Monthly Archives: December, 2021

ཕྱི་ཟླ་ ༡༢ ཚེས་ ༡༠ སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་སུད་སིར་གནས་སྡོད་བོད་མི་ཚོས་ཇི་ནིཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་གཙོ་འཛིན་མཆོག་གི་ལས་ཁུངས་མདུན་ཐང་དུ་བོད་ནང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་གནས་སྟངས་གསལ་སྟོན་ཆེད་ངོ་རྒོལ་སྐད་འབོད་ཀྱི་ལས་འགུལ་དང་རྒྱལ་ཚོགས་ལ་བོད་དོན་ཞུ་གཏུགས་གནང་སོང་།ཉིན་དེར་སུད་སི་ནང་ནང་ཁ་བ་འབབ་བཞིན་གནམ་གཤིས་ཧ་ཅང་་གྲང་ངར་ཆེབའི་ཁྲོད་སུད་སི་དང་ལིག་ཏེན་སིཊཡན་བོད་རིགས་མི་མང་གི་སྣི་ཁྲིད་འོག་བོད་མི་དང་བོད་དོན་རྒྱབ་སྐྱོར་བ་རྣམས་ནས་གྲོང་ཁྱེར་ཇི་ནིཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་གཙོ་འཛིན་མཆོག་གི་ལས་ཁུངས་མདུན་ཐང་དུ་འདུ་འཛོམས་ཀྱིས་ལག་ཏུ་བོད་ཀྱི་རྒྱལ་དར་འཕྱར་ཞིང། བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་། དེ་བཞིན་ལས་འགུལ་བ་ཚོས་བོད་ལ་རང་དབང་དགོས། རྒྱ་གཞུང་ནས་བོད་ནང་འགྲོ་བ་མིའི་ཐོབ་ཐང་རྡོག་རོལ་མཚམས་འཇོག་དགོས། རྒྱལ་ཚོགས་གཉིད་གསོད་ཤོག རྒྱ་ནག་གི་ངོས་ནས་བོད་ནང་མི་རིགས་སྡེབ་གསོད་མཚམས་འཇོག་དགོས། ༢༠༢༢ ལོའི་པེ་ཅིང་དགུན་དུས་ཨོ་རྩལ་མགྲན་ཚོགས་ལ་ངོས་ལེན་མེད་ཅེས་སོགས་ཀྱི་དགོས་འདུན་འཁོད་པའི་ཤོག་བྱང་དང། སྐད་འབོད་སོགས་སྒྲོག་ཞིང་ཞི་བའི་ངོ་རྒོལ་གྱི་ལས་འགུལ་སྤེལ་ཡོད་པ་རེད།ལས་འགུལ་དེའི་ཐོག་སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གཙོས་པའི་སུད་སི་དང་ལིག་ཏེན་སིཊཡན་བོད་རིགས་མི་མང་ཚོགས་གཙོས་འཐུས་མི། སུད་བོད་མཐུན་ཚོགས། ས་གནས་བེུད་དང་ཡོ་རོབ་བོད་རིགས་གཞོན་ནུ་མཐུན་ཚོགས་བཅས་བོད་མིའི་གཞུང་འབྲེལ་མིན་པའི་སྐུ་ཚབ་ནས་མཉམ་ཞུགས་ཀྱིས་རྒྱ་གཞུང་གིས་ད་བར་བོད་ནང་འཛིན་པའི་གདུག་རྩུབ་ཅན་གྱི་སྲིད་བྱུས་ལ་སྐྱོན་བརྗོད་དང་རྒྱལ་ཚོགས་ནས་བོད་ཀྱི་གནད་དོན་ཐོག་ཞལ་གསང་པོ་གནང་དགོས་ཞེས་གསུངས་ཡོད། དེ་རིང་ཉིན་མོ་དང་བསྟུན་ནས་སུད་སི་དང་ལིག་ཏེན་སིཊཡན་བོད་རིགས་མི་མང་དང་ས་གནས་ཀྱི་ཆོལ་ཁ་གསུམ་ཚོགས་པ་བཅས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ལ་བོད་ནང་གི་ཆོས་དད་རང་དབང། སྐད་ཡིག་རང་དབང། སྨྲ་བརྗོད་རང་དབང། འདུ་འཛོམས་རང་དབང་སོགས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་འགྲོ་བཞིན་པའི་གནད་དོན་སྤྱི་དང་སྒོས་ཉེ་བའི་སྲིད་འཛིན་ཞི་ཅིན་ཕིང་གི་སྲིད་གཞུང་གིས་མི་རིགས་མཉམ་བསྲེས་ཀྱི་སྲིད་བྱུས་འོག་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་བཙན་བཤད་ཀྱིས་བོད་ནང་རྒྱ་གཞུང་གིས་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭ་ཕོན་ཆེ་འཛུགས་བྱེད་བཞིན་པའི་ཁར་བོད་ཀྱི་སྐད་ཡིག་དང་རིག་གཞུང་སོགས་གང་ཡང་མི་ཤེས་པའི་མི་རབས་ཤིག་བསྐྲུན་ཐབས་བྱེད་མུས་ཡིན་པར་མངོན་གསལ་གྱི་ཞུ་སྙན་ཞིག་ཀྱང་ཕུལ་ཡོད་པ་རེད།དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་ཡོ་རོབ་རྒྱལ་ཁབ་ཨོ་སི་ཀྲི་ཡ་ནང་ཆ་མཚོན་ཨོ་སི་ཀྲི་ཡ་བོད་རིགས་ཚོགས་པའི་གོ་སྒྲིག་འོག་བོད་མི་ཚོས་གྲོང་ཁྱེར་ཝེ་ན་ནང་རྟེན་གཞི་བྱས་པའི་རྒྱ་ནག་གཞུང་ཚབ་མདུན་དུ་འདུ་འཛོམས་ཀྱིས་བོད་ཀྱི་