཏོག་སོགས་ཤོག་སྒམ་དང་ཤེལ་དམ་བཅས་ཀྱི་ནང་ཐུམ་བརྒྱབ་པའི་རིགས་ཕུལ་མི་ཆོག་པ། ཕ་མ་དང་ནང་མི་གྲོགས་པོ་སོགས་ལ་ལོ་གསར་འཚམས་འདྲི་ཞུ་བར་བསྐྱོད་སྐབས་ཁ་བཏགས་མཉམ་དུ་སྒོར་མོ་དང་ཡང་ན་ཚོད་མ་དང་གོ་རེ། ཆང་རག། ཐ་མག ཤོག་སྒམ་དང་ཤེལ་དམ་ནང་ཐུམ་བརྒྱབ་པའི་རིགས་འཁྱེར་མི་ཆོག་པ། ལོ་གསར་མེད་མཁན་ཚོར་ལོ་གསར་འཁྱེར་སྐབས་ཚེས་ ༣ ཉིན་ཁ་བཏགས་མཉམ་དུ་སྒོར་བཅུ་རེ་འཁྱེར་རྒྱུ་ལས་ཐུམ་བརྒྱབ་པའི་ཟས་རིགས་དང་བཏུང་བའི་རིགས་འཁྱེར་མི་ཆོག་པ། ལོ་གསར་ཚེས་ ༡ དང་བོད་ཟླ་ ༡༢ ཚེས་ ༢༤ དགོང་མོ་ཤོག་སྦག་རྒྱག་སྐབས་མེ་ཏོག་འགད་རྫས་རིགས་རྩ་བ་ཉིད་ནས་བརྒྱབ་མི་ཆོག་པ། ལོ་གསར་སྡེར་ཁ་སྒྲིག་སྐབས་འཕྲོད་བསྟེན་ལ་གནོད་པའི་ཟས་རིགས་དང་ཐུམ་བརྒྱབ་པའི་བཏུང་བའི་རིགས། དེ་བཞིན་ང་ཚོ་ནང་པ་སངས་རྒྱས་པ་ཞིག་ཡིན་པའི་ཆ་ནས་དཀོན་མཆོག་གི་རྟེན་དྲུང་དུ་ཤའི་སྡེར་ཁ་སྒྲིག་མི་དགོས་པར་རེ་སྐུལ་ཞུ་རྒྱུ། ལོ་གསར་སྐབས་དང་མི་མང་འཛོམས་སར་ངེས་པར་དུ་ཕོ་མོ་རྒན་གཞོན་ཚང་མས་བོད་ལྭ་གྱོན་དགོས་པ། ལོ་གསར་སྐབས་ཁྱིམ་ཕྱི་ནང་སོགས་ལ་འདྲ་པར་སྦྱར་སྐབས་བོད་རང་གི་ལུགས་སྲོལ་གཞིར་བཞག་གནང་དགོས་པ། ལོ་གསར་སྐབས་གླུ་ལེན་དང་གར་རྩེད་གནང་རྒྱུ་ལས་རྒྱན་འགྱེད་པ་སོགས་རྒྱན་པོ་རིགས་རྩ་བ་ཉིད་ནས་མི་བརྩེ་བ། རང་སྡེ་བའི་ནང་གི་ཚོང་ཁང་གི་བདག་པོ་དང་བདག་མོ་ཚོས་བྱིས་པའི་འཕྲོད་བསྟེན་ལ་གནོད་པའི་ཟས་རིགས་བཙོང་རྒྱུ་དང་། ཚོང་ཁང་གི་ཉེར་འཁོར་གད་རྙིགས་རྣམས་དོ་བདག་སོ་སོ་ནས་ཉར་ཚགས་གནང་རྒྱུ་དང་། ལོ་གསར་དང་གར་འཆམ་སྐབས་སུ་དགོན་པའི་ཉེ་འཁོར་དང་མཆོད་རྟེན་གཡས་གཡོན་བཅས་སུ་ཤ་རིགས་མེར་བསྲེགས་བཏང་ནས་མི་བཙོང་བ། དེ་བཞིན་ལོ་གསར་ཚེས་ ༡ ཉིན་དགོན་པར་བསང་གསོལ་གཏོང་སྐབས་རླུང་རྟ་མི་གཏོར་བ་མ་ཟད་མཆོད་རྟེན་མདུན་དུའང་མི་གཏོར་བ། ཅི་སྟེ་རླུང་རྟ་གཏོར་དགོས་ཚེ་རི་མགོར་སོང་ནས་གཏོར་དགོས་པ་བཅས་ཀྱི་སྒྲིག་གཞི་དོན་ཚན་བཅུ་ཅན་ཞིག་གཏན་འབེབས་གནང་ཡོད་པ་རེད། གཞི་རྩའི་དེང་སྐབས་བོད་ནང་བོད་རང་གི་སྲོལ་རྒྱུན་གཉེན་སྟོན་དང་ལོ་གསར་སོགས་བོད་མི་རང་གི་ཐུན་མིིན་སྲོལ་རྒྱུན་དགའ་སྟོན་གཉེར་སྲོལ་ལས་འདས་ཏེ་རྒྱའི་ལུགས་སྲོལ་མཉམ་སྲེ་གནང་ཤུགས་ཆེ་རུ་འགྲོ་བཞིན་ཡོད་སྟབས་གཞོན་སྐྱེས་མང་པོས་དེ་དག་ནི་བོད་མིའི་ལུགས་སྲོལ་ཡིན་ཤག་གནང་བཞིན་ཡོད་པར་བརྟེན་མ་འོངས་པར་བོད་མིའི་སྲོལ་རྒྱུན་གཉེན་སྟོན་དང་ལོ་གསར་སོགས་གནང་སྒོ་དེ་དག་རིམ་བཞིན་རྩ་བརླག་འགྲོ་ཉེན་ཡོད་པ་རེད་འདུག

ཉན་པ།: Listen ཕབ་ལེན། Download སྒྲ་འཇུག་ཆེད་ལས་པ་ཚེ་དབང་མཐར་ཕྱིན་ལགས་དང་ཁོང་གི་ཆེད་ལས་སྐོར་གླེང་མོལ། Sunday 04/02/2018 In conversation with Tsewang Tharchin, founder of Tibet Audio

ཉན་པ།: Listen ཕབ་ལེན། Download རྒྱ་གར་བ་ཚོར་ནང་པའི་རིག་གཞུང་སྲུང་སྐྱོབ་བྱ་རྒྱུའི་འགན་ཡོད། ཨམ་ར་ལྦ་ཏིར་ནང་པའི་དུས་སྟོན་ཚོགས་བཞིན་པ། དབྱིན་ཡུལ་སྲིད་བློན་ནས་འགྲོ་བ་མིའི་ཐོབ་ཐང་གླེང་སློང་མ་བྱས་པ་དེ་ལ་རྒྱ་ཕྱོགས་ནས་བསྔགས་བརྗོད་བྱས་འདུག རྒྱ་གཞུང་ནས་འགྲོ་བ་མིའི་ཐོབ་ཐང་རྡོག་རོལ་བཏང་ཡང་རྒྱལ་སྤྱིའི་དོ་སྣང་ཉུང་དུ་འགྲོ་བཞིན་པ་གསུངས་འདུག ༸གོང་ས་མཆོག་གི་བཀའ་ཆོས་ལེ་ཚན། ཆོས་ཀྱི་འཁོར་ལོ་བསྐོར་བའི་མདོ་དང་སཱ་ལུ་ལྗང་པའི་རྟེན་འབྲེལ་གྱི་མདོ། Saturday 03/02/2018 India has moral responsibility to preserve Buddhist Sanskrit Tradition: Dalai Lama Buddhist Heritage Festival held in Amravati for Global Shanti The deafening silence on China's human rights abuses: Sophie Richarson, HRW China applauds Theresa May for sidestepping human rights issue FEATURE: Dalai Lama teaching in Bodhgaya on Dharmachakra Parivaretan Sutra

