རྒྱ་ནག་གི་ངོས་ནས་ཐའེ་ཝན་གྱི་རང་བཙན་ཞེས་པ་དེ་བཟོད་ཐབས་བྲལ་བ་ཞིག་ཡིན་པ་བཤད་འདུག

ཐའེ་ཝན་གྱི་གོ་མིན་ཏང་ཆབ་སྲིད་ཚོགས་པའི་འགོ་ཁྲིད་ཞི་ཅིན་ཕིང་དང་ཐུག་འཕྲད་བྱས་འདུག་པ་དང་། སྐབས་དེར་ཞི་ཅིན་ཕིང་གི་ཐའེ་ཝན་གྱི་རང་བཙན་ནི་བཟོད་ཐབས་བྲལ་བ་ཞིག་ཡིན་ཞིང་། མེས་རྒྱལ་གོང་བུ་གཅིག་འགྱུར་བྱ་རྒྱུ་འབད་བརྩོན་བྱ་དགོས་པ་བཤད་འདུག

དེ་ཡང་ཐའེ་ཝན་ལ་རྒྱ་ནག་གི་དམག་དོན་གནོན་ཤུགས་རྒྱ་ཆེ་སྤྲོད་བཞིན་པའི་གནས་སྟངས་ཀྱི་མཚམས་འདིར། ཐའེ་ཝན་གྱི་ཕྱོགས་འགལ་ཚོགས་པ་སྟེ། གོ་མིན་ཏང་ཆབ་སྲིད་ཚོགས་པའི་འགོ་ཁྲིད་ Cheng Li-wun ཅེང་ལི་ཝུན་ཟླ་བ་འདིའི་ཚེས་ ༧ ནས་ ༡༢ བར་ཉིན་གྲངས་དྲུག་རིང་ཞི་བདེའི་འགྲུལ་བཞུད་ཞེས་པའི་འབོད་སྒྲའི་འོག་རྒྱ་ནག་ནང་དུ་འཚམས་གཟིགས་བསྐྱོད་བཞིན་ཡོད་པ་དང་། དེ་རིང་ཚེས་ ༡༠ ཉིན་རྒྱ་ནག་མི་མང་གི་ཚོགས་ཁང་ཆེན་མོའི་ནང་སྲིད་འཛིན་ཞི་ཅིན་ཕིང་དང་ཐུག་འཕྲད་བྱས་འདུག སྐབས་དེར་ཞི་ཅིན་ཕིང་གིས་ཐའེ་ཝན་གྱི་རང་བཙན་ནི་བཟོད་ཐབས་བྲལ་བ་ཞིག་ཡིན་པ་བསྐྱར་ནན་དང་འབྲེལ། མེས་རྒྱལ་གོང་བུ་གཅིག་འགྱུར་ཐོག་འབད་བརྩོན་བྱ་དགོས་ལུགས་བཤད་འདུག མ་ཟད་ད་ལྟའི་འཛམ་གླིང་འདི་བཞིན་དོན་དངོས་ཐོག་ཞི་བདེ་མེད་པ་དང་། ཞི་བདེ་ནི་རྩ་ཆེན་པོ་ཡིན་ལུགས་སོགས་བཤད་འདུག

ད་དུང་ཐའེ་ཝན་དང་རྒྱ་ནག་གཉིས་ཀ་ཞི་བདེ་དང་ཡར་རྒྱས། བརྗེ་ལེན། མཉམ་ལས་འདོད་མཁན་གྱི་ནང་མི་གཅིག་གྱུར་ཡིན་སྟབས། རྒྱ་ནག་གཅིག་ཡིན་པ་དང་། ནང་མི་མཐུན་པོ་ཡོད་ན་ཐམས་ཅད་བཀྲ་ཤིས་པ་ཡོང་གི་ཡོད་ལུགས། དེ་བཞིན་ཐའེ་ཝན་རང་བཙན་གྱི་གནད་དོན་ནི་ཁུལ་དེའི་ཞི་བདེ་ལ་སྣང་ཆུང་བཏང་བ་ཞིག་ཆགས་ཀྱི་ཡོད་ཚུལ་སོགས་བཤད་འདུག ད་དུང་རྒྱ་ནག་དམར་ཤོག་ཚོགས་པ་དང་གོ་མིན་ཏང་ཚོགས་པ་གཉིས་ཐུན་མོང་ནས་ཆབ་སྲིད་ཐོག་ཕན་ཚུན་ཡིད་ཆེས་དང་བཟང་ཕྱོགས་ཀྱི་གོ་བསྡུར། ཕྱོགས་གཉིས་ཀའི་རྒྱལ་གཅེས་བློ་མཐུན་ཆིག་སྒྲིལ་བཟོས་དགོས་པ། མེས་རྒྱལ་གོང་བུ་གཅིག་འགྱུར་གྱི་མ་འོངས་མདུན་ལམ་བཟང་པོ་བསྐྲུན་དགོས་ལུགས་བཤད་འདུག

