དེ་རིང་ཟླ་ ༩ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ནང་བོད་རྒྱ་འབྲེལ་མོལ་དང་༸གོང་ས་མཆོག་བོད་ལ་གདན་ཞུའི་སྐོར་དང་འབྲེལ་བའི་སྐར་རྟགས་ཅན་གྱི་དྲི་བར་
བཀའ་ལན་གནང་སྐབས། བཀའ་ཤག་ནས་༸གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་འབད་བརྩོན་ཞུ་གལ་ཆེ་ཤོས་སུ་ངོས་འཛིན་གནང་གི་ཡོད་པ་གསུངས་པ་དང་། བོད་རྒྱ་འབྲེལ་མོལ་ཡོང་སླད་འཆར་གཞི་ལྡན་པའི་ཐོག་ནས་སྔར་ལྷག་འབད་བཙོན་གནང་མུས་ཡིན་པ་གསུངས་གནང་སོང་།
རྩ་བའི་དེ་རིང་སྔ་དྲོ་སྤྱི་འཐུས་གྲོས་ཚོགས་ཀྱི་ལས་ཉིན་གཉིས་པ་འདིའི་ཐོག་སྲིད་སྐྱོང་མཆོག་ལ་བོད་རྒྱ་ཞི་མོལ་གྱི་ལམ་ནས་དུས་ཡུན་རིང་པོ་མ་འགོར་བར་བོད་དོན་བདེན་མཐའ་གསལ་ཐུབ་པའི་ཡིད་ཆེས་དང་གདེང་ཚོད་ཡོད་དམ་ཞེས་དང་། དེ་བཞིན་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་འབད་བཙོན་གནང་རྒྱུ་ཡིན་སྐོར་གསུངས་པ་དེ། གནས་གཟིགས་ཙམ་ལ་གོ་བ་ཡིན་ནམ། བོད་དོན་བདེན་མཐའ་གསལ་ནས་བོད་ལ་གདན་འདྲེན་ཞུ་བ་ཞིག་ལ་གོ་བ་ཡིན། ད་ལྟའི་ཆར་གནད་དོན་དེ་ལ་རེ་བ་ཅུང་ཙམ་རེ་གཟིགས་ཀྱི་ཡོད་དམ་ཞེས་སྐར་རྟགས་ཅན་གྱི་དྲི་བ་གཉིས་ཕུལ་སོང་བ་མ་ཟད། དྲི་བ་དེ་དག་དང་དེ་བཞིན་སྲིད་སྐྱོང་མཆོག་གིས་བཀའ་ལན་ལས་འཕྲོད་ནས་སྤྱི་འཐུས་ཁག་ཅིག་གིས་༸གོང་ས་མ
ཆོག་བོད་ལ་གདན་འདྲེན་ཞུ་ཆེད་དང་། འབྲེལ་མོལ་བསྐྱར་མཐུད་ཡོང་སླད་ད་བར་འཛིན་སྐྱོང་གིས་གང་གནང་ཡོད་མེད་དང་། མ་འོངས་པར་འབྲེལ་མོལ་ཡོང་བའི་རེ་བ་གསར་པ་གཟིགས་མིན་དང་རེ་བའི་འབྱུང་གཞི་ཇི་གཟིགས་སོགས་ཀྱི་ཐད་ལ་དཀའ་ཅན་གྱི་བཀའ་འདྲི་མང་དག་ཅིག་ཞུས་ཡོད་པ་རེད།
སྲིད་སྐྱོང་མཆོག་གིས་སྐབས་དེར་བོད་རྒྱ་འབྲེལ་མོལ་ཡོང་མིན་གཙོ་བོ་རྒྱ་གཞུང་གི་འགོ་ཁྲིད་ཚོའི་ཆོད་སེམས་ལ་རག་ལུས་ཡོད་པ་གསུངས་པ་དང་སྦྲགས། བཀའ་ཤག་ནས་དེ་སྔ་བཞིན་དབུ་མའི་ལམ་གྱི་ཐོག་ནས་༸གོང་ས་མཆོག་གི་༸སྐུ་ཚབ་དང་རྒྱ་གཞུང་དབར་འབྲེལ་མོལ་དང་། དེ་རྗེས་ཞི་མོལ་གྱི་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་སུ་འབད་བརྩོན་སྔར་ལྷག་མེད་ནའང་སྔར་ལྟར་གནང་མུས་ཐོག་འབྲེལ་མོལ་བསྐྱར་མཐུད་ཡོང་རྒྱུའི་རེ་བ་གཟིགས་གནང་གི་ཡོད་པ་དེ་ལྟར་ཡང་། བོད་མི་ལྟར་འཚེ་མེད་ཞི་བ་དང་འབྲེལ་མོལ་ཐོག་ནས་འཐབ་རྩོད་གནང་མཁན་གཞན་ཚོའི་རེ་བ་ཁག་གྲུབ་ཡོད་པ་གསུངས་ཡོད་པ་རེད།
ད་དུང་འབྲེལ་མོལ་དང་འབྲེལ་ཏེ་སྤྱི་འཐུས་ཤིག་གིས་ཉིན་ཤས་སྔོན། དེ་སྔའི་༸གོང་ས་མཆོག་གིས་དམིགས་བསལ་༸སྐུ་ཚབ་སྐལ་བཟང་རྒྱལ་ཚོགས་ལགས་ནས་བཀའ་ཤག་ནས་འབྲེལ་
