Monthly Archives: February, 2020

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་ནང་བསྟན་ལྷན་ཚོགས་ཀྱི་ཚོགས་གཙོ་གནང་མྱོང་མཁན་ཐེ་ཝན་ Kung Teh དགོན་པའི་མཁན་པོ་ CHING Hsin མཆོག་དགུང་ལོ་ ༩༡ ཐོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་བསྟུན། དམ་པ་ཁོང་གི་ཤུལ་ལུས་དད་ལྡན་རྗེས་འབྲང་པ་ཡོངས་ལ་ཐུགས་གསོ་བསྩལ་བ་དང་སྦྲགས། མཁན་པོ་ CHING Hsin མཆོག་གིས་སྐུ་ཚེ་གང་པོར་འགྲོ་དོན་མཛད་དེ་སྐུ་ཚེ་དོན་སྙིང་ལྡན་པ་ཞིག་སྐྱེལ་ཡོད་པ་དེ་ནི་དམིགས་དཔེ་འོས་པ་ཞིག་རེད་ཅེས་བཀའ་བསྩལ་འདུག དགུང་གྲངས་ ༩༡ ལ་ཕེབས་པ་ཐེ་ཝན་ Kung Teh དགོན་པའི་མཁན་པོ་ CHING Hsin མཆོག་ཉེ་ཆར་ཕྱི་ཚེས་ ༡༥ ཉིན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་དང་། དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་སྐུ་ཚབ་དོན་གཅོད་ཁང་བརྒྱུད་མཁན་པོ་མཆོག་གི་དགོན་པ་ Kung Teh མཚན་ཐོག་ལ་ཐུགས་གསོའི་གསུང་འཕྲིན་ཞིག་བསྩལ་འདུག་པ་དང་གསུང་འཕྲིན་ནང་མགོན་པོ་༸གང་ཉིད་མཆོག་ནས་མཁན་པོ་དམ་པ་ཁོང་སྐུ་ཚེ་མ་ཟིན་པའི་གནས་ཚུལ་ཐོས་སྐབས་ཐུགས་ཕམ་ཆེན་པོ་བྱུང་ཡོད་པ་དང་། དམ་པ་ཁོང་སྐུ་འཚོ་བཞུགས་རིང་ལ་འགྲོ་བ་སྤྱིའི་བདེ་དོན་ཐོག་མཛད་འཕྲིན་རྒྱ་ཆེ་བསྐྱངས་པ་དེ་ནི་དམིགས་དཔེ་འོས་པའི་མཛད་བཟང་ཞིག་རེད་ཅེས་ཆེ་བསྟོད་མཛད་འདུག ༸གོང་ས་མཆོག་ནས་དེ་སྔ་ཕྱི་ལོ་ ༡༩༩༧ དང་ ༢༠༠༡ ལོ་སོ་སོར་ཐེ་ཝན་ནང་ཆིབས་བསྒྱུར་བཀའ་དྲིན་བསྐྱངས་སྐབས་དམ་ཁོང་དང་མཇལ་མོལ་མཛད་རྒྱུའི་གོ་སྐབས་བྱུང་བ་ནས་བཟུང་ད་བར་མུ་མཐུད་ཕན་ཚུན་དབར་ཐུགས་འདྲིས་ཆེན་པོ་ཡོད་པ་དང་། ལྷག་པར་དུ་དམ་པ་ཁོང་ནི་སྐབས་དེའི་མགོན་པོ་༸གང་ཉིད་མཆོག་གི་ཐེ་ཝན་ནང་ཆིབས་བསྒྱུར་ཁག་གོ་སྒྲིག་ཞུ་མཁན་གཙོ་གྲས་ཤིག་ཡིན་པ་སོགས་དྲན་གསོ་མཛད་འདུག རྩ་བའི་ Kung Teh དགོན་པའི་མཁན་པོ་དམ་པ་ CHING Hsin མཆོག་ནི་ཐེ་ཝན་ནང་འཚར་ལོང་བྱུང་བའི་ནང་པའི་བླ་ཆེན་ཐོག་མའི་གྲས་ཤིག་ཆགས་ཀྱི་ཡོད་པ་དང་། དེ་སྔ་དམ་པ་ཁོང་ཐེ་ཝན་ནང་བསྟན་ལྷན་ཚོགས་ཀྱི་ཚོགས་གཙོའི་མཛད་འཁུར་བཞེས་མྱོང་ཡོད་པ་དང་ཕྱི་ལོ་ ༡༩༩༧ དང་ ༢༠༠༡ ལོར་༸གོང་ས་མཆོག་ཁུལ་དེར་གདན་ཞུའི་གསོལ་འདེབས་ཞུས་ཡོད་པ་མ་ཟད། མཁན་པོ་སྐུ་ཉིད་མཆོག་གི་དགོན་པ་གཙོ་བོར་གྱུར་པའི་ཐེ་ཝན་ངན་གི་དགོན་སྡེ་ཁག་ཏུ་བོད་བརྒྱུད་ནང་བསྟན་དང་འབྲེལ་བའི་ནང་ཆོས་སློབ་གཉེར་སོགས་གནང་ཡོད་པ་རེད།  

ད་ཆ་རྒྱ་ནག་གཞུང་གིས་ཡུལ་དེའི་མི་སེར་ཙམ་མ་ཟད་རྒྱལ་སྤྱིའི་ཁྱོན་ནས་འགྲོ་བ་མིའི་ཐོབ་ཐང་གི་གནད་དོན་ལ་རྒྱབ་སྐྱོར་གནང་མཁན་རྣམས་ལ་ཚོད་འཛིན་གྱིས་དྲག་གནོན་ཆེས་ཆེར་བྱེད་བཞིན་པའི་ཁྲོད་འདིར་ཉེ་ཆར་ཨ་རིའི་གྲོས་ཚོགས་སུ་ཡུལ་དེའི་མི་སེར་རྣམས་ཀྱི་སྨྲ་བརྗོད་རང་དབང་སྲུང་སྐྱོབ་སླད་ཁྲིམས་འཆར་གསར་པ་ཞིག་ཆེད་འདོན་གནང་འདུག དེ་ཡང་གཟའ་འཁོར་སྔོན་མའི་རེས་གཟའ་ལྷག་པ་ཉིན་ཨ་རིའི་ཆབ་སྲིད་ཚོགས་པ་གཉིས་ལས་གྲུབ་པའི་གྲོས་ཚོགས་འཐུས་མི་ཁག་ཅིག་མཉམ་རུབ་ཀྱིས་ཡུལ་དེའི་ནང་ཆེས་ཆེར་འགྲོ་བཞིན་པའི་རྒྱ་གཞུང་གི་དམ་དྲག་འོག་ཨ་རིའི་མི་སེར་རྣམས་ཀྱི་སྨྲ་བརྗོད་རང་དབང་སྲུང་སྐྱོབ་སླད་ཁྲིམས་འཆར་གསར་པ་དེ་ཆེད་འདོན་གནང་འདུག་པ་དང་། ཁྲིམས་འཆར་དེ་སྤྱིར་ཨ་རིའི་ནང་ཡོང་བཞིན་པའི་ཕྱིའི་རྒྱལ་ཁབ་ཁག་གི་ཚོད་འཛིན་དམ་དྲག་ཡོངས་ལ་གོ་ཡི་ཡོད་ཀྱང་དམིགས་དོན་གཙོ་བོ་དེ་རྒྱ་ནག་ཆགས་ཀྱི་ཡོད་པ་མ་ཟད། ལྷག་དོན་ཐེངས་འདིའི་ཁྲིམས་འཆར་བརྒྱུད་ཨ་རིའི་ནང་གཉེར་བཞིན་པའི་ཚོང་ལས་སྡེ་ཁག་ནས་བཟོ་ཚོང་ཁང་དེའི་ནང་ཕྱག་ལས་གནང་བཞིན་པའི་ལས་བྱེད་དག་གིས་རྒྱ་ནག་དང་འབྲེལ། ཧོང་ཀོང་དང་ཡུ་གུར། དེ་བཞིན་རྒྱ་གཞུང་གིས་རྡོག་རོལ་གཏོང་བཞིན་པའི་འགྲོ་བ་མིའི་ཐོབ་ཐང་གི་གནད་དོན་གླེང་བར་ལས་གནས་ལས་ཕྱིར་ཕུད་གཏང་བ་དང་འཁོན་ལན་སློག་པ་སོགས་ཀྱི་ངལ་འཕྲད་ལ་གདོང་ལེན་གནང་ཐབས་ལ་འབད་རྒྱུ་མངོན་གསལ་གནང་འདུག