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨམ་ར་ཝ་ཏི་ནང་འཚོགས་བཞིན་པའི་ནང་པའི་དུས་སྟོན་ཐོག་གསུང་འཕྲིན་ཞིག་བསྩལ་བ་དང་འབྲེལ། རྒྱ་གར་བ་ཚོས་ལེགས་སྦྱར་གྱི་སྐད་ཡིག་ཐོག་ཡོད་པའི་ནང་པ་སངས་རྒྱས་པའི་ཆོས་དང་རིག་གཞུང་རྣམས་སྲུང་སྐྱོབ་བྱ་རྒྱུའི་བཟང་སྤྱོད་ཀྱི་འགན་ཡོད་ཅེས་བཀའ་ནན་བསྩལ་འདུག དེ་རིང་ཟླ་ ༢ ཚེས་ ༣ ཉིན་དབུས་འཛུགས་ཀྱིས་ཚེས་ ༥ བར་རྒྱ་གར་ལྷོ་ཕྱོགས་ Andhra Predesh མངའ་སྡེའི་ཡུལ་སྐོར་སྤྲོ་འཆམ་ལྷན་ཁང་གི་གོ་སྒྲིག་འོག་ཁུལ་དེར་ཡོད་པའི་ནང་པའི་གནས་ཆེན་ཨམ་ར་ཝ་ཏིར་འཛམ་གླིང་ཞི་བདེའི་མཚན་བྱང་ཐོག་རྒྱལ་ཁབ་མི་འདྲ་བའི་ནང་པའི་དགེ་འདུན་ཞལ་གྲངས་  ༡༠༠༠ ལྷག་འདུ་འཛོམས་ཀྱིས་རྒྱལ་སྤྱིའི་རང་བཞིན་ལྡན་པའི་ནང་པའི་དུས་སྟོན་ཆེན་པོ་ཞིག་འཚོགས་བཞིན་ཡོད་པ་རེད། རྩ་བའི་དེ་སྔོན་གོ་སྒྲིག་ཚོགས་ཆུང་གི་ངོས་ནས་༸གོང་ས་མཆོག་ནང་པའི་དུས་སྟོན་ཐོག་ཆིབས་བསྒྱུར་མཛད་རྒྱུར་གསོལ་འདེབས་ཞུས་ཡོད་པ་ལྟར། མགོན་པོ་༸གང་ཉིད་མཆོག་ཆིབས་བསྒྱུར་གནང་ཐུབ་མེད་ཀྱང་དེ་རིང་༸གང་ཉིད་མཆོག་གིས་བརྙན་པར་བརྒྱུད་དུས་སྟོན་ཐོག་ཕེབས་པའི་ཚོགས་བཅར་བ་ཀུན་ལ་འཚམས་འདྲིའི་གསུང་འཕྲིན་ཞིག་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་ལན་རྒྱ་གར་གྱི་གནས་མཆོག་ཨམ་ར་ཝ་ཏིར་ནང་པའི་རིག་གཞུང་དང་དེ་སྔའི་ས་གནས་སུ་ནང་པའི་རིག་གཞུང་དར་ཁྱབ་བྱུང་བའི་དུས་ཚིགས་དྲན་གསོའི་དུས་སྟོན་ཐོག་ཕེབས་པའི་ཚོགས་བཅར་བ་ཀུན་ལ་དགའ་བསུའི་འཚམས་འདྲི་གནང་བ་དང་