Monthly Archives: February, 2020

བཞུགས་སྒར་དྷརྨ་ས་ལ་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བར་བོད་དོན་གོ་རྟོགས་ཀྱི་རྐང་འཁོར་སྐོར་སྐྱོད་གནང་མཁན་རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ Sandesh Meshram ཁ་ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་འབྱོར་འདུག གསར་འགོད་པས་དེ་རིང་སྔ་དྲོ་སྐུ་ཞབས་བསམ་གཏན་ཡེ་ཤེས་ལགས་སུ་བཀའ་འདྲི་ཞུས་པར་ ཁོང་གིས་འདས་པའི་ཟླ་བ་གཉིས་ལྷག་ཙམ་གྱི་རིང་མངའ་སྡེ་འདྲ་མིན་ ༡༠ ཙམ་དང་གྲོང་ཁྱེར་མང་དག་ཅིག་ནང་ཁྱོན་རྒྱང་ཐག་སྤྱི་ལེ་ ༦༠༦༥ བར་རྐང་འཁོར་སྐོར་སྐྱོད་གནང་ཡོད་པ་དང་ཁ་ཉིན་ནས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་ཕེབས་འབྱོར་གྱིས་ཁུལ་དེའི་ནང་གི་ཏཱ་ལའི་བླ་མ་མཐོ་སློབ་དང་རྒྱ་གར་གྱི་མཐོ་རིམ་སློབ་གཉེར་ཁང་ཁག་ཅིག་གི་ནང་བོད་དང་འབྲེལ་བའི་གསུང་བཤད་གནང་ཡོད་སྐོར་གསུངས་སོང་། ཁོང་གིས་ད་བར་རྒྱ་གར་མང་ཚོགས་དང་བརྒྱུད་ལམ་ཁག་ནས་བོད་དོན་ཆེད་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བར་དོ་སྣང་དང་ངོས་ལེན་ཡག་པོ་གནང་སོང་བ་མ་ཟད། བོད་མི་འདུ་སྡོད་ཁག་ཏུ་འབྱོར་སྐབས་ས་གནས་ཀྱི་གཞུང་དང་གཞུང་འབྲེལ་མིན་པའི་བོད་མིའི་ཚོགས་སྒེར་ཁག་ནས་ཁོང་གིས་ལས་འགུལ་ལ་ཆེ་བསྟོད་ཀྱི་དགའ་བསུའི་སྣེ་ལེན་གང་ལེགས་གནང་ཡོད་པ་རེད། འོན་ཀྱང་སྐུ་ཞབས་བསམ་གཏན་ཡེ་ཤེས་ལགས་རྒྱ་གར་ལྷོ་ཕྱོགས་ཁུལ་དུ་འབྱོར་སྐབས་ཡུལ་དེར་སྤྱོད་བཞིན་པའི་སྐད་ཡིག་དེ་དག་ཤེས་ཀྱི་མེད་པར་བརྟེན་ཁོང་ལ་དེ་འབྲེལ་གོ་བརྡ་མ་འཕྲོད་པའི་དཀའ་ངལ་ཕྲན་བུ་འཕྲད་འདུག གཞི་རྩ་སྐུ་ཞབས་ Sandesh Meshram ལགས་སང་ཉིན་ཧུབ་ལི་བརྒྱུད་གྲོང་ཁྱེར་ལྔའི་ནང་དང་དེ་ནས་མོན་གྷོ་འདོད་རྒུ་གླིང་བོད་མིའི་གཞིས་སྒར་བར་རྐང་འཁོར་སྐོར་སྐྱོད་གནང་རྒྱུ་ཡིན་པ་དང་། ཉེ་སྔོན་ཁོང་ལ་གློ་བུར་དུ་ནད་མནར་རྐྱེན་པས་ཟླ་བ་འདིའི་ཚེས་ ༢༡ ཉིན་ལས་འགུལ་དེ་མཇུག་སྒྲིག་གནང་གི་ཡོད་པ་རེད།

ཕྱི་ཟླ་ ༢ ཚེས་ ༡༢ ཉིན་རྒྱ་གར་རྒྱལ་དི་ལླཱིར་ཚོགས་པའི་ ༢༠༢༠ ལོའི་ Mr and Miss Glory of India ཞེས་པའི་མཛངས་མའི་འགྲན་བསྡུར་ནང་བོད་རིགས་བེུད་མེ་ཏོག་ལྷ་མཛེས་ལགས་ལ་ Miss Himalaya Global བྱ་དགའ་ཐོབ་འདུག Aman Gandhi གློག་བརྙན་བཟོ་སྐྲུན་ཁང་གི་གོ་སྒྲིག་འོག་ཉེ་ཆར་དི་ལླླི་གསར་པར་ཚོགས་པའི་མཛངས་མའི་འགྲན་བསྡུར་ནང་མེ་ཏོག་ལྷ་མཛེས་ལགས་ནས་མཉམ་ཞུགས་གནང་བ་ལྟར་ཁོང་ལ་ Miss Himalaya Global བྱ་དགའ་ཐོབ་འདུག འགྲན་བསྡུར་དེའི་ནང་རྒྱ་གར་གྱི་མངའ་སྡེ་འདྲ་མིན་དང་བལ་ཡུལ་བཅས་ནས་བུ་དང་བུ་མོ་རང་ལོ་ ༡༨ ནས་ ༣༠ བར་དང་གཟུགས་པོའི་རིང་ཐུང་ཕི་ཊི་ ༥་༣ ནས་ ༥་༡༡ བར་ཡིན་པ་བཅས་ནས་མཉམ་ཞུགས་གནང་ཡོད་པ་རེད། སྐབས་དེར་འགྲན་བསྡུར་གྲུབ་མཚམས་སུ་གསར་འགོད་པས་བཅར་འདྲི་ཞུས་པའི་ཁྲོད་ལས་རིམ་གོ་སྒྲིག་གནང་མཁན་གྱི་ངོས་ནས་ Mr and Miss Glory of India ཞེས་པའི་འགྲན་དེ་གློག་བརྙན་བཟོ་སྐྲུན་ཁང་དེས་ཕྱི་ལོ་ ༢༠༡༢ ལོ་ནས་དབུ་འཛུགས་གནང་བ་ཞིག་ཡིན་པ་དང། དེའི་ནང་མཛངས་མའི་འགྲན་བསྡུར་གཞན་ལྟར་གྱོན་ཆས་ཉུང་ཉུང་སྤྲས་མི་དགོས་པའི་དམིགས་གསལ་གྱི་ཁྱད་ཆོས་ཡོད་པ། དེ་བཞིན་འགྲན་བསྡུར་ཐོག་དེ་སྔ་ཨིན་ཇིའི་ Hollywood བེུད་ནས་ཀྱང་མཉམ་ཞུགས་གནང་ཡོད་པར་མ་ཟད། ཐེངས་འདིའི་འགྲན་བསྡུར་ཐོག་བོད་ཀྱི་བེུད་ཅིག་ནས་མཉམ་ཞུགས་གནང་ཡོད་པར་གསུངས་འདུག དེ་རྗེས་མེ་ཏོག་ལྷ་མཛེས་ལགས་ཀྱིས་གསར་འགོད་པར་ཁོང་མོ་ད་རེས་འགྲན་བསྡུར་དེའི་ནང་མཉམ་ཞུགས་གནང་རྒྱུའི་གོ་སྐབས་གནང་བ་དེ་ནི་བོད་དོན་ལ་རྒྱབ་སྐྱོར་གནང་བ་ཅིག་དང་གོ་སྐབས་དེ་ལྟར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་ཏུ་ཁོང་ལ་བྱ་དགའ་ཐོབ་པར་དགའ་ཚོར་ཆེན་པོ་བྱུང་ཞེས་གསུངས་འདུག རྩ་བའི་མེ་ཏོག་ལྷ་མཛེས་ལགས་ནི་ཕྱི་ལོ་ ༡༩༩༩ ལོར་བོད་ནས་རྒྱ་གར་དུ་འབྱོར་རྗེས་སུ་ཇཱ་བོད་ཁྱིམ་སློབ་གྲྭར་སློབ་ཞུགས་གནང་ཡོད་པ་དང་། རྗེས་སུ་ཁོང་གི་པཱ་ལགས་ཀྱི་གཟུགས་གཞི་བདེ་མིན་རྐྱེན་པས་བོད་ལ་ཕྱིར་ལོག་གནང་དགོས་བྱུང་ཡོད་སྟབས་བོད་ནང་ལོ་གསུམ་རིང་བཞུགས་འདུག སྐབས་དེར་རྒྱ་གཞུང་གིས་ཁོང་ལ་དོགས་གཞི་འདྲ་མིན་བྱས་པར་བརྟེན་ཟླ་བ་གཅིག་དང་ཕྱེད་ཀ་ཙམ་གྱི་རིང་བཙོན་འཇུག་བྱས་མྱོང་འདུག ཕྱི་ལོ་ ༢༠༠༤ ལོར་ཁོང་རྒྱ་གར་དུ་ཐེངས་གཉིས་པ་ཕེབས་རྗེས་བཞུགས་སྒར་དྷརྨ་སཱ་ལཱར་ཕྱི་ལོ་ ༢༠༠༦ ལོའི་བོད་ཀྱི་མཛངས་མའི་འགྲན་བསྡུར་ནང་ཞུགས་མྱོང་ཡོད་པ་རེད།

ཉན་པ།: Listen ཕབ་ལེན། Download རྔ་བ་ཁྱུང་མཆུ་རྫོང་གི་ན་གཞོང་ཆེན་མོར་མེ་སྐྱོན་ཚབས་ཆེན་བྱུང་འདུག བསྟན་འཛིན་རབ་གསལ་ལགས་ཀྱི་གདོན་འདྲེའི་བརྙན་ཐུང་ལ་བྱ་དགའ་ཐོབ་པ། སྲིད་སྐྱོང་གིས་བོད་དོན་རྒྱབ་སྐྱོར་གྱི་ཁྲིམས་འཆར་འདོན་མཁན་གྲོས་འཐུས་དང་མཇལ་འཕྲད་ཀྱིས་ཐུགས་རྗེ་ཆེ་ཞུས་པ། སྤྱི་འཐུས་ཚོགས་གཙོ་མཆོག་ལྷོ་ཨ་ཕི་རི་ཀའི་སྲིད་འཛིན་གྱི་རྒྱལ་ཡོངས་གསུང་བཤད་ཐོག་ལྷན་ཞུགས། དཀར་མཛེས་ཁུལ་དུ་ཏོག་དབྱིབས་རིམས་ནད་ཕོག་པའི་ནད་པ་དྲུག་ཇེ་མང་། བཙན་བྱོལ་བོད་མིའི་གནས་སྟངས་ངོ་སྤྲོད། སུད་སི་ནང་གི་ཉམ་ཆུང་རོགས་རམ་སྤྱི་ཚོགས་ཞབས་ཞུ་ཁང་གི་སྐོར། Friday 14/02/2020 Severe fire incident in Ngaba, govt says situation dealt with but locals say other wise