གོང་ཞུས་ཁྲིམས་འཆར་དེ་ཐོག་མ་ཆེད་འདོན་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་ལྕམ་ Yvette Clarke ལགས་ཀྱིས་ཕྱིའི་ཚོགས་སྒེར་ཁག་ནས་ཨ་རིའི་མི་སེར་གྱི་ལས་བྱེད་རྣམས་ཁ་གྲག་ཏུ་མི་འཇུག་པ་བཟོས་ནས་ཡུལ་དེའི་ཚོགས་པ་སྒྲིག་འཛུགས་ཁག་ལ་ཐུབ་ཚོད་གཏོང་རྒྱུར་དགོངས་བཞིན་ཡོད་ཀྱང་ཨ་རིའི་རྩ་ཁྲིམས་ཀྱི་དོན་ཚན་དང་པོར་སྨྲ་བརྗོད་རང་དབང་ཡིན་པ་ལྟར་དེའི་ནང་དེ་དག་གནང་ཆོག་པའི་ཆ་རྐྱེན་གང་ཡང་གསལ་མེད་པར་དྲན་སྐུལ་དང་སྦྲགས་གལ་ཏེ་རྒྱ་ནག་གཞུང་ནས་ NBA ཞེས་པའི་བྱང་ཨ་རིའི་རྒྱལ་ཡོངས་སིལ་སྦོལ་མཐུན་ཚོགས་ལ་དམ་དྲག་བྱ་ཚེ་ང་ཚོ་ཁྲིམས་ཁང་ལ་གཏུག་ཆོག་ཅེས་ནན་བརྗོད་གནང་འདུག་པ་མ་ཟད། ཁྲིམས་འཆར་དེར་རྒྱབ་སྐྱོར་གནང་མཁན་གྲོས་ཚོགས་འཐུས་མི་སྐུ་ཞབས་ Mike Gallagher ལགས་ཀྱིས་རྒྱ་ནག་དམར་ཤོག་ཚོགས་པ་ནི་རྒྱ་ནག་རྒྱལ་ནང་དུ་དབང་ཆ་གཅིག་བསྡུས་ཀྱི་ལམ་ལུགས་སྲ་བརྟན་ཡོང་སླད་མང་ཚོགས་ཐོག་སྟངས་འཛིན་ཤུགས་ཆེ་བྱེད་བཞིན་པའི་ཐད་བློ་ཡིད་མ་ཚིམ་པར་ཕྱིའི་རང་དབང་རྒྱལ་ཁབ་ཁག་ཏུ་ཡོད་པའི་ཚོང་ལས་སྡེ་ཁག་ལ་གནོན་ཤུགས་སྤྲད་དེ་རྒྱལ་ཁབ་དེ་དག་ནང་གི་སྨྲ་བརྗོད་དང་བསམ་བརྗོད་རང་དབང་ལའང་ཚོད་འཛིན་བྱེད་བཞིན་པར་སྐྱོན་བརྗོད་ཀྱིས་འཕྲལ་མར་མཚམས་འཇོག་དགོས་པ་བརྗོད་འདུག ཁྲིམས་འཆར་དེར་རྒྱབ་སྐྱོར་གནང་མཁན་ཡུལ་དེའི་གྲོས་ཚོགས་འཐུས་མི་སྐུ་ཞབས་ Jim Banks ལགས་ཀྱིས་མི་སྣ་ཞིག་ཨ་རིའི་མི་སེར་ཡིན་པ་དང་ཡང་ན་ཨ་རིའི་ནང་ཡོད་ཚེ་དོ་བདག་དེར་སྨྲ་བརྗོད་རང་དབང་སྤྲོད་དགོས་ཞེས་དང་ཨ་རིའི་གྲོས་ཚོགས་ངོས་ནས་རྒྱ་གཞུང་གིས་ཕྱིའི་རང་དབང་ལྡན་པའི་རྒྱལ་ཁབ་ཁག་ཏུ་རང་ཉིད་ཀྱི་གནོན་ཤུགས་རྒྱ་ཁྱབ་གཏོང་བཞིན་པར་བཏང་སྙོམས་ཚུལ་དུ་བཞུགས་རྒྱུ་མིན་ཞེས་ནན་བརྗོད་གནང་སྟེ་ཨ་རི་དེ་དུས་རྟག་ཏུ་རང་དབང་གི་རྒྱལ་ཁབ་ཅིག་ལ་གནས་རྒྱུ་ཡིན་པ་དང་ཡུལ་དེའི་གཞུང་དང་ཚོགས་པ་ཁག་ནས་རྒྱ་གཞུང་གི་བྱ་སྤྱོད་དེ་དག་ལ་ཁ་ཁུ་སིམ་པོར་བཞུགས་རྒྱུ་མིན་པའི་བཞེངས་ཕྱོགས་ཁ་གསལ་བཟོ་དགོས་པའི་བརྡ་ལན་གནང་འདུག དེ་བཞིན་ཟླ་བ་འདིའི་ཚེས་ ༡༢ ཉིན་ཨ་རིའི་བདེ་སྲུང་དྲུང་ཆེ་སྐུ་ཞབས་ Mark Esper ལགས་ཀྱིས་འཇར་མ་ནིའི་གྲོང་ཁྱེར་ Munich ནང་རྒྱལ་སྤྱིའི་བདེ་འཇགས་ལྷན་ཚོགས་ཐེངས་ ༥༦ ཐོག་གཏམ་བཤད་སྤེལ་སྐབས་འཛམ་གླིང་ནང་མི་འབོར་ཆེ་ཤོས་ཀྱི་རྒྱལ་ཁབ་རྒྱ་ནག་གིས་ནུབ་ཕྱོགས་ཡུལ་གྲུ་ཁག་གི་རིག་གནས་དངོས་རྫས་སོགས་རྐུ་འཁྱེར་བྱས་པ་དང་ཡུལ་ལུང་ཆུང་བ་ཚོར་སྡིགས་ར་སྐུལ་བ་སོགས་ཀྱི་ཐབས་བྱུས་འདྲ་མིན་སྤྱོད་དེ་ཁེ་བཟང་རག་ཐབས་བྱེད་བཞིན་ཡོད་པས་རྒྱ་ནག་དེ་ད་ཆ་འཛམ་གླིང་གི་སྒྲིག་འཛུགས་ཁག་ལ་ཆེས་ཉེན་ཚབས་ཆེ་ཤོས་ཤིག་ཆགས་ཡོད་པར་སྐྱོན་བརྗོད་ཤུགས་ཆེ་གནང་ཡོད་པ་རེད།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བྱང་ཨ་མི་རི་ཀའི་ནང་གི་གཞུང་འབྲེལ་ཕྱོགས་ཕེབས་ཁག་ཅིག་གྲུབ་རྗེས་ཕྱི་ཚེས་ ༡༥ ནས་ ༡༧ བར་ཉིན་གྲངས་གསུམ་རིང་ཡོ་རོབ་རྒྱལ་ཁབ་ Austria ལ་གཞུང་འབྲེལ་ཕྱོགས་ཕེབས་གནང་བཞིན་འདུག ཐེངས་འདིའི་གཞུང་འབྲེལ་ཕེབས་གནང་དོན་གཙོ་བོ་ནི་ཡུལ་དེར་རྟེན་གཞི་བྱས་པའི་ Innsbruck གཙུག་ལག་སློབ་གཉེར་ནས་དགུན་དུས་ཤེས་ཡོན་ལས་རིམ་གྱི་དབུ་འབྱེད་མཛད་སྒོར་གསུང་བཤད་བར་སྲིད་སྐྱོང་མཆོག་གདན་ཞུ་ཕུལ་བ་ལྟར་ཆེད་ཕེབས་གནང་བ་ཞིག་ཆགས་ཀྱི་འདུག སྲིད་སྐྱོང་མཆོག་གིས་ཟླ་ ༢ ཚེས་ ༡༥ ནས་ ༡༧ བར་ཉིན་གྲངས་གསུམ་ཨོ་སི་ཀྲི་ཡའི་གཞུང་འབྲེལ་ཕྱོགས་ཕེབས་ཁྲོད་ས་གནས་སུ་ཡོད་པའི་བོད་དོན་རྒྱབ་སྐྱོར་ཚོགས་པའི་འབྲེལ་ཡོད་མི་སྣ་མི་ཁག་ལ་མཇལ་མོལ་དང་གསར་ཁང་ཁག་ལ་བཅར་འདྲི་དང་ལེན། དེ་བཞིན་ཨོ་སི་ཀྲི་ཡ་ Grafenworth ས་གནས་རྫོང་དཔོན་སྐུ་ཞབས་ Alfred Riedl མཆོག་དང་མཇལ་མོལ། ཕྱི་ཚེས་ ༡༥ ཉིན་སྲིད་སྐྱོང་མཆོག་ནས་ཨོ་སི་ཀྲི་ཡའི་བོད་རིགས་མི་མང་རྣམས་ལ་གསུང་བཤད་གནང་བ་དང་འབྲེལ། སྐབས་དེར་ཨོ་སི་ཀྲི་ཡའི་བོད་རིགས་མི་མང་ཚོགས་པས་སྲིད་སྐྱོང་མཆོག་གིས་ད་བར་སྲིད་སྐྱོང་གི་ཕྱག་ལས་གནང་རིང་ལ་ཆབ་སྲིད་དང་དཔལ་འབྱོར། འཕྲོད་བསྟེན། ཤེས་ཡོན་བཅས་ཀྱི་ཐོག་ཞབས་འདེགས་གང་ལེགས་ཞུས་པར་ཆེ་བསྟོད་ཀྱི་བཀའ་དྲིན་ཅན་ལ་བཀྲིན་ཆེ་ཞེས་པའི་གཟེངས་རྟགས་ཤིག་ཕུལ་ཡོད་པ་རེད། དེ་རིང་ཁུལ་དེའི་ནང་གཞུང་འབྲེལ་ཕྱོགས་ཕེབས་མཐའ་མ་དང་འབྲེལ་ཏེ་ཁུལ་དེར་རྟེན་གཞི་བྱས་པའི་ Innsbruck གཙུག་ལག་སློབ་གཉེར་ནས་དགུན་དུས་ཤེས་ཡོན་ལས་རིམ་གྱི་དབུ་འབྱེད་མཛད་སྒོར་དགེ་སློབ་ཚོར་དབུ་འབྱེད་ཀྱི་གསུང་བཤད་གནང་ཡོད་པ་མ་ཟད་གཙུག་ལག་སློབ་གཉེར་ཁང་གི་དབུ་འཛིན་དང། ས་གནས་རྫོང་དཔོན་ Georg Wille ལགས་དང་མཇལ་མོལ་སོགས་གནང་ཡོད་པ་རེད། ཤེས་རྟོགས་བྱུང་བར་གཞིགས་ན། སང་ཉིན་ཕྱི་ཚེསས་ ༡༨ ཉིན་སྲིད་སྐྱོང་མཆོག་ Austria ནས་ཨ་རིའི་རྒྱལ་ས་ཝ་ཤིང་ཊོན་ལ་ཕེབས་ཐོན་གནང་གི་ཡོད་པ་རེད།

ཨ་རིའི་གྲོས་ཚོགས་འཐུས་མིས་རྒྱ་གཞུང་གིས་རིམས་ནད་སྐོར་རྫུན་གཏམ་འཆད་བཞིན་པ་དང་ཚན་རིག་གནས་ཚུལ་སྤེལ་བའི་བརྒྱུད་ལམ་ཐོག་ལོ་གཅིག་གི་གོང་ནས་རིམས་ནད་ཀྱི་སྔོན་བརྡ་བཏང་ཡོད་པ་སོགས་ཀྱི་གནས་ཚུལ་དང་འབྲེལ། དྲྭ་རྒྱའི་མི་སྣ་མང་དག་ཅིག་ནས་དེ་སྔ་ ༢༠༡༨ ལོར་རྒྱ་ནག་གི་དམག་དོན་ཚན་རིག་པ་ཟུར་པ་ Chen Hu ཟེར་བས་རྒྱ་ནག་གི་བརྒྱུད་ལམ་ཐོག་རྒྱ་ནག་ནས་དེ་སྔ་ཁྱབ་གདལ་བྱུང་བའི་ MERS དང་ SARS  ཡི་ནད་དུག་རྣམས་གྱི་སྨན་སྦྱོར་བྱས་ནས་ཆེས་ཉེན་ཚབས་ཆེ་བའི་སྐྱེས་ལྡན་རྫས་སྦྱོར་གྱི་མཚོན་ཆ་བསྐྲུན་ཐུབ་ངེས་ཡིན་སྐོར་བཤད་པའི་བརྙན་པར་དེ་ཡང་ཤུགས་ཆེར་བརྒྱུད་བསྒྲགས་བྱེད་བཞིན་པ་རེད། དེའི་ཁྲོད་ཉེ་ཆར་ Wuhan གྲོང་ཁྱེར་མང་ཚོགས་ཁྲོད་དཀའ་སྡུག་མྱོང་བཞིན་པའི་རྒྱ་རིགས་བེུད་ཅིག་གིས་བརྙན་ཞིག་ཡོངས་བསྒྲགས་གནང་འདུག་པར་རྒྱ་ནག་དམར་ཤོག་ཚོགས་པས་འཆར་གཞི་དང་ངན་ཇུས་ལྡན་ཐོག་རིམས་ནད་དེ་བཏང་བ་ཞིག་ཡིན་པ་དང་ངལ་བ་དེ་དག་དངོས་སུ་མྱོང་མཁན་དེ་མི་སེར་དཀྱུས་མ་ཡིན་པར་མ་ཟད། ད་ལྟའི་ཆར་ཁོང་རྣམས་ལ་སྨན་བཅོས་འཐུས་སྒོ་ཚང་བ་ཅིག་ཀྱང་ཐོབ་ཀྱི་མེད་སྟབས་ཕ་མ་ཚོས་རང་ཁྱིམ་དུ་ཤི་སྒུག་བྱས་ནས་བསྡད་ཡོད་པ་གསུངས་འདུག ཁོང་གིས་ཧོང་ཀོང་དང་ཐེ་ཝན། དེ་བཞིན་བོད་མིའི་རང་བཙན་གྱི་འཐབ་རྩོད་ལ་རྒྱབ་སྐྱོར་ཞུ་རྒྱུ་ཡིན་པ་དང་། རྒྱ་ནག་དམར་ཤོག་ཚོགས་པའི་སྲིད་དབང་འོག   