དེང་སྐབས་བོད་ཀྱི་ལོ་གསར་སྲུང་བརྩི་དང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སླེབས་ལ་ཉེ་བ་དང་བསྟུན་རྒྱ་གཞུང་གིས་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་དམ་བསྒྲགས་དང་ལག་ཐོག་ཁ་པར་བཅས་ལ་ཞིབ་བཤེར་སྔར་གྱོ་ལས་དོན་སྔར་ལྷག་སྤེལ་བཞིན་ཡོད་པ་ལྟར་རྒྱ་གཞུང་གིས་དབྱེ་བའི་བོད་རང་སྐྱོངས་ལྗོངས་ཁུལ་གྱི་གཞིས་ཀ་རྩེ་གྲོང་ཁྱེར་ནས་ཡིན་པ་རང་ལོ་ ༢༣ སོན་པའི་བུ་མོ་དབྱངས་མཚོ་ལགས་ཀྱིས་བོད་ནང་གི་པར་རིས་དང་བརྙན་སོགས་ཕྱི་ཕྱོགས་སུ་བསྒྱུད་སྐུལ་བྱས་འདུག་ཟེར་བའི་ནག་ཉེས་གཡོགས་ཏེ་ཁོང་འཛིན་བཟུང་བྱས་འདུག
ཕྱི་ཟླ་ ༣ ཚེས་ ༢ ཉིན་བོད་ནང་གི་སྔ་དྲོ་ཆུ་ཚོད་ ༨ ཡས་མས་ཙམ་ལ་གཞིས་ཀ་རྩེ་ནས་ཡིན་པའི་རྣམ་གླིང་རྫོང་རྒྱ་མཚོ་ཡུལ་ཚོ་ནས་ཡིན་པ་བོད་པའི་བུ་མོ་དབྱངས་མཚོ་ལགས་ས་གནས་ཉེན་རྟོག་པས་འཛིན་བཟུང་བྱས་འདུག་སྟབས་ད་ཆ་ཁོང་ཉེན་རྟོག་ཁང་དུ་བཀག་ཉར་བྱས་ཡོད་པ་རེད།
གནས་ཚུལ་མཁོ་སྤྲོད་པས་གསུངས་པར་རྒྱ་གཞུང་ས་གནས་ཉེན་རྟོག་པས་དབྱངས་མཚོ་ལགས་ཀྱི་ལག་ཐོག་ཁ་པར་སྔོག་བཤེར་བྱས་སྐབས་ཁོང་གིས་ཕྱི་ཕྱོགས་སུ་པར་རིས་སྐུར་འདུག་ཟེར་ནས་འཛིན་བཟུང་བྱས་ཡོད་པ་མ་ཚད་པར་ཁོང་གི་ནང་མི་ཚོ་དང་ཐུག་འཕྲད་གཙོས་འབྲེལ་གཏུག་རྩ་བ་ནས་བྱེད་བཅུག་མེད་སྐོར་གསུངས་ཡོད།
གཞི་རྩའི་རང་ལོ་ ༢༣ སོན་པའི་བུ་མོ་དབྱངས་མཚོ་ལགས་ཆུང་དུས་སྐབས་ནས་ཁོང་གི་ཡབ་འདས་གྲོངས་སུ་གྱུར་རྐྱེན་སློབ་གྲྭར་སློབ་གཉེར་གནང་རྒྱུའི་གོ་སྐབས་ཐོབ་མེད་པ་དང་། ནང་མི་དང་རང་གི་འཚོ་བའི་ཆེད་དུ་གཞིས་རྩེ་གྲོང་ཁྱེར་གྱི་གངས་རི་ཟ་ཁང་དུ་ཕྱག་ལས་གནང་བཞིན་ཡོད་པ་རེད་འདུག
