Monthly Archives: July, 2018

ཉན་པ།: Listen ཕབ་ལེན། Download འཛམ་གླིང་རྐང་རྩེད་སྤོ་ལོའི་འགྲན་སྡུར་གྱི་གཟིགས་མོ་བ་ལ་བོད་དོན་གོ་རྟོགས་སྤེལ་བ། ཡི་ཤུའི་ཆོས་དཔོན་ Zhang Shaojie དང་༸པཎ་ཆེན་རིན་པོ་ཆེ་མཆོག་གི་གནད་དོན་བརྗེད་རྒྱུ་མེད་པའི་ཞུ་སྐུལ། ༸སྐུའི་འཁྲུངས་སྐར་དང་བསྟུན་ཀུན་ཕན་ལས་ཁུངས་ཀྱི་སྙན་ཐོའི་དུས་དེབ་དང་པོ་དབུ་འབྱེད ཨི་ཊ་ལིའི་ནང་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཚོགས་པ། དམིགས་བསལ་ལེ་ཚན། སྨན་ཞབས་འཇིགས་མེད་ཆོས་སྐྱིད་ལགས་ཀྱིས་ཟུངས་ཁྲག་སྦྱིན་གཏོང་སྐོར་ངོ་སྤྲོད། Thursday 05/07/2018 Tashi Lhunpo monks hightlight Tibet issue in Russia Must remember Zhang Shaojie and Panchen Lama as we celebrate 4thofJuly: TL Human Rights Commission 1st Report magazine of Kunphen released in celebration of HHDL’s 83rd birthday Tibet support groups meeting held in Bolzano, Italy HEALTH FEATURE: Health Benefits of Blood Donation by Jigmey Choekyi

ཁ་སང་ཕྱི་ཟླ་ ༦ ཚེས་ ༤ ཨ་རིའི་རང་བཙན་ཉིན་མོ་དང་བསྟུན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་ནས་ཉིན་མོ་དེ་སྲུང་བརྩི་དང་འབྲེལ་རྒྱ་གཞུང་གི་བཙོན་འཇུག་འོག་ཡོད་པའི་རྒྱ་རིགས་ཡི་ཤུའི་ཆོས་དཔོན་ Zhang Shaojie དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་གནད་དོན་བརྗེད་རྒྱུ་མེད་པའི་ཞུ་སྐུལ་གནང་འདུག ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ངོས་ནས་འཕྲུལ་བྱའི་དྲྭ་ལམ་ཐོག་ཨ་རིའི་ནང་སྤྱི་དམངས་ཐོབ་ལེན་པ་གྲགས་ཅན་ Fannie Lou Hamer ལགས་ཀྱིས་མི་ཚང་མར་རང་དབང་མ་ཐོབ་བར་དུ་སུ་གང་ཞིག་རང་དབང་མ་རེད་ཅེས་གསུངས་སྐོར་ལུང་འདྲེན་དང་སྦྲགས། དེ་སྔ་ ༢༠༡༤ ལོར་ཉིན་དེའི་སྐབས་རྒྱ་རིགས་ཡི་ཤུའི་ཆོས་དཔོན་ Zhang Shaojie ལགས་ལ་རྒྱ་གཞུང་གིས་ལོ་ ༡༢ རིང་བཙོན་འཇུག་ཁྲིམས་ཐག་བཅད་པའི་ཉིན་མོ་ཞིག་ཡིན་པ་དང་བསྟུན། ཨ་རིའི་ངོས་ནས་རང་བཙན་ཉིན་མོར་སྲུང་བརྩི་ཞུ་བཞིན་ཡོད་ཀྱང་། རྒྱ་རིགས་ཡི་ཤུའི་ཆོས་དཔོན་ Zhang Shaojie དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་གནད་དོན་བརྗེད་རྒྱུ་མེད་པའི་ཞུ་སྐུལ་གནང་འདུག སྐུ་ཞབས་ Zhang Shaojie ལགས་ནི་རྒྱ་ནག་གི་ Henan ཞིང་ཆེན་གྱི་ Nanle རྫོང་ཁོངས་ནང་ཡི་ཤུའི་རྣམ་དག་ཆོས་ལུགས་ཀྱི་ཆོས་དཔོན་ཞིག་ཡིན་པ་དང་། ཁོང་ནས་དེ་སྔ་བཙོན་པ་གཞན་ཞིག་ལ་རོགས་རམ་གནང་སྟབས་ཕྱི་ལོ་ ༢༠༡༣ ཟླ་ ༡༡ ནང་ཁོང་གི་ཆོས་གྲོགས་གཞན་ ༢༠ དང་ལྷན་འཛིན་བཟུང་བྱས་ནས་ཕྱི་ལོ་ ༢༠༡༤ ཟླ་ ༦ ཚེས་ ༤ ཉིན་ཁོང་ལ་སྤྱི་ཚོགས་གཏན་ལྷིང་དཀྲུག་པ་དང་། ངན་བྱུས་གཤམས་པའི་ནག་ཉེས་འོག་ལོ་ ༡༢ རིང་བཙོན་འཇུག་བྱས་པ་རེད། རྩ་བའི་ཉེ་སྔོན་གྲོས་ཚོགས་འཐུས་མི་ Marco Rubio ལགས་དང་ Chris Smith ལགས་གཉིས་ནས་ཡུལ་དེའི་གྲོས་ཚོགས་ནང་སྐུ་ཞབས་ Zhang Shaojie ལགས་ཀྱི་གནད་དོན་ཐོག་རྟོག་ཞིབ་དགོས་པའི་དགོས་འདུན་བཏོན་ཡོད་པ་རེད།  དེ་བཞིན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་ Jim Mcgovern ལགས་དང་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་བསྟན་འཛིན་རྡོ་རྗེ་ལགས་རྣམ་གཉིས་ནས་ཀྱང་རྒྱ་གཞུང་ལ་༸ཀུན་གཟིགས་པཎ་ཆེན་རིན་པོ་ཆེ་མཆོག་གི་༸སྐུ་ཁམས་གསལ་ཐང་ཡིན་མིན་གྱི་བརྙན་པར་བརྒྱུད་དཔང་རྟགས་མངོན་གསལ་དགོས་པའི་རེ་སྐུལ་གནང་ཡོད་པ་རེད།

རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་གོ་སྒྲིག་གནང་ཐོག་ཟླ་ ༦ ཚེས་ ༢༩ ནས་དབུ་འཛུགས་ཀྱིས་ཟླ་བ་འདིའི་ཚེས་ ༡ བར་ཡོ་རོབ་གླིང་ཆེན་གྱི་ཨི་ཊ་ལིའི་རྒྱལ་ཁབ་ Bolzano ནང་བོད་དོན་རྒྱབ་སྐྱོར་ཚོགས་ཁག་གི་ལྷན་ཚོགས་ཤིག་ཚོགས་འདུག ཐེངས་འའདིའི་ཚོགས་འདུའི་ཐོག་ཇེ་ནི་ཝའི་བོད་ཀྱི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་གཙོས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། ཡུ་རོབ་ཁུལ་དུ་ཡོད་པའི་ནོར་ཝེ་དང་ཨུ་རུ་སུ། ཨིཛ་རེལ།  སུད་སི། ཌེན་མག ཨོ་སི་ཊོ་ལི་ཡ། དེ་བཞིན་དབྱིན་ཡུལ་སོགས་ནས་བོད་མི་དང་བོད་དོན་རྒྱབ་སྐྱོར་བའི་རྒྱལ་ཁབ་ཁག་ ༢༠ ནས་མི་གྲངས་ ༤༨ ལྷག་ནས་ལྷན་ཞུགས་གནང་འདུག ཚོགས་འདུའི་ཐོག་ལྷན་ཞུགས་གནང་མཁན་ཚོས་རྒྱ་ནག་རྒྱལ་ཁབ་དེ་ཆབ་སྲིད་དང་དཔལ་འབྱོར་གྱི་ཆ་ནས་སྟོབས་ཤུགས་ཆེ་རུ་འགྲོ་བཞིན་ཡོད་སྟབས་དེས་རྒྱལ་སྤྱིའི་ཁྲོད་རྒྱལ་ཁབ་ཡོངས་ཀྱི་ཆབ་སྲིད་དང་དཔལ་འབྱོར་ཐད་འཆར་གཞི་དང་ཐག་གཅོད། ལྷག་དོན་འགྲོ་བ་མིའི་ཐོབ་ཐང་ཐད་ཤུགས་རྐྱེན་དང་གནོན་ཤུགས་སྤྲད་པའི་ཐོག་ལས་འགུལ་གང་སྤེལ་དགོས་མིན་དང་། ལོ་རྗེས་མར་བོད་མིའི་རང་དབང་སྒེར་ལངས་གནང་ནས་ལོ་ངོ་ ༦༠ འཁོར་འཁོར་གྱི་ཡོད་པ་དང་བསྟུན་ལོ་འཁོར་མོའི་ནང་བོད་དོན་ལས་འགུལ་སྤེལ་རྒྱུ་མ་ཟད་ཕྱི་ལོ་ ༢༠༢༢ ལོར་རྒྱ་ནག་ནང་དགུན་ཁའི་ཨོ་རྩེད་འགྲན་ཚོགས་གནང་རྒྱུ་ཡིན་པ་ལྟར་དེའི་ཚེ་བོད་དོན་ལས་འགུལ་གང་སྤེལ་དགོས་མིན། བོད་ཀྱི་ཁོར་ཡུག་དང་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ཀྱིས་གཙོས་ཆབ་སྲིད་བཙོན་པ་གཞན་རྣམས་ཆ་རྐྱེན་གང་ཡང་མེད་པའི་ཐོག་འཕྲལ་མར་གློད་བཀྲོལ་དགོས་པ་སོགས་ཀྱི་གནད་དོན་ཁག་ཅིག་གི་ཐད་གོ་བསྡུར་གནང་འདུག