གང་ཟག་སུ་འདྲ་ཞིག་ཡིན་རུང་རང་དབང་ཐོག་བཀའ་མོལ་གནང་རྒྱུའི་ཐོབ་ཐང་མེད་པ་དང་། དངོས་ཡོད་གནས་ཚུལ་བཤད་མཁན་རྣམས་ཉེན་རྟོག་པས་འཛིན་བཟུང་བྱེད་བཞིན་ཡོད་པ། ཁྲིམས་རྩོད་པ་རྣམས་ཀྱང་འཛིན་བཟུང་གིས་བཀག་ཉར་བྱེད་མུས་ཡིན་པ་དང་། ལྷག་དོན་བཀའ་མོལ་གནང་འདོད་ཡོད་ཀྱང་དེ་ལྟར་གོ་སྐབས་མེད་པ་སོགས་འགྲེལ་བརྗོད་གནང་འདུག ད་ཆ་བཟོད་སྲན་བྱེད་ཐབས་བྲལ་སོང་ཝུ་ཧན་ནང་སྨན་མེད་པ་དང་སྨན་ཁང་ནང་ཉལ་ཁྲི་མི་འདུག CCTV བརྒྱུད་ལམ་ཐོག་བསྟན་པ་ཚང་མ་རྫུན་མ་རེད། མི་དཀྱུས་མ་ཚོའི་དཀའ་སྡུག་དང་འབོད་སྒྲ་ངས་མཐོང་སོང་ཞེས་ཚོར་ཤུགས་ཆེན་པོས་གསུངས་འདུག རྩ་བའི་འདི་ལོ་ཕྱི་ཟླ་ ༡༢ ནང་ཝུ་ཧན་དུ་ཏོག་དབྱིབས་ནད་དུག་ཁྱབ་བརྡལ་བྱུང་བ་ནས་བཟུང་རྒྱ་གཞུང་གིས་སྨན་པ་Li Wenliang ལགས་དམ་པ་དེ་ཉིད་ཀྱིས་གཙོས་པའི་དེའི་སྐོར་དངོས་ཡོད་གནས་ཚུལ་གསུང་མཁན་རྣམས་འཛིན་བཟུང་བཀག་ཉར་དང་སུན་གཙེར་བཟོ་བ་དང། གར་སོང་ཆ་མེད་དུ་བཏང་བ་སོགས་ཀྱི་གནས་ཚུལ་རིམ་པ་ཐོན་ཡོད་སྟབས། ད་ཆ་ཝུ་ཧན་གྱི་བེུད་དེས་ས་གནས་ཀྱི་དངོས་ཡོད་གནས་ཚུལ་གསུངས་པར་བརྟེན་རྒྱ་གཞུང་ནས་འཛིན་བཟུང་བྱེད་སྲིད་པའི་ཉེན་ཁ་ཆེན་པོ་ཆགས་ཡོད་སྟབས། དྲྭ་རྒྱའི་ཐོག་ཁོང་མོའི་བདེ་འཇགས་ཐོག་སྲུང་སྐྱོབ་གནང་དགོས་གལ་ཡིན་སྐོར་གསུང་མཁན་མང་དག་ཅིག་འདུག རྩ་བའི་ད་བར་རྒྱ་ནག་རྒྱལ་ཡོངས་གཙོས་པའི་རྒྱལ་སྤྱི་ཁྱོན་ཡོངས་སུ་རིམས་ནད་དེ་འགོས་ཁྱབ་ཤུགས་ཆེར་བྱུང་བཞིན་པའི་ཁྲོད་ད་བར་མི་བདུན་ཁྲི་ཆིག་སྟོང་ལྷག་ལ་ནད་གཞི་དེ་ཕོག་ཡོད་པ་དང་མི་ ༡༧༠༠ ལྷག་རྐྱེན་འདས་སུ་ཕྱིན་ཡོད་པ་རེད། དེའི་ཁྲོད་འཛམ་གླིང་རྒྱལ་ཁབ་འདྲ་མིན་ ༢༠ ལྷག་ནང་རིམས་ནད་དེ་འགོས་ཁྱབ་བྱུང་ཡོད་པ་ལྟར་ Philippines དང་ཧོང་ཀོང་། ཉི་ཧོང་། ཐེ་ཝན། དེ་བཞིན་ཕ་རན་སི་བཅས་ཀྱི་ནང་མི་གྲོངས་པའི་གནས་ཚུལ་ཡང་བྱུང་ཡོད་པ་རེད།

ཉན་པ།: Listen ཕབ་ལེན། Download བོད་ཀྱི་བེུད་ལས་རིམ། བཙན་བྱོལ་ནང་གི་རྩམ་སྒྲུང་རྩོམ་པ་པོ་དང་བྱིས་སྒྲུང་རྩོམ་སྒྱུར་བ་ཉི་མ་འཚོ་ལགས་དང་གླེང་མོལ། Sunday 16/02/2020 Women of Tibet: Nyima Tso, Tibetan children story book writer and poet

ཉན་པ།: Listen ཕབ་ལེན། Download ༸གོང་ས་མཆོག་གིས་བརྟག་ཞུ་གནང་འབྲས་སུ་དམིགས་བསལ་ངན་དོག་ཆེ་བ་མེད་ཅེས་བཀའ་བསྩལ་བ། རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་གི་ཚོགས་ཆེན་ཐོག་༸པཎ་ཆེན་རིན་པོ་ཆེའི་གནད་དོན་ཞུ་གཏུག རྒྱ་ནག་གི་འཁྱོག་བཤད་འགྲེམས་སྟོན་ཕྱིར་འཐེན་མ་བྱས་པར་བརྟེན་བོད་མིས་མུ་མཐུད་ངོ་རྒོལ་གནང་རྒྱུ། སྐུ་ཞབས་ Sandesh Meshram ལགས་རྒྱ་གར་ལྷོ་ཕྱོགས་སྦེང་ལོར་དུ་འབྱོར་འདུག མེ་ཏོག་ལྷ་མཛེས་ལགས་ལ་ Miss Himalaya Global བྱ་དགའ་ཐོབ་འདུག Huawei ལྷན་དུ་ཚོང་འབྲེལ་བྱེད་པ་ནི་དབང་ཆ་གཅིག་བསྡུས་རིང་ལུགས་ལ་རྒྱབ་སྐྱོར་བྱས་པ་དང་གཅིག་མཚུངས་ཡིན་པ་གསུངས་འདུག Saturday 15/02/2020 Dalai Lama assures Tawu Tibetans of better times ahead Panchen Lama issue raised through UN Committee on Enforced Disappearances meeting Queens library caves in to China, Tibet groups to continue protests Lone Indian cyclist for Tibet reaches Bangalore Tibetan model wins Miss Himalaya Global 2020 title China seeking to export its digital autocracy through Huawei: Nancy Pelosi