རྒྱལ་དར་དང་རྒྱ་གཞུང་ལ་ངོ་རྒོལ་གྱི་ཕྲེད་དར་འཕྱར་ནས་སྐད་འབོད་དང་། རྒྱ་ནག་གཞུང་ཚབ་ནས་དབུ་འཛུགས་ཀྱིས་གྲོང་ཁྱེར་ཝེ་ན་ཁྲོམ་གཞུང་དུ་ཞི་བའི་རྔམ་སྟོན་འཁྲོམ་སྐོར་གྱི་ལས་འགུལ་སྤེལ་ཡོད་པ་རེད། དེ་དང་ཕྱོགས་མཚུངས་རྒྱལ་སྤྱིའི་འགྲོ་བ་མིའི་ཐོབ་ཐང་ཉི་མོར་བོད་མི་གཙོས་ཡུ་གུར་བ་དང་ཧོང་ཀོང། ནང་སོག་མང་ཚོགས་སོགས་གཞུང་འབྲེལ་མིན་པའི་ཚོགས་པ་ཁག་ནས་དབྱིན་ཡུལ་རྒྱལ་ས་ལོ་ཊོན་ནང་གི་རྒྱ་ནག་གཞུང་ཚབ་ཁང་དང་བི་བི་སི་གསར་འགྱུར་ལས་ཁང། དེ་བཞིན་ Piccadilly ཐང་ཆེན་བཅས་ཁག་སོ་སོར་རྒྱ་ནག་གཞུང་གིས་བོད་གཙོས་མངའ་འོག་ས་ཁུལ་ཁག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་དང། ༢༠༢༢ ལོའི་པེ་ཅིང་དགུན་དུས་ཨོ་རྩལ་མགྲན་ཚོགས་རྒྱ་ནག་ནས་ཕྱིར་འཐེན་དགོས་པའི་ཕྲེད་དར་སོགས་འཁྱེར་ནས་སྐད་འབོད་ལས་འགུལ་སྤེལ་འདུག་པ་མ་ཟད་། ལས་འགུལ་བ་རྣམས་ནས་གཞུང་འབྲེལ་གནད་ཡོད་མི་སྣ་དང་མང་ཚོགས་ ༧༠༠༠ ལྷག་གིས་ ༢༠༢༢ པེ་ཅིང་དགུན་དུས་ཨོ་རྩལ་འགྲན་ཚོགས་ཕྱིར་འཐེན་དགོས་པར་རྒྱབ་སྐྱོར་གནང་བའི་མཚན་རྟགས་འཁོད་པའི་ཞུ་འབོད་སྙན་ཞུ་ཞིག་ས་གནས་སུ་ཡོད་པའི་རྒྱལ་སྤྱིའི་ཨོ་རྩལ་མཐུན་ཚོགས་ཡན་ལག་ལས་ཁུངས་སུ་ཡང་ཕུལ་འདུགཕ་རན་སི་ནང་ཉིན་འདིའི་ཕྱི་དྲོ་རྒྱལ་ས་པ་རི་སི་ཁུལ་དུ་ཕ་རན་སི་བོད་རིགས་ཚོགས་པའི་གོ་སྒྲིག་འོག་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་ཀྱི་གདུང་དེམས་མཉམ་བསྐྱེད་དང་བོད་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་དེ་བཞིན་ ༢༠༢༢ ལོའི་པེ་ཅིང་དགུན་དུས་ཨོ་རྩལ་མགྲན་ཚོགས་ལ་ངོ་རྒོལ་བཅས་ཀྱི་མར་མེ་མཆོད་འབུལ་གྱི་ལས་འགུལ་ཞིག་སྤེལ་ཡོད་པ་རེད།

ཕྱི་ཟླ་ ༡༢ ཚེས་ ༡༡ ཉིན་ཡོ་རོབ་བོད་རིགས་གཞོན་ནུ་མཐུན་ཚོགས་དང་བོད་རང་བཙན་སློབ་ཕྲུག་ཚོགས་པའི་ལས་འགུལ་ཁག་ཅིག་ནས་སུད་སི་གྲོང་ཁྱེར་ Lausanne ནང་རྟེན་གཞི་བྱས་པའི་རྒྱལ་སྤྱིའི་ཨོ་རྩལ་མཐུན་ཚོགས་ཀྱི་ལས་ཁུངས་ཨ་མའི་ནང་དུ་རྒོལ་མཆོང་གིས་ངོ་རྒོལ་སྐད་འབོད་ལས་འགུལ་སྤེལ་འདུགསྐབས་དེར་བོད་མིའི་ལས་འགུལ་བ་ཚོས་བོད་ཀྱི་རྒྱལ་དར་རྒྱབ་ངོས་སུ་གྱོན་ནས་རྒྱལ་སྤྱིའིཨོ་རྩལ་མཐུན་ཚོགས་ཀྱི་ལས་ཁུངས་ཨ་མའི་ནང་དུ་རྒོལ་མཆོང་བྱས་ཏེ་ལས་འགུལ་བ་ཁག་ཅིག་ལས་ཁུངས་ནང་ཡར་འཛུལ་ཐུབ་པ་བྱུང་འདུག་ཅིང། སྐབས་དེར་ལས་འགུལ་བ་ཚོས་ལས་ཁུངས་ཀྱི་ས་སྟེང་ཐོག་མར་བསྡད་ནས་གཅིག་གིས་གཅིག་ལག་ཐམ་སྟེ་ཞི་བའི་ངོ་རྒོལ་སྐད་འབོད་བྱས་པ་དང། དེ་བཞིན་ཨོ་རྩལ་མཐུན་ཚོགས་ཀྱི་ལས་ཁུངས་ཕྱི་ཕྱོགས་སུ་ཡོད་པའི་ཨོ་ལམ་པིག་རྩེད་འགྲན་ཀྱི་ཨ་ལོང་ལྔ་ཅན་གྱི་ལས་རྟགས་ཐོག་ལ་ལས་འགུལ་བ་གཉིས་ནས་རང་ཉིད་སོ་སོར་ལྕགས་ཐག་བརྒྱབ་ནས་རྒྱལ་སྤྱིའི་ཨོ་རྩལ་མཐུན་ཚོགས་ཀྱི་རྒྱ་གཞུང་གིས་བོད་གཙོས་དེའི་མངའ་འོག་ས་ཁུལ་ཁག་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་ཤེས་བཞིན་དུ་རྒྱ་ནག་ལ་དགུན་དུས་ཨོ་རྩལ་འགྲན་ཚོགས་རྒྱུའི་ཆོག་མཆན་སྤྲད་པའི་ནོར་འཁྲུལ་ཅན་གྱི་ཐག་གཅོད་ལ་སྐྱོན་བརྗོད་ཀྱིས་ངོ་རྒོལ་དང་འགྲོ་བ་མིའི་ཐོབ་ཐང་མེད་ན་རྩེད་འགྲན་མེད། རྒྱ་ནག་ཏུ་འཚོགས་རྒྱུའི་མི་གསོད་ཁྲག་སྦྱོར་གྱི་རྩེད་འགྲན་མཚམས་འཇོགས་དགོས། མི་མི་རིགས་སྡེབ་གསོད་ཀྱི་རྩེད་འགྲན་ཕྱིར་འཐེན་དགོས། དེ་བཞིན་ངོ་ཚ་ཁྲལ་གཞུང་མེད་པའི་རྒྱལ་སྤྱིའི་ཨོ་རྩལ་མཐུན་ཚོགས་ཞེས་སོགས་གསུངས་ཏེ་ཞི་བའི་སྐད་འབོད་ཀྱི་ལས་འགུལ་སྤེལ་འདུག