Young Tibetan film maker’s horror movie wins awards at international film festival Sikyong meets Speaker Pelosi, Congressman Jim Mcgovern and other US leaders Speaker Pema Jungney attends ‘2020 State of the National Address ‘in South Africa Six new COVID 19 infected case in Kardze bring the total to 43 in the area DIASPORA FEATURE: Nyamchung Rokram Social Service in Switzerland

རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རི་རྒན་ན་གཞོང་ལ་མེ་སྐྱོན་ཚབས་ཆེན་བྱུང་སྟེ་རྩྭ་ས་མུའུ་ཁྲི་ཚོ་བརྒལ་བ་མེར་འཚིགས་ནས་གནོད་སྐྱོན་ཆེན་པོ་ཐེབས་ཡོད་པ་ད་དུས་ལྟའང་མེ་འབར་བཞིན་པ་རེད་འདུག ཁ་སང་ཕྱི་ཚེས་ ༡༢ ཉིན་བོད་ནང་གི་ཉིན་རྒྱབ་ཆུ་ཚོད་ ༡ ཙམ་ལ་རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རི་རྒན་ན་གཞོང་ལ་མེ་སྐྱོན་ཚབས་ཆེན་ཤོར་ཡོད་པ་དང་ཡུལ་མི་རྣམས་ཀྱིས་འཕྲལ་དུ་མེ་གསོད་ཐབས་གནང་ཡོད་ཀྱང་རྩྭ་ས་ཆེ་དྲག་པ་དང་རླུང་གཡུག་དྲག་པར་བརྟེན་མེ་གསོད་ཐུབ་མི་འདུག རྒྱ་ནག་སྲིད་གཞུང་གིས་གནས་ཚུལ་སྤེལ་བར་རྫོང་སྲིད་གཞུང་གི་ཉེན་རྟོག་པ་དང་མེ་གསོད་རུ་ཁག་གི་རོགས་འདེགས་འོག་མེ་བསད་ཡོད་པར་འགྲེལ་བརྗོད་བྱས་ཡོད་ནའང་། ཁྱུང་མཆུ་རྫོང་གི་ཡུལ་མི་རྣམས་ཀྱིས་གནས་ཚུལ་དེ་རྫུན་མ་ཡིན་པ་ཕྱིར་བསྒྲགས་གནང་ཡོད་པའི་ཁྲོད་ཡུལ་མི་ཞིག་གིས་ཁོང་གི་སྐད་འཕྲིན་གྱི་པར་མཛོད་དུ་སྲིད་གཞུང་གིས་མེ་བསད་ཡོད་པའི་གསར་འགྱུར་དང་ད་ལྟ་འབར་བཞིན་པའི་རྩྭ་ཐང་གི་པར་གཉིས་བཞག་སྟེ་སྲིད་གཞུང་གིས་ཀྱང་རྫུན་བཤད་པར་ཟུར་ཟ་གནང་ཡོད་པ་དང་མི་གཞན་ཞིག་གིས་སྲིད་གཞུང་གི་གསར་འགྱུར་ཚང་མ་རྫུན་མ་ཡིན་པས་དེང་སང་གི་རྒྱ་ནག་ནང་གི་ཏོག་དབྱིབས་ནད་རིམས་སྐོར་གྱི་གསར་འགྱུར་རྣམས་ཀྱང་རྫུན་མ་ཡིན་པར་བརྟེན་ཀུན་གྱིས་གཟབ་གཟབ་བྱོས་ཞེས་སྤེལ་འདུག  ཁྱུང་མཆུ་རྫོང་གི་ཡུལ་མི་ཞིག་གིས་འདི་གར་གསར་འགྱུར་མཁོ་སྤྲོད་བྱས་པར་མེ་སྐྱོན་ཤོར་ཚད་ཧ་ཅང་ཚབས་ཆེན་ཡིན་པ་དང་། ལྷག་པར་དུ་ན་གཞོང་ཆེན་པོ་དང་རྩྭ་ཡག་པོ་ཡོད་པས་མེ་གསོད་རྒྱུ་ཧ་ཅང་ཁག་པོ་ཆགས་ཡོད་རབས་དང་། དེ་བཞིན་ཁ་སང་ས་ཁྱོན་མུའུ་ ༡༠༠༠༠ ལྷག་འཚིག་ཚར་བར་བརྗོད་བཞིན་པ་དང་དེ་རིང་ད་དུང་མེ་འབར་བཞིན་ཡོད་པས་ས་ཁྱོན་ཁ་སང་ལས་ལྡབ་འགྱུར་འཚིག་འདུག མེ་སྐྱོན་བྱུང་རྗེས་ཁུལ་དང་རྫོང་མེ་གསོད་རུ་ཁག