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་པའི་ཁྲོད་འདིར་བོད་ཆོལ་གསུམ་ལས་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་ནད་གཞི་དེ་ཕོག་པའི་མི་གྲངས་ཁྱོན་ ༣༩ བྱུང་ཡོད་སྟབས། རྟའུ་ཡུལ་དགོན་སྤྱི་ནས་༸གོང་༸སྐྱབས་མགོན་ཆེན་པོ་མཆོག་ལ་བརྟག་ཞུ་ཞུས་པར་མགོན་པོ་༸གང་ཉིད་མཆོག་གིས་ཁ་སང་ཕྱི་ཚེས་ ༡༤ ཉིན་བརྟག་པ་བགྱིས་འབྲས་སུ་དམིགས་བསལ་ངན་དོག་ཆེ་བ་མེད་ཅེས་བཀའ་བསྩལ་འདུག དེའང་ད་ལྟའི་ཆར་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་ས་གནས་ཁག་ཏུ་གློ་ཚད་རིམས་ནད་དེ་ཁྱབ་བརྡལ་ཡོང་བར་དོགས་ནས་བོད་མི་ཚོས་ཡིད་གཟབ་དང་འཕྲོད་བསྟེན་ལ་ཐུགས་སྣང་རྒྱ་གང་ཆེ་གནང་མུས་ཡིན་པ་དང་། རྒྱ་གཞུང་གི་འབྲེལ་ཡོད་ལས་བྱེད་ཚོས་ཀྱང་རིམས་ནད་དེེ་འགོས་པར་དོགས་ཏེ་གཞིས་བཞུགས་བོད་མི་དག་ལ་རང་ཉིད་ཀྱི་ནང་ནས་ཕྱི་ལ་བསྐྱོད་རྒྱུ་གཙོས་པའི་འགྲོ་འདུག་སྤྱོད་གསུམ་ལ་དམ་དྲག་ཆེས་ཆེར་བྱས་དང་བྱེད་བཞིན་ཡོད་པ་རེད། འོན་ཀྱང་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་མི་གྲངས་ ༣༩ ལ་གློ་ཚད་གསར་པའི་རིམས་ནད་དེ་ཕོག་པར་བརྟེན་ནས་བོད་ནང་ནས་རིམས་ནད་ཕོག་པའི་གྲངས་འབོར་མང་ཤོས་ཀྱི་ས་ཚིགས་ཤིག་གྱུར་བར་བརྟེན། རྟའུ་ཡུལ་དགོན་སྤྱི་ནས་༸གོང་ས༌སྐྱབས་མགོན་ཆེན་པོ་མཆོག་ལ་དེ་འབྲེལ་བརྟག་ཞུ་གསོལ་འདེབས་ཞུས་པར་མགོན་པོ་༸གང་ཉིད་མཆོག་གིས་བརྟག་པར་བགྱིས་འབྲས་སུ་དམིགས་བསལ་ངན་དོག་ཆེ་བ་གང་ཡང་མ་ཤར་ཡང་སྤྱི་མཐུན་ལས་དབང་དང་འབྲེལ་བས་ཡུལ་སྤྱི་ནས་འཕྲོད་བསྟེན་སྔོན་འགོག་གཟབ་ནན་དང་། ༸རྗེ་བཙུན་སྒྲོལ་མའི་མཚན་སྔགས་དང་མ་ཎི་གང་འགྲོ་གསོག་དགོས་གལ་ཆེ་བ་མ་ཟད། ༸སྟོན་པའི་གསུང་གི་སྙིང་པོ་བྱང་ཆུབ་སེམས་དང་སྟོང་ཉིད་ཀྱི་ལྟ་བར་ཐོས་བསམ་སྒོམ་པ་ཅི་ཐུབ་གནང་ཚེ་ཚོགས་བསགས་དང་ལས་སྒྲིབ་སྦྱོང་བར་དེ་ལས་ལྷག་པའི་གནད་ཆེ་བ་མེད་ཅེས་ལམ་སྟོན་བཀའ་བསྩལ་མཛད་འདུག གཞི་རྩའི་༸གོང་ས་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཕྱི་ཟླ་ ༡ ཚེས་ ༢༩ ཉིན་ཐེ་ལན་ཌི་དང་ཝེ་ཏི་ནམ་གྱི་དད་ལྡན་ཁག་གཅིག་ལ་མཇལ་ཁ་བསྩལ་སྐབས་རྒྱ་ནག་ནང་གི་ནད་ཡམས་དེའི་ཆེད་ཐུགས་སྨོན་མཛད་པ་མ་ཟད། ནད་ཡམས་དེ་ཞི་བར་སྒྲོལ་མའི་གཟུངས་སྔགས་གསུང་འདོན་གནང་ཚེ་ཕན་ཕོགས་ཡོད་པར་ལམ་སྟོན་མཛད་ཡོད་པར་མ་ཟད། དེ་རྗེས་སླར་ཚེས་ ༣༠ ཉིན་༸མགོན་པོ་༸གང་ཉིད་མཆོག་གིས་བླ་ལྷའི་ཐུགས་དམ་དགོངས་དོན་ལྟར་ཐུབ་པའི་མཚན་སྔགས་དང་མ་ཎི་དུང་ཕྱུར།  སྒྲོལ་མའི་མཚན་སྔགས་ཡི་གེ་བཅུ་པ། བཀའ་འགྱུར་དག་སྒྲོག རྡོ་རྗེ་རྣམ་འཇོམས་མའི་སྒོ་ནས་རྟེན་ཁྲུས་ཡུལ་ཁྲུས་དང་། འདོད་ཁམས་བདག་མོའི་བསྐང་བ་དང་འབྲེལ་མ་མོའི་འཁྲུགས་སྐོང་། པདྨའི་མནོལ་བསངས་བཅས་འཕྲལ་དུ་བསྒྲུབ་དགོས་པ་དང་། གཟུང་སྔགས་ཁག་མང་ཚོགས་སོ་སོ་ནས་གནང་དགོས་པ། དེ་མིན་རྣམས་དགོན་སྡེ་དང་གྲོང་སྡེ་སྤྱི་ཚོགས་བཅས་ནས་རང་དོན་རང་གཅེས་ཀྱིས་འཕྲལ་དུ་བསྒྲུབ་གལ་ཆེ་བའི་འབོད་སྐུལ་མཛད་ཡོད་པ་རེད།

ཨ་རིའི་ནིའུ་ཡོག་གྲོང་ཁྱེར་ Elmhurst ས་ཁུལ་དུ་རྟེན་གཞི་བྱས་པའི་ Queens དཔེ་མཛོད་ཁང་ནས་ཉེ་ལམ་བོད་དང་བོད་མིའི་སྐོར་འཁྱོག་བཤད་དྲིལ་བསྒྲགས་ཀྱི་འགྲེམས་སྟོན་གཉེར་བཞིན་པར་བོད་མི་རྣམས་ནས་ངོ་རྒོལ་གནང་བཞིན་པ་དང་བསྟུན། ཁ་སང་བོད་མིའི་སྐུ་ཚབ་རྣམ་པ་དང་དཔེ་མཛོད་ཁང་གི་འབྲེལ་ཡོད་ལས་བྱེད་དབར་ཐུག་འཕྲད་ཀྱིས་འགྲེམས་སྟོན་དེ་ཕྱིར་འཐེན་བྱེད་དགོས་པའི་གྲོས་བསྡུར་གནང་ཡོད་ཀྱང་། ད་ཆ་འགྲེམས་སྟོན་ཕྱིར་འཐེན་གནང་རྒྱུར་ངོས་ལེན་བྱས་མེད་པར་བོད་མིས་མུ་མཐུད་ངོ་རྒོལ་གནང་རྒྱུ་རེད་འདུག