སྐབས་དེར་ས་གནས་ཉེན་རྟོག་པས་བོད་མི་ལས་ཁུལ་བ་ཚོས་འཛིན་བཟུང་གིས་ཚོུད་བཞི་མ་ཙམ་གྱི་བཀག་ཉར་བྱས་འདུག རྩ་བའི་ཉེ་ལམ་ཨོ་རི་དང་སོ་ཁོཊ་ལན་ཌི། དེ་བཞིན་ཨོ་སི་ཀྲོ་ལི་ཡ་དང། ཁེ་ན་ཌ་བཅས་གིས་རྒྱ་ནག་གཞུང་གིས་བོད་མི་གཙོས་ཡུ་གུར་མི་རིགས་སོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱེད་ཕྱོགས་ལ་སྐྱོན་བརྗོད་ཀྱིས་ཨོ་རྩལ་འགྲན་ཚོགས་སྐབས་གཞུང་གི་ཕྱི་འབྲེལ་མི་སྣ་གཏང་རྒྱུ་མིན་པའི་གསལ་བསྒྲགས་བྱས་ཡོད་པ་རེད།

ཉན་པ།: Listen ཕབ་ལེན། Download ཏོག་དབྱིབས་གཉན་རིམས་ཁྲོད་དགུན་ཚོང་གི་གནས་འབབ། Saturday 11/12/2021 Sweater Business amidst Covid: a look at impact of Covid on Tibetan winter business

དེ་རིང་སྔ་དྲོ་ཕྱག་ཚོད་ ༩.༣༠ སྟེང་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཀྱིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་འཛོམས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་རྗེས་དྲན་དགའ་སྟོན་མཛད་སྒོ་ཐེངས་ ༣༢ པ་སྲུང་བརྩི་ཞུས་སོང་། དེ་རིང་གི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་པའི་ཕྱག་རོགས་བཀའ་བློན་ལྷན་རྒྱས་དང་ཁྲིམས་ཞིབ་པ་ཆེ་བའི་ལས་ཚབ་མཆོག དེ་བཞིན་སྤྱི་འཐུས་རྒྱུན་ལས་རྣམས་དང་ལྷན་ཁང་ཁག་གི་དྲུང་ཆེ་ཆུང་རྣམས། གཞན་ཡང་སྲི་ཞུ་བ་སོགས་ཆེད་ཕེབས་གནང་ཡོད་པ་དང་སྐབས་དེར་སྲིད་སྐྱོང་མཆོག་གིས་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་སུམ་བཅུ་སོ་གཉིས་འཁོར་བའི་དུས་ཚེ་ཁྱད་པར་ཅན་འདིར་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་མགོན་པོ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་༸གང་ཉིད་མཆོག་གི་མཛད་འཕྲིན་ལ་ཆེ་བསྟོད་ཞུས་བ་དང་༸གང་ཉིད་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེས་གཞིས་བཞུགས་བོད་རིགས་སྤུན་ཟླར་སེམས་ཤུགས་དང་སྙིང་སྟོབས་འཕར་མ་ཞིག་སྤར་ཐུབ་ཡོད་པ་དང་བཙན་བྱོལ་བོད་མིའི་སྤྱི་ཚོགས་སུའང་རྒྱལ་སྤྱིའི་ནང་གོམ་པ་སྤོ་སྟངས་ཀྱི་ཁ་ཕྱོགས་གསར་པ་ཞིག་རྙེད་ཐུབ་ཡོད་ལ། བོད་རྒྱའི་དཀའ་རྙོག་གཉིས་སྨན་དབུ་མའི་ལམ་ནས་སེལ་རྒྱུའི་སྲིད་བྱུས་འགྱུར་མེད་དུ་གནས་རྒྱུར་གཞུང་ལུགས་ཀྱི་རྒྱབ་རྟེན་ཁུངས་བཙན་ཞིག་བཞེངས་བསྐྲུན་ཐུབ་ཡོད་ཅེས་བཀའ་དྲིན་རྗེས་དྲན་ཞུས་གནང་སོང་། དེ་བཞིན་སྲིད་སྐྱོང་མཆོག་གིས་དེ་རིང་དུས་དྲན་གྱི་མཛད་སྒོ་འདིར་ང་ཚོས་༸གང་ཉིད་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་དུས་ཆེན་གྱི་དགའ་སྟོན་ལ་རོལ་ཆོག་ནའང་༸མགོན་པོ་མཆོག་ལ་དད་དམ་གཡོ་བ་མེད་པའི་གཞིས་བཞུགས་སྤུན་ཟླ་ཚོར་རྩ་བའི་བླ་མའི་༸སྐུ་པར་བཤམ་རྒྱུའི་རང་དབང་ཙམ་ཡང་མེད་པ་དང་། ད་དུང་དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་བོད་ནང་གི་བོད་མི་ཚོར་མཁར་དབང་དང་འདོད་དབང་། ཆོས་དང་དང་འགྲོ་འོང་། དེ་བཞིན་རང་མི་རིགས་ཀྱི་སྐད་ཡིག་སྦྱོང་སྤྱོད་སོགས་གཞི་རྩའི་འགྲོ་བ་མིའི་ཐོབ་ཐང་ལ་ལོངས་སུ་སྤྱོད་པའི་སྐལ་བ་ཙམ་ཡང་མེད་པའི་ཁར་རྒྱ་གཞུང་གིས་བོད་ཀྱི་རང་བྱུང་ཁོར་ཡུག་ལ་གཏོར་བཤིག་དང་བོད་མིའི་ངོ་བོ་རྩ་བརླག་གཏོང་བའི་གདུག་རྩུབ་སྲིད་བྱུས་ཀྱི་གནོན་བཙིར་ཉིན་མཚན་གཉིས་སུ་མྱོང་དགོས་ཀྱི་ཡོད་པ་ལུང་འདྲེན་གནང་སྟེ་བོད་རྒྱ་གཉིས་ཀར་གྱོང་ལས་ཁེ་མེད་པའི་རྒྱ་གཞུང་གི་ནོར་འཁྲུལ་སྲིད་བྱུས་དེ་རིགས་ཁུངས་འཁྱོལ་ཐབས་མེད་ངེས་ཡིན་སྟབས། བོད་མིའི་སྒྲིག་འཛུགས་ཀྱིས་གཉིས་སྨན་དབུ་མའི་ལམ་གྱི་འཇུག་ངོགས་ནས་རྒྱ་གཞུང་ལ་འབྲེལ་གཏུག་བརྒྱུད་བོད་རྒྱའི་དཀའ་ངལ་སེལ་རྒྱུར་འབད་བརྩོན་བྱ་རྒྱུའི་ཆོད་སེམས་གཞིར་བཞག་ཐོག་རྒྱལ་སྤྱིའི་ནང་བོད་དོན་ལས་འགུལ་རྒྱ་གང་ཆེར་སྤེལ་རྒྱུ་དང་དེ་མཚུངས་སུ་རྒྱ་གཞུང་གི་དྲག་གནོན་སྲིད་བྱུས་དེའི་་རིགས་མཚམས་འཇོག་དང་ཡོ་བསྲང་དགོས་པའི་ཡིག་ཆ་ཞིག་ཀྱང་རྒྱ་གཞུང་ལ་རིང་མིན་སྤྲོད་འཆར་ཡོད་ཅེས་གསུངས་སོང་། ལྷག་དོན་ཉེ་ལམ་སྐབས་ ༡༦ པའི་བཀའ་ཤག་གིས་བོད་དོན་དང་བླངས་ཞུ་གཏུག་ལས་འགུལ་དབུ་འཛུགས་ཀྱི་གསལ་བསྒྲགས་སྤེལ་ཟིན་པ་འགྲེལ་བརྗོད་དང་སྦྲགས། འཛམ་གླིང་ཡུལ་གྲུ་གང་སར་གནས་བཞུགས་གཞོན་་སྐྱེས་གཙོས་པའི་བོད་མི་མི་རེ་ངོ་རེ་ལས་འགུལ་འདིའི་ནང་མཉམ་ཞུགས་གནང་སྟེ་བོད་དོན་བདེན་མཐའ་གསལ་ཐབས་སུ་སོ་སོའི་སེམས་ཤུགས་དང་ནུས་རྩལ་འདོན་སྤེལ་ཡོང་བའི་འབོད་སྐུལ་ཞུས་ཡོད་ལ། བོད་རྒྱའི་དཀའ་རྙོག་འདི་གཙང་སེལ་མ་བྱུང་བར་དུ་བོད་དོན་བདེན་མཐའ་གསལ་བའི་ཐབས་ཤེས་ཡོད་རྒུ་རྩལ་སྤྲུགས་བྱ་རྒྱུ་ནི་བཅའ་ཁྲིམས་ཀྱིས་བཙན་བྱོལ་བོད་མི་ཚོར་བསྐུར་བའི་ལས་འགན་གལ་ཆེ་ཤོས་དེ་ཡིན་སྟབས། རང་དབང་ལུང་པར་གནས་འཁོད་བོད་མི་གང་མང་ཞིག་ལས་འགུལ་འདིར་མཉམ་ཞུགས་ཐུབ་པའི་ཡིད་ཆེས་ཡོད་ཅེས་གཞེན་སྐུལ་གནང་སོང་། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་༸གོང་ས་མཆོག་གི་ཀུན་ཁྱབ་འགན་འཁུར་གྱི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པར་བཀའ་དྲིན་རྗེས་སུ་དྲན་པའི་སྒོ་ནས་༸གང་ཉིད་མཆོག་གི་མཛད་འཕྲིན་ལ་ཆེ་བསྟོད་ཞུས་བ་དང་འབྲེལ། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་སྟབས། རྒྱ་གཞུང་གིས་བོད་ནང་བཙན་འཛུལ་ཧམ་བཟུང་བྱས་པར་ཞི་བས་བཅིངས་འགྲོལ་བཏང་ལུགས་ཀྱི་ལོ་ ༧༠ འཁོར་ཟེར་བའི་དུས་དྲན་སྲུང་བརྩི་བྱས་པ་དང་དེ་དང་འབྲེལ་བའི་རྒྱབ་ཤ་དཀར་པོ་ཟེར་བའི་དཔེ་དེབ་འགྲེམས་སྤེལ་གྱིས་མི་བདེན་རྫུན་སྒྲིག་དང་ལོ་རྒྱུས་ལ་འཁྱོག་བཤད་སྣ་ཚོགས་བྱས་ཡོད་པ་མ་ཟད། ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་རྒྱ་ནག་གི་རྒྱལ་ས་པེ་ཅིང་དུ་འཚོག་འཆར་ཡོད་པ་བཅས་ནི་དྲང་བདེན་དང་བཟང་སྤྱོད་མེད་པའི་བྱེད་སྒོ་སྤེལ་བ་འདི་རིགས་ལ་བོད་མི་མང་སྤྱི་འཐུས་ལྷན་ཚོགས་ཀྱིས་ངོས་ལེན་ནམ་ཡང་མེད་པ་མ་ཟད། རྒྱལ་སྤྱིའི་སྤྱི་ཚོགས་ནས་ཀྱང་དེ་ལུགས་བསམ་གཞིགས་དགོས་པའི་དུས་ལ་བབ་ཡོད་པ་ངོས་འཛིན་ཞུ་བཞིན་ཡོད་ཅེས་གསུངས་པ་དང་ཆབས་ཅིག