ས་གནས་མི་མང་གིས་ཀྱང་ཧུར་ཐག་གིས་མེ་གསོད་ཐབས་བྱེད་ཀྱི་ཡོད་སྟབས་མི་དང་ཕྱུགས་ཟོག་ལ་གནོད་སྐྱོན་གང་ཡང་བྱུང་མེད་ཀྱང་། མེ་གསོད་རྒྱུ་དཀའ་ལས་ཆེན་པོ་ཆགས་ཡོད་སྐོར་བརྗོད་པ་དང་འབྲེལ་ཏེ་ད་ལྟའི་ཆར་མེ་ཤོར་བའི་རྒྱུ་རྐྱེན་གང་ཡིན་ཤེས་རྟོགས་ཐུབ་མེད་སྐོར་བརྗོད་སོང་། གསར་འགོད་པས་ཕ་ཡུལ་ཁྱུང་མཆུ་ནས་ཡིན་པའི་བྱེས་བཞུགས་བོད་མི་ཞིག་ལ་བཅར་འདྲི་ཞུས་པར་ད་ལྟའི་ཆར་ཤེས་རྟོགས་མེད་ཚུལ་དགསུངས་པ་དང་འབྲེལ་ཏེ་ཐེངས་འདིའི་མེ་སྐྱོན་ཁྲོད་ས་ཁྱོན་ཆེ་པོ་འཚིགས་ཡོད་པར་བརྟེན་དཔྱིད་ངན་འདིར་འབྲོག་པ་མང་ཚོགས་ཀྱི་ཕྱུགས་ཟོག་ལ་གཟན་ཆག་གི་དཀའ་ངལ་ཆེན་པོ་འཕྲད་རྒྱུ་ཡིན་པར་ངོ་སྤྲོད་གནང་ཡོད།

ཨོ་སི་ཊོ་ལི་ཡ་གནས་བཞུགས་བོད་རིགས་བསྟན་འཛིན་རབ་གསལ་ལགས་ཀྱིས་ཕྱོགས་བསྒྲིགས་གནང་བའི་གདོན་འདྲེའི་བརྙན་ཐུང་ ༡༣༠ ཞེས་པར་ཆེ་བསྟོད་ཀྱི་བྱ་དགའ་ཐོབ་འདུག དེ་ཡང་རབ་གསལ་ལགས་ཀྱི་སྐར་མ་ ༨ ལྷག་ཡོད་པའི་གདོན་འདྲེའི་བརྙན་ཐུང་ ༡༣༠ ཞེས་པར་ Independent Shorts Awardsཞེས་རང་དབང་ཅན་གྱི་བརྙན་ཐུང་གཟེངས་རྟགས་ལས་ཟངས་ཀྱི་རྟགས་མ་ཐོབ་པ་དང་དེ་བཞིན་ Indie Short Fest གྱི་སློབ་མ་འཁྲབ་ཁྲིད་པ་རྩེ་ཕུད་དང་ Hollywood Blood Horror Fest དང་ Indiex Film Fest ཞེས་པ་ནས་བརྙན་ཐུང་ལེགས་ཤོས་ཁོངས་སུ་བདམས་ཐོན་བྱུང་འདུག སྤྱིར་གློག་བརྙན་དུས་སྟོན་ཐོག་རྒྱལ་ཁབ་ ༢༣ ལྷག་ཙམ་གྱི་གློག་བརྙན་བཟོ་སྐྲུན་པས་བརྗོད་གཞི་འདྲ་མིན་ཐད་གློག་བརྙན་བཟོས་ཏེ་མཉམ་ཞུགས་གནང་གི་ཡོད་པ་རེད་འདུག གཞི་རྩའི་ ༡༣༠ ཞེས་པའི་གདོན་འདྲེའི་བརྙན་ཐུང་དེ་གསར་དུ་འབྱོར་བའི་བཀྲ་ཤིས་ཞེས་པའི་སློབ་ཕྲུག་ཞིག་ལ་སློབ་གྲྭའི་འཛིན་ཁང་ཨང་ ༡༣༠ ཞེས་པ་ཞིག་གི་ནང་སློབ་ཟུར་ཟླ་བ་ཞེས་པ་ཞིག་གི་ཉིན་དེབ་རྙེད་སོན་བྱུང་བ་དང་ཉིན་དེབ་ནང་ཟླ་བ་ནས་རང་གི་འཛིན་གྲོགས་ཚོས་སློབ་གྲྭར་རྣམ་ཤེས་འཁྱམ་པས་སྐོར་འཆལ་གཏམ་བཤད་པ་ཐོས་པ་དང་། དེ་བཞིན་སློབ་གྲྭའི་དགེ་རྒན་གྱིས་སློབ་ཕྲུག་ཚོར་འཛིན་ཁང་སྟོང་པ་འམ་སློབ་གྲྭའི་ར་བ་ནང་འགྲོ་མི་ཆོག་པའི་ས་ཁུལ་སོགས་སུ་འགྲོ་རྒྱུ་མེད་པའི་ཉེན་བརྡ་བཏང་བར་བརྟེན་ཟླ་བས་གནས་ཚུལ་དེ་དག་རྟོག་ཞིབ་སླད་འཛིན་ཁང་ ༡༣༠ ནང་བསྐྱོད་དེ་དོན་རྐྱེན་བྱུང་བའི་གདོན་འདྲེའི་བརྙན་ཐུང་ཞིག་ཡིན་པ་རེད། རྩ་བའི་ད་ལྟའི་ཆར་རང་ལོ་ ༢༤ སོན་པའི་རབ་གསལ་ལགས་ནི་ཕྱི་ལོ་ ༢༠༠༤ ལོར་བོད་ནས་རྒྱ་གར་དུ་འབྱོར་ཏེ་རྡ་སྟེང་བོད་ཁྱིམ་ནང་འཛིན་རིམ་བཅུ་པ་བར་སློབ་སྦྱོང་གནང་བ་དང་། དེ་རྗེས་ཁོང་རྡེ་ར་ལྡུན་དུ་རྟེན་གཞི་བྱས་པའི་སེ་ལ་ཀུའི་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་ཐོན་ཡོད་པ་རེད། རྗེས་སུ་ཕྱི་ལོ་ ༢༠༡༤ ལོར་ཨོ་གླིང་དུ་བསྐྱོད་དེ་ SAE Institute མཐོ་རིམ་སློབ་གཉེར་ཁང་དུ་འགུལ་རིས་ཆེད་ལས་ཐོག་ལོ་གསུམ་གྱི་སློབ་སྦྱོང་གནང་བ་མ་ཟད་ད་ཆ་སིཌ་ནི་གཙུག་ལག་སློབ་གྲྭར་ Robotic Engineer འམ་མི་གཟུགས་བཟོ་སྐྲུན་རིག་གནས་དང་གློག་བརྙན་བཟོ་སྐྲུན་ཐད་སློབ་སྦྱོང་གནང་བཞིན་པ་རེད། ཁོང་གིས་དེ་སྔ་ Father’s Faith དང་ The Mirage ཞེས་པའི་བརྙན་ཐུང་གཉིས་བཟོ་སྐྲུན་གནང་ཡོད་པ་རེད།

ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཁུལ་དེའི་ State of the National Address  འམ་ལྷོ་ཨ་ཕི་རི་ཀའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་གདན་ཞུས་གནང་དོན་ལྟར་ཁ་སང་ཚེས་ ༡༣ ཉིན་ Inkatha Freedom Party སྲིད་དོན་ཚོགས་པའི་གྲོས་ཚོགས་འཐུས་མི་རྣམས་དང་མཇལ་འཕྲད་དང་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་ལྷན་ཞུགས་གནང་འདུག ཚོགས་གཙོ་མཆོག་ནས་དེ་རིང་ཕྱི་ཚེས་ ༡༤ ཉིན་རྒྱ་དམར་གྱིས་བོད་ས་བཙན་བཟུང་བྱས་རྗེས་རྒྱ་གར་ནང་བཙན་བྱོལ་བོད་མིའི་སྒྲིག་འཛུགས་ཞེས་པའི་བརྗོད་གཞིའི་ཐོག་ས་གནས་མི་མང་རྣམས་ལ་གསུང་བཤད་གནང་གི་འདུག ཕྱི་དྲོ་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་ཅིག་དང་མཇལ་འཕྲད་གནང་རྒྱུ། དེ་བཞིན་ཕྱི་ཚེས་ ༡༥ ཉིན་ལྷོ་ཨ་ཕི་རི་ཀའི་རྒྱལ་ས་ཇོཧ་ན་ས་བྷག་ལ་ཕེབས་ཐོན་གནང་རྒྱུ་རེད་འདུག གཞི་རྩའི་ཕྱི་ལོ་ ༢༠༡༨ ཕྱི་ཟླ་ ༢ པའི་ནང་ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་ཡུལ་དེའི་གྲོས་ཚོགས་སུ་ལྷོ་ཨ་ཕི་རི་ཀའི་སྲིད་འཛིན་ཛུ་མ་མཆོག་གི་རྒྱལ་ཡོངས་གཏམ་བཤད་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟངསེང་གེ་མཆོག་ཀྱང་གདན་ཞུ་གནང་ཡོད་པ་མ་ཟད། འདས་པའི་ལོ་ཤས་ནང་ལྷོ་ཨ་ཕི་རི་ཀའི་རྒྱལ་ཁབ་དང་རྒྱ་ནག་གཞུང་དབར་དཔལ་འབྱོར་དང་ཚོང་གི་འབྲེལ་ལམ་དམ་ཟབ་ཕྱིན་ཡོད་པ་དང་། འབྲེལ་ལམ་དེའི་རྐྱེན་གྱིས་རྒྱ་གཞུང་གིས་གནོན་ཤུགས་འོག་ཕྱི་ལོ་ ༢༠༠༩ ལོ་ནས་ད་བར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེའི་ནང་ཆིབས་བསྒྱུར་མཛད་ཐུབ་མེད་པ་རེད། དེ་བཞིན་སྔ་ལོའི་ཕྱི་ཟླ་ ༡༢ ཚེས་ ༡༥ ནས་འདི་ལོའི་ཕྱི་ཟླ་ ༢ ཚེས་ ༩ ཉིན་བར་ཨ་ཕི་རི་ཀར་རྟེན་གཞི་བྱས་པའི་ Johannesburg Holocaust དང་  Genocide Centre ཨ་ཕི་རི་ཀའི་དོན་གཅོད་ལས་ཁུངས་ཀྱིས་གོ་སྒྲིག་གནང་སྟེ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་མཛད་རྣམ་དང་འབྲེལ་བའི་འགྲེམས་སྟོན་ཞིག་གོ་སྒྲིག་གནང་མུས་ཁྲོད་ཉེ་ལམ་ཕྱི་ཚེས་ ༩ ཉིན་༸གོང་ས་མཆོག་གི་ཐུགས་བསྐྱེད་ཆེན་པོ་དག་ལས་ཚན་རིག་དང་འབྲེལ་ནས་ནང་ཆོས་ཐོག་དཔྱད་བསྡུར་གནང་རྒྱུའི་སྐོར་ལ་གཏམ་བཤད་ལས་རིམ་ཞིག་གནང་འདུག སྐབས་དེར་གཏམ་བཤད་གནང་མཁན་གྱི་མི་སྣ་གཙོ་བོ་ནི་ཁུལ་དེར་རྟེན་གཞི་བྱས་པའི་ལམ་རིམ་ནང་པའི་བསྟི་གནས་ཁང་དགེ་རྩ་ཚོགས་པའི་སྐུ་ཞབས་ Philip Wyse  ལགས་ཡིན་པ་དང་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ངོ་སྤྲོད་གསུང་བཤད་གནང་ཐོག་འགྲེམས་སྟོན་བརྒྱུད་དེ་ཨ་ཕི་རི་ཀའི་མི་མང་ཡོངས་ལ་༸གོང་ས་མཆོག་ཀྱི་སྐུ་ཚེའི་མཛད་རྣམ་དང་བོད་ཀྱི་ལོ་རྒྱུས། རིག་གཞུང་སོགས་ཐུན་མིན་ཡོད་པ་ངོ་སྤྲོད་དང་སློབ་གསོ་སྤེལ་སླད་ཡིན་པར་གསུངས་ཡོད་པ་རེད།

ཉན་པ།: Listen ཕབ་ལེན། Download རྒྱ་ནག་གིས་ཡ་ཆེན་སྒར་ནས་བཙན་ཕུད་བཏང་བའི་བཙུན་མ་ཞིག་གིས་རང་སྲོག་བཅད་འདུག འགྱིང་འགྲོས་བརྒྱུད་བོད་རང་བཙན་བསྐྱར་གསོ་གནང་བའི་ཉིན་མོ་སྲུང་བརྩི། ༸གོང་ས་མཆོག་གི་སྐྱེས་རབས་བཀའ་ཆོས་སྩོལ་རྒྱུའི་མཛད་འཆར་ཕྱིར་འགྱངས། Elmhurst གནས་བཞུགས་བོད་མིས་དེ་གའི་དཔེ་མཛོད་མདུན་དུ་ངོ་རྒོལ་ལས་འགུལ་སྤེལ་བ། ཁ་སང་རྒྱ་ནག་ནང་མི་གྲོངས་པ་དང་ནད་པ་གསར་ཐོན་པའི་གྲངས་འབོར་ཆེ་ཤོས་སུ་གྱུར་བ། རྒྱུད་སྟོད་གྲྭ་ཚང་དུ་ལྕགས་མཁར་ཆེན་མོའི་གཏོར་རྒྱག་ཞེས་བྱིན་རླབས་ཀྱི་ཚན་ཁ་ཆེ་བའི་ཞབས་རིམ་ལེགས་གྲུབ། Thursday 13/02/2020 Force evicted Yarchen Gar nun takes own life Tibetans mark Independence Day with Majestic March and talk on Shimla Convention March 9 teachings of Dalai Lama cancelled Tibetans hold protest rally in front of Queens Library Coronavirus: Sharp increase in deaths and cases, Wednesday becomes deadliest day of outbreak Gyuto Monastery holds Torgya ritual for Dalai Lama’s good health and to combat COVID-19

ཕྱི་ལོ་ ༢༠༡༩ ལོའི་ཟླ་བ་ལྔ་བ་དང་དྲུག་པའི་ནང་རྒྱ་ནག་གིས་ཡ་ཆེན་སྒར་གྱི་གྲྭ་ཤག་མང་པོ་རྩ་གཏོར་བཏང་སྟེ་གྲྭ་བཙུན་མང་པོ་བཙན་ཤེད་ཀྱིས་དགོན་གྲོང་ནས་ཕྱིར་ཕུད་བཏང་ཡོད་པའི་ཁྲོད་ཡ་ཆེན་སྒར་གྱི་ཆོས་ཉིད་རིག་རྩལ་མཁའ་འགྲོ་གླིང་གི་བཙུན་མ་བསོད་ནམས་དབྱངས་བྷ་ལགས་ཀྱིས་རྒྱ་ནག་གིས་ཁོང་མོ་དགོན་གྲོང་ནས་ཕྱིར་ཕུད་བཏང་བར་བརྟེན་རང་སྲོག་བཅད་འདུག བལ་ཡུལ་དུ་གནས་སྡོད་བྱེད་བཞིན་པའི་ཨ་རིའི་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་ལགས་ལ་བོད་ནས་འབྲེལ་ཡོད་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། བཙུན་མ་བསོད་ནམས་དབྱངས་བྷ་ལགས་ནི་དགུང་ལོ་སུམ་ཅུའི་གཡས་གཡོན་ཞིག་ཡིན་པ་དང་། ཁོང་བོད་ལྗོངས་ཆབ་མདོ་ཁུལ་འཇོ་མདའ་རྫོང་མདོ་གཞུང་མ་སྡེ་བ་ནས་ཡིན་པ་དང་། ཁོང་རྒྱ་ནག་གིས་བཙན་གྱིས་ཡ་ཆེན་སྒར་ནས་ཕྱིར་ཕུད་བཏང་སྟེ་བཀག་བསྐྱིལ་ཁང་དུ་བཅུག་པར་བརྟེན་ཁོང་ལ་སྙུང་གཞི་བཞེས་ནས་སྨན་ཁང་དུ་ཅུང་ཙམ་ལྷག་ཡོད་པ་དང་། སྐབས་དེར་རྒྱ་ནག་གི་ཉེན་རྟོག་པས་ཁོང་མགྱོགས་མྱུར་ངང་ཕྱིར་བཀག་བསྐྱིལ་ཁང་དུ་ཡོང་དགོས་པའི་ཉེན་བརྡ་བཏང་བས་རྗེས་སུ་ཁོང་བཀག་བསྐྱིལ་ཁང་དུ་མ་སོང་བར་རང་སྲོག་བཅད་ཡོད་པ་ལས་ཟླ་ཚེས་ནམ་ཞིག་ལ་རང་སྲོག་བཅད་པའི་གནད་དོན་ཁ་གསལ་ཤེས་རྟོགས་ཐུབ་མེད་པར་གསུངས་སོང་། བཙུན་མ་བསོད་ནམས་དབྱངས་བྷ་ལགས་ཀྱིས་ཟླ་བ་བདུན་པ་བརྒྱད་པ་ཞིག་ལ་རང་སྲོག་བཅད་པ་བརྟེན་ནས་ཁུལ་དེར་རྒྱ་ནག་གིས་སྔར་ལས་ལྷག་པའི་དོ་དམ་བྱེད་ཀྱི་ཡོད་པར་བརྟེན། ད་ཆ་བཙུན་མ་ཁོང་གི་ནང་མི་རྣམས་ལ་འབྲེལ་བ་བྱེད་ཐབས་མེད་པར་གསུངས་བ་དང་སྦྲགས། ཉེ་སྔོན་རྒྱ་ནག་གིས་ཡ་ཆེན་སྒར་ནས་བཙན་ཁྲིད་བྱས་པའི་བཙུན་མ་རྣམས་ཕྱིར་དགོན་གྲོང་དུ་འགྲོ་རུ་འཇུག་གི་མེད་པ་མ་ཟད་ཁོང་རྣམས་ཀྱི་ཕ་ཡུལ་གྱི་གྲོང་སྡེའི་དགོན་པའི་ནང་དུ་འཛུལ་ཞུགས་བྱེད་དུ་འཇུག་གི་མེད་པ་དང་། བཙུན་མ་ཚོ་སྐྱ་སར་འབབ་དགོས་པའི་སློབ་གསོ་སྤྲོད་བཞིན་ཡོད་པ་སོགས་ངོ་སྤྲོད་གནང་ཡོད། རྩ་བའི་བཙུན་མ་བསོད་ནམས་དབྱངས་བྷ་ལགས་རྒྱ་ནག་གིས་དགོན་གྲོང་ནས་ཕྱིར་ཕུད་བཏང་ནས་བཀག་སྐྱིལ་ཁང་དུ་མནར་གཅོད་བཏང་བར་བརྟེན་སྙུང་གཞི་བཞེས་ཡོད་པ་དང་། ཁོང་སྨན་ཁང་དུ་བཞུགས་དུས་སུ་ཡང་རྒྱ་ནག་གིས་ཁོང་ངེས་བར་དུ་ཕྱིར་བཀག་སྐྱིལ་ཁང་དུ་ལོག་དགོས་བའི་ཉེན་བརྡ་བཏང་བར་བརྟེན་ཁོང་གིས་རང་སྲོག་བཅད་པ་ཞིག་ཡིན་ཀྱང་ད་ལྟའི་ཆར་རྒྱ་ནག་གིས་ལྟ་རྟོག་ནན་མོ་བྱེད་བཞིན་པར་བརྟེན་ཁོང་གི་གནས་ཚུལ་ཆ་ཚང་བ་ཞིག་ཤེས་རྟོགས་ཞུ་ཐབས་མི་འདུག

བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་བཞུགས་སྒར་ཁྲོམ་ཞུང་དུ་བོད་ཆས་སྤྲས་ནས་འགྱིང་འགྲོས་གནང་སྟེ་༸རྒྱལ་མཆོག་སྐུ་ཕྲེན་བཅུ་གསུམ་པ་ཐུབ་བསྟན་རྒྱ་མཚོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་དེ་ལོ་ངོ་ ༡༠༧ འཁོར་བའི་ཉིན་མོ་སྲུང་བརྩི་ཞུས་སོང་། དེ་རིང་གི་ཉིན་མོ་འདི་ནི་དེ་སྔ་ཕྱི་ལོ་ ༡༩༡༣ ཕྱི་ཟླ་ ༢ ཚེས་ ༡༣ ཉིན་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་ཁེལ་གྱི་ཡོད་པ་ལྟར། དེ་རིང་ཉིན་གུང་ཚོུད་ ༡ ཐོག་རྒྱ་གར་བོད་རང་བཙན་སློབ་ཕྲུག་ཚོགས་པས་རྐང་གོ་སྒྲིག་གནང་སྟེ་བོད་པའི་གཞོན་སྐྱེས་ཕོ་མོ་བརྒྱ་སྐོར་ཞིག་གིས་བོད་ཀྱི་ཐུན་མོང་མ་ཡིན་པའི་ཆས་གོས་དང་། ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་བོད་བོད་ཡུལ་དུ་སྐྱིད། རྒྱ་རྒྱ་ཡུལ་དུ་སྐྱིད་ཅེས་པའི་འབོད་ཚིག