Monthly Archives: February, 2020

ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་སྐུ་ཞབས་ Mike Pompeo ལགས་ཀྱིས་རྒྱ་ནག་གི་གསར་ལམ་ཆེ་ཁག་ལྔ་མིང་འདོན་བྱས་ཏེ།  གསར་ལམ་དེ་དག་ནི་རྒྱ་ནག་གིས་ཕྱི་ཕྱོགས་ཀྱི་དམིགས་འདུན་ལ་ཁ་གཏད་པའི་དམར་ཤོག་སྲིད་གཞུང་གི་ལག་ཆ་ཡིན་པར་མངོན་གསལ་གནང་འདུག དེ་རིང་ཨ་རིའི་གསར་ཁང་། Axios ཞེས་པས་གནས་ཚུལ་སྤེལ་བའི་ནང་དུ། ཁ་སང་ཨ་རིའི་ཕྱི་སྲིད་ལས་ཁུངས་ཀྱིས་རྒྱ་ནག་སྲིད་གཞུང་གིས་གསར་འགྱུར་བརྒྱུད་ལམ་ཆེ་ཁག་ལྔ། ཞིན་ཧ་གསར་ཁང་དང་། རྒྱ་ནག་གི་རྒྱལ་སྤྱིའི་བརྙན་འཕྲིན་དྲ་བ། རྒྱ་ནག་གི་རྒྱལ་སྤྱིའི་རླུང་འཕྲིན་ཁང་། དེ་བཞིན་རྒྱ་ནག་གི་ China Daily Distribution Corp ཞེས་པ་དང་ Hai Tian Development USA ཞེས་པ་སོགས་ནི་རྒྱ་ནག་དམར་ཤོག་གིས་ཕྱི་ཕྱོགས་ལ་ཁ་གཏད་པའི་སྲིད་གཞུང་གི་ལག་ཆ་ལྟ་བུའི་གསར་ཁང་རྐྱང་རྐྱང་ཡིན་པར་མངོན་གསལ་གནང་སྟེ།   རྒྱ་ནག་གི་དྲིལ་བསྒྲགས་ཀྱི་སྡེ་ཚན་རྣམས་ཀྱིས་ཨ་རིའི་ནང་དུ་རང་དབང་གིས་ལས་དོན་སྤེལ་བཞིན་ཡོད་ནའང་། རྒྱ་ནག་གི་ནང་དུ་ཡོད་པའི་ཨ་རིའི་གསར་འགོད་པ་རྣམས་ལ་དམར་ཤོག་གཞུང་གིས་སྟངས་འཛིན་དམ་དྲག་ནན་པོ་བྱེད་བཞིན་པར་བརྟེན།  རྒྱ་ནག་གིས་དམར་ཤོག་སྲིད་གཞུང་གིས་གནད་དོན་དེར་བསྐྱར་དུ་བསམ་གཞིགས་བྱེད་རྒྱུའི་སྐུལ་མ་གནང་འདུག གསར་ཁང་གིས།  ཕྱི་སྲིད་ལས་ཁུངས་ཀྱིས་གནད་དོན་དེ་གླེང་སློང་བྱེད་དོན་ནི་ Trump འཛིན་སྐྱོང་གི་ངོས་ནས་རྒྱ་ནག་ལ་གནོད་ཤུགས་སྤྲོད་རྒྱུའི་འགུལ་སྐྱོད་གསར་བ་ཞིག་ཡིན་དང་། རྒྱ་ནག་གི་ནང་དུ་ཡོད་པའི་ཨ་རིའི་ཚོགས་པ་ཁག་ལ་རྒྱ་ནག་གིས་བཀག་སྡོམ་བྱེད་ཀྱི་ཡོད་པ་ལྟར།  ད་ཆ་ཨ་རིའི་ངོས་ནས་ཀྱང་ཨ་རིར་ཡོད་པའི་རྒྱ་ནག་གི་ཚོགས་པ་ཁག་ལ་བཀག་སྡོམ་གཅིག་པ་བྱེད་ཐབས་ཤིག་ཡིན་པར་འཁོད་འདུག སྐུ་ཞབས་ Pompeo ལགས་ཀྱིས་གསར་ཁང་ལ།  རྒྱ་ནག་གི་སྲིད་འཛིན་ཞི་ཅིན་ཕིང་གིས་གསར་ལམ་ཁག་དེ་དག་གིས་དམར་ཤོག་སྲིད་གཞུང་གི་ཆེད་དུ་ལས་ཀ་བྱེད་བཞིན་ཡོད་སྐོར་གསུངས་ཡོད་དུས།   ང་ཚོ་ངོས་ནས་རྒྱ་ནག་གི་གསར་ཁང་དེ་དག་ག་རེ་ཡིན་པ་དེ་ལ་ངོས་འཛིན་བྱེད་ཀྱི་ཡོད་པ་ལས། ང་ཚོས་དེ་ལ་སྒྲོ་འདོགས་བྱེད་ཀྱི་མེད་སྐོར་གསུངས་བ་དང་སྦྲགས།  གསར་ཁང་དེ་དག་རྒྱ་ནག་དམར་ཤོག་སྲིད་གཞུང་གི་མགྲིན་ཚབ་པ་ཆགས་ཡོད་པ་མ་ཟད།   ད་ཆ་སྲིད་གཞུང་གི་སྟངས་འཛིན་འོག་གི་གསར་ཁང་དེ་དག་ཤུགས་ཆེ་རུ་འགྲོ་བཞིན་པ་ཡོངས་གྲགས་གནང་འདུག གཞན་ཡང་གསར་ཁང་གིས།  ཐེངས་འདིའི་ཨ་རིའི་ཕྱི་སྲིད་ལས་ཁུངས་ཀྱི་བྱེད་ལས་དེ་ཡིས།  ཨ་རིའི་ Trump འཛིན་སྐྱོང་གིས་ཨ་རི་དང་རྒྱ་ནག་གཉིས་ཀྱི་འབྲེལ་ལམ་གྱི་ཁྲོད་དུ་ཕན་ཚུན་འདྲ་མཉམ་དུ་བལྟ་དགོས་བར་ཤུགས་སྣོན་ཡང་ཡང་བྱེད་ཀྱི་ཡོད་པ་དེ་གསལ་འདོན་བྱས་ཡོད་པ་ཞིག་ཡིན་པར་འགྲེལ་བརྗོད་གནང་སྟེ།   