རྒྱ་གཞུང་གིས་བོད་མི་རྣམས་རྒྱ་རིགས་ཀྱི་ངོ་བོར་བསྒྱུར་རྒྱུའི་སྲིད་བྱུས་ངན་པ་ལག་བསྟར་བྱེད་བཞིན་པ་དེ་དག་འཕྲལ་དུ་མཚམས་འཇོག་དགོས་པའི་འབོད་སྐུལ་ཞུས་སོང་། དེ་བཞིན་ཚོགས་གཙོ་མཆོག་གིས་རྒྱ་གཞུང་ནས་ཉེ་ཆར་ཡང་༸གོང་ས་མཆོག་༸སྐུ་སྒེར་གྱི་གནད་དོན་ཙམ་ལས་བོད་དང་འབྲེལ་བའི་གནད་དོན་གང་ཡང་མེད་པའི་ལོག་བཤད་མུ་མཐུད་བྱེད་བཞིན་ཡོད་པས་རྒྱ་གཞུང་གི་འགོ་ཁྲིད་རྣམས་ལ་བོད་དོན་ཐག་གཅོད་བྱ་་རྒྱུའི་འདུན་པ་དང་ཆོད་སེམས་བརྟན་པོ་མེད་པ་ཁ་གསལ་དུ་འགྲོ་བཞིན་ཡང་༸གོང་ས་མཆོག་གི་ཐུགས་བསྐྱེད་མཛད་འཕྲིན་དང་བོད་ནང་གི་བོད་མིའི་སེམས་ཤུགས་དང་ལ་རྒྱ་བཅས་ལ་བརྟེན་ནས་བོད་དོན་ལ་དོ་སྣང་བྱེད་མཁན་མང་དུ་འགྲོ་བཞིན་པའི་གོ་སྐབས་དང་བསྟུན་བཙན་བྱོལ་བོད་མི་རྣམས་ཀྱིས་བོད་དོན་འཐབ་རྩོད་ལ་རྒྱབ་སྐྱོར་སྔ་ལྷག་ཡོང་ཐབས་དང་བོད་མིའི་སྒྲིག་འཛུགས་ཀྱི་གནས་བབ་སྲ་བརྟན་གཏོང་ཐབས། བོད་ཀྱི་ཆོས་རིག་དང་བོད་མིའི་ངོ་བོ་མི་བརླག་པའི་ཐབས་ཤེས་གང་ཡོད་ཀྱིས་མདུན་བསྐྱོད་བྱ་དགོས་པའི་གཞེན་སྐུལ་གནང་སོང་། དེ་རིང་གི་མཛད་སྒོའི་ཐོག་བོད་ཀྱི་ཟློས་གར་ཚོགས་པ་ནས་རིག་གཞུང་འཁྲབ་སྟོན་དང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་གཅིག་ལ་ཞབས་ལོ་ ༢༥ འཁོར་བའི་གཟེངས་བསྟོད་ལེགས་སྐྱེས་དང་། དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་ནས་བོད་མིའི་སྒྲིག་ཕྱི་དྲིལ་ལས་ཁུངས་ཀྱི་ཕྱོགས་སྒྲིག་གནང་བའི་ཕྱག་དདག་དབུ་འབྱེད་དང་གཞན་ཡང་སྲིད་སྐྱོང་མཆོག་གིས་དབུས་འོས་བསྡུ་ལས་ཁུང་ནས་བཟོ་སྐྲུན་གནང་བའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེ་མོའི་ལས་རིམ་དང་འབྲེལ་བའི་གློག་བརྙན་ང་ཚོས་འོས་ནི་ང་ཚོའི་མ་འོངས་ཞེས་པ་བཅས་དབུ་འབྱེད་གནང་སོང་། གཞི་རྩའི་དེ་རིང་གི་ཉིན་མོ་དང་ཚོགས་པས་གོ་སྒྲིག་འོག་བོད་ཀྱི་ཟློས་གར་ཚོགས་པར་དེ་རིང་དང་སང་ཉིན་བཅས་ཉིན་གཉིས་རིང་ཧི་མཱ་ལ་ཡའི་དུས་སྟོན་ཐེངས་ ༢༥ པ་སྲུང་བརྩི་ཞུ་གནང་གི་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དེ་རིང་འགྲོ་བ་མིའི་ཐོབ་ཐང་ཉིན་མོར་བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་བསྡུའི་རེའུ་མིག་བསྐྱར་སྒྲིག་གནང་བའི་དྲ་ཚིགས་ཤིག་འདོན་སྤེལ་གནང་གི་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བའི་དུས་དྲན་སྲུང་བརྩི། ༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགསའབུལ་བཞེས་ཀྱི་དུས་ཚིགས་དྲན་གསོའི་སྐོར་ཕྱོགས་སྒྲིག Friday 10/12/2021 Tibetans mark 32nd anniversary of Dalai Lama’s Nobel Peace Prize 1989 Nobel Peace Prize conferment on Dalai Lama: Special Feature

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་འཇར་མི་ནིའི་སྲིད་བློན་གསར་པར་འདེམས་ཐོན་བྱུང་བར་དགའ་བསུའི་འཚམས་འཕྲིན་སྩལ་འདུག དེ་རིང་༸གོང་ས་༸སྐྱབས་གོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་གི་མཚན་ཐོག་ལ་ཕྱག་ཡིག་ཞིག་སྩལ་བའི་ནང་དུ་ཁོང་སྲིད་བློན་དུ་འདེམས་ཐོན་བྱུང་བར་འཚམས་འདྲི་སྩལ་བ་དང་སྦྲགས། ཡུ་རོབ་མཐུན་ཚོགས་ཀྱི་ནུས་སྟོབས་དང་བརྟན་ལྷིང་སྲ་བརྟན་ཡོང་རྒྱུའི་ཐད་ལ་འཇར་མི་ནིའི་སྲིད་བློན་གྱི་ཞབས་སྟེགས་ཐོབ་པ་དེ་ནི་འཛམ་གླིང་ཁྱོན་ཡོངས་ལ་རེ་བ་དང་སེམས་སྐུལ་སྐྱེད་གཞི་ཞིག་ཆགས་ཡོད་པར་བཀའ་སྩལ་བར་མ་ཟད། སྐུ་ཞབས་ Olaf ཁོང་གི་ཉམས་མྱོང་དང་དཔྱད་གསུམ་དག་པའི་དབུ་ཁྲིད་འོག་དཔལ་འབྱོར་དང་རང་དབང་། ཁྲིམས་ཀྱི་དབང་བསྒྱུར། མང་གཙོ། དེ་བཞིན་འགྲོ་བ་མིའི་ཐོབ་ཐང་བཅས་ཀྱི་རིན་ཐངསྲུང་མཁན་འཛམ་གླིང་སྣེ་ཁྲིད་ཀྱི་རྒྱལ་ཁབ་ཞིག་ལ་མུ་མཐུད་ནས་མདུན་བསྐྱོད་གནང་རྒྱུའི་ཐུགས་རེ་ཡོད་ཅེས་བཀའ་སྩལ་འདུག ༸གོང་ས་མཆོག་གིས་ད་དུང་འདས་པའི་ལོ་ངོ་བཅུ་ཕྲག་བཞིའི་ནང་དུ་མགོན་པོ་མཆོག་འཇར་མི་ནི་ནང་དུ་ཐེངས་མང་ཆིབས་བསྒྱུར་མཛད་རྒྱུའི་གོ་སྐབས་བྱུང་ཡོད་པའི་ཁྲོད་ཡུལ་དེའི་མི་མང་གི་བརྩེ་སེམས་དང་བསམ་བློ། ལྷག་པར་དུ་མགོན་པོ་མཆོག་གིས་ཆོས་ལུགས་མཐུན་སྒྲིལ་དང་འགྲོ་བ་མི་གཅིག་འགྱུར་གྱི་མཛད་རྗེས་ལ་མང་ཚོགས་ཀྱི་དོ་སྣང་དང་རྒྱབ་སྐྱོར་གནང་ཕྱོགས་བཅས་ཀྱིས་ཐུགས་འགུལ་ཆེན་པོ་ཐེབས་ཡོད་སྐོར་བཀའ་སྩལ་ཡོད། ༸གོང་ས་མཆོག་གིས་འཇར་མི་ནིའི་མང་ཚོགས་ཀྱིས་བོད་མིའི་རང་དབང་གྱི་ཐོག་གདུང་སེམས་མཉམ་བསྐྱེད་གནང་བར་ཐུགས་རྗེ་ཆེ་ཞེས་བཀའ་སྩལ་བ་དང་འབྲེལ། དེ་སྔའི་སྲིད་བློན་ལྕམ་ Angela Merkel མཆོག་གིས་ཀྱང་བོད་དོན་ལ་དམིགས་བསལ་དོ་སྣང་དང་ཐུགས་འཁུར་བཞེས་པརབ་སྔགས་བརྗོད་མཛད་འདུག དེའི་བར་ན་ཁ་སང་རྒྱ་གར་ནང་དུ་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་ Bipin Rawat ལགས་ཀྱིས་གཙོས་བདེ་སྲུང་མཐོ་རིམ་ལས་བྱེད་མི་སྣ་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་བྱུང་རྐྱེན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད་སྟབས། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་ཐུགས་གསོའི་གསུང་འཕྲིན་ཞིག་སྩལ་བའི་ནང་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་བི་པིན་རཱ་ཝ་ཊ་ལགས་ཀྱིས་གཙོས་ཁོང་དང་ལྷན་དུ་ཕྱོགས་བསྐྱོད་གནང་མཁན་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་དབང་གིས་འདས་གྲོངས་སུ་གྱུར་པའི་གནས་ཚུལ་གསན་པར་ཐུགས་ཕམ་དང་།ཁོང་རྣམ་པའི་ནང་མི་སྤུན་མཆེད་ཡོངས་ལ་ཐུགས་གསོ་སྩལ་བ་དང་ཆབས་ཅིག འདས་པོ་རྣམས་ལ་བསྔོ་སྨོན་མཛད་འདུག

ཉེ་ཆར་རྒྱ་ནག་གི་ཆོས་རིགས་ལས་དོན་དང་འབྲེལ་བའི་རྒྱལ་ཡོངས་ཚོགས་ཆེན་ཐོག་རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་ཤིག་བསྐྲུན་རྒྱུའི་ལས་དོན་རྒྱ་ཆེར་སྤེལ་དགོས་པར་ནན་བརྗོད་བྱས་པ་དང་། དེའི་ཁྲོད་བོད་བརྒྱུད་ནང་བསྟན་དང་ཡི་ཤུ། དེ་བཞིན་ཁ་ཆེ་སོགས་རྒྱ་ནག་ནང་གི་ཆོས་རིག་ལས་དོན་གང་ཅིའི་ཐོག་དྲ་རྒྱས་ལྟ་སྲུང་སོགས་ཤུགས་ཆེ་རུ་གཏང་དགོས་པར་བརྗོད་འདུགཉེ་ཆར་རྒྱ་ནག་གཞུང་འབྲེལ་བརྒྱུད་ལམ་དང་གཞན་རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། ཟླ་བ་འདིའི་ཚེས་ ༣ དང་ ༤ གཉིས་ལ་རྒྱ་ནག་གི་རྒྱལ་ས་པེ་ཅིང་དུ་རྒྱ་ནག་གི་ཆོས་རིགས་ལས་དོན་དང་འབྲེལ་བའི་རྒྱལ་ཡོངས་ཚོགས་ཆེན་ཞིག་ཚོགས་ཡོད་པ་དང་ཚོགས་འདུ་ཐོག་སྲིད་འཛིན་ཞི་ཅིན་ཕིང་གཙོས་པའི་ Li Zhanshu དང་ Wang Huning དེ་བཞིན་ Zhao Leji དང་ Han Zheng སོགས་རྒྱ་ནག་དམར་ཤོག་ཚོགས་པའི་དཔོན་རིགས་ཆེ་གྲས་ཁག་ཅིག་མཉམ་ཞུགས་བྱས་ཡོད་པ་དང་། ཕྱི་ལོ་ ༢༠༡༦ ལོར་ཐེངས་དང་པོ་ཚོགས་པའི་ཚོགས་འདུའི་ཐོག་སྲིད་འཛིན་ཞི་ཅིན་ཕིང་གིས་ཆོས་རིགས་ལས་དོན་དང་འབྲེལ་བའི་དམར་ཤོགས་ཚོགས་པའི་སྲིད་བྱུས་དང་ཁྲིམས་སྒྲིག་ཁག་ལག་བསྟར་ཤུགས་ཆེ་རུ་གཏང་དགོས་པའི་དེ་སྔ་ ༢༠༡༦ ལོར་བཤད་པའི་གཏམ་བཤད་བསྐྱར་ནན་དང་འབྲེལ། རྒྱ་ནག་དམར་ཤོགས་ཚོགས་པའི་སྤྱི་ཚོགས་རིང་ལུགས་ཀྱི་ལྟ་གྲུབ་ལྡན་པའི་ཆོས་དང་སྤྱི་ཚོགས་བསྐྲུན་རྒྱུར་ཤུགས་རྒྱག་དགོས་པ་དང་། ཆོས་དད་འདྲ་མིན་གཉེར་མཁན་གྱི་མང་ཚོགས་རྣམས་ནས་དེའི་ཐོག་མཐུན་འགྱུར་གྱིས་ཆོས་དད་དང་འབྲེལ་བའི་རྒྱ་ནག་གཞུང་གི་ཁྲིམས་སྒྲིག་ཁག་ལ་བརྩི་སྲུང་གང་ལེགས་ཞུ་དགོས་པ་དང་། དེའི་འོག་གཞུང་གི་ངོས་ནས་ཆོས་དད་འདྲ་མིན་གྱི་འགོ་ཁྲིད་རྣམས་ལ་ལྟ་སྲུང་ཤུགས་ཆེ་རུ་གཏང་དགོས་པ་སོགས་བརྗོད་འདུག