ལོ་རྒྱུས་རང་བཞིན་ལྡན་པའི་བོད་དང་རྒྱ་ནག་དབར་གྱི་ཆིངས་ཡིག་གི་དོན་ཚན་སོགས་འཁོད་པའི་འཕྲེད་དར་བསྣམས་ཏེ་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཆགས་པའི་དཔའ་བོའི་རྡོ་རིང་མདུན་ནས་མེག་གྷན་སྣུམ་འཁོར་བབས་ཚུགས་བར་འགྱིང་འགྲོས་གནང་སྟེ་ཉིན་མོ་འདི་སྲུང་བརྩི་ཞུས་ཡོད། སྐབས་དེར་རྒྱ་གར་བོད་རང་བཙན་སློབ་ཕྲུག་ཚོགས་པའི་ངེས་བསྟོན་པ་རིག་འཛིན་ཆོས་སྒྲོན་ལགས་ནས་ཉིན་མོ་འདིའི་གལ་ཆེའི་རང་བཞིན་ཁག་ངོ་སྤྲོད་གནང་བ་དང་སྦྲགས། རྒྱ་ནག་དམར་ཤོག་སྲིད་གཞུང་དང་སྲིད་གཞུང་དེས་རྒྱལ་སྤྱིའི་ཐོག་བོད་ཀྱི་དངོས་ཡོད་རྒྱལ་རབས་ལོ་རྒྱུས་ཁག་འཁྱོག་བཤད་དྲིལ་བསྒྲགས་སྣ་མང་བྱེད་བཞིན་པའི་བྱ་སྤྱོད་དེ་དག་ལ་ངོས་ལེན་རྩ་བ་ནས་མེད་ཅེས་གསུངས་སོང་།  ཁོང་གིས་འགྱིང་འགྲོས་ཀྱི་ལས་འགུལ་འདི་ནི་བོད་ནང་ལ་མཚོན་ན་རྒྱ་གཞུང་གི་དམ་དྲག་རྐྱེན་པས་བོད་ཀྱི་རྒྱལ་དར་འཆར་རྒྱུ་ཁག་པོ་ཡིན་སྟབས། སྨོན་ལམ་ཆེན་མོའི་རྗེས་སུ་ཆོས་དར་བསྣམས་ཏེ་སྤེལ་སྲོལ་ཡོད་པ་སོགས་ངོ་སྤྲོད་དང་ཆབས་ཅིག བཙན་བྱོལ་རང་དབང་ལུང་པའི་ནང་བོད་མི་ཚོས་རང་གི་རིག་གཞུང་དང་ལོ་རྒྱུས་དེ་དག་བདག་གཅེས་གནང་དགོས་གལ་ཡིན་པར་མ་ཟད་གཞོན་སྐྱེས་ཚོར་དེ་དག་དང་འབྲེལ་བའི་འོས་འགན་འཕར་མ་ཞིག་ཡོད་པ་གསུངས་ཡོད། དེ་བཞིན་ལོ་རྒྱུས་རང་བཞིན་ལྡན་པའི་དུས་ཚིགས་དང་བསྟུན་རྒྱ་གར་བོད་རང་བཙན་སློབ་ཕྲུག་ཚོགས་པས་དགོང་དྲོ་ཆུ་ཚོད་དྲུག་པ་ནས་ Drum Stick ཟ་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་གཉིས་གདན་ཞུ་ཐོག་སིམ་ལ་ཆིངས་ཡིག་གི་འབྱུང་རྐྱེན་གང་ཡིན་ལ་ལྟ་བ་ཅེས་པའི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་སོགས་གནང་གི་ཡོད་པ་རེད། རྩ་བའི་བོད་རང་བཙན་གཙང་མ་ཡིན་པའི་ཡོངས་ཁྱབ་བསྐྱར་ནན་གསལ་བསྒྲགས་མཛད་པའི་ཉིན་མོ་སྲུང་བརྩི་ཞུ་རྒྱུའི་ལས་འགུལ་དེ་ནི་བོད་རང་བཙན་སློབ་ཕྲུག་ཚོགས་པས་དེ་སྔ་ཕྱི་ལོ་ ༢༠༡༣ ལོར་༸གོང་ས་༸སྐུ་ཕྲེང་བཅུ་གསུམ་པོ་ཆེན་པོ་མཆོག་གིས་བོད་རང་བཙན་གསལ་བསྒྲགས་བསྐྱངས་ནས་ལོ་ངོ་ ༡༠༠ འཁོར་བའི་དུས་ཚིགས་ཉིན་ནས་དབུ་འཛུགས་ཀྱིས་ལོ་ལྟར་ཟླ་ ༢ ཚེས་ ༡༣ ཉིན་བོད་མིའི་གནས་ཡུལ་རྒྱལ་སྤྱིའི་ས་གནས་མང་དག་ཅིག་ཏུ་ལས་འགུལ་གྱི་རྣམ་པ་འདྲ་མིན་ཐོག་སྲུང་བརྩི་ཞུ་བཞིན་ཡོད་པ་ལྟར། ཨ་རི་ནང་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་ཀྱང་ཡུལ་དེའི་གྲོང་ཁྱེར་ New York ནང་སྙན་ངག་དང་འགོག་རྒོལ་ཞེས་པའི་བརྗོད་གཞིའི་འོག་ས་གནས་བོད་མི་དང་བོད་དོན་རྒྱབ་སྐྱོར་བ། དེ་བཞིན་རང་དབང་འཐབ་རྩོད་སོགས་ཀྱི་ནང་ཕྱག་ལས་གནང་མྱོང་ཡོད་པའི་མི་སྣ་དང་མང་ཚོགས་འདུ་འཛོམས་ཀྱིས་འཐབ་རྩོད་ལས་འགུལ་སོགས་དང་འབྲེལ་བའི་སྙན་ངག་གྱེར་འདོན་དང་བསམ་ཚུལ་བརྗེ་ལེན་གནང་སྟེ་སྲུང་བརྩི་ཞུས་ཡོད་པ་རེད།