འདི་ལོའི་ཟླ་བ་བཅུ་བའི་ནང་དུ། ཨ་རིའི་ངོས་ནས་རྒྱ་ནག་གི་གཞུང་འབྲེལ་མི་སྣ་སུ་ཞིག་ཨ་རིར་ཡོང་ནས་མཐོ་སློབ་དང་ཞིབ་འཇུག་ལྟེ་གནས་སོགས་སུ་འགྲོ་དགོས་ཚེ་ངེས་བར་ཨ་རིའི་ཕྱི་སྲིད་ལས་ཁུངས་ལ་ཐོ་འགོད་བྱེད་དགོས་བའི་ཁྲིམས་སྒྲིག་ཤིག་བཟོས་ཡོད་པར་བསྒྲགས་ཏེ། ཐེངས་འདིའི་ཕྱི་སྲིད་ལས་ཁུངས་ཀྱི་དམིགས་འབེན་གཙོ་བོ་ནི། རྒྱལ་ཁབ་ཕན་ཚུན་གྱི་བར་དུ་འདྲ་མཉམ་ཀྱི་ངོས་འཛིན་ཡོང་ཐབས་ལ་དམིགས་པ་ཞིག་ཡིན་སྐོར་འཁོད་འདུག  

དེ་རིང་གསར་ལམ་ཁག་ཏུ་གནས་ཚུལ་ཐོན་པར་རྒྱ་ནག་ཝུ་ཧན་ནང་སྨན་ཁང་གི་མཐུན་རྐྱེན་ཞན་པ་དང་ནད་གཉོག་སོགས་ཀྱི་གསར་འགྱུར་མང་པོ་སྐད་འཕྲིན་བརྒྱུད་ནས་ཁྱབ་བརྡལ་འབྱུང་བཞིན་པའི་ཁྲོད་ནད་དུག་ཕོག་པའི་ནད་པ་ཁག་ཅིག་གིས་སྨན་ཁང་གི་རྩིག་གྱང་གཏོར་ནས་ཕྱི་ལ་བྲོས་ཡོད་པའི་གནད་དོན་དང་། དེ་བཞིན་སྨན་པའི་ནད་པ་ཁག་ཅིག་གསོན་པོ་རྒྱབ་ཁུག་ཏུ་བཅུག་ནས་དུར་ལ་བརྫངས་བ་སོགས་ཆེས་ཛ་དྲག་གི་གནད་དོན་བྱུང་ཡོད་པ་རེད། རྒྱ་ནག་གི་བཀག་སྡོམ་ནན་པོ་བྱེད་བཞིན་ཡོད་ཀྱང་ད་ལྟའི་ཆར་མི་མང་ནས་སྐད་འཕྲིན་བརྒྱུད་ནས་གླེང་མོལ་དང་ཡིག་འབྲེལ་བྱས་པའི་གནད་དོན་མང་པོ་ཞིག་ཕྱི་ལ་ཁྱབ་བཞིན་པའི་ཁྲོད་འདིར་རིམས་ནད་ཕོག་པའི་ནད་པ་ཞིག་གི་བུས་སྐད་འཕྲིན་དུ་ཡི་གེ་བྲིས་བ་ཞིག་ཕྱིར་གྱར་བྱུང་བར་སྨན་ཁང་དུ་སྨན་བཅོས་ཀྱི་མཐུན་རྐྱེན་དང་ཉལ་ཁྲི་མེད་པའི་དཀའ་ངལ་ཡོད་པར་བརྟེན་ཁོང་གི་པཱ་ལགས་སྨན་པ་ཞིག་གིས་གསོན་པོ་རྒྱབ་ཁུག་ཏུ་བཅུག་ནས་དུར་སར་བརྫངས་ཡོད་པ་མངོན་གསལ་གནང་འདུག ཡི་གེ་བྲིས་དེའི་ནང་ནད་པ་གསར་པ་ཞིག་ལ་ཉལ་ཁྲི་མཁོ་སྤྲོད་ཆེད་དུ་ཁོང་གི་པཱ་ལགས་གསོན་པོ་རྒྱབ་ཁུག་ཏུ་བཅུག་ཡོད་པ་དང།  ཁོང་གི་བུས་རྒྱབ་ཁུག་གི་ཁ་ཕྱེས་ནས་པཱ་ལགས་ཀྱི་ལུས་པོར་ལག་པ་འཆང་དུས་པཱ་ལགས་ཀྱི་ལུས་པོའི་དྲོད་ཡལ་མེད་པ་མ་ཟད་མིག་ཕྱེས་ནས་ཁོང་ལ་སྐད་ཆ་བཤད་གྲབས་བྱས་ཀྱང་། སྨན་པས་བཙན་དབང་གིས་ཁོང་ཕྱི་ལ་ཕུད་ཡོད་པ་དང་། ཁོང་ཚོར་ཕུང་པོ་དུར་སྤས་བྱེད་མཁན་སྐད་ཐོངས་ཤོག་ཅེས་བཙན་སྐད་བཏང་ཡོད་པ་ལྟར་པཱ་ལགས་གསོན་པོ་རྒྱབ་ཁུག་ཏུ་བཅུག་ནས་རླངས་འཁོར་ཞིག་གི་ནང་བཞག་ནས་དུར་སར་བརྫགས་འདུག ནད་པ་དེའི་ཆུང་མའི་མིག་ནས་རང་དབང་མེད་པར་མིག་ཆུ་ཤོར་ཡོད་སྟབས། སྨན་པས་ཁོང་མོར་རིམས་ནད་ཕོག་སྟབས་མིག་ཆུའི་ནང་ནད་དུག་འདྲེས་ཡོད་པར་བརྗོད་དེ་འཇིགས་སྐུལ་བྱས་ཡོད་པ་སོགས་ཀྱི་གནས་ཚུལ་བྱུང་འདུག རྩ་བའི་དེ་རིང་བར་རྒྱ་ནག་གིས་སྤེལ་བའི་གནས་ཚུལ་ནང་རྒྱ་ནག་ཏུ་ནད་དུག་ཕོག་པའི་མི་གྲངས་ ༧༤༠༠༠ ལྷག་ཡོད་པ་དང་། དེ་དག་ལས་ནད་པ་ ༢༠༠༤ ལྷག་གྲོངས་ཡོད་པའི་གནས་ཚུལ་འཁོད་འདུག   དེ་བཞིན་བོད་ཁུལ་གྱི་གནས་ཚུལ་སྤེལ་བར་ཁ་སང་ཚེས་ ༡༧ བར་སི་ཁྲོན་ཞིང་ཆེན་དུ་ནད་པ་ ༥༠༨ བྱུང་ཡོད་པ་དང་། མཚོ་སྔོན་ཞིང་ཆེན་དུ་ཁྱོན་བསྡོམས་ནད་པ་ ༡༨ བྱུང་བ། དེ་བཞིན་ཀན་སུའུ་རུ་ནད་པ་ ༩༡ དང་ཡུན་ནན་ཞིང་ཆེན་དུ་ནད་པ་ ༡༧༢ བྱུང་ཡོད་པ་སོགས་ཀྱི་གནས་ཚུལ་སྤེལ་འདུག