ཞི་ཅིན་ཕིང་གིས་ལྷག་པར་དུ་སྤྱི་ཚོགས་དྲ་རྒྱ་སོགས་ཀྱི་ཐོག་ཆོས་ལུགས་དང་འབྲེལ་བའི་ཁྱབ་བསྒྲགས་དང་འགྲེལ་བརྗོད་བྱེད་ཕྱོགས་ཐོག་ལ་ལྟ་སྲུང་ལེགས་པོ་ཞིག་ཡོང་མིན་སྐོར་དང་འབྲེལ་ནས་དྲ་རྒྱའི་ཐོག་གནད་དོན་དེ་དག་ལ་ལྟ་སྲུང་ཤུགས་ཆེ་རུ་བཏང་ནས་དྲ་རྒྱའི་ཐོག་རྒྱ་ནག་དམར་ཤོགས་ཚོགས་པའི་ཆོས་རིགས་ལས་དོན་དང་འབྲེལ་བའི་སྲིད་བྱུས་ཁག་ལ་སྐྱོན་བརྗོད་བྱེད་མཁན་རྣམས་ལ་ལྟ་སྲུང་དང་དེ་དག་ལ་ཉེས་ཆད་གཏང་རྒྱུ་སོགས་ཤུགས་ཆེ་རུ་གཏང་དགོས་ཞེས་བཤད་ཡོད་པ་རེད། ཁོ་པས་ད་དུང་གཞུང་གི་ངོས་ལེན་ཡོད་པའི་ཆོས་ལུགས་ཁག་ ༥ པོས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་བསྐྲུན་རྒྱུ་དང་འབྲེལ་བའི་སྤྱོད་ཚུལ་ཤུགས་ཆེ་རུ་འཛིན་དགོས་ཞེས་བརྗོད་པའི་འོག་ཆོས་དད་འཛིན་མཁན་རྣམས་ནས་ཆོས་དད་གཉེར་སྐབས་རང་གི་སྤྱོད་ཚུལ་ལ་ཚོད་འཛིན་བྱེད་དགོས་པ་དང་མི་རབས་གཞོན་པ་ཚོའི་རྒྱུན་ལྡན་གྱི་མི་ཚེ་དང་སློབ་སྦྱོང་ཐོག་ལ་ཐེ་བྱུས་བྱེད་རྒྱུ་མེད་པར་ནན་བརྗོད་འདུགཆོས་དད་འདྲ་མིན་གཉེར་མཁན་རྣམས་ལ་ཆོས་དད་དང་འབྲེལ་བའི་ Marxist འམ་སྤྱི་ཚོགས་རིང་ལུགས་ཀྱི་ལྟ་གྲུབ་དང་དམར་ཤོགས་ཚོགས་པའི་ཆོས་ལུགས་ལྟ་གྲུབ་དང་སྲིད་བྱུས་བཅས་ཀྱི་སྐོར་ལ་སློབ་སྦྱོང་སྤྲོད་དགོས་སྐོར་དང་སྦྲགས། རྒྱ་ནག་གི་ཁྱད་ཆོས་ལྡན་པའི་ཆོས་ལུགས་དང་སྤྱི་ཚོགས་ཞེས་པའི་འོག་ཆོས་དད་ཀྱི་སྤྱི་ཚོགས་ཡོངས་རྫོགས་དམར་ཤོག་ཚོགས་པའི་འགོ་ཁྲིད་དང་རྒྱབ་སྐྱོར། དེ་བཞིན་བཏང་འཛིན་འོག་འགྲོ་དགོས་པར་ནན་བརྗོད་བྱས་འདུག དབྱེ་ཞིབ་པ་རྣམས་ཀྱི་གསུངས་ན་ད་རེས་ཞི་ཅིན་ཕིང་གི་གཏམ་བཤད་དེ་ནི་དེ་སྔ་ ༢༠༡༦ ལོར་སྤེལ་བའི་གཏམ་བཤད་དེ་ནན་བརྗོད་དང་དམ་དྲག་ཤུགས་ཆེ་རུ་གཏང་དགོས་སྐོར་བཤད་པ་དང་འབྲེལ། ནང་ཆོས་གཙོ་བོར་གྱུར་པའི་རྒྱ་ནག་ནང་ཆོས་དད་འདྲ་མིན་འཛིན་མཁན་ཚོའི་ཐོག་དམ་དྲག་ཤུགས་ཆེ་རུ་བཏང་རྒྱུ་ཡིན་པའི་དངངས་འཚབ་ཀྱི་གནད་དོན་ཞིག་ཆགས་ཀྱི་ཡོད་པ་གསུང་མཁན་འདུག

ཉན་པ།: Listen ཕབ་ལེན། Download སྐུ་ཞབས་ Olaf Scholz མཆོག་ལ་དགའ་བསུའི་འཚམས་འདྲི་མཛད་པ། སུད་སི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་འདུ། ཞི་ཅིན་ཕིང་གིས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་ཤིག་བསྐྲུན་རྒྱུའི་ལས་དོན་རྒྱ་ཆེར་སྤེལ་དགོས་པར་ནན་བརྗོད། དབྱིན་ཡུལ་དང་ཁེ་ན་ཌས་ཀྱང་པེ་ཅིང་ཨོ་རྩལ་ལ་ཕྱི་འབྲེལ་མི་སྣ་གཏང་རྒྱུ་ཕྱིར་འཐེན། འཕྲོད་བསྟེན་ཤེས་བྱ་ངོ་སྤྲོད། ཨེ་རོ་བིག་ལུས་སྦྱོང་གི་ཕན་ཡོན་སྐོར། Thursday 09/12/2021 Dalai Lama congratulates new German Chancellor, consoled demise of India’s defence Chief Swiss Parliamentarians hold meet on Tibet CCP National Conference on Religion: Xi asks for more Marxism,more Sinicization UK, Canada join diplomatic boycott of Beijing Winter Games Health and Wellness: Aerobics and it’s benefit