སྐབས་དེར་གོ་མིན་ཏང་ཆབ་སྲིད་ཚོགས་པའི་འགོ་ཁྲིད་ Cheng Li-wun ཅེང་ལི་ཝུན་གྱིས། ཕན་ཚུན་འབྲེལ་ལམ་གྱི་ཁེ་ཕན་ནི་ཕྱོགས་གཉིས་ཀྱི་མི་མང་རྣམས་ཀྱི་མངོན་འདོད་ལ་རག་ལུས་ཡོད་པ་དང་། དེ་ལ་གཞིགས་པའི་གོ་བསྡུར་དང་བརྗེ་ལེན་ནི་ཕར་སྤྲོད་ཚུར་སྤྲོད་ཀྱི་གནས་བབ་ཅིག་ཆགས་ཀྱི་ཡོད་པ་བརྗོད་འདུག ད་དུང་མ་འོངས་པར་ཁོང་གི་ངོས་ནས་ཞི་ཅིན་ཕིང་ཐའེ་ཝན་དུ་གདན་ཞུ་བྱ་རྒྱུའི་གོ་སྐབས་ཤར་ངེས་ཡིན་པ་དང་། ཕྱོགས་གཉིས་ཀྱི་འབད་བརྩོན་འོག་ཐའེ་ཝན་གྱི་མཚོ་འགག་དེ་ཉེན་ཁ་ཅན་གྱི་འཁྲུག་རྩོད་ཀྱི་གཞི་རྟེན་ཞིག་ཏུ་མི་འགྱུར་བ་དང་། ངེས་པར་དུ་ཕྱིའི་སྟོབས་ཤུགས་ཀྱི་ཐེ་གཏོགས་བྱ་ཡུལ་ཞིག་ཏུ་འགྱུར་རྒྱུ་མིན་པ་བརྗོད་འདུག

ལྷག་པར་ཕྱོགས་གཉིས་ཀའི་ངོས་ནས་གྲོས་མོལ་དང་མཉམ་ལས་ཆེད་དུ་ཕུག་རྒྱང་རིང་བའི་འཆར་གཞི་དང་སྒྲིག་འཛུགས། དེ་བཞིན་རྒྱུན་གནས་ཐུབ་པའི་བརྒྱུད་ལམ་ཞིག་དགོས་ངེས་ཡིན་པ་བརྗོད་འདུག

Cheng Li-wun ཅེང་ལི་ཝུན་གྱི་པེ་ཅིང་དུ་གསར་འགོད་པའི་དྲི་བར་ལན་འདེབས་ཁྲོད། ཞི་ཅིན་ཕིང་གིས་ཐའེ་ཝན་སྤྱི་ཚོགས་ཀྱི་སྒྲོམ་གཞི་དང་འཚོ་བའི་འདེམ་ཀ་མི་འདྲ་བ་ཡོད་པ་དེར་གུས་བརྩི་ཞུ་ཡི་ཡོད་ལུགས་དང་ལྷན་དུ་ཐའེ་ཝན་གྱི་ངོས་ནས་རྒྱ་ནག་སྐམ་ས་ཆེན་མོའི་ཡར་རྒྱས་ལ་ངོས་བཞེས་གནང་ཐུབ་པའི་རེ་བ་བྱེད་ཀྱི་ཡོད་ཅེས་བརྗོད་པ་ལུང་འདྲེན་བྱས་འདུག

རྩ་བའི་རྒྱ་ནག་གི་ངོས་ནས་ཐའེ་ཝན་སྲིད་འཛིན་ Lai Ching-te ལའེ་ཅིན་ཏའེ་མཆོག་དང་གྲོས་མོལ་བྱ་རྒྱུ་ཡིན་པར་ཁོང་ནི་ཁ་བྲལ་བ་ཞིག་རེད་ཅེས་སྐྱོན་བརྗོད་བྱེད་བཞིན་ཡོད་པ་དང་། སྲིད་འཛིན་ལའེ་ཅིན་ཏའེ་གཞུང་ནས་གོ་མིན་ཏང་ཆབ་སྲིད་ཚོགས་པའི་འགོ་ཁྲིད་ Cheng Li-wun ཅེང་ལི་ཝུན་ལ་རྒྱ་ནག་ལ་འཇིགས་སྐུལ་བྱེད་མཚམས་བཞག་དགོས་པ་དང་། ཐའེ་ཝན་མི་དམངས་ཀྱི་མང་གཙོའི་ཐོག་ནས་འོས་འདེམས་བྱས་པའི་གཞུང་དང་ལྷན་དུ་གྲོས་མོལ་བྱ་དགོས་པ་བརྗོད་འདུག

གཞི་རྩའི་ཨ་རི་ནི་ཐའེ་ཝན་ལ་གཞུང་འབྲེལ་གྱི་ཐོག་ནས་འབྲེལ་ལམ་མེད་ཀྱང་། ཕྱི་ལོ་ ༡༩༧༩ ལོའི་ཐའེ་ཝན་དང་འབྲེལ་ལམ་གྱི་ཁྲིམས་ཡིག་གཏན་འབེབས་གཞིར་བཟུང་། ཐའེ་ཝན་ལ་དམག་དོན་གྱི་ཐོག་ནས་རོགས་འདེགས་བྱས་དང་བྱེད་མུས་ཡིན་པར་བརྟེན། རྒྱ་ནག་གི་ངོས་ནས་གོ་མཚོན་རོགས་སྐྱོར་བྱ་རྒྱུ་མཚམས་འཇོག་བྱ་དགོས་པའི་སྐྱོན་བརྗོད་རིམ་པ་བྱས་ཡོད། ལྷག་པར་འདི་ལོའི་ཕྱི་ཟླ་ ༣ པའི་ཟླ་མཇུག་ནས་ཟླ་ ༤ འགོ་སྟོད་བར་ཨ་རིའི་གྲོས་ཚོགས་གོང་མའི་སྐུ་ཚབ་ཚོགས་ཆུང་ཞིག་ཐའེ་ཝན་བདེ་སྲུང་ཆེད་དུ་ཨ་རི་ནས་གོ་མཚོན་ཉོ་རྒྱུ་དང་འབྲེལ་བའི་ཐོག་ལ་ཨ་སྒོར་ཐེར་འབུམ་ ༤༠ སྔོན་རྩིས་གཏན་འབེབས་བྱ་དགོས་པའི་ཤུགས་གནོན་སྤྲོད་ཆེད་ཐའེ་ཝན་ནང་དུ་བསྐྱོད་ཡོད་པ་དེ་ལྟར་ཡང་། ད་དུང་གཏན་འབེབས་ཐུབ་མེད་སྟབས། གནད་དོན་དེ་དང་འབྲེལ་ནས་ཐའེ་ཝན་གཞུང་འཛིན་ Democratic Progressive Party མང་གཙོ་ཡར་ཐོན་ཚོགས་པའི་སྤྱི་ཁྱབ་དྲུང་ཆེ་ Hsu Kuo-yung ཧུས་ཀྱོ་ཡུང་གིས་ Cheng Li-wun ཅེང་ལི་ཝུན་རྒྱ་ནག་ནང་དུ་བསྐྱོད་བཞིན་པ་དང་། ཐའེ་ཝན་གྱི་རྒྱལ་སྲུང་འགྲོ་གྲོན་ལ་གོ་མིན་ཏང་ཆབ་སྲིད་ཚོགས་པས་གྲོས་ཚོགས་ཀྱི་ཆོག་མཆན་མུ་མཐུད་བཀག་འགོག་བྱེད་བཞིན་ཡོད་པར་སྐྱོན་བརྗོད་བྱས་འདུག