སྐུ་ཞབས་ Olaf Scholz མཆོག་འཇར་མི་ནིའི་སྲིད་བློན་གསར་པར་འདེམས་ཐོན་བྱུང་བར་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་འཇར་མི་ནིའི་སྲིད་བློན་གསར་པར་འདེམས་ཐོན་བྱུང་བར་དགའ་བསུའི་འཚམས་འཕྲིན་སྩལ་འདུག དེ་རིང་༸གོང་ས་༸སྐྱབས་གོན་ཆེན་པོ་མཆོག་གིས་སྐུ་ཞབས་ Olaf Scholz མཆོག་གི་མཚན་ཐོག་ལ་ཕྱག་ཡིག་ཞིག་སྩལ་བའི་ནང་དུ་ཁོང་སྲིད་བློན་དུ་འདེམས་ཐོན་བྱུང་བར་འཚམས་འདྲི་སྩལ་བ་དང་སྦྲགས། ཡུ་རོབ་མཐུན་ཚོགས་ཀྱི་ནུས་སྟོབས་དང་བརྟན་ལྷིང་སྲ་བརྟན་ཡོང་རྒྱུའི་ཐད་ལ་འཇར་མི་ནིའི་སྲིད་བློན་གྱི་ཞབས་སྟེགས་ཐོབ་པ་དེ་ནི་འཛམ་གླིང་ཁྱོན་ཡོངས་ལ་རེ་བ་དང་སེམས་སྐུལ་སྐྱེད་གཞི་ཞིག་ཆགས་ཡོད་པར་བཀའ་སྩལ་བར་མ་ཟད། སྐུ་ཞབས་ Olaf ཁོང་གི་ཉམས་མྱོང་དང་དཔྱད་གསུམ་དག་པའི་དབུ་ཁྲིད་འོག་དཔལ་འབྱོར་དང་རང་དབང་། ཁྲིམས་ཀྱི་དབང་བསྒྱུར། མང་གཙོ། དེ་བཞིན་འགྲོ་བ་མིའི་ཐོབ་ཐང་བཅས་ཀྱི་རིན་ཐངསྲུང་མཁན་འཛམ་གླིང་སྣེ་ཁྲིད་ཀྱི་རྒྱལ་ཁབ་ཞིག་ལ་མུ་མཐུད་ནས་མདུན་བསྐྱོད་གནང་རྒྱུའི་ཐུགས་རེ་ཡོད་ཅེས་བཀའ་སྩལ་འདུག ༸གོང་ས་མཆོག་གིས་ད་དུང་འདས་པའི་ལོ་ངོ་བཅུ་ཕྲག་བཞིའི་ནང་དུ་མགོན་པོ་མཆོག་འཇར་མི་ནི་ནང་དུ་ཐེངས་མང་ཆིབས་བསྒྱུར་མཛད་རྒྱུའི་གོ་སྐབས་བྱུང་ཡོད་པའི་ཁྲོད་ཡུལ་དེའི་མི་མང་གི་བརྩེ་སེམས་དང་བསམ་བློ། ལྷག་པར་དུ་མགོན་པོ་མཆོག་གིས་ཆོས་ལུགས་མཐུན་སྒྲིལ་དང་འགྲོ་བ་མི་གཅིག་འགྱུར་གྱི་མཛད་རྗེས་ལ་མང་ཚོགས་ཀྱི་དོ་སྣང་དང་རྒྱབ་སྐྱོར་གནང་ཕྱོགས་བཅས་ཀྱིས་ཐུགས་འགུལ་ཆེན་པོ་ཐེབས་ཡོད་སྐོར་བཀའ་སྩལ་ཡོད། ༸གོང་ས་མཆོག་གིས་འཇར་མི་ནིའི་མང་ཚོགས་ཀྱིས་བོད་མིའི་རང་དབང་གྱི་ཐོག་གདུང་སེམས་མཉམ་བསྐྱེད་གནང་བར་ཐུགས་རྗེ་ཆེ་ཞེས་བཀའ་སྩལ་བ་དང་འབྲེལ། དེ་སྔའི་སྲིད་བློན་ལྕམ་ Angela Merkel མཆོག་གིས་ཀྱང་བོད་དོན་ལ་དམིགས་བསལ་དོ་སྣང་དང་ཐུགས་འཁུར་བཞེས་པརབ་སྔགས་བརྗོད་མཛད་འདུག དེའི་བར་ན་ཁ་སང་རྒྱ་གར་ནང་དུ་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་ Bipin Rawat ལགས་ཀྱིས་གཙོས་བདེ་སྲུང་མཐོ་རིམ་ལས་བྱེད་མི་སྣ་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་བྱུང་རྐྱེན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད་སྟབས། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་ཐུགས་གསོའི་གསུང་འཕྲིན་ཞིག་སྩལ་བའི་ནང་རྒྱ་གར་གྱི་བདེ་སྲུང་སྤྱི་ཁྱབ་དམག་སྤྱི་བི་པིན་རཱ་ཝ་ཊ་ལགས་ཀྱིས་གཙོས་ཁོང་དང་ལྷན་དུ་ཕྱོགས་བསྐྱོད་གནང་མཁན་གཞན་ཁག་གཅིག་བཅས་ཐད་འཕུར་གནམ་གྲུ་བརྡབ་སྐྱོན་དབང་གིས་འདས་གྲོངས་སུ་གྱུར་པའི་གནས་ཚུལ་གསན་པར་ཐུགས་ཕམ་དང་།ཁོང་རྣམ་པའི་ནང་མི་སྤུན་མཆེད་ཡོངས་ལ་ཐུགས་གསོ་སྩལ་བ་དང་ཆབས་ཅིག འདས་པོ་རྣམས་ལ་བསྔོ་སྨོན་མཛད་འདུག