དེ་བཞིན་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ཚོགས་འདུའི་ཐོག་སྐུ་མགྲོན་གཙོ་བོར་ཕེབས་པའི་ཇི་ནི་ཝའི་བོད་ཀྱི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་བོད་དོན་བདེན་ཐབས་གསལ་ཆེད་གཉིས་སྨན་དབུ་མའི་ལམ་གྱི་སྲིད་བྱུས་དང་རང་བཙན་གཙང་མ་འདོད་མཁན་གྱི་རྒྱབ་སྐྱོར་བ་གཞིར་བཞག་ནས་དབྱེ་འབྱེད་གནང་རྒྱུ་དེ་གལ་གནད་མིན་པ་དང་། ད་ལྟ་ང་ཚོའི་ངོས་ནས་དོ་སྣང་གནང་ས་གཙོ་བོ་དེ་བོད་མི་རྣམས་ལ་རྒྱ་གཞུང་ནས་དོན་སྙིང་ལྡན་པའི་རང་དབང་ཞིག་ཐོབ་ཐབས་ལ་འབད་དགོས་གལ་ཡིན་པ་གསུངས་འདུག གཞི་རྩའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་ཕྱི་ལོ་ ༢༠༠༠ ལོ་ནས་བཟུང་རྒྱལ་སྤྱིའི་ཐོག་བོད་དོན་རྒྱབ་སྐྱོར་ཚོགས་པ་ཁག་དང་འབྲེལ་མཐུད་ཀྱི་ལས་གཞི་དབུ་འཛུགས་གནང་བ་ལྟར་ད་ལྟའི་ཆར་རྒྱལ་ཁབ་མི་འདྲ་བ་ ༥༠ ལྷག་གི་ནང་ཚོགས་ཁག་ ༢༠༠ ཐམ་པ་ཡོད་ཐོག་བོད་དོན་འབྲེལ་མཐུད་ཀྱི་ལས་དོན་གནང་མུས་རེད།

ཉན་པ།: Listen ཕབ་ལེན། Download ལ་དྭགས་པ་ཚོས་རྒྱ་གར་གནའ་བོའི་རིག་གཞུང་བསྐྱར་གསོའི་ཆེད་དམིགས་བསལ་འགན་ཁུར་དགོས། ཨ་རི་གཙུག་ལག་སློབ་གྲྭར་ནང་དོན་རིག་པ་ཆེད་སློབ་ཡོན་ཨ་སྒོར་འབུམ་ ༢༥ གནང་བ། དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་བའི་འཐུས་མིར་ཐུགས་རྗེ་ཆེ་ཞུས་པ། ཕྱིའི་ཤུགས་རྐྱེན་ལ་གདོང་ལེན་གྱིས་ཁྲིམས་གཏན་འབེབ་བྱས་པ་དེ་རྒྱ་ནག་གཞུང་ལ་དམིགས་པ་བརྗོད་པ། རྒྱ་གར་གྱི་གནས་མཇལ་བ་ཁག་ཅིག་ས་རུད་རྐྱེན་པས་བལ་བོད་ས་མཚམས་སུ་ལུས་པ། Wednesday 04/07/2018 Ladakhis should shoulder special responsibility to revive ancient Indian knowledge: Dalai Lama UIM receives $2.5M for new chair in Tibetan Buddhist Studies London Tibet Representative meets UK Parliamentarians China concerned over Australia Foreign interference bill Kailash Mansarovar yatra: 1600 Indian pilgrims stranded after landslides, rains

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་དེ་རིང་སྔ་དྲོ་རྒྱ་གར་བྱང་ཕྱོགས་ལ་དྭགས་སླེ་རྒྱལ་སར་རྟེན་གཞི་བྱས་པའི་ཇོ་ཁང་དུ་གནས་གཟིགས་མཛད་པ་དང་འབྲེལ། སྐབས་དེར་མགོན་པོ་མཆོག་ནས་སྤྱིར་འཛམ་བུ་གླིང་ནང་བྱམས་པ་དང་སྙིང་རྗེ་བཅས་ཀྱི་བསླབ་བྱ་གནང་མཁན་ཆོས་ལུགས་ཀྱི་སྟོན་པ་མང་པོ་བྱུང་ཡོད་པར་མ་ཟད། ལྷ་ཁང་རྫིག་པོ་དང་།  སྐུ་འདྲ་རྫིག་པོ་ཆོས་ལུགས་ཚང་མར་ཡོད་ཀྱང་། ནང་པ་སངས་རྒྱས་པའི་ཆོས་འདི་ཆོས་ལུགས་གཞན་དང་མི་འདྲ་བར་ལྟ་གྲུབ་ཀྱི་ཐོག་ནས་དངོས་ཡོད་ཀྱི་གནས་སྟངས་དང་མཐུན་པའི་ཐུན་མོང་མ་ཡིན་པའི་ཆོས་ལུགས་ཤིག་ཡིན་པར་ངོ་སྤྲོད་མཛད་པ་མ་ཟད། ཆེད་དུ་བཅར་བའི་ལ་དྭགས་ཀྱི་བླ་ཆེན་ཁག་ཅིག་དང་ཆབ་སྲིད་ཀྱི་མི་སྣ།  