ཁ་སང་ཉིན་དགུང་ཚོུད་ ༣ ཐོག་བོད་རང་བཙན་སློབ་ཕྲུག་ཚོགས་པ་དང་ས་གནས་གཞོན་ནུ་ལྷན་ཚོགས། དེ་བཞིན་ས་གནས་བོད་རིགས་སྤྱི་མཐུན་ཚོགས་པ། མདོ་ཁམས་ཆུ་བཞི་སྒང་དྲུག་གི་སྐུ་ཚབ་རྣམ་པ། ཞིང་གཤེགས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷ་མོ་ལགས་བཅས་ཀྱིས་དཔེ་མཛོད་ཁང་གི་ཚོགས་གཞོན་དང་འབྲེལ་ཡོད་ལས་བྱེད་དང་ལྷན་ཐུག་འཕྲད་ཀྱིས་ཆུ་ཚོད་ ༡ ལྷག་ཙམ་རིང་སྤྱི་ཁང་ཕུན་ཚོགས་སྡེ་བཞིར་འགྲེམས་སྟོན་ཕྱིར་འཐེན་སླད་གྲོས་བསྡུར་གནང་ཡོད་ཀྱང་ད་ཆ་འགྲེམས་སྟོན་དེ་མཚམས་འཇོག་གནང་རྒྱུར་ངོས་ལེན་བྱས་མེད་པ་རེད།    གནད་དོན་དེའི་ཐོག་ཁ་སང་དགོང་མོར་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་སྤྱི་འཐུས་རྡོ་རྗེ་ཚེ་བརྟན་ལགས་དང་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ངག་དབང་མཐར་ཕྱིན་ལགས་རྣམ་གཉིས་ཀྱིས་ངོ་དེབ་བརྒྱུད་ཚོགས་འདུ་དེའི་སྐབས་བོད་རང་བཙན་སློབ་ཕྲུག་ཚོགས་པས་དཔེ་མཛོད་ཁང་གི་སྤྱི་ཁྱབ་ཚོགས་གཙོའི་མཚན་ཐོག་ཏུ་སྤེལ་བའི་ཞུ་སྙན་ཐོག་མི་གྲངས་ ༢༥༠༠ ལྷག་ནས་མཚན་རྟགས་བསྐྱོན་པ་དེ་ཕུལ་ཡོད་པ་དང་། བོད་མི་སྐུ་ཚབ་ངོས་ནས་བོད་ནང་གི་གནས་སྟངས་དངོས་ཡོད་འགྲེལ་བརྗོད་དང་། དེ་བཞིན་ད་རེས་རྒྱ་གཞུང་གིས་འཁྱོག་བཤད་འགྲེམས་སྟོན་སྤེལ་བ་དེས་ཁུལ་དེའི་ནང་གནས་བཞུགས་བོད་མི་རྣམས་ཀྱི་སེམས་ཚོར་ལ་ཕོག་ཐུག་བྱུང་ཡོད་པར་མ་ཟད་ལྷག་པར་དུ་ཨ་རི་ལྟ་བུ་རང་དབང་ལུང་པར་རྒྱ་གཞུང་གི་འཁྱོག་བཤད་སྤེལ་བའི་གནད་དོན་བྱུང་བར་བློ་ཕམ་ཡོད་སྐོར་གསུངས་ཏེ་འགྲེམས་སྟོན་དེ་དེ་མ་ཐག་ཕྱིར་འཐེན་དགོས་པའི་ཞུ་གཏུག་གནང་ཡོད་ཀྱང་། དཔེ་མཛོད་ཀྱི་འབྲེལ་ཡོད་ལས་བྱེད་གཉིས་ནས་གནད་དོན་དེ་དཔེ་མཛོད་ཀྱི་ལས་བྱེད་གོང་མ་དང་ལྷན་གྲོས་བསྡུར་གནང་རྒྱུ་དང་དེ་འབྲེལ་ལན་འདེབས་གང་མགྱོགས་གནང་ངེས་ཡིན་པའི་བརྡ་ལན་གནང་བ་ལས་འགྲེམས་སྟོན་དེ་ཕྱིར་འཐེན་གནང་རྒྱུར་ངོས་ལེན་བྱས་མེད་པར་བོད་མི་ཚོས་མུ་མཐུད་ཕྱི་ཚེས་ ༡༥ ཉིན་དགུང་ཚོུད་ ༡ ནས་ ༥ བར་ངོ་རྒོལ་གནང་རྒྱུ་ཡིན་སྐོར་གསུངས་ཡོད། བོད་དོན་འཁྱོག་བཤད་འགྲེམས་སྟོན་དེ་ནིའུ་ཡོག་ནང་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་ནས་རྒྱབ་སྐྱོར་བྱེད་བཞིན་ཡོད་པ་གསུངས་པ་མ་ཟད་སླད་མར་ Queens  དཔེ་མཛོད་ཁང་གི་ཡན་ལག་ ༦༥ དེ་དག་ནང་བོད་དོན་གྱི་དངོས་ཡོད་གནས་སྟངས་ཐོག་གཏམ་བཤད་གནང་རྒྱུའི་སྡིངས་ཆ་བསྐྲུན་རྒྱུ་ཡིན་པར་གསུངས་པ་དེ་ལྟར་ཡང་། བོད་མིའི་སྐུ་ཚབ་རྣམ་པས་དཔེ་མཛོད་ཁང་ནས་ད་ལྟ་སྤེལ་བཞིན་པའི་འཁྱོག་བཤད་འགྲེམས་སྟོན་དེ་ངེས་པར་དུ་མཚམས་འཇོག་བྱེད་དགོས་པ་དང་དེ་ལྟར་མ་གནང་ཚེ་མུ་མཐུད་ལས་འགུལ་སྤེལ་རྒྱུ་ཡིན་པ་གསུངས་ཡོད། རྒྱ་ནག་གི་འཁྱོགས་བཤད་དྲིལ་བསྒྲགས་འགྲེམས་སྟོན་དེ་ཟླ་བ་ ༦ པ་བར་ Elmhurst ཀྱི་ Queens དཔེ་མཛོད་ཁང་ཙམ་མིན་པར་དཔེ་མཛོད་ཁང་གཞན་བརྒྱད་ཀྱི་ནང་དེ་ལྟར་སྤེལ་རྒྱུའི་འཆར་གཞི་ཡོད་པ་དང་། རྡོ་རྗེ་ཚེ་བརྟན་ལགས་ཀྱིས་རྒྱ་གཞུང་གིས་འཁྱོག་བཤད་སྤེལ་བར་རྒྱབ་སྐྱོར་གནང་རྒྱུ་དང་དེ་མིན་དྲང་བདེན་ལ་རྒྱབ་སྐྱོར་གནང་རྒྱུའི་གདམ་ཀ་དེ་ Queens དཔེ་མཛོད་ཁང་ལ་ཡོད་ཅེས་གསུངས་འདུག གཞི་རྩའི་ Queens དཔེ་མཛོད་ཁང་དུ་རྒྱ་ནག་གིས་འཁྱོག་བཤད་དྲིལ་བསྒྲགས་བྱེད་བཞིན་པའི་འགྲེམས་སྟོན་དེ་དེང་རབས་ཀྱི་རྒྱ་ནག་ཅེས་པའི་འགྲེམས་སྟོན་གྱི་ཆ་ཤས་ཡིན་པ་དང་། འགྲེམས་སྟོན་གྱི་བརྗོད་གཞི་ནི་བོད་ནང་གི་དུས་རྒྱུན་གྱི་འཚོ་བ་ཞེས་པ་དེ་རེད་འདུག