ཉེ་ལམ་ཕྱི་ཟླ་ ༡༠ ཚེས་ ༩ ནས་ ༡༡ བར་ནོར་ཝེར་རྟེན་གཞི་བྱས་པའི་ཀརྨ་བཤད་སྒྲུབ་གླིང་དགོན་དུ་ཨིན་ཇིའི་མཚོ་གླིང་དང་། པོ་ལེནྜ། བྱང་ཡུ་རོབ། སྦལ་ཊིག་རྒྱལ་ཁབ་ཁག་ཏུ་གནས་པའི་བོད་དོན་རྒྱབ་སྐྱོར་ཚོགས་པ་ཁག་དང་། བོད་རིགས་ཚོགས་པ་ཁག་བཅས་ཀྱི་ས་ཁུལ་ཚོགས་འདུ་ཐེངས་གསུམ་པ་དེ་སྐོང་འཚོགས་གནང་འདུག
དེ་ཡང་ནོར་ཝེ་བོད་རིགས་ལྷན་ཚོགས་དང་། ནོར་ཝེ་བོད་དོན་ྲརྒྱབ་སྐྱོར་ཚོགས་པ་གཉིས་ཀྱི་མཐུན་འགྱུར་འོག་ཨིན་ཡུལ་སྐུ་ཚབ་དོན་ཁང་གིས་གོ་སྒྲིག་གནང་བའི་ཚོགས་འདུ་དེའི་ཐོག ཨིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་དང་། དམིགས་བསལ་སྐུ་མགྲོན་དུ་ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས་དང་། ཡུ་རོབ་བོད་རིགས་འབྲེལ་མཐུད་པ་དོན་གྲུབ་རྒྱལ་པོ་ལགས། ཌེན་མཱག་དང་། ནོར་ཝེ། སྭི་ཌན། ཕིན་ལེནྜ། ཨེསྟོ་ནི་ཡ། ལི་ཐུའེ་ནི་ཡ། ཨིན་ཡུལ་བཅས་ཀྱི་བོད་དོན་རྒྱབ་སྐྱོར་ཚོགས་པ་བདུན་གྱི་སྐུ་ཚབ་ཉི་ཤུ་རྩ་ལྔ་དང་། པོ་ལེནྜ་དང་སྭི་ཌན་གཉིས་ནས་དང་བླངས་བོད་དོན་ཞུ་གཏུག་ལས་འགུལ་གྱི་རྒྱལ་ཡོངས་འབྲེལ་མཐུད་པ་གཉིས། དེ་བཞིན་ཨིན་ཡུལ་སྐུ་ཚབ་དོན་ཁང་གི་ཁྱབ་ཁོངས་སུ་ཡོད་པའི་བོད་རིགས་མཐུན་ཚོགས་དྲུག་གི་སྐུ་ཚབ་བཅས་ནས་མཉམ་ཞུགས་གནང་འདུག
ཚོགས་འདུ་འདིའི་ཐོག་གཙོ་བོ་མཉམ་ཞུགས་པ་རྣམས་ལྷན་འཛོམས་ཀྱིས་བོད་མིའི་སྤྱི་ཚོགས་དང་འབྲེལ་བའི་གནད་དོན་ཁག་ལ་གྲོས་བསྡུར་སྤྱི་དང་། ལྷག་པར་རྒྱ་ནག་གིས་བོད་ནང་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལག་བསྟར་བྱས་པའི་ཤུགས་རྐྱེན་དེར་གདོང་ལེན་ཆེད་དུ་ནུས་པ་ལྡན་པའི་ལས་འགུལ་སྤེལ་རྒྱུའི་ཐད་གྲོས་བསྡུར་གནང་འདུག་པ་མ་ཟད། སྐབས་དེར་ཚང་མས་མཉམ་འབྲེལ་གྱི་ལས་གཞི་ཁག་གཅིག་བཏོན་པའི་ནང་། བོད་དོན་ཞུ་གཏུག་ཉིན་མོའམ་བདུན་ཕྲག་སྲུང་བརྩི་བརྒྱུད་རྒྱ་ནག་གི་དབང་བསྒྱུར་འོག་གི་མི་རིགས་རྣམས་ལ་ཁྲིམས་ཡིག་འདིའི་ཤུགས་རྐྱེན་གསལ་བའི་འགྲེམ་ཡིག་འགྲེམས་སྤེལ་བྱ་རྒྱུ། དེ་བཞིན་ཡུ་རོབ་རྒྱལ་ཁབ་ཁག་ཏུ་ཐབས་བྱུས་ལྡན་པའི་མཉམ་ལས་དང་། གྲོས་ཚོགས་འཐུས་མི་དང་གནད་ཡོད་མི་སྣ་རྣམས་དང་ལྷན་དུ་འབྲེལ་བ་རྒྱུན་མཐུད་བྱ་རྒྱུ་བཅས་ཡིན་པ་རེད་འདུག
སྐབས་དེར་ཨིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ཀྱིས། རྒྱ་ནག་གིས་བོད་ནང་རྒྱ་ཡིག་གཙོ་བོ་བཟོ་རྒྱུའི་འབད་བརྩོན་ལ་གདོང་ལེན་ཆེད་དུ་བོད་མི་རྣམས་ལ་བོད་ཡིག་གང་མང་བཀོལ་སྤྱོད་གནང་རྒྱུའི་གལ་གནད་སྐོར་ནན་བརྗོད་གནང་བ་མ་ཟད། ཕ་མ་ཚོས་རང་གི་ཁྱིམ་ཚང་དུ་བོད་སྐད་ཐོག་གང་མང་བཀའ་མོལ་གནང་དགོས་པའི་སྐུལ་མ་གནང་འདུག་པ་དང་། ཕྱོགས་མཚུངས་ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་བཙན་བྱོལ་བོད་མི་རྣམས་ནི་གཞིས་བྱེས་བོད་མི་ཡོངས་ཀྱི་སྐུ་ཚབ་ཡིན་ཞེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དྲན་སྐུལ་གནང་བ་དང་སྦྲགས། ཚང་མས་བོད་དོན་ཐོག་ནུས་པ་གང་ཡོད་སྤུང་དགོས་པ་དང་འབྲེལ། རྒྱ་ནག་གི་ཁྲིམས་ཡིག་གསར་པ་དེས་བོད་ཀྱི་སྐད་ཡིག་དང་། རིག་གཞུང་། ངོ་བོ་བཅས་ལ་གནོད་འཚེ་ཚབས་ཆེན་ཕོག་སྲིད་པ་དེར་ངོ་རྒོལ་ཆེད་དུ་སོ་སོའི་རྒྱལ་ཁབ་ཁག་ཏུ་བོད་ཀྱི་སྐད་ཡིག་དང་རིག་གཞུང་གི་བསྟི་གནས་ཁང་གསར་འཛུགས་གནང་རྒྱུ་ཐོག་འབད་བརྩོན་གནང་དགོས་པ་གསུངས་འདུག
དེ་བཞིན་ནོར་ཝེའི་ལོ་རྒྱུས་སྨྲ་བ་དང་། གསར་འགོད་པ། དངོས་བྱུང་རྩོམ་པ་པོ་གྲགས་ཅན་སྐུ་ཞབས་ཊུར་སྦི་ཡན་ཕེ་རོ་ཝིག་ (Torbjørn Færøvik) ལགས་ཀྱིས་རྒྱ་ནག་གི་ཁྲིམས་ཡིག་དེས་རྒྱལ་ཁབ་ཀྱི་ཐུན་མོང་གི་ངོ་བོ་སྲ་བརྟན་བཟོ་རྒྱུ་དང་། རྒྱལ་ཁབ་ཀྱི་མཐུན་སྒྲིལ། ས་མཚམས་གཅིག་གྱུར་དེ་ཚང་མའི་འགན་འཁྲི་བཟོ་རྒྱུ། དེ་བཞིན་མི་མང་ཁྲོད་རྒྱ་ནག་དམར་གཞུང་ལ་ཆབ་སྲིད་ཀྱི་ཞེན་ཁོག་གོང་མཐོར་གཏོར་རྒྱུར་དམིགས་ཡོད་པས་ཚང་མས་ཁྲིམས་ཡིག་དེར་གདོང་ལེན་གནང་དགོས་གལ་ཡིན་པ་གསུངས་འདུག །ཁོང་གིས་ད་དུང་ཁྲིམས་ཡིག་དེ་ནི་སྲིད་གཞུང་གི་ཞན་ཆ་མཚོན་བྱེད་ཅིག་ཡིན་པ་ལས་སྟོབས་ཤུགས་ཀྱི་མཚོན་རྟགས་ཤིག་མིན་ཞེས་དང་། ལྷག་པར་བོད་རང་སྐྱོང་ལྗོངས་ཟེར་བའི་ཚོགས་པའི་དྲུང་ཆེ་གསར་པ་དེ་ཡང་ཞི་ཅིན་ཕིང་གི་བློ་ཉེ་བའི་མི་ཞིག་ཡིན་སྟབས། ཁོ་ཚོའི་སྣེ་ཁྲིད་འོག་ཁྲིམས་ཡིག་དེ་དྲག་པོའི་སྒོ་ནས་ལག་བསྟར་བྱེད་རྒྱུ་ཡིན་སྐོར་གསུངས་འདུག
གཞི་རྩའི་ཚོགས་འདུ་དེ་བཞིན་ནོར་ཝེ་བོད་དོན་རྒྱབ་སྐྱོར་ཚོགས་པ་དང་། ནོར་ཝེ་བོད་རིགས་མཐུན་ཚོགས་གཉིས་ཀྱི་མཐུན་འགྱུར་འོག་ཨིན་ཡུལ་སྐུ་ཚབ་དོན་ཁང་གིས་གོ་སྒྲིག་གནང་བ་ཞིག་ཡིན་པ་དང་། ཚོགས་འདུ་ཐེངས་དང་པོ་དེ་ཕྱི་ལོ་ ༢༠༢༣ ལོར་སྭི་ཌན་དང་། ཐེངས་གཉིས་པ་ཕྱི་ལོ་ ༢༠༢༥ ལོར་ཌེན་མག་ཏུ་འཚོགས་ཡོད་པ་རེད།