ཉན་པ།: Listen ཕབ་ལེན། Download སྤྱི་འཐུས་ཚོགས་གཙོ་མཆོག་གིས་ལྷོ་ཨ་ཕི་རི་ཀའི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་ཆེད་འཛུགས་གནང་བའི་ཞུ་སྐུལ། ༸དཔལ་ས་སྐྱའི་ཁྲི་འཛིན་ཞེ་གསུམ་པའི་ཁྲི་སྟོན་མཛད་སྒོ་ཕྱི་བཤོལ་གནང་བ། བོད་ཀྱི་སྨན་རྩིས་ཁང་གིས་རིམས་སྲུང་རིལ་བུའི་ཚོང་འགྲེམས་གནང་རྒྱུ་མཚམས་འཇོག ལོ་གཅིག་གི་ཉི་ཧོང་སྐད་ཡིག་ཆེད་སྦྱོང་གི་སློབ་ཡོན་གསར་ཐོན། གླུ་གཞས་ལས་རིམ། ཚེ་དབང་ལྷ་མོ་ལགས་ཀྱིས་ ༢༠༢༠ ལོའི་ཨ་མ་ལོ་ལོའི་གླུ་གཞས་ཕྱོགས་བསྒྲིགས། Tuesday 18/02/2020 TPiE speaker urges for Tibet Support Group in South African parliament Enthronement ceremony of 43rd Sakya Trizin postponed Men Tsee Khang notified to stop selling Rimsung Rilbu Education department announces 2020 Reitaku University Scholarship MUSIC FEATURE: Ama Lolo, new song by Tsewang Lhamo

བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཉིན་གྲངས་བཞིའི་རིང་ལྷོ་ཨ་ཕི་རི་ཀའི་ནང་གཞུང་འབྲེལ་ཕྱོགས་སྐྱོད་གནང་ཡོད་པའི་ཁྲོད་ཡུལ་དེའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་མཉམ་ཞུགས་དང་དེ་བཞིན་གྲོས་ཚོགས་འཐུས་མི་ཁག་ཅིག་དང་མཇལ་མོལ་གྱིས་ལྷོ་ཨ་ཕི་རི་ཀའི་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེད་འཛུགས་གནང་བའི་ཞུ་སྐུལ་གནང་འདུག ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཁུལ་དེའི་ State of the National Address  འམ་ལྷོ་ཨ་ཕི་རི་ཀའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་གདན་ཞུས་གནང་དོན་ལྟར་ཚེས་ ༡༣ ཉིན་ Inkatha Freedom Party སྲིད་དོན་ཚོགས་པའི་གྲོས་ཚོགས་འཐུས་མི་རྣམས་དང་མཇལ་འཕྲད་དང་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་ལྷན་ཞུགས་གནང་ཡོད་པ་དང་། མཛད་སྒོའི་ཐོག་ Inkatha སྲིད་དོན་ཚོགས་པའི་ཚོགས་གཙོ་ཟུར་པ་རྒྱལ་སྲས་ Buthelize མཆོག་དང་ད་ལྟའི་ཚོགས་གཙོ་ལས་ཐོག་སྐུ་ཞབས་ Velenkosini Hlabisa མཆོག་ལ་སོགས་པའི་གྲོས་ཚོགས་འཐུས་མི་དང་དེ་བཞིན་ཚོགས་པ་དེ་དང་འབྲེལ་ཡོད་ཁག་ཅིག ཐེ་ཝན་གཞུང་ཚབ། འཇར་མ་ནིའི་སྤྱི་ཚོགས་རིང་ལུགས་སྲིད་དོན་ཚོགས་པའི་གཞུང་འབྲེལ་མིན་པའི་ཚོགས་པ་ཁག་གི་འཐུས་མི་སོགས་མཉམ་ཞུགས་གནང་ཡོད་སྟབས། སྐབས་དེར་ Inkatha འི་གྲོས་ཚོགས་ཤོག་ཁག་འགན་འཛིན་སྐུ་ཞབས་ Narend Singh