མོལ་ཡོང་རྒྱུར་སྒུག་ནས་མ་བཞུགས་པར་འཆར་གཞི་ལྡན་པའི་ཐོག་ནས་ཕྱག་ལས་གནང་དགོས་གལ་ཡིན་སྐོར་གསུངས་ཡོད་པ་ལུང་འདྲེན་དང་སྦྲགས། ཁོང་གིས་གསུངས་པ་དེ་ལས་བཀའ་ཤག་གི་གྲ་སྒྲིག་དེ་ཙམ་ཡག་པོ་མེད་པར་ཐེ་ཚོམ་བྱུང་གི་ཡོད་པ་བཀའ་འདྲི་ཞུས་པར་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གིས་དམིགས་བསལ་སྐུ་ཚབ་རྣམ་པ་གཉིས་ ༢༠༡༢ ལོ་ནས་རྩ་དགོངས་ཞུས་རྗེས། ཉེ་བའི་ཆར་འཛིན་སྐྱོང་ནས་སྐུ་ཚབ་མེད་པའི་ཐོག་ནས་འབད་བརྩོན་གནང་པའི་གནས་ཚུལ་ཁག་སྐུ་ཚབ་སྐལ་བཟང་རྒྱལ་མཚན་མཆོག་གིས་མཁྱེན་གྱི་མེད་པ་ངོས་འཛིན་གནང་ཡོད་ཅེས་གསུངས་སོང་བ་མ་ཟད། ལྷག་པར་དུ་འཛིན་སྐྱོང་ནས་འབྲེལ་མོལ་ཡོང་སླད་འཆར་གཞི་དང་ལྡན་པའི་ཐོག་ནས་འབད་བཙོན་གནང་མུས་ཐོག་རྒྱབ་སྐྱོར་ཡང་ཐོབ་ཡོད་སྐོར་གསུངས་གནང་སོང།
མུ་མཐུད་དྲི་བ་ཕེབས་པའི་ནང་སྲིད་སྐྱོང་མཆོག་གིས་འབྲེལ་མོལ་ཡོང་མིན་དེ་རྒྱ་གཞུང་གི་ཆོད་སེམས་ལ་རག་ལུས་ཡོད་པ་གསུངས་ན། བཀའ་ཤག་སྐབས་༡༣པའི་སྐབས་འབྲེལ་མོལ་བྱུང་བ་དང་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་སྐབས་༡༤པའི་སྐབས་ལ་འབྲེལ་མོལ་ཡོང་མ་ཐུབ་པར་འཕར་བབ་བྱུང་དགོས་པའི་རྒྱུ་མཚན་གཙོ་བོ་ཇི་ཡིན་བཀའ་འདྲི་ཞུས་སོང་བས། སྐབས་སྲིད་སྐྱོང་མཆོག་གིས་འབྲེལ་མོལ་དེ་བཀའ་ཤག་སྐབས་༡༣རང་ནས་ཆད་ཡོད་པ་བཀའ་ལན་གནང་ཡོད་པ་རེད།
དེ་བཞིན་སྐབས་དེར་སྤྱི་འཐུས་འགས་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་ཐད་སྲིད་སྐྱོང་མཆོག་ནས་
ད་བར་ཐབས་ཤེས་འབད་བཙོན་ཇི་གནང་གསུང་དགོས་སྐོར་བཀའ་འདྲི་ཞུས་པར་སྲིད་སྐྱོང་མཆོག་གིས་མགོན་པོ་མཆོག་བོད་ལ་གདན་འདྲེན་ཞུ་རྒྱུ་དེ་ནི་བོད་མིའི་མངོན་འདོད་ལྟར་འཛིན་སྐྱོང་གིས་འབད་བརྩོན་ཞུ་གལ་ཆེ་ཤོས་སུ་ངོས་འཛིན་གནང་གི་ཡོད་པ་གསུངས་ཡོད།
དེ་རིང་གྲོས་ཚོགས་ཀྱི་ལས་ཉིན་གཉིས་པའི་སྔ་དྲོའི་ཚོགས་ཐུན་སྐབས་གྲོས་ཚོགས་འཐུས་མི་རྣམ་པས་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་སྐོར་དང་། ལྷག་པར་དུ་བོད་རྒྱ་འབྲེལ་མོལ་དང་འབྲེལ་ཆབ་སྲིད་ཀྱི་གནད་དོན་གལ་ཆེའི་སྐོར་ལ་དཀའ་གནད་ཅན་གྱི་དྲི་བ་མང་དག་ཕེབས་ཡོད་སྟབས། སྲིད་སྐྱོང་མཆོག་གིས་བཀའ་ཤག་ནས་བཀའ་ལན་གནང་ཐུབ་པ་དང་ཆོག་པ་ཁག་ཞུས་ཡོད་པ་ལས། འགྲོ་ལུགས་ཀྱི་ཆ་ནས་གནད་དོན་ཆ་ཚང་ཕྱི་གསལ་ནང་གསལ་གནང་ཚེ་ཕན་ལས་གནོད་ཆེ་ཉེན་ཡོད་པ་དཔེ་མཚོན་དང་སྦྲགས་འདི་ལྟར་གསུངས་ཡོད་པ་རེད།
གཞི་རྩ་བའི་ཕྱོ་ལོ་༢༠༠༢ ནས་ ༢༠༡༠ བར་བོད་རྒྱ་འབྲེལ་མོལ་ཐེངས་དགུ་བྱུང་ཡོད་པ་དང་། དེ་ཡང་སྐབས་དེའི་༸གོང་ས་མཆོག་གི་ཨ་རིའི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་དང་ཡོ་རོབ་སྐུ་ཚབ་སྐལ་བཟང་རྒྱལ་མཚན་མཆོག་རྣམ་གཉིས་ནས་སྣེ་འཁྲིད་གནང་ཡོད། འོན་ཀྱང་འདས་པའི་ལོ་ལྔ་ལྷག་ནས་འབྲེལ་མོལ་དེ་ཆད་ནས་བསྐྱར་གསོ་མ་བྱུང་བར་ལྷག་ཡོད་པ་རེད།
