དེ་རིང་ཕྱི་ཟླ་ ༡༢ ཕྱི་ཚེས་ ༤ ཉིན་གྱི་སྔ་དྲོ་ཚོུད་ ༡༡།༠༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་རྒྱ་གར་ལྷོ་ཕྱོགས་ཁུལ་དུ་ཆིབས་སྒྱུར་མཛད་སོང། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཕྱི་ཟླ་བཅུ་གཉིས་པའི་ཚེས་
༤ ཉིན་བཞུགས་སྒར་རྒྱལ་བའི་ཕོ་བྲང་ནས་ཆིབས་ཐོན་གྱིས་ Gagal གནམ་ཐང་ནས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིའི་ཕྱོགས་སུ་ཆིབས་སྒྱུར་གནང་ཡོད་པ་དང་། སང་ཕྱི་ཚེས་ ༥ ཉིན་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་ཀྱི་མངའ་སྡེ་ Karnataka འི་གྲོང་ཁྱེར་སྦེང་ལོར་ (Banglore) གྲོང་ཁྱེར་དུ་ཞབས་སོར་འཁོད་གནང་མཛད་རྒྱུ་ཡིན་པ་དང་། ཕྱི་ཚེས་ ༦ དང་། ༧ བཅས་ཉིན་གཉིས་རིང་མངའ་སྡེའི་གྲོང་ཁྱེར་སྦེང་ལོར་དུ་རྒྱ་གར་གི་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་རྒྱུ་སོགས་ཀྱི་མཛད་འཆར་ཡོད་པ་རེད། ཕྱི་ཚེས་ ༨ ཉིན་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཁུལ་གྱི་དགའ་ལྡན་རྣ
མ་པར་རྒྱལ་བའི་གླིང་དུ་ཞབས་སོར་བཀའ་དྲིན་བསྐྱང་ཏེ། དེ་གའི་དགའ་ལྡན་ཁྲི་ཐོག་ཁང་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་མཛད་རྒྱུ་དང་། ཉིན་དགུང་ལྗགས་སྨིན་གྲུབ་རྗེས། མཁའ་ལམ་བརྒྱུད་ཧུན་སུར་རབ་རྒྱས་གླིང་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་ལ་ཕེབས་གནང་མཛད་དེཉིན་བཞིའི་རིང་བཀའ་ཆོས་བཀའ་དྲིན་རྩལ་རྒྱུ་ཡིན་པ་དང་། ཕྱི་ཉིན་ཕྱི་ཚེས་ ༡༤ ཉིན་སྦེལ་ཀོབ་བོད་མིའི་གཞིས་ཆགས་སུ་སེ་ར་ཐེག་ཆེན་གླིང་དུ་ཞབས་སོར་བཀའ་དྲིན་བསྐྱང་གནང་མཛད་དེ་ཕྱི་ཚེས་ ༡༧ བར་བཅས་ཉིན་གྲངས་བཞི་རིང་དེ་གར་སེམས་དང་སྲོག་གི་ཚན་རིག་བགྲོ་གླེང་གི་ཚོགས་མགོན་དུ་བཀྲིན་ཆེན་པས་དབུ་བཞུགས་མཛད་པ་རྒྱུ་རེད་འདུག
དེ་བཞིན་ཚེས་ ༡༨ སྔ་དྲོ་སེ་ར་ཐེག་ཆེན་གླིང་དུ་དད་ལྡན་སེར་སྐྱ་མང་ཚོགས་ལ་ཚེ་དབང་གནང་རྒྱུ་དང་དཔེ་དེབ་དབུ་འབྱེད་སོགས་ཀྱི་མཛད་རིམ་ཁག་ཅིག་བཅས་ལེགས་གྲུབ་ཟིན་རྗེས། སེར་སྨད་ཐོས་བསམ་ནོར་གླིང་གྲ་ཚང་དུ་ཞབས་སོར་འཁོད་གནང་མཛད་པ་དང་ཆབས་ཅིག ཕྱི་ཚེས་ ༡༩ ཉིན་སྔ་ཐོག་བཀྲིས་ལྷུན་པོའི་གཙུག་ལག་ཁང་གསར་པར་དབུ་འབྱེད་ཀྱི་རབ་གནས་གནང་རྒྱུ་མ་ཟད། དེ་ཉིན་ཉིན་རྒྱབ་ནས་ཆོས་འབྲེལ་དབུ་འཛུགས་གནང་རྒྱུའི་མཛད་འཆར་ཞིག་ཀྱང་ཡོད་པ་རེད་འདུག
༸གོང་ས་སྐྱབས་མགོན་ཆེན་པོ་མཆོག་ནས་བཀྲ་ཤིས་ལྷུན་པོར་ཆིབས་བསྒྱུར་དང་འབྲེལ་ཕྱི་ཚེས་ ༢༠ ནས་ ༣༡ བར་ལམ་རིམ་འཁྲིད་ཆེན་བཅོ་བརྒྱད་ཀྱི་གསུང་ཆོས་དང་། བཀའ་གདམས་ཐིག་ལེ་བཅུ་དྲུག་གི་བཀའ་དབང་སྩལ་རྒྱུ་ཡིན་པ་མ་ཟད། ཆོས་འབྲེལ་གྱི་ཉིན་མཐའ་མ་སྟེ། ༢༠༡༦ ལོའི་ཕྱི་ཟླ་ ༡ ཕྱི་ཚེས་ ༡ ཉིན་བྱང་ཆུབ་ལམ་རིམ་ཆེན་མོའི་གསུང་ཆོས་གོ་སྒྲིག་ཚོགས་ཆུང་སོགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུ་དོན་བཞིན་སྐལ་བཟང་གི་བཀའ་སྩལ་བཟང་པོ་སྨིན་སྩལ་ཐོན་དོན་ལྟར་བརྟན་བཞུགས་བསྟར་འབུལ་ཞུ་གནང་རྒྱུ་རེད་འདུག རྒྱ་གར་ལྷོ་ཕྱོགས་ཁུལ་གྱི་ཟླ་བ་གཅིག་ཙམ་གྱི་མཛད་འཆར་ཁག་ལེགས་པར་གྲུབ་རྗེས་༸གོང་ས་མཆོག་ཕྱི་ཟླ་ ༡ ཕྱི་ཚེས་ ༣ ཉིན་སྦེང་ལོར་ནས་བཞུགས་སྒར་དུ་ཆིབས་ཞལ་བསྒྱུར་གནང་མཛད་རྒྱུ་ཡིན་པ་རེད།