མཆོག་གིས་རྒྱ་ནག་གཞུང་མཉམ་འབྲེལ་རྒྱལ་ཚོགས་ཀྱི་གཞུང་ཚབ་ནས་ཁོང་ཚོའི་ཚོགས་པར་བོད་དང་ཐེ་ཝན་གྱི་སྐུ་ཚབ་མགྲོན་འབོད་གནང་ན་འགྲིག་གི་མེད་པའི་ཉེན་བརྡ་བཏང་བར་བལྟོས་མེད་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་དང་ཐེ་ཝན་གཞུང་ཚབབཅས་མགྲོན་འབོད་གནང་བ་ལྟར་ཕེབས་ཐུབ་པར་དགའ་བསུ་ཡོད་ཅེས་གསུངས་ཡོད་པ་རེད། ཐེངས་འདིའི་གཞུང་འབྲེལ་ཕྱོགས་བསྐྱོད་ཁྲོད་ཕྱི་ཚེས་ ༡༤ ཉིན་གྱི་སྔ་དྲོ་སྤྱི་འཐུས་ཚོགས་གཙོ་མཆོག་གིས་ Scalabrini and Africa Committee for Tibet གཉིས་ནས་གོ་སྒྲིག་ཞུས་པའི་བོད་དེ་རྒྱ་ནག་གཞུང་གིས་ཁྲིམས་འགལ་ཐོག་བཙན་བཟུང་བྱས་ རྗེས་རྒྱ་གར་དུ་བཙན་བྱོལ་བོད་མིའི་སྒྲིག་འཛུགས་ཀྱི་འཛིན་སྐྱོང་གནང་ཕྱོགས་སྐོར་གྱི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་གྱི་མཛད་རིམ་ཞིག་གནང་ཡོད་པ་དང་། སྐབས་དེར་ཚོགས་བཅར་བ་མི་གྲངས་ ༦༠ ལྷག་ཕེབས་ཡོད་པའི་ཁོངས་ནས་གྲོས་ཚོགས་འཐུས་མི་ལྔ་དང་སྤྱི་ཚོགས་ཞབས་ཞུ་བ། བོད་དོན་སྣང་ཅན། ཡུལ་དེར་སྐྱབས་བཅོལ་དུ་འབྱོར་བ་བཅས་ཆགས་ཀྱི་འདུག ཕྱི་ཚེས་ ༡༤ ཉིན་སྤྱི་འཐུས་ཚོགས་གཙོ་མཆོག་གིས་ལྷོ་ཨ་ཕི་རི་ཀའི་མང་གཙོ་མཉམ་མཐུན་ཚོགས་པའི་གྲོས་ཚོགས་ཤོག་ཁག་གི་འགན་འཛིན་ལྕམ་སྐུ་ Natasha Mazzone མཆོག་དང་མཇལ་མོལ་གནང་ཡོད་པ་ལྟར་མཇལ་མོལ་སྐབས་བོད་ནང་གི་དཀའ་ངལ་དངོས་ཡོད་ཁག་ངོ་སྤྲོད་དང་འབྲེལ་ལྷོ་ཨ་ཕི་རི་ཀའི་གྲོས་ཚོགས་ནང་བོད་དོན་ཐོག་གྲོས་ཆོད་དང་གསུང་བཤད་གནང་ཐུབ་ཚེ་དགེ་མཚན་ཆེ་སྐོར་དང་དེ་བཞིན་ཡུལ་དེར་སྲིད་དོན་ཚོགས་པ་འདྲ་མིན་ལས་གྲུབ་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེད་འཛུགས་གནང་རྒྱུ་གཙོས་པའི་ལྕམ་སྐུ་མཆོག་དང་གྲོས་ཚོགས་འཐུས་མི་རྣམ་པ་བཞུགས་སྒར་དུ་གཞུང་འབྲེལ་སྐུ་མགྲོན་དུ་གདན་ཞུ་ལྟར་ཕེབས་ཐུབ་ན་དགའ་བསུ་ཡོད་ཅེས་ཞུས་པར་ལྕམ་སྐུ་མཆོག་གིས་ཁོང་ནི་༸གོང་ས་༸སྐྱབས་མགོན་ཆེན་པོ་མཆོག་ལ་དད་མོས་ཤུགས་ཆེ་ཞུ་མཁན་ཞིག་ཡིན་པ་དང་དེ་སྔོན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཡུལ་དེར་གདན་འདྲེན་ཞུས་ཡོད་སྐོར་གསུངས་པ་མ་ཟད། གྲོས་ཚོགས་ནང་བོད་དོན་སྐོར་གསུང་བཤད་གནང་རྒྱུར་དཀའ་ངལ་མེད་པར་འགྲེལ་བརྗོད་གནང་སྟེ་སླད་མར་ལྷོ་ཨ་ཕི་རི་ཀར་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུར་ཡུལ་དེའི་  Inkatha སྲིད་དོན་ཚོགས་པའི་གྲོས་ཚོགས་ཤོག་ཁག་དང་ལྷན་དུ་བཀའ་མོལ་གནང་རྒྱུའི་ཞལ་བཞེས་གནང་འདུག གཞི་རྩའི་ཕྱི་ལོ་ ༢༠༡༨ ཕྱི་ཟླ་ ༢ པའི་ནང་ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་ཡུལ་དེའི་གྲོས་ཚོགས་སུ་ལྷོ་ཨ་ཕི་རི་ཀའི་སྲིད་འཛིན་ཛུ་མ་མཆོག་གི་རྒྱལ་ཡོངས་གཏམ་བཤད་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟངསེང་གེ་མཆོག་ཀྱང་གདན་ཞུ་གནང་ཡོད་པ་མ་ཟད། འདས་པའི་ལོ་ཤས་ནང་ལྷོ་ཨ་ཕི་རི་ཀའི་རྒྱལ་ཁབ་དང་རྒྱ་ནག་གཞུང་དབར་དཔལ་འབྱོར་དང་ཚོང་གི་འབྲེལ་ལམ་དམ་ཟབ་ཕྱིན་ཡོད་པ་དང་། འབྲེལ་ལམ་དེའི་རྐྱེན་གྱིས་རྒྱ་གཞུང་གིས་གནོན་ཤུགས་འོག་ཕྱི་ལོ་ ༢༠༠༩ ལོ་ནས་ད་བར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེའི་ནང་ཆིབས་བསྒྱུར་མཛད་ཐུབ་མེད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་རིམས་ནད་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་ཡོད་སྟབས། ༸དཔལ་ས་སྐྱའི་ཁྲི་འཛིན་ཞེ་གསུམ་པའི་ཁྲི་སྟོན་མཛད་སྒོ་གོ་སྒྲིག་ཚོགས་ཆུང་གིས་༸དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་སྟོན་མཛད་སྒོའི་དུས་ཚོད་རེ་ཞིག་ཕྱིར་བཤོལ་གནང་འདུག དེའང་༸དཔལ་ས་སྐྱའི་ཁྲི་འཛིན་ཞེ་གསུམ་པའི་ཁྲི་སྟོན་མཛད་སྒོ་གོ་སྒྲིག་ཚོགས་ཆུང་གིས་བོད་ཨིན་རྒྱ་གསུམ་གྱི་སྐད་ཡིག་སོ་སོར་བཀའ་ཁྱབ་ཅིག་སྤེལ་བར་གཞིགས་ན། རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་ནད་དུག་གསར་པའི་གློ་ཚད་རིམས་ནད་དང་འབྲེལ་བའི་ཆེས་ཛ་དྲག་གི་གནས་བབས་གྱུར་བརྟེན་འཆར་ལ་ཉེ་བའི་ཕྱི་ཟླ་ ༣ ཚེས་ ༢༩ གཟའ་སྐར་འཕྲོད་སྦྱོར་དགེ་བའི་ཉིན་ས་གཞིས་པུ་རུ་ཝ་ལ་༸དཔལ་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་གཙུག་ལག་ཁང་དུ་༸དཔལ་ས་སྐྱའི་༸སྐྱབས་མགོན་༸གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་ཆེའི་ཁྲི་སྟོན་མཛད་སྒོ་དང་། དེ་བཞིན་ན་པོ་ཆེའི་ཞལ་མངའ་ནས་ཕྱི་ཟླ་ ༤ ཚེས་ ༧ ནས་ ༩ བར་༸དཔལ་ས་སྐྱའི་གདན་ས་ཆོས་སྒར་དུ་ཕྱི་ནང་གི་དད་ལྡན་སེར་སྐྱ་མང་ཚོགས་རྣམས་ལ་ཡི་དམ་རྡོ་རྗེ་ཕུར་པའི་སྟོད་ལས་དང་། དེ་སྔ་རྒྱ་གར་ནང་བཀའ་དྲིན་བསྩལ་མྱོང་མེད་པའི་སྨད་ལས་ཀྱི་དབང་ཆེན་གར་འཆམ་དང་བཅས་པ་ཕྱག་ལེན་རྒྱས་སྤྲོས་ཅན། དེ་བཞིན་སྒྲུབ་ཐབས་རྒྱ་མཚོའི་རྗེས་གནང་བཅས་བཀའ་ཆོས་སྩལ་རྒྱུའི་མཛད་འཆར་དེ་རེ་ཞིག་ཕྱིར་བཤོལ་གནང་འདུག དེའི་བར་ན་༸སྐྱབས་མགོན་༸གོང་མ་ཁྲི་འཛིན་རིན་པོ་ཆེ་མཆོག་ཕྱི་ཟླ་ ༢ ཚེས་ ༡༤ ནས་ཚེས་ ༡༦ བར་ཉིན་གསུམ་གྱི་རིང་བྷན་དྷ་ར་ནོར་རྒྱས་གླིང་བོད་མིའི་གཞིས་ཆགས་སུ་མང་ཚོགས་ཚོར་སྦྱིན་སྲེག་དང་སྤྱན་རས་གཟིགས། རྟ་ཕྱག་ཁྱུང་གསུམ་གྱི་རྗེས་གནང་། ལོ་བརྒྱ་མའི་བཀའ་དབང་། དེ་བཞིན་ནང་ཆོས་ངོ་སྤྲོད་བཅས་བསྩལ་བར་མ་ཟད། སྐབས་དེར་ཚེ་དབང་ཞུ་རྒྱུའི་དགོས་པ་དེ་ཚེ་རིང་པོ་ཡོང་ཐབས་ཡིན་པ་དང་། ཚེ་རིང་པོ་ཡོང་ན་དགེ་བ་སྒྲུབ་རྒྱུའི་དུས་ཚོད་མང་བ་འཐོབ་པའི་ཆེད་ཡིན་སྐོར་སོགས་ལམ་སྟོན་བསྩལ་འདུག དེ་བཞིན་སྐྱེ་བ་སྔ་ཕྱི་དང་ལས་རྒྱུ་འབྲས་ཀྱི་རྣམ་གཞག་དང་འབྲེལ་ཏེ་བླང་དོར་གྱི་གནད་ལ་འབད་དགོས་གལ་ཡིན་པར་བཀའ་བསྩལ་བ་དང་ཆབས་ཅིག་ཏུ་ཆོས་འབྲེལ་གནང་བའི་དགེ་བའི་རྩ་བ་འདིས་མཐུ་ལ་བརྟེན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བསྟན་འཛིན་གྱི་སྐྱེས་ཆེན་རྣམས་སྐུ་ཚེ་༸ཞབས་པད་བརྟན་ཅིང་མཛད་འཕྲིན་རྒྱས་པའི་ཐུགས་སྨོན་མཛད་ཅིང་། མཇུག་ཏུ་ནད་ཡམས་ཞི་ཆེད་ས་སྐྱའི་ནད་གྲོལ་གྱི་ལྗགས་ལུང་དང་༸གོང་མ་ཁྲི་ཆེན་རིན་པོ་ཆེས་སྒྲུབ་གནང་མཛད་པའི་རི་ཁྲོད་ལོ་མ་གྱོན་མའི་འཁྲུས་ཆུ་བཅས་རྗེས་གནང་བསྩལ་འདུག