འཁྱོག་བཤད་ཀྱི་པར་རིས་འགྲེམས་སྟོན་ནང་བོད་ནང་གི་དགོན་སྡེ་དང་མཆོད་རྟེན་སོགས་བསྟན་པ་དང་། བོད་ཕྲུག་རྣམས་སློབ་གྲྭར་བསྐྱོད་དེ་བོད་ཡིག་སྦྱོང་བཞིན་ཡོད་པ་བཅས་ཤེས་ཡོན་གྱི་གོ་སྐབས་འདྲ་མཉམ་ཡོད་པའི་རྣམ་པ་སོགས་བསྟན་ཡོད་པར་མ་ཟད་འགྲེམས་སྟོན་གྱི་ངོ་སྤྲོད་ནང་བོད་དེ་དེ་སྔ་ནས་རྒྱ་ནག་གི་ཆ་ཤས་ཡིན་པ་དང་། བོད་ཀྱི་གནད་དོན་དེ་རྒྱ་ནག་གི་ནང་མོལ་གྱི་གནད་དོན་ལས་ཕྱི་ཕྱོགས་ནས་ཐེ་བྱུས་བྱེད་མི་ཆོག་པ། ལྷག་པར་དུ་འདས་པའི་ལོ་ངོ་ ༦༠ ནང་བོད་ནང་དཔལ་འབྱོར་དང་སྤྱི་ཚོགས། རིག་གཞུང་། ཁོར་ཡུག་སོགས་ཀྱི་སྡེ་ཚན་གང་ས་ཅི་ཐད་ནས་ལོ་རྒྱུས་ཀྱི་རང་བཞིན་ལྡན་པའི་ཡར་རྒྱས་ཚད་མཐོར་ཕྱིན་ཡོད་པ་དང་། དེང་རབས་བོད་ནང་གི་བོད་མི་ཚོས་ཆོས་ལུགས་མཐུན་སྒྲིལ་དང་དཔལ་འབྱོར་། ཁོར་ཡུག་སོགས་ཡར་རྒྱས་ཕྱིན་པ་དག་ལོངས་སུ་སྤྱོད་བཞིན་ཡོད་པ་མངོན་གསལ་བྱས་པ་དང་ཆབས་ཅིག བོད་རང་སྐྱོང་ལྗོངས་ཟེར་བའི་ནང་མི་རིགས་འདྲ་མིན་ཡོད་པ་དེ་དག་གིས་ཀྱང་རྒྱ་གཞུང་དང་ས་གནས་གཞུང་ལ་རྒྱབ་སྐྱོར་མཐའ་གཅིག་ཏུ་གནང་གི་ཡོད་སྐོར་འཁྱོག་བཤད་སྤེལ་བར་མ་ཟད་རྒྱལ་སྤྱིའི་སྤྱི་ཚོགས་ནས་ཀྱང་རྒྱ་གཞུང་གི་བོད་དང་འབྲེལ་བའི་སྲིད་བྱུས་ལའང་རྒྱབ་སྐྱོར་དང་བསམ་ཤེས་བྱེད་ཀྱི་ཡོད་པ་སོགས་རྣམ་ཀུན་ནས་བོད་དོན་དང་འབྲེལ་བའི་རྒྱ་གཞུང་གི་དྲིལ་བསྒྲགས་ཤུགས་ཆེ་སྤེལ་བཞིན་པའི་འཁྱོག་བཤད་རྣམས་ཆེད་འདོན་བྱས་ཡོད་པ་རེད།

ཕྱི་ཟླ་ ༢ ཚེས་ ༡༠ ནས་ ༡༤ བར་སུད་སི་གྲོང་ཁྱེར་ཇི་ཝར་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་ཡོད་པ་ལྟར་ཚོགས་ཆེན་དེ་དང་བསྟུན་བོད་མའི་སྐུ་ཚབ་ནས་འབྲེལ་ཡོད་ཚོགས་ཆུང་ལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མིའི་ཆབ་སྲིད་བཙོན་པའི་གནད་དོན་སྐོར་ལ་ཞུ་གཏུག་སྙན་སེང་ཞུས་འདུག གཙོ་བོར་དེ་སྔ་ཕྱི་ལོ་ ༡༩༩༥ ལོར་སུད་སི་སྐུ་ཚབ་དོན་གཅོད་ཁང་ནས་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ལ་རྒྱ་གཞུང་གིས་བཙན་ཁྲིད་བྱས་པའི་འོག་གར་སོང་ཆ་མེད་དུ་གྱུར་བའི་ ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་ཡབ་ཡུབ་གཉིས་ཀྱི་གནད་དོན་གྱོད་གཞི་ཐོ་འཁོད་ངོས་བཞེས་གནང་བ་ནས་བཟུང་ད་བར་རྒྱུན་མི་ཆད་པར་འཇུག་སྣོན་ཞུ་གཏུག་གནང་བཞིན་པའི་ཁྲོད་འདིར་ཉེ་ཆར་སུད་སི་སྐུ་ཚབ་དོན་གཅོད་འཆེ་མེད་རིན་འཛིན་ལགས་ཀྱིས་སྣི་ཁྲིད་འོག་དོན་ཁང་གི་འགྲོ་བ་མིའི་ཐོབ་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་དང་འཕྲིན་ལས་ཆོས་སྐྱིད་ལགས་བཅས་གསུམ་ནས་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་པ་དང་བསྟུན་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ཚོགས་གཞོན་སྐུ་ཞབས་ Tae Uug Baik ལགས་སུ་མཇལ་མོལ་གྱིས་ད་ལྟའི་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གནས་བབས་དང་བོད་མིའི་རང་ལུས་མེར་སྲེག་གི་གནད་དོན། ༸པཎ་ཆེན་དགེ་ཆོས་ཀྱི་ཉི་མ་མཆོག་གི་གནད་དོན་མུ་མཐུད་འཇུག་སྐྱོང་ཞུ་གཏུག་གནང་བ་དང་འབྲེལ། རྒྱལ་ཚོགས་ནས་རྒྱ་གཞུང་ལ་གནོན་ཤུགས་སྤྲད་དེ་རིན་པོ་ཆེ་མཆོག་གིས་གཙོས་པའི་ད་བར་གར་སོང་ཆ་མེད་དུ་གྱུར་བའི་བོད་མི་རྣམས་ཀྱི་གནད་དོན་རྩད་གཅོད་གནང་ཕྱིར་རྒྱལ་ཚོགས་ཀྱི་རང་དབང་རྟོག་ཞིབ་ཚོགས་ཆུང་ཞིག་བོད་ནང་ཆེད་བསྐྱོད་གནང་རྒྱུ། དེ་བཞིན་རྒྱ་གཞུང་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་དང་བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་བྱ་སྤྱོད་རྣམས་འཕྲལ་དུ་མཚམས་འཇོག་ཡོང་བར་གནོན་ཤུགས་སྤྲོད་རོགས་ཞེས་འབོད་སྐུལ་སོགས་གནང་ཡོད་པ་རེད། སྔ་ལོའི་ཕྱི་ཟླ་དགུ་པའི་ནང་ཚོགས་པའི་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་ཐོག་རྟོག་ཞིབ་གནང་མཁན་གྱི་མཁས་ལས་དོན་ཚོགས་ཆུང་གི་ཚོགས་འདུ་ཐེངས་ ༡༡༩ སྟེང་ལས་དོན་ཚོགས་ཆུང་གི་ངོས་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མཆོག་གི་གནད་དོན་དང་འབྲེལ་ཏེ་འདྲི་རྩད་བྱས་པར་རྒྱ་ནག་གཞུང་གིས་༸པཎ་ཆེན་རིན་པོ་མཆོག་རྒྱུན་ལྡན་གྱི་འཚོ་བར་རོལ་བཞིན་ཡོད་སྐོར་བརྗོད་པ་དང་འབྲེལ། ད་ལྟའི་ཆར་གཙུག་ལག་སློབ་གྲྭ་ཆེན་མོ་ཐོན་ནས་ཕྱག་ལས་གནང་གི་ཡོད་ཅེས་བརྗོད་པ་ཙམ་ལས་ཞིབ་ཕྲའི་གནས་ཚུལ་ཁ་གསལ་གང་ཡང་བཤད་མེད་པ་རེད། སྐབས་དེར་རྒྱ་གཞུང་གིས་ལན་འདེབས་དེ་ཕྱི་ལོ་ ༢༠༡༣ ལོར་༸པཎ་རིན་པོ་ཆེའི་གནད་དོན་སྐོར་ལ་རྒྱལ་ཚོགས་ལན་འདེབས་གནང་བའི་རྗེས་ཀྱི་ལན་འདེབས་ཐོག་མ་དེ་ཆགས་ཀྱི་ཡོད་པ་རེད། འོན་ཀྱང་སྐབས་དེར་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་མཁས་ལས་ལས་དོན་དོན་ཚོགས་ཆུང་ནས་རྒྱ་ནག་གཞུང་གིས་གསལ་བཤད་ལན་འདེབས་དེ་ནི་འདོད་བློ་ཁེངས་པ་ཞིག་མི་འདུག་ཅེས་དང། རིན་པོ་ཆེ་མཆོག་གི་གནས་སྟངས་སྐོར་ལ་ཞིབ་འཇུག་དང་ཤེས་རྟོགས་ཁ་གསལ་ཡོང་བའི་གནས་ཚུལ་ཆ་ཚང་བ་ཞིག་རྒྱ་གཞུང་ནས་ལན་འདེབས་ནང་མི་འདུག་པས་ལས་དོན་ཚོགས་ཆུང་ནས་དེ་འབྲེལ་ཐོག་དོ་སྣང་གནང་གནད་ཡིན་སྐོར་རྒྱ་ནག་གཞུང་ལ་བསྐྱར་ནན་གནང་ཡོད་པ་རེད། རྩ་བའི་འཛམ་གླིང་ནང་རྒྱལ་ཁབ་ཁག་གི་ཁྲོད་དུ་གར་སོང་ཆ་མེད་དུ་གྱུར་བའི་གནད་དོན་ཐོག་ལྟ་སྲུང་ རོགས་སྐྱོར་བྱེད་མཁན་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དབུ་བརྙེས་ཏེ་འདི་ལོར་ལོ་ངོ་ ༤༠ འཁོར་བ་དང་བསྟུན་ཁ་སང་སྤེལ་བའི་སྤྱི་བསྒྲགས་ནང་འདས་པའི་ལོ་ངོ་དེ་དག་ནང་འཛམ་གླིང་རྒྱལ་ཁབ་འདྲ་མིན་ ༡༠༠ ལྷག་གི་ཁྲོད་ནས་གར་སོང་ཆ་མེད་དུ་གྱུར་བའི་གྱོད་གཞི་ཁྱོན་ ༥༨༠༠༠ ལྷག་ཚོགས་ཆུང་ལ་ཐོ་འཁོད་སྙན་སེང་ཞུས་ཡོད་པའི་ཁྲོད་ནས་གྱོད་གཞི་ ༤༦༠༠༠ དུང་ཡང་གསལ་མ་ཐུབ་པར་ལྷག་ཡོད་པར་མངོན་གསལ་གནང་འདུག་པར་མ་ཟད་བཙན་ཁྲིད་འོག་གར་སོང་ཆ་མེད་དུ་གྱུར་བའི་གནད་དོན་མུ་མཐུད་ནས་འཕྲད་བཞིན་པ་འདིས་འཛམ་གླིང་ནང་ཁྱོན་ཡོངས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐོང་རྡོག་རོལ་གྱི་གནད་དོན་ཚབས་ཆེས་ཆེར་འགྲོ་བཞིན་ཡོད་པར་བརྗོད་འདུག དེ་བཞིན་ཁ་སང་ལས་དོན་ཚོགས་ཆུང་དེ་དབུ་བརྙེས་ནས་ལོ་ངོ་ ༤༠ འཁོར་བའི་དུས་དྲན་སྲུང་བརྩི་དང་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གནས་ཡུལ་དུ་དམིགས་བསལ་གྱི་འདུ་འཛོམས་ཆེས་ཐོག་མ་དེ་གཉེར་ཡོད་པ་དང། སྐབས་དེར་ཚོགས་ཆུང་གིས་སླད་མར་འབྲེལ་ཡོད་འཛམ་གླིང་ས་ཕྱོགས་གང་ས་ནས་ཚོགས་སྡེ་ཁག་དང་མང་ཚོགས་ངོས་ནས་གར་སོང་ཆ་མེད་ཀྱི་གྱོད་གཞི་གང་འདྲ་ཞིག་ཡིན་རུང་སྟབས་བདེ་ཐོག་ལས་དོན་ཚོགས་ཆུང་ལ་ཞུ་གཏུག་ཐོ་འགོད་དང་སྙན་སེང་ཞུ་ཕྱིར་ཆེད་དམིགས་བསལ་བཀོད་སྤྱོད་མཉེན་ཆས་ཤིག་ཀྱང་དབུ་འབྱེད་གནང་ཡོད་པ་རེད། སུད་སི་གཅོད་ཁང་གི་རྒྱལ་ཚོགས་དང་འབྲེལ་ཡོད་ཀྱི་ལས་བྱེད་རྣམས་བོད་མིའི་སྐུ་ཚབ་ཐོག་ནས་མཛད་སྒོར་མཉམ་ཞུགས་ཀྱང་གནང་ཡོད་པ་རེད།