། གནས་མཆོག་ཨམ་ར་ཝ་ཏི་ནི་སྟོན་པ་སངས་རྒྱས་བཅོམ་ལྡན་འདས་ཀྱི་ཆོས་འབྲེལ་མཛད་ཡུལ་དང་ལོ་རྒྱུས་ཡུན་རིང་ལྡན་པའི་ནང་པའི་གནས་ཆེན་ཞིག་ཡིན་སྐོར་བཀའ་བསྩལ་བ་དང། ལྷག་ཏུ་༸གང་ཉིད་མཆོག་གིས་ལེགས་སྦྱར་གྱི་སྐད་ཡིག་ཐོག་ཡོད་པའི་ནང་པའི་རིག་གཞུང་གི་གལ་གནད་སྐོར་བཀའ་སྩལ་དང་འབྲེལ་ཏེ། པཱ་ལིའི་སྐད་ཡིག་ཐོག་ཡོད་པའི་ནང་པ་སངས་རྒྱས་པའི་ཆོས་དང་རིག་གཞུང་དེ་དག་བྷར་མ་དང་ཀམ་བོ་ཌི་ཡ་སོགས་རྒྱལ་ཁབ་ཁག་གིས་སྲུང་སྐྱོབ་ལེགས་པ་གནང་ཡོད་པ་དེ་ལྟར་ཡང། ལེགས་སྦྱར་གྱི་སྐད་ཡིག་ཐོག་ཡོད་པའི་ནང་པ་སངས་རྒྱས་པའི་ཆོས་རིག་རྒྱུན་འཛིན་གནང་མཁན་བོད་སོག་རྒྱ་གསུམ་གྱི་ཡུལ་ལུང་དུ་ད་ལྟའི་ཆར་རིག་གཞུང་དེ་དག་ཐོག་སློབ་གཉེར་དང་སྲུང་སྐྱོབ་ཞུ་རྒྱུའི་རང་དབང་དང་གོ་སྐབས་མེད་པའི་གནས་སྟངས་ཆགས་ཡོད་པ་བཀའ་སྩལ་དང་ཆབས་ཅིག རྒྱ་གར་བ་ཚོས་ལེགས་སྦྱར་གྱི་སྐད་ཡིག་ཐོག་ཡོད་པའི་ནང་པའི་ཆོས་རིག་དག་སྲུང་སྐྱོབ་བྱ་རྒྱུའི་བཟང་སྤྱོད་ཀྱི་འགན་ཡོད་པར་བཀའ་བསྩལ་ཡོད། ༸གོང་ས་མཆོག་གིས་ད་དུང་ས་གནས་སུ་སྟོན་པའི་༸སྐུ་བརྙན་གསར་བཞེངས་ཞུ་རྒྱུ་ལས་སངས་རྒྱས་ཀྱི་ཆོས་ལ་སློབ་གཉེར་བྱ་རྒྱུ་དེ་གནད་ཆེ་ཡིན་པ་དང་། ནང་པ་སངས་རྒྱས་པའི་ཆོས་ནས་གསུངས་པའི་སེམས་ཁམས་རིག་པ་དང་ཚད་རྡུལ་དངོས་ཁམས་རིག་པ་སོགས་ཀྱི་ལྟ་གྲུབ་ཁག་ལ་དེང་གི་ཚན་རིག་པ་ཚོས་ཀྱང་ཡིད་སྨོན་དང་གདེང་འཇོག་ཆེན་པོ་གནང་བཞིན་ཡོད་པ་རེད། རྒྱ་གར་གྱི་གནའ་བོའི་རིག་གནས་དེས་དེང་གི་འཛམ་གླིང་ཐོག་ཆེས་འབྲེལ་བ་ཡོད་པའི་ཤེས་རིག་ཞིག་དང་ཞབས་འདེགས་ཆེན་པོ་ཞུ་རྒྱུའི་ནུས་པ་ལྡན་ཡོད་སྟབས། རྒྱ་གར་གྱི་གནའ་བོའི་རིག་གཞུང་དེ་དག་བསྐྱར་གསོ་ཞུ་གལ་ཆེ་བ་དང་དེའི་ཐོག་ཤེས་ཡོན་གྱི་འདུ་ཤེས་འཛིན་ནས་སློབ་གཉེར་གནང་དགོས་ཞེས་བཀའ་བསྩལ་འདུག