འདི་ལོ་ཕྱི་ཟླ་ ༡༢ ནས་རྒྱ་ནག་ནས་ཁྱབ་བརྡལ་བྱུང་བའི་ཏོག་དབྱིབས་ནད་དུག་གསར་པའི་གློ་ཚད་རིམས་ནད་དེ་རྒྱ་ནག་ཙམ་མ་ཟད་མརྒྱལ་སྤྱིའི་ཁྱོན་ཡོངས་སུ་ཁྱབ་བརྡལ་འགྲོ་བཞིན་པའི་ཆེས་ཛ་དྲག་གནས་སྟངས་ཁྲོད། ད་ལྟའི་ཆར་བཙན་བྱོལ་རྒྱ་གར་ནང་བོད་མིར་རིམས་ནད་དེ་ཕོག་པའི་གནད་དོན་བྱུང་མེད་ཀྱང་བོད་མི་དང་བོད་སྨན་བསྟེན་མཁན་རྒྱ་གར་ཁག་ཅིག་ནས་ནད་གཞི་སྔོན་འགོག་གི་ཚུལ་དུ་དབུས་བོད་ཀྱི་སྨན་རྩིས་ཁང་ནས་ཚང་ཁ་ཤིག་ཤིག་ཐོག་རིམས་སྲུང་རིལ་བུ་ཉོ་བཞིན་ཡོད་པ་དང་བསྟུན། ཉེ་ཆར་ཀངྒ་རཱ་རྫོང་གི་སྨན་པའི་འགན་འཛིན་མཆོག་གིས་གནད་དོན་དེས་མང་ཚོགས་ཁྲོད་དོན་མེད་བརྡབ་གསིག་ཐེབས་ཡོད་སྐོར་དང་འབྲེལ། རིམས་སྲུང་རིལ་བུའི་ཚོང་འགྲེམས་གནང་རྒྱུ་མཚམས་འཇོག་གནང་དགོས་པའི་བཀའ་བཏང་ཡོད་པ་ལྟར་དབུས་བོད་ཀྱི་སྨན་རྩིས་ཁང་གིས་དེ་ལྟར་མཚམས་འཇོག་གནང་འདུག ཁ་ཉིན་ཕྱི་ཚེས་ ༡༦ ཉིན་གྱི་ཕྱི་དྲོ་རྫོང་སྨན་པའི་འགན་འཛིན་མཆོག་དང་ས་གནས་སྐོར་སྲུང་བ་གཉིས་དབུས་བོད་ཀྱི་སྨན་རྩིས་ཁང་དུ་ཕེབས་ཏེ་ངག་ཐོག་ནས་བཀའ་ངག་གནང་སྟེ་དེ་ལྟར་མ་གནང་ཚེ་དངུལ་ཆད་དང་སྨན་ཁང་སྒོ་བརྒྱབ་སྲིད་པའི་ཉེན་བརྡ་བཏང་ཡོད་པ་ལྟར། ཁ་སང་ཕྱི་ཚེས་ ༡༧ ཉིན་དབུས་བོད་ཀྱི་སྨན་རྩིས་ཁང་གི་བརྡ་ཁྱབ་ཅིག་བཏང་བར་ས་གནས་ཀངྒ་རཱ་རྫོང་སྨན་ཁང་གི་འགན་འཛིན་ལས་ཁུངས་ཀྱི་བཀོད་ཁྱབ་གཞིར་བཟུང་དབུས་བོད་ཀྱི་སྨན་རྩིས་ཁང་གིས་དེ་ལྟར་མཚམས་འཇོག་གནང་རྒྱུ་ཡིན་པར་གསུངས་འདུག རྩ་བའི་ཧི་མཱ་ཅལ་མངའ་སྡེ་འདི་རྒྱ་གར་བྱང་ཕྱོགས་ཁུལ་གྱི་ཡུལ་སྐོར་སྤྲོ་འཆམ་པ་ཕོན་ཆེ་ཡོང་སའི་ས་ཚིགས་ཤིག་ག་དང། ལྷག་པར་དུ་དྷརྨ་སཱ་ལཱ་དེ་བཞིན་འཛམ་གླིང་ཡུལ་གྲུ་གང་ས་ནས་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་དང་ཆོས་ཞུ་བ་ཕོན་ཆེ་ཡོང་སའི་ས་ཚིགས་ཤིག་ཆགས་ཀྱི་ཡོད་སྟབས། རྒྱ་གར་གཞུང་གི་ངོས་ནས་བཞུགས་སྒར་དྷརྨ་སཱ་ལཱ་དང། དེའི་ཉེ་ཁྲིས་ཀྱི་པཱ་ལམ་པུར། བྷིར་བཅས་རིམས་ནད་འགོས་ཁྱབ་འགྲོ་ཉེན་ཆེ་བའི་ས་ཁུལ་ཁག་ལ་དམིགས་གསལ་གྱིས་དོ་དམ་བྱེད་བཞིན་པའི་ཁྲོད་འདིར་ཧི་མཱ་ཅལ་མངའ་སྡེ་ཁྱོན་ཡོངས་སུ་ཉེ་ཆར་རྒྱ་ནག་ཏུ་འགྲུལ་བསྐྱོད་བྱེད་མྱོང་མཁན་དང་དེ་དག་དང་འབྲེལ་ཡོད་མི་གྲངས་ཁྱོན་ ༧༥ ཟུར་བཀག་གིས་བརྟག་དཔྱད་གནང་ཁོངས་ནས་མི་ ༢༢ ཀངྒ་རཱ་རྫོང་ནས་ཡིན་པ་རེད། འོན་ཏང་ད་ལྟའི་ཆར་མངའ་སྡེ་འདིའི་ནང་རིམས་ནད་ཕོག་པའི་མི་གཅིག་ཀྱང་བྱུང་མེད་པ་རེད།