ད་ལྟ་སུད་སི་རྒྱལ་ས་སྦན་དུ་དགུན་དུས་གྲོས་ཚོགས་འཚོགས་བཞིན་པ་དང་བསྟུན་སུད་སིའི་གྲོས་ཚོགས་ཚོགས་ཁང་ཞིག་ཏུ་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་དང་བོད་མིའི་སྐུ་ཚབ་རྣམས་ལྷན་འཛོམས་ཐོག་བོད་ནང་གི་གནས་སྟངས་དང་མ་འོངས་ལས་འཆར་སྐོར་བཀའ་བསྡུར་གནང་འདུགཟླ་བ་འདིའི་ཕྱི་ཚེས་ ༧ ཉིན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Nicholas Walder ལགས་ཀྱིས་གཙོ་སྐྱོང་གནང་སྟེ་གྲོས་ཚོགས་འཐུས་མི་ Fabian Molina ལགས་དང། Maya Graf ལགས། དེ་བཞིན་ Preliez-Huber ལགས་བཅས་ཀྱིས་དབུས་པའི་སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་དོན་ཁང་གི་འབྲེལ་ཡོད་ལས་བྱེད། སུད་སི་དང་ལིག་ཏེན་སིཌཡན་བོད་རིགས་མི་ཚོགས་གཙོ། སུད་བོད་མཐུན་ཚོགས་ཀྱི་སྐུ་ཚབ་བཅས་ལྷན་འཛོམས་གནང་འདུག ཚོགས་འདུ་ཐོག་གཙོ་བོ་ཉེ་བའི་ཆར་བོད་ནང་རྒྱ་ནག་གཞུང་གི་ངོས་ནས་འཆར་གཞི་དང་གོ་རིམ་ལྡན་པའི་ངང་བོད་མིའི་སྐད་ཡིག་དང་ངོ་བོ་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་དང་དང་སུད་སི་གཞུང་ནས་ཨ་རིས་གཙོས་པའི་རྒྱལ་ཁབ་གཞན་ཁག་དང་གཅིག་མཚུངས་ཀྱིས་པེ་ཅིང་དགུན་དུས་ཨོ་རྩལ་མགྲན་ཚོགས་ཐོག་གཞུང་འབྲེལ་དཔོན་རིགས་མཉམ་ཞུགས་གནང་རྒྱུ་ཕྱིར་འཐེན་ཡོང་བའི་གནད་དོན་བཅས་གྲོས་ཚོགས་སུ་གླེང་སློང་གནང་བའི་ཞུ་འབོད་གནང་འདུག་པར་མ་ཟད། ད་ལྟའི་ཆར་སུད་སི་ནང་ཡིག་ཆ་མེད་པའི་བོད་མི་སྐྱབས་བཅོལ་བའི་ངལ་འཕྲད་དེ་སེལ་ཐབས་གནང་གལ་ཡིན་པ་སོགས་ཀྱི་སྐོར་ལ་བཀའ་བསྡུར་གནང་ཡོད། སུད་སི་སྐུ་ཚབ་དོན་གཅོད་འཆིེ་མེད་རིག་འཛིན་ལགས་ཀྱིས་ཁ་ཉིན་བོད་མིའི་སྐུ་ཚབ་ཀྱི་ངོས་ནས་གྲོས་ཚོགས་འཐུས་མི་ཚོ་དང་ལྷན་དུ་ཉེ་ཆར་བོད་ནང་རྒྱ་ནག་གཞུང་གི་ངོས་ནས་འཆར་གཞི་དང་གོ་རིམ་ལྡན་པའི་ངང་བོད་མིའི་སྐད་ཡིག་དང་ངོ་བོ་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་ཐོག་བཀའ་བསྡུར་དང་དེ་དོན་གྲོས་ཚོགས་སུ་གླེང་ཡོང་བའི་འབོད་སྐུལ་ཞུས་པ་ལྟར་ཁ་སང་སུད་སི་གྲོས་ཚོགས་སུ་གོང་གསལ་གནད་དོན་ཐད་ལ་བགྲོ་གླེང་བྱུང་ཡོད་པར་འགྲེལ་བརྗོད་གནང་སོང་།སྤྱིར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་ལོ་ལྟར་ལོ་གཅིག་ནང་སུད་སི་དབུས་གྲོས་ཚོགས་འཚོགས་བཞིན་པ་དང་བསྟུན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམ་པ་དང་དང་བོད་མིའི་སྐུ་ཚབ་བཅས་ལྷན་འཛོམས་ཀྱི་ཐོག་ནས་ཚོགས་འདུ་ཐེངས་གཉིས་ཚོགས་སྲོལ་ཡོད་པ་རེད། ད་རེས་ཀྱི་ཚོགས་འདུ་དེ་ཕྱི་ལོ་ ༢༠༢༡ ལོའི་ལྷན་འཛོམས་ཐེངས་གཉིས་པ་དེ་ཆགས་ཀྱི་ཡོད་པ་དང་ད་ཆར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པར་སུད་སི་ཆབ་སྲིད་ཚོགས་པ་འདྲ་མིན་ནས་གྲོས་ཚོགས་འཐུས་མི་གྲངས་ ༢༥ ཙམ་ཡོད་པ་རེད། དེ་དང་ཕྱོགས་མཚུངས་ཕྱི་ཚེས་ ༧ ཉིན་གྲོས་ཚོགས་འཐུས་མི་རྣམ་པའི་ཚོགས་འདུ་གྲུབ་འཚམས་སུ་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམ་པས་གྲོས་ཚོགས་ཀྱི་ཕྱི་ཕྱོགས་སུ་ས་གནས་སུ་ཡོད་པའི་གཞུང་འབྲེལ་མིན་པའི་ཚོགས་ཁག་གི་རིང་མིན་པེ་ཅིང་དགུན་དུས་ཨོ་རྩལ་མགྲན་ཚོགས་ཐོག་སུད་སི་གཞུང་འབྲེལ་དཔོན་རིགས་མཉམ་ཞུགས་གནང་རྒྱུ་ཕྱིར་འཐེན་གནང་དགོས་པའི་ཞུ་འབོད་ལས་འགུལ་ཐོག་མཉམ་ཞུགས་ཀྱིས་རྒྱབ་སྐྱོར་ཡོད་པའི་རྣམ་པ་ཡང་བསྟན་འདུག