ཚོགས་པ་ཁག་གི་དབུ་ཁྲིད་བཅས་མི་གྲངས་ ༢༠༠ སྐོར་ཞིག་ལ་བདག་ཅག་གི་སྟོན་པ་བཅོམ་ལྡན་འདས་ཀྱིས་མཛད་པའི་བཀའ་འགྱུར་པོད་ ༡༠༠ དང་རྒྱ་གར་གྱི་མཁས་པ་ཚོས་མཛད་པའི་བསྟན་འགྱུུར་པོད་ ༢༠༠ ལྷག་ཡོད་པ་དེ་དག་ནི་ཆོས་ལུགས་གཞན་ལ་མེད་པའི་མིའི་སེམས་ལ་འགྱུར་བ་གཏོང་ཐུབ་པའི་རྩ་ཆེའི་གཞུང་ཞིག་ཡིན་པ་ལྟར་དེ་དག་ཐོག་ལ་ངེས་པར་དུ་སློབ་སྦྱོང་བྱེད་དགོས་ཞེས་ལམ་སྟོན་བསྩལ་འདུག དེ་བཞིན་ལ་དྭགས་ནང་པའི་ཚོགས་འདུའི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་མ་འོངས་པར་སླེ་གྲོང་ཁྱེར་ནང་ཡོད་པའི་ཇོ་ཁང་འདི་ཤེས་ཡོན་གྱི་ལྟེ་གནས་ཤིག་ཡོང་ཐབས་སུ་འབད་བརྩོན་གནང་བཞིན་ཡོད་པ་སྙན་སེང་ཞུས་པར་མགོན་པོ་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་བ་དང་ཆབས་ཅིག ང་ཚོ་ནང་པ་ཚོས་རྒྱུན་ལྡན་བྱང་ཆུབ་ཀྱི་སེམས་རང་རྒྱུད་ལ་འཁྲུངས་ཚེ་དགོངས་པ་རྒྱ་ཆེ་བཞེས་ནས་གཞན་ལ་ཁ་ཡོད་ལག་ཡོད་ཕན་ཐོགས་པའི་ཕྱག་ལས་གནང་གལ་ཡིན་པར་ལམ་སྟོན་སོགས་རྒྱ་ཆེ་མཛད་འདུག ལ་དྭགས་པ་ཚོས་མིའི་བདེ་སྐྱིད་ལ་ཕན་ཐོགས་ཡོད་པའི་ནང་པའི་ལྟ་གྲུབ་ཀྱི་ཆོས་དང་མ་འབྲེལ་བའི་བཟང་པོའི་ཡོན་ཏན་དེ་དག་བསྐྱར་གསོ་ཡོང་ཐབས་ཐོག་འབད་བརྩོན་གནང་དགོས་པ་བཀའ་བསྩལ་བ་དང་འབྲེལ། ༸གང་ཉིད་མཆོག་༸སྐུ་སྒེར་གྱི་ངོས་ནས་དེང་སྐབས་རྒྱ་གར་གྱི་ཕ་མེས་ནས་ཡོད་པའི་རིག་གཞུང་བཟང་པོ་དེ་ཆོས་དང་མ་འབྲེལ་བའི་ཐོག་ནས་བསྐྱར་གསོ་ཡོང་ཐབས་གནང་བཞིན་ཡོད་པ་ལྟར། ཉེ་བའི་ཆར་རྒྱལ་ས་ལྡི་ལིའི་ས་གནས་གཞུང་གི་སློབ་གྲྭའི་དགེ་རྒན་ ༥༠༠༠ ལྷག་མཇལ་འཕྲད་གནང་བ་མ་ཟད་དྷ་སའི་མཐོ་རིམ་སློབ་གྲྭའི་དབུ་འཛིན་དང་མཇལ་འཕྲད་གནང་སྐོར་བཀའ་བསྩལ་འདུག དེ་བཞིན་དེ་སྔོན་ཝཱ་རཱ་ཎ་སཱི་ཁུལ་དུ་ཉེ་བའི་རིགས་བདག་ ༡༥༠ ལྷག་མཇལ་འཕྲད་སྐབས་སློབ་གྲྭ་ཁག་ཏུ་དེ་ལྟར་སློབ་ཁྲིད་གནང་ཐུབ་ཚེ་དགེ་མཚན་ཆེན་པོ་ཡོད་པའི་ལམ་སྟོན་མཛད་པ་བཞིན་དངོས་པོ་ཡར་རྒྱས་དང་བསྟུན་སེམས་ཀྱི་ཞི་བདེ་ཡོང་རྒྱུར་ཕན་ཐོགས་ཆེན་པོ་ཡོང་ངེས་ཡིན་པ་རེད། དེས་ན་ལ་དྭགས་མི་མང་ཚོས་རྒྱ་གར་གྱི་གནའ་བོའི་རིག་གཞུང་བསྐྱར་གསོ་ཡོང་ཐབས་སུ་དམིགས་བསལ་འགན་ཁུར་ཡོད་པ་བཞིན་ཤུགས་སྣོན་འཕར་མ་བརྒྱབ་དགོས་ཞེས་བཀའ་ནན་བསྩལ་འདུག མཛད་འཆར་ལ་གཞིགས་ན། སང་ཚེས་ ༥ ཉིན་༸སྐུ་ངལ་གསོ་བཞུགས་མཛད་རྒྱུ་དང་། ཕྱི་ཚེས་ ༦ ཉིན་ལ་དྭགས་ཞི་བའི་ཚལ་ཕོ་བྲང་དུ་ལ་དྭགས་མང་ཚོགས་ནས་གོ་སྒྲིག་ཞུས་པའི་༸གོང་ས་མཆོག་དགུང་གྲངས་ ༨༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་གྱི་མཛད་སྟོན་ཐོག་མགོན་པོ་༸གང་ཉིད་མཆོག་དབུ་བཞུགས་དང་འབྲེལ་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུ་ཡི་ཡོད་པ་རེད། ཚེས་ ༡༠ ནས་ ༡༢ བར་ཉིན་གྲངས་གསུམ་རིང་ཞི་བའི་ཚལ་དུས་འཁོར་ཐང་ཆེན་དུ་ས་གནས་སུ་ཡོད་པའི་དད་ལྡན་མང་ཚོགས་ལ་སྔ་ལོའི་སྤྱོད་འཇུག་ཆེན་མོའི་གསུང་ཆོས་འཕྲོ་སྐྱོང་མཛད་རྒྱུ་མ་ཟད་ཚེས་ ༡༤ ཉིན་མགོན་པོ་༸གང་ཉིད་མཆོག་ལ་དྭགས་གླེ་ནས་ནུབ་ར་ཁུལ་དུ་ཆིབས་ཞལ་བསྒྱུར་གནང་མཛད་དེ་ཁུལ་དེའི་མང་ཚོགས་ལ་སྒོམ་རིམ་བར་པའི་བཀའ་ཆོས་དང། དེ་བཞིན་བསམ་གཏན་གླིང་དགོན་པའི་ཕར་ཕྱིན་དབྱར་ཆོས་ཆེན་མོའི་ཚོགས་མགོན་དུ་དབུ་བཞུགས་མཛད་རྒྱུ་སོགས་ཀྱི་མཛད་འཆར་ཐུགས་གནང་ཁེལ་ཡོད་པ་རེད།

ཨ་རིའི་ Michigan གཙུག་ལག་སློབ་གྲྭར་མཁས་དབང་དགེ་འདུན་ཆོས་འཕེལ་གྱི་ནང་དོན་རིག་པའི་ཆེད་ལས་སློབ་ཡོན་ཨ་སྒོར་འབུམ་ ༢༥ གསོལ་བསྩལ་གནང་འདུག བརྒྱུད་ལམ་ཁག་ཏུ་གནས་ཚུལ་ཐོན་གསལ་ཨ་རི་ California མངའ་སྡེའི་ San francisco གྲོང་ཁྱེར་ནང་རྟེན་གཞི་བྱས་པའི་མཁྱེན་བརྩེ་ཐེབས་རྩ་ཚོགས་པས་ཉེ་ཆར་ Michigan གཙུག་ལག་སློབ་གྲྭའི་ཨེ་ཤ་ཡའི་སྐད་ཡིག་དང་རིག་གཞུང་སྡེ་ཚན་ལ་སངས་རྒྱས་ཀྱི་བསྟན་པ་བཤད་སྒྲུབ་གཉིས་ཀྱི་སྒོ་ནས་དར་ཞིང་རྒྱས་པའི་མཐུན་རྐྱེན་བསྐྲུན་སླད་མཁས་དབང་དགེ་འདུན་ཆོས་འཕེལ་ལགས་དམ་པ་དེ་ཉིད་ཀྱི་མཚན་གནས་ཐོག་སློབ་ཡོན་ཨ་སྒོར་འབུམ་ ༢༥ གསོལ་བསྩལ་གནང་འདུག གཙུག་ལག་སློབ་ཁང་དེའི་འབྲེལ་ཡོད་ཚན་པའི་ངོས་ནས་ཕྱི་ལོ་ ༢༠༡༩ ལོའི་དགུན་དུས་ནས་སློབ་གྲྭ་ཆེན་མོར་ནང་དོན་རིག་པའི་སློབ་ཁྲིད་གནང་ཆེད་ཆེད་ལས་སློབ་དཔོན་ཁག་ཅིག་འདེམས་སྒྲུག་གིས་ཚད་མཐོའི་ཉམས་ཞིབ་གནང་རྒྱུའི་ཐག་གཅོད་བྱུང་འདུག་པ་མ་ཟད་ཉམས་ཞིབ་ཀྱི་གྲུབ་དོན་ཁག་རིམ་བཞིན་རྒྱལ་སྤྱིའི་ཁྲོད་ནང་པའི་སློབ་ཕྲུག་དང་ཁྱད་མཁས་མི་སྣ་ནང་ཁུལ་དབར་གོ་བསྡུར་གནང་རྒྱུ་རེད་འདུག གཙུག་ལག་སློབ་གྲྭ་ཆེན་མོ་དེའི་ཨེ་ཤ་ཡའི་སྐད་ཡིག་དང་རིག་གཞུང་ཚན་པའི་འགན་འཛིན་སློབ་དཔོན་ Donald Lopez ལགས་ཀྱིས་འགྲེལ་བརྗོད་གནང་བར་ Michigan གཙུག་ལག་སློབ་གྲྭ་ཆེན་མོར་གྲགས་ཅན་གྱི་བྱ་དགའ་དེ་ལྟ་བུ་ཞིག་གནང་བ་དེས་གཙུག་ལག་སློབ་གཉེར་ཁང་གི་ལས་འཆར་ཁག་རྒྱ་བསྐྱེད་དང་ཁ་ཕྱོགས་གསར་པ་ཞིག་ཏུ་འཁྲིད་གནང་རྒྱུར་ཕན་ཐོགས་ཆེན་པོ་ཡོད་པ་གསུངས་འདུག མཁྱེན་བརྩེ་ཐེབས་རྩ་ཚོགས་པ་གསར་འཛུགས་གནང་མཁན་རྫོང་སར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་གིས་ནང་ཆོས་ལ་སློབ་གཉེར་དང་སྒོམ་སྒྲུབ་བྱ་རྒྱུ་དེས་མི་སྒེར་དང་སྤྱི་ཚོགས་གཉིས་ཀ་སྲ་བརྟན་དང་མཐུན་སྒྲིལ་ཡོང་སླད་ཕན་ཐོགས་ཆེན་པོ་བྱུང་བཞིན་ཡོད་པ་མ་ཟད། ལྷག་པར་དུ་ད་ལྟའི་གཉན་འཕྲང་ཅན་གྱི་དུས་སྐབས་འདིར་ Michigan