དེ་རིང་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་སློབ་ཡོན་ཚན་པའི་ངོས་ནས་གསལ་བསྒྲགས་གནང་བ་ལྟར་ན། སྤྱི་ལོ་ ༢༠༢༡ ལོའི་ཉི་ཧོང་རེ་ཊ་ཀུ་ Reitaku གཙུག་ལག་སློབ་གཉེར་ཁང་གིས་བོད་ཕྲུག་གཉིས་ལ་ལོ་གཅིག་རིང་ཉི་འོང་སྐད་ཡིག་ཆེད་སྦྱོང་གི་སློབ་ཡོན་གནང་རྒྱུའི་ཞལ་བཞེས་ཐོབ་ཡོད་པའི་གསལ་བསྒྲགས་གནང་འདུག འདི་གའི་གསར་གསར་འགོད་པའི་ཤེས་རིག་ལས་ཁུངས་ཀྱི་སློབ་ཡོན་སྡེ་ཚན་གྱི་འགན་འཛིན། བསོད་ནམས་བཟང་མོ་ལགས་སུ་སློབ་ཡོན་དེ་ཐོག་མ་ཡིན་གྱི་སྐོར་གྱི་ཐད་ནས་བཀའ་འདྲི་ཞུས་པར་ཁོང་གིས། རྩ་བ་སློབ་ཡོན་དེ་ནི་ཉི་ཧོང་གི་དོན་གཅོད་བརྒྱུད་ནས་གནང་གི་ཡོད་པ་ཞིག་ཡིན་པ་དང་། འདི་ལོའི་སློབ་ཡོན་དེ་ནི་ཐེངས་གཉིས་པ་དེ་ཡིན་ལུགས་འབྲེལ་བརྗོད་ཀྱིས་སྔར་ལོ་བོད་མིའི་སྒྲིག་འཛུགས་ཀྱི་རྩིས་ཞིབ་ཁང་གི་ལས་བྱེད་གཉིས་ཡིག་རྒྱུགས་ཀྱི་ལམ་ནས་བདམས་ཐོན་བྱུང་བ་ལྟར་ད་ལྟའི་ཆར་སློབ་སྦྱོང་བྱེད་མུས་ཡིན་པ་དང་། གང་མགྱོགས་འདི་ལོའི་སྤྱི་ཟླ་གསུམ་པའི་ནང་སླར་ཡང་ཕྱི་ལོ་ ༢༠༡༤ རྗེས་སུ་གཙུག་ལག་རབ་འབྱམས་པ་མཐར་ཕྱིན་གྱི་བོད་ཕྲུག་སློབ་མ་གཉིས་ལ་ཡིག་རྒྱུགས་འགྲན་བསྡུར་གྱི་ཁྲོད་ནས་རྩེ་ཏོག་གིས་སློབ་ཡོན་གནང་འཆར་ཡོད་པར་ངོ་སྤྲོད་གནང་སོང་། དེ་བཞིན་གསར་འགོད་པས་རྩ་བའི་ཡིག་རྒྱུགས་ཀྱི་ནང་དུ། རིག་གནས་རབ་འབྱམས་པའི་རྒྱུགས་འབྲས་ལ་མ་མཐའ་ཡང་བརྒྱ་ཆ་ལྔ་བཅུ་དགོས་བ་ཞིག་འཁོད་ཡོད་ནའང་། རྒྱ་གར་ལྷོ་བྱང་གིི་ཡིག་རྒྱུགས་ཀྱི་དམ་ལྷོད་ཀྱི་རྐྱེན་གྱིས་རེ་འགར་རིག་གནས་རབ་འབྱམས་པར་བརྒྱ་ཆ་ལྔ་བཅུ་མེད་ན་ཡང་། གཙུལ་ལག་སློབ་ཐོན་གྱི་བརྒྱ་ཆ་ལྔ་བཅུ་ལས་མཐོ་བ་ཡོད་ན་ཡིག་རྒྱུགས་སུ་ཞུགས་ཆོག་མིན་གྱི་ཐད་ནས་བཀའ་འདྲི་ཞུས་པར་ཁོང་གིས། མ་མཐའ་ཡང་རིག་གནས་རབ་འབྱམས་པའི་ཕྱག་འཁྱེར་ལ་བརྒྱ་ཆ་ལྔ་བཅུ་ལོང་དགོས་བ་ཞིག་ཡིན་སྐོར་འགྲེལ་བརྗོད་གནང་སོང་། གཞན་ཡང་ཁོང་གིས་ཐེངས་འདིའི་སློབ་ཡོན་འདེམས་སྒྲིག་གི་སྐབས་སུ་བྲི་རྒྱུགས་མེད་པར་དབྱིན་ཡིག་གི་ངག་རྒྱུགས་གཅིག་པོ་ཡིན་པ་དང་། བརྗོད་གཞིའི་ཆ་ནས་བོད་དོན་དང་སྤྱི་ཡོངས་ཀྱི་གནས་ཚུལ་གྱི་ཐད་ནས་དྲི་བ་གཏོང་སྲིད་པར་འགྲེལ་བརྗོད་གནང་སོང་། རྩ་བའི་དགོས་ངེས་ཆ་རྐྱེན་ཚང་རིགས་ནས་ཕྱི་ལོ་ ༢༠༢༠ ཟླ་ ༣ ཚེས་ ༡༩ ཕྱི་དྲོའི་ཕྱག་ཚོད་ ༥ པ་འགྱངས་མེད་དུ་ཤེས་རིག་ལས་ཁུངས་ཀྱི་ཁ་བྱང་ཐོག་འཚང་སྙན་ཕུལ་ཟིན་དགོས་པ་དང་། འདེམས་སྒྲུག་གི་ཡིག་རྒྱུགས་དེ་ཕྱི་ལོ་ ༢༠༢༠ ཟླ་ ༣ ཚེས་ ༣༠ ཉིན་བཞུགས་སྒར་རྡ་སར་གཏན་འཁེལ་བྱུང་ཡོད་པར་འཁོད་འདུག

