ཟླ་ ༡༠ ཚེས་ ༨ ཉིན་ཧྥ་རན་སིའི་རྒྱལ་ས་པེ་རིས་དང། Italy འི་རྒྱལ་ས་རོམ་ནང་སྡུག་རྩུབ་འོག་གནས་པའི་གྲངས་ཉུང་མི་རིགས་དང་མི་མང་གི་རང་དབང་སླད་རྒྱལ་སྤྱིའི་གོམ་བགྲོད་ཐེངས་ ༩ པ་དེ་ཚོགས་ཡོད་པ་དང། གོམ་བགྲོད་ནང་ Vietnam དང་། Laos ཐེ་ཝན། ཡུ་གུར་མི་རིགས་སོགས་ཡོད་པ་མ་ཟད། བཙན་བྱོལ་བོད་མི་རྣམས་ནས་ཀྱང་དེར་མཉམ་ཞུགས་གནང་འདུག
ལས་འགུལ་བ་རྣམས་ནས་རང་དབང་གི་གོམ་བགྲོད་དེའི་བརྒྱུད་གཙོ་བོ་རང་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སོགས་ལ་བརྩི་སྲུང་ཞུ་དགོས་པ་མ་ཟད། རྒྱལ་སྤྱིའི་ཚོགས་སྡེ་ཁག་གིས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་དང་འདི་བཞིན་རྒྱལ་སྤྱིའི་འབྲེལ་ལམ་ཁྲོད་ཀྱི་གནད་དོན་དེ་དག་གཙོ་གྲས་སུ་འཇོག་དགོས་པ། ཡུ་རོབ་མཐུན་ཚོགས་ཀྱིས་ཞལ་ཁོ་ནས་གསུངས་པ་ཙམ་མིན་པར་དོན་དམ་གྱི་ལག་བསྟར་ཐོག་འགྲོ་བ་མིའི་ཐོབ་ཐང་སྲུང་སྐྱོབ་གནང་དགོས་སྐོར་སྐུལ་མ་ཞུས་འདུག
ལྷག་པར་དུ་བོད་མི་རྣམས་ནས་སྐབས་དེར་ཕྱག་ཏུ་བོད་ཀྱི་རྒྱལ་དར་དང་འཕྲེད་དར་འདྲ་མིན་བསྣམས་ཏེ་རྒྱ་གཞུང་གི་དྲག་གནོན་སྲིད་བྱུས་ལ་ངོ་རྒོལ་དང་གསེར་རྟ་བླ་རུང་སྒར་གཏོར་བཤིག་གི་ལས་གཞི་འཕྲལ་མར་མཚམས་འཇོག་དགོས་པའི་ཞུ་སྐུལ་གནང་ཡོད་པ་རེད།