གཙུག་ལག་སློབ་གྲྭ་ཆེན་མོས་གཙོས་སློབ་གཉེར་བསྟི་གནས་ཁང་གཞན་ཁག་ཏུ་ནང་པའི་རིག་གཞུང་ཉར་ཚགས་དང་གསོན་པོར་གནས་ཐབས་བྱ་རྒྱུ་དེ་དམིགས་བསལ་གྱི་གནད་ཆེ་ཆགས་ཡོད་པ་གསུངས་འདུག རྩ་བའི་མཁྱེན་བརྩེ་ཐེབས་རྩ་ནི་༸སྐྱབས་རྗེ་རྫོང་སར་མཁྱེན་བརྩེ་རིན་པོ་ཆེས་ཆེད་འཛུགས་གནང་བའི་ཁེ་ལས་མ་ཡིན་པའི་ཚོགས་པ་ཞིག་ཡིན་པ་དང་། ད་བར་རིས་སུ་མ་ཆད་པའི་རྒྱལ་སྤྱིའི་རང་བཞིན་ཅན་དང་འཛམ་གླིང་ཁྱོན་ཡོངས་ནས་སངས་རྒྱས་ཀྱི་ཐབས་དང་ཤེས་རབ་གཉིས་ལ་སློབ་གཉེར་དང་སྒོམ་སྒྲུབ་གནང་བཞིན་པའི་གང་ཟག་སྤྱི་སྒེར་གཉིས་ཀ་ལ་རོགས་སྐྱོར་གནང་དང་གནང་མུས་ཡིན་པ་མ་ཟད། རྒྱལ་ཁབ་འདྲ་མིན་ནང་ཡོད་པའི་གཙུག་ལག་སློབ་གྲྭ་གལ་ཆེ་ཁག་ཏུ་ནང་ཆོས་ཀྱི་སློབ་སྦྱོང་གནང་རྒྱུའི་ཆེད་ཆ་རྐྱེན་གཏན་འཇགས་ཤིག་བསྐྲུན་ཐབས་གནང་བཞིན་པའི་ཁྲོད་ཨ་རི་ California གཙུག་ལག་སློབ་གྲྭ་དང་འཇར་མ་ནི་ Humburg གཙུག་ལག་སློབ་གྲྭ་གཉིས་ནང་ནང་ཆོས་ཀྱི་སློབ་སྦྱོང་གནང་སའི་ཆ་རྐྱེན་ཞིག་བསྐྲུན་ཡོད་པ་རེད། ལྷག་པར་དུ་ཐེབས་རྩ་ཁང་དེས་ཕྱི་ལོ་ ༢༠༠༡ ལོ་ནས་བཟུང་རྒྱལ་ཁབ་ ༣༠ ལྷག་གི་ནང་ཚོགས་སྒེར་མང་པོ་ཞིག་ལ་རོགས་རམ་གྱི་ལས་གཞི་འདྲ་མིན་སྤེལ་བའི་ཁོངས་ནས་གཙོ་གྲས་གཅིག་ནི་གསུང་རབ་ཉར་ཚགས་དང་བཀའ་བསྟན་སྒྲ་སྒྱུར་གནང་རྒྱུ་ཡིན་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་ལ་དྭགས་ཞི་བའི་ཚལ་ཕོ་བྲང་དུ་༸ཞབས་སོར་བདེ་བར་འཁོད་པ། ཨ་རི་ནང་མེ་ལོང་གསར་ཁང་གིས་བོད་དོན་བགྲོ་གླེང་གནང་འདུག དགེ་བཤེས་བློ་བཟང་བསམ་གཏན་ལགས་འབྲས་སྤུངས་བློ་གླིང་གི་མཁན་ཐོག་༨༢ པར་ཁྲི་འདོན། བོད་ཀྱི་དཔེ་མཛོད་ཁང་དུ་རྩོམ་སྒྱུར་ཟབ་སྦྱོང་ཐེངས་ ༡༣ པ་དབུ་འཛུགས། དམིགས་བསལ་ལས་རིམ། གཞས་པ་རཱ་ཛྷད་ཏ་མངྒ་ལགས་ཀྱིས་༸སྐུའི་འཁྲུངས་སྐར་ཆེད་དུ་བླངས་བའི་གླུ་གཞས། Tuesday 03/07/2018 Dalai Lama arrives to a rousing welcome in Leh, Ladakh Mirror Media hosts panel discussion on Tibet Geshe Lobsang Samten appointed abbot of Drepung Loseling Monastery 13th Intensive course on Tibetan language and Buddhist Studies begins MUSIC FEATURE: Shillong artist Razat Tamang pays tribute to His Holiness the Dalai Lama /ul>

དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡི་ལིའི་མཛད་འཆར་ཁག་ལེགས་པར་གྲུབ་ནས་རྒྱ་གར་ཇ་མུ་ཀཤྨིར་མངའ་སྡེའི་ལ་དྭགས་སླེ་གྲོང་ཁྱེར་དུ་༸ཞབས་སོར་བདེ་བར་འཁོད་གནང་འདུག ཞི་བའི་ཚལ་ཕོ་བྲང་དུ་མགོན་པོ་༸གང་ཉིད་ལ་ཕེབས་བསུའི་སྣེ་ལེན་མཛད་སྒོ་སྟབས་བདེ་ཞིག་གོ་སྒྲིག་ཞུས་པའི་ཐོག་༸གང་ཉིད་མཆོག་ནས་ད་རེས་སླར་ཡང་ལ་དྭགས་སླེ་རུ་༸ཞབས་སོར་འཁོད་ཐུབ་པ་དེ་ཡག་པོ་བྱུང་ཞེས་བཀའ་བསྩལ་བ་དང་། ལ་དྭགས་མི་མང་རྣམས་ཀྱི་གཡོ་བ་མེད་པའི་དད་པ་དང་དམ་ཚིག་ལ་ཡི་རང་བསྔགས་བརྗོད་གནང་བ་མ་ཟད་ལྷག་པར་དུ་འདས་པའི་དུས་ཚོད་དང་ད་ལྟའི་གནས་སྐབས་ལ་གཞིགས་ན་ལ་དྭགས་དེ་དཔལ་འབྱོར་གྱི་ཐོག་ནས་མི་མང་གི་འཚོ་བ་ཡར་རྒྱས་ཆེན་པོ་ཕྱིན་ཡོད་པ་དང་བསྟུན། སོ་སོའི་ཆོས་དང་རིག་གཞུང་གི་བག་ཆགས་དེ་མ་ཡལ་བར་དགོན་པ་ཁག་འཛུགས་སྐྲུན་ཡར་རྒྱས་དང་སློབ་གཉེར་བཅས་ཕྱོགས་གཉིས་ཀ་ནས་ཡར་རྒྱས་ཕྱིན་ཡོད་པ་དེ་ལེགས་པོ་བྱུང་འདུག་ཅེས་བཀའ་བསྩལ་མཛད་འདུག ད་རེས་སླར་ཡང་མགོན་པོ་༸གང་ཉིད་ཁུལ་དེར་ཕེབས་རྒྱུ་བྱུང་བར་ཐུགས་དགྱེས་ཚོར་ཆེན་པོ་དང་སྦྲགས་ཏེ་ཐུགས་རྗེ་ཆེ་ཞེས་བཀའ་བསྩལ་ཡོད་པ་རེད།   ཞི་བའི་ཚལ་གྱི་ཕོ་བྲང་དུ་གོ་སྒྲིག་ཞུས་པའི་ཕེབས་བསུའི་མཛད་སྒོ་ཐོག་དགའ་ལྡན་ཁྲི་ཟུར་རི་རྫོང་སྲས་རིན་པོ་ཆེ་མཆོག་གིས་དབུས་པའི་འབྲི་གུང་ཆེ་ཚང་རིན་པོ་ཆེ་མཆོག ལ་དྭགས་ཀྱི་མཁན་པོ་བླ་སྤྲུལ་ཁག་ཅིག འབྲེལ་ཡོད་ཆིབས་བསྒྱུར་གོ་སྒྲིག་གནང་མཁན་ཚོ། དེ་བཞིན་ས་གནས་ཀྱི་དཔོན་རིགས་ཁག་ཅིག་བཅས་ཁྱོན་མི་གྲངས་ ༡༠༠ སྐོར་ཞིག་འདུ་འཛོམས་བྱུང་འདུག སྐབས་དེར་མགོན་པོ་༸གང་ཉིད་མཆོག་ནས་ཉེ་ཆར་རྒྱལ་ས་ལྡི་ལིའི་ནང་ཧི་མཱ་ལ་ཡའི་རིགས་རྒྱུད་ཁག་ཏུ་ཡོད་པའི་དགོན་པ་ཁག་ཤེས་ཡོན་གྱི་བསྟི་གནས་སུ་བསྒྱུར་ཐབས་འབད་བརྩོན་གནང་མཁན་གྱི་ཚོགས་མི་དང་མཇལ་འཕྲད་བྱུང་སྐབས་ཡི་རང་བསྔགས་བརྗོད་གནང་སྐོར་བཀའ་བསྩལ་བ་དང་ཆབས་ཅིག་ཏུ་ནང་པ་སངས་རྒྱས་པའི་ཆོས་དེ་དེང་དུས་ཀྱི་ཚན་རིག་དང་ཟུང་དུ་འགྲོ་ཐུབ་པའི་མིའི་དགོས་མཁོ་དང་མཐུན་པའི་ཆོས་ཤིག་ཡིན་སྐོར་ལམ་སྟོན་རྒྱ་ཆེ་མཛད་འདུག གནས་ཚུལ་རྒྱས་པ་གཤམ་ལ་གསན་རོགས།

ཁ་སང་བཞུགས་སྒར་དུ་རྟེན་གཞི་བྱས་པའི་བོད་ཀྱི་དཔེ་མཛོད་ཁང་དུ་རྩོམ་སྒྱུར་ཟབ་སྦྱོང་ཐེངས་ ༡༣ པ་དབུ་འབྱེད་གནང་བ་དང་འབྲེལ། སྐུ་མགྲོན་གཙོ་བོ་མཁས་དབང་ངག་དབང་ཕུན་ཚོགས་ལགས་ཀྱིས་སྔོན་བྱོན་ལོ་ཙཱ་བ་རྣམས་ཀྱིས་སྐུ་ལས་སྐྱོན་པ་ལྟར་ད་ལྟའི་མི་རབས་གསར་པ་ཚོས་ཀྱང་དེ་བཞིན་གནང་གལ་ཡིན་པ་གསུངས་སོང་། རྩོམ་སྒྱུར་ཟབ་སྦྱོང་ཐེངས་  ༡༣ པའི་དབུ་འབྱེད་ཀྱི་མཛད་སྒོ་དེའི་ཐོག་ཨ་རིའི་ཁེ་ལི་ཕོར་ནི་ཡ་མངའ་སྡེའི་Fullerton གྲོང་ཁྱེར་དུ་རྟེན་གཞི་བྱས་པའི་ཁེ་ལི་ཕོར་ནི་ཡ་གཙུག་ལག་སློབ་གཉེར་ཁང་གི་སློབ་དཔོན་ངག་དབང་ཕུན་ཚོགས་ལགས་ཀྱིས་གཙོས་པའི། དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས་དང་དྲུང་ཆེ་དང་ལས་བྱེད་རྣམ་པ། དེ་བཞིན་ཕྱོགས་མཐའ་ཁག་ནས་ཕེབས་པའི་ན་གཞོན་སློབ་མ་ཕོ་མོ་༤༠ བཅས་ལྷན་འཛོམས་གནང་འདུག སྐབས་དེར་ངག་དབང་ཕུན་ཚོགས་ལགས་ཀྱིས་སྔར་བོད་ཀྱི་ལོ་ཙཱ་བ་མང་དག་ཞིག་དཀའ་བ་ཁྱད་དུ་གསད་ནས་རྒྱ་གར་འཕགས་པའི་ཡུལ་དུ་ཕེབས་ནས་སངས་རྒྱས་ཀྱི་བཀའ་བསྟན་རྣམས་ཡོངས་སུ་རྫོགས་པ་བོད་བསྒྱུར་ཡོད་པ་དང་སྐབས་དེ་དང་དེའི་ཚེ་མཐུན་རྐྱེན་རྣམས་ད་ལྟ་ལྟར་མེད་པ་ཞིག་ཡིན་པ་དེ་ལྟར་ཡང། ད་ལྟའི་མི་རབས་གསར་པ་ཚོར་དེང་རབས་དང་མཐུན་པའི་མཐུན་རྐྱེན་ཆ་ཚང་བ་ཞིག་ཡོད་སྟབས། རྩོམ་སྒྱུར་ཐོག་དམིགས་བསལ་འབད་བརྩོན་བྱེད་དགོས་གལ་ཡིན་པ་གསུངས་སོང་། ད་དུང་ཁོང་གིས་ཡིག་བསྒྱུར་ལེགས་པོ་ཞིག་ཡོང་བར་ངེས་པར་དུ་བོད་དབྱིན་སྐད་ཡིག་གཉིས་ཀའི་གནས་ཚད་དེ་རང་སྐྱ་འཕེལ་བའི་ལེགས་པོ་དགོས་གལ་ཡིན་སྐོར་འགྲེལ་བརྗོད་གནང་བ་དང་ཆབས་ཅིག བོད་ཀྱི་སྐད་ཡིག་འདི་སྐད་ཡིག་གཞན་ནས་ཚུར་ཕབ་བསྒྱུར་གནང་རྒྱུའི་སྐད་ཡིག་ཧ་ཅང་ཕྱུག་པོ་ཡོད་པའི་སྐད་དམིགས་བསལ་བ་ཞིག་ཡིན་སྐོར་གསུངས་སོང་། རྩ་བའི་བོད་ཀྱི་དཔེ་མཛོད་ཁང་ནས་བོད་པའི་སྤྱི་ཚོགས་ཁྲོད་དུ་རྩོམ་སྒྱུར་ཆེད་ལས་དོན་གཉེར་ཅན་ལ་ཆེད་དམིགས་ཀྱིས་ཕྱི་ལོ་ ༢༠༠༦ ནས་རྩོམ་སྒྱུར་ཟབ་སྦྱོང་དེ་དབུ་བཙུགས་པ་ཞིག་ཡིན་པ་དང་། ལོ་ལྟར་ཟླ་ ༧ པ་ནས་ཟླ་ ༩ པའི་བར་རིན་མེད་ཐོག་གནང་བའི་ཟབ་སྦྱོང་དེའི་ཁྲོད་ད་བར་ཁྱོན་སློབ་མ་ ༣༠༠ ལྷག་ནས་མཉམ་བཞུགས་ཐུབ་པ་བྱུང་འདུག་པ་དང་། ཟབ་ཁྲིད་ཀྱི་སློབ་ཚན་ཁག་ནི་བོད་ཡིག  ནང་ཆོས། དབྱིན་ཡིག་དང་རྩོམ་སྒྱུར་གྱི་ཐབས་བྱུས་སོགས་ཡིན་པ་མ་ཟད་ལྷག་དོན་ཆེད་ལས་མི་སྣ་གདན་ཞུས་ཐོག་གསུང་བཤད་དང་བགྲོ་གླེང་གི་ལས་རིམ་ཀྱང་བང་སྒྲིག་གི་ཡོད་པ་རེད། འདི་ག་རླུང་འཕྲིན་ཁང་གིས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་སུ་ཟབ་སྦྱོང་དེའི་སྐོར་བཅར་འདྲི་ཞུས་སྐབས་རྩོམ་བསྒྱུར་ཟབ་སྦྱོང་གི་དགོས་དམིགས་གཙོ་བོ་ནི་བོད་ཀྱི་སྐད་ཡིག་དང་།  ནང་ཆོས། རིག་གཞུང་ལ་སློབ་གཉེར་གནང་རྒྱུ་དེ་ཡར་རྒྱས་གཏང་རྒྱུར་དམིགས་པ་ཞིག་ཡིན་པ་དང་། རྒྱལ་སྤྱིའི་ཁྲོད་དུ་བོད་མི་རིགས་ཀྱི་རྩ་ཆེ་བའི་ཆོས་དང་རིག་གཞུང་རྣམས་འགྲེལ་བརྗོད་བྱ་རྒྱུའི་ཆེད་དབྱིན་སྐད་དེ་མེད་དུ་མི་རུང་བ་ཞིག་ཡིན་སྟབས་དེ་དག་ཀྱང་སློབ་ཁྲིད་གནང་གི་ཡོད་སྐོར་གསུངས་པ་མ་ཟད། ཟབ་སྦྱོང་དེར་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་པ་དང་། མཉམ་ཞུགས་གནང་མཁན་ཚོའི་ངོས་ནས་ཀྱང་ས་མིག་ཡོད་པ་ལས་མང་བ་ཡོང་གི་འདུག་པ་མ་ཟད་ད་དུང་ཡང་སྒུག་ཐོ་ནང་སློབ་མ་ཁ་ཤས་ཤིག་ཚུད་རེ་གནང་བཞིན་ཡོད་སོགས་གསུངས་སོང་། ཐེངས་འདིའི་ཟབ་སྦྱོང་ནང་མཐོ་སློབ་འདྲ་མིན་གྱི་སློབ་མ་དང་། གདན་ས་ཁག་གི་དགེ་འདུན་པ། དེ་བཞིན་འབྲུག་བཅས་ནས་ཤེས་ཡོན་གྱི་རྒྱབ་ལྗོངས་མི་འདྲ་བའི་སློབ་མ་གྲངས་ ༤༠ ནས་ལྷན་ཞུགས་གནང་འདུག