ཉན་པ།: Listen ཕབ་ལེན། Download རྒྱལ་སྤྱིའི་བོད་རིགས་སྤྱི་མཐུན་ཚོགས་པའི་ལྔ་དང་ལྔ་བཅུའི་ཚོགས་འདུ་ཆེས་ཐོག་མ་འཚོགས་རྒྱུ། སྲིད་སྐྱོང་མཆོག་ཨོ་སི་ཀྲི་ཡར་གཞུང་འབྲེལ་ཕྱོགས་ཕེབས་གནང་བ། ཨ་རིའི་གྲོས་ཚོགས་སུ་ཡུལ་དེའི་མི་སེར་རྣམས་ཀྱི་སྨྲ་བརྗོད་རང་དབང་སྲུང་སྐྱོབ་སླད་ཁྲིམས་འཆར་གསར་པ་ཞིག་ཆེད་འདོན་གནང་འདུག ཐེ་ཝན་ Kung Teh དགོན་པའི་མཁན་པོ་དགོངས་པ་རྫོགས་པར་ཐུགས་གསོ་བསྩལ་བ། རྒྱ་ནག་གི་ཏོག་དབྱིབས་ནད་དུག་གསར་པའི་རིམས་ནད་སྐོར་ཕྱོགས་ཡོངས་ནས་རྫུན་གཏམ་འཆད་བཞིན་པ། Monday 17/02/2020 CTA to host global summit of International Tibetan Associations and Organizations in April Sikyong arrives in Austria, Europe Congress moves to stop China’s censoring of Americans Taiwanese Buddhist master and Tibet supporter Chin Hsin passes away Lead guitarist and founding member of Parikrama, Sonam Sherpa passes away at 48 China 'still lying' about coronavirus outbreak: Senator Tom Cotton Desperate Wuhan women calls for revolution against CCP and freedom of speech

བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་བོད་མིའི་སྤྱི་ཚོགས་ཡར་རྒྱས་ཐེབས་རྩ་ཁང་གཉིས་ཀྱིས་གོ་སྒྲིག་གནང་ཐོག་འདི་ལོའི་ཕྱི་ཟླ་ ༤ ཚེས་ ༢ ནས་དབུ་འཛུགས་གནང་སྟེ་ཚེས་ ༤ བར་ཉིན་གྲངས་གསུམ་གྱི་རིང་བཞུགས་སྒར་དྷརྨ་སཱ་ལཱར་ཕྱི་རྒྱལ་ཁག་ཏུ་ཡོད་པའི་བོད་རིགས་སྤྱི་མཐུན་ཚོགས་པས་གཙོས་བོད་མིའི་སྒེར་གཉེར་སྤྱི་ཚོགས་ཞབས་ཞུ་བའི་ལས་ཁང་སོགས་ནས་བོད་མི་རིགས་ཀྱི་བདེ་དོན་སླད་དུ་ཕྱག་ལས་གནང་མཁན་བོད་མི་ཁྱོན་ ༡༢༥ ལྷག་བསྡུ་བསྐོང་གིས་ Global summit of international Tibetan Associations /Organizations ཞེས་རྒྱལ་སྤྱིའི་བོད་རིགས་སྤྱི་མཐུན་ཚོགས་པའི་ལྔ་དང་ལྔ་བཅུའི་ཚོགས་འདུ་ཆེས་ཐོག་མ་འཚོགས་གཏན་ཁེལ་འདུག ཚོགས་ཆེན་ཐོག་ཕྱི་རྒྱལ་དུ་བཞུགས་པའི་བོད་མི་ཚོས་རྒྱལ་སྤྱིའི་ཐོག་བོད་ཀྱི་འཐབ་རྩོད་ཀྱི་གནས་བབས་དེ་ ཤུགས་ཆེ་རུ་གཏོང་ཐབས་དང་ཁུལ་དེ་དག་ཏུ་འཚར་ལོངས་བྱུང་བའི་བོད་ཕྲུག་ཚོར་བོད་ཀྱི་ཆོས་རིག་སློབ་ཁྲིད་གནང་བ་བརྒྱུད་ནས་སྲུང་སྐྱོབ་གནང་ཐབས། བོད་རིགས་སྤྱི་མཐུན་ཚོགས་པ་སྲ་བརྟན་དང་ཚགས་ཚུད་གནང་རྒྱུ། དེ་བཞིན་བོད་མིའི་སྒྲིག་འཛུགས་དང་བོད་རིགས་ཚོགས་པའི་དབར་འབྲེལ་ལམ་དམ་ཟབ་གནང་ཐབས་བཅས་ཀྱི་བརྗོད་གཞི་བཞིའི་ཐོག་བཀའ་བསྡུར་གནང་རྒྱུ་རེད་འདུག ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚོགས་ཆུང་ནས་ཚོགས་འདུར་མཐུན་འགྱུར་གནང་གི་ཡོད་པ་རེད། རླུང་འཕྲིན་ཁང་ནས་རིང་མིན་འཚོགས་རྒྱུའི་རྒྱལ་སྤྱིའི་བོད་རིགས་སྤྱི་མཐུན་ཚོགས་པའི་ལྔ་དང་ལྔ་བཅུའི་ཚོགས་འདུ་དང་འབྲེལ་བའི་ཞིབ་ཕྲའི་གནས་ཚུལ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་བཟང་རྡོ་རྗེ་ལགས་སུ་བཅར་འདྲི་ཞུས་ཡོད།