ཕྱི་ལོ་ ༢༠༢༠ ལོར་ཨ་རིའི་ནིའུ་ཡོག་གྲོང་ཁྱེར་གྱི་གསང་བའི་ལས་ཁུངས་ཀྱིས་བོད་མིའི་ཐོག་སོ་མྱུལ་བྱས་པའི་ཉེས་མིང་འོག་འཛིན་བཟུང་བཙོན་འཇུག་བྱས་པ་ཨ་རིའི་གྲོང་ཁྱེར་ནིའུ་ཡོག་གི་ཉེན་རྟོག་པ་པདྨ་དར་རྒྱས་ངག་དབང་ Baimadajie Angwang ཟེར་བ་དེ་དང་འབྲེལ་བའི་ནག་ཉེས་རྣམས་ཕྱིར་འཐེན་བྱས་འདུག
ཉེ་ཆར་ཕྱི་ཚེས་ ༡༤ ཨ་རིའི་ New York Post གསར་ཁང་གིས་དྲ་གནས་ཐོག་གནས་ཚུལ་སྤེལ་བར་གཞིགས་ན། ནིའུ་ཡོག་གྲོང་ཁྱེར་གྱི་ས་གནས་ Brooklyn དུ་ཡོད་པའི་ Breon ཁྲིམས་རྩོད་ལས་ཁུངས་ཀྱིས་ས་གནས་ཁྲིམས་ཁང་གི་ཁྲིམས་དཔོན་སྐུ་ཞབས་ Eric R. Komitee ལགས་སུ་པདྨ་དར་རྒྱས་ངག་དབང་རྒྱ་གཞུང་གི་གསང་ཉུལ་བ་ཡིན་པ་སོགས་དང་འབྲེལ་བའི་ཉེས་འཛུགས་ཀྱི་ཁྲིམས་གཤེར་གནས་སྟངས་ཇི་ཆགས་དང་དཔང་རྟགས་ཁ་གསལ་མེད་པར་ཉེས་འཛུགས་བྱས་པ་རྣམས་ངོས་ལེན་གནང་རྒྱུ་མེད་པ་སོགས་ཀྱི་ཞུ་སྐུལ་བྱས་ཡོད་པ་རེད། སྐབས་དེར་ས་གནས་ཁྲིམས་ཁང་གིས་པདྨ་དར་རྒྱས་ངག་དབང་རྒྱ་གཞུང་གི་གསང་ཉུང་བ་ཡིན་པའི་གནད་དོན་ཐད་འབྲེལ་ཡོད་རྣམས་ནས་ཕུལ་བའི་གནས་ཚུལ་འཕར་མ་ཁག་ལ་ཞིབ་འཇུགས་གནང་རྗེས་ཁོ་པ་དང་འབྲེལ་བའི་ཁ་མཆུ་དེ་ཕྱིར་འཐེན་བྱས་ཟིན་ཡོད་པར་གསུངས་འདུག
ས་གནས་ཁྲིམས་ཁང་གིས་པདྨ་དར་རྒྱས་ངག་དབང་དང་འབྲེལ་བའི་ཁ་མཆུ་ཕྱིར་འཐེན་བྱས་ཟིན་ཡོད་པར་གསུངས་པ་ཙམ་ལས་ཞིབ་ཕྲའི་འགྲེལ་བརྗོད་གང་ཡང་གནང་མེད་སྟབས། པདྨ་དར་རྒྱས་ངག་དབང་གི་ཁྲིམས་རྩོད་པ་ John Carman ཡིས་སྐྱོན་བརྗོད་དང་སྦྲགས་ཏེ་ཁོ་པ་ནི་རྒྱ་ནག་གི་གསང་ཉུལ་བ་མིན་པར་ཨ་རིའི་དམག་མི་དང་ཉེ་རྟོག་པའི་ལས་དོན་ནང་ཞུགས་ཏེ་ Afghanistan སོགས་སུ་ལས་དོན་གཉེར་མྱོང་ཡོད་པའི་ཨ་རིའི་མེ་སེར་རླབས་ཆེན་ཞིག་ཡིན་པར་བཤད་འདུག
རྩ་བའི་ཕྱི་ལོ་ ༢༠༢༠ ལོར་ནིའུ་ཡོག་གྲོང་ཁྱེར་གྱི་གསང་བའི་ལས་ཁུངས་ནས་གྲོང་ཁྱེར་ནིའུ་ཡོག་གི་ཉེན་རྟོག་པ་པདྨ་དར་རྒྱས་ངག་དབང་ཟེར་བ་དེས་ཕྱི་ལོ་ ༢༠༡༤ ལོ་ནས་ས་གནས་སུ་ཡོད་པའི་རྒྱ་ནག་གཞུང་ཚབ་ལས་ཁུངས་དང་འབྲེལ་བ་བྱས་ཏེ་ཁུལ་དེར་ཡོད་པའི་བོད་མི་རྣམས་ཀྱི་གནས་ཚུལ་མཁོ་སྤྲོད་བྱས་པར་མ་ཟད། ཕྱི་ལོ་ ༢༠༡༦ ལོར་ཉེན་རྟོག་ལས་ཁུངས་ཀྱི་ལས་དོན་ནང་འཛུལ་ཞུགས་བྱས་རྗེས་གཞུང་གི་གོ་གནས་སྤྱོད་དེ་བོད་མི་དང་འབྲེལ་བའི་གནས་ཚུལ་ཁོ་ན་ཙམ་མིན་པར་ཨ་རི་གཞུང་གི་ལས་དོན་དང་འབྲེལ་བའི་གནས་ཚུལ་ཁག་གཅིག་རྒྱ་ནག་གཞུང་ལ་མཁོ་སྤྲོད་བྱས་ཡོད་པ་སོགས་ཀྱི་ཉེས་མིང་འོག་འཛིན་བཟུང་བཀག་ཉར་བྱས་པ་ཞིག་ཆགས་ཀྱི་ཡོད་པ་དང་། སྔ་ལོ་ ༢༠༢༢ ལོའི་ཕྱི་ཟླ་བརྒྱད་ཙམ་ལ་ས་གནས་ཁྲིམས་ཁང་གིས་ཁོ་པར་ཨ་སྒོར་ས་ཡ་གཉིས་ཀྱི་གན་རྒྱ་བཞག་ཏེ་གློད་བཀྲོལ་